Nipaakseb lay Panangukom ed Abeban Patar na Desisyon
“Saray nasyon . . . ontatdang ira [komon] ed lawak [abeban patar, NW] na Josafat; ta diman onyurong ak naani a mangukom ed saray amin a nasyon.”—JOEL 3:12.
1. Akin a nanenengneng nen Joel iray karaklan a mantitipon ed “abeban patar na desisyon”?
“DAKERAKEL, dakerakel a totoo dia ed lawak na panangigeter [abeban patar na desisyon, NW]”! Nabasa tayo iratan a mabiskeg a salita diad Joel 3:14. Akin a nantitipon irayan ulop? Oneebat si Joel: “Say agew nen Jehova sikato so asingger [la, NW].” Satan so baleg ya agew na kiyalangon nen Jehova—agew a kipaakseb na panangukom to ed dakerakel a totoon angipulisay ed niletneg lan Panarian ed silong nen Kristo Jesus. Asabin siansia, say “apatiran anghel” na Apocalipsis kapitulo 7 so mangibulos la’d pamupuger da ed “apatiran dagem na dalin,” a mansumpal ed “baleg ya irap ed satan, ya anggapo so ontan a nanlapu’d gapo na mundo ya angga ed natan, anggapo, anggapo la naani.”—Apocalipsis 7:1; Mateo 24:21.
2. (a) Akin a matukotukoy a natawag so pasen na pangipaakseban nen Jehova na panangukom to ya “abeban patar na Josafat”? (b) Panon a dugay inkiwas nen Josafat ed silong na panangataki?
2 Diad Joel 3:12, say pasen a pangipaakseban na sayan panangukom so natatawag ya “abeban patar na Josafat.” Matukotukoy, legan na magulon panaon na awaray Juda, impaakseb nen Jehova so panangukom to diman ed biang na maong ya Arin Josafat, a say kabaliksan na ngaran to et “Si Jehova so Ukom.” Lalon natulongan itayo a natalosan so paganigani lan nagawa ed agew tayo diad pangonsidera’d agawa ed satan a panaon. Naromog so rekord diad 2 Awaran kapitulo 20. Diad 2Aw 20 bersikulo 1 na satan a kapitulo, nabasa tayo a “saray anak na Moab, tan saray anak na Ammon, tan pati sikara arum ed saray Ammonita, linma ra a sumpa ed Josafat a mibakal.” Panoy inkiwas nen Josafat? Ginawa toy lawas gagawaen na matoor ya ariripen nen Jehova ed panaoy inkagipit. Sikatoy binmaling ed si Jehova parad panangiwanwan, a masimoon ton impikasi: “O Dios mi, agmora ta ukomen? Ta andian kami na pakapanyari sumpa ed saya a baleg ya ulop ya onsabi a sumpa ed sikami, agmi met amta no anto so gawaen mi, balet saray mata mi wala ra ed sika.”—2 Awaran 20:12.
Eebatan nen Jehova so Pikakasi
3. Antoray imbilin nen Jehova ed Juda sanen inarap day panaglusob na kabangibang a nasyones?
3 Bangta ‘manalalagey so amin a Juda ed arap nen Jehova, pati saray angkelag da, saray asawa ra, tan saray anak da,’ inmebat si Jehova. (2 Awaran 20:13) No panon ya uusaren toy “matoor tan makabat ya aripen” to natan, ontan met say baleg a Dumerengel na pikakasi so angiter na pakayari ed Levitan propeta a si Jahaziel pian iter so ebat To ed saramay nantitipon. (Mateo 24:45) Nabasa tayo: “Onia so kuan nen Jehova ed sikayo, ‘Agkayo antakot nisay napunaw kayo nisengeg ed saya a baleg a karaklan; ta say bakal agyo kayarian, noag ingen kien na Dios. . . . Agyo nakaukolan so mibakal dia ed saya a bakal. Ompasen kayo tan ontanyareg kayo, tan nengnengen yo so panangilaban nen Jehova ed sikayo. . . . Agkayo antakot, nisay napunaw kayo. Nabuas ompaway kayo a sumpa ed sikara; ta si Jehova wala ed sikayo.’”—2 Awaran 20:15-17.
4. Diad anton dalan a kinaukolan nen Jehova so totoo to a man-aktibo, aliwan paspasaray, sano aarapen day angat na kabusol?
4 Mas ni kinaukolan nen Jehova ed si Arin Josafat tan ed totoo to nen say basta panmeneng, a manatalaray mamilagron pakaliktar da. Kaukolan a sikara lay unonan onkiwas ed panalonay angat na kabusol. Say ari tan ‘amin a Juda, pati saray angkelag da, saray asawa ra, tan saray anak da,’ so angipanengneng na mabiskeg a pananisia legan iran situtulok a binmangon ya asaksakbay ed kabuasan tan nanmartsa pian abetey onlulubak a karaklan. Legan na panmamartsa, intuloy na ari ya iter so teokratikon instruksion tan panamaseseg, a sasagyaten iran: “Manisia kayo ed Jehova a Dios yo, dia ed ontan niletneg kayo; manisia kayo ed saray propeta to, dia ed ontan manaligwas kayo.” (2 Awaran 20:20) Pananisia ed si Jehova! Pananisia ed saray propeta to! Nitan lay solusyon ed itatalona. Ontan met natan, legan itayon mantutultuloy ya aktibo ed serbisyo nen Jehova, komon ta agtayon balot panduaruwaan a pambiktoryaen toy pananisia tayo!
5. Panon kaaktibo natan iray Tastasi nen Jehova legan dan dadayewen si Jehova?
5 Singa saray taga-Judea ed agew nen Josafat, nepeg itayon “misalamat [mangidayew, NW] . . . ed Jehova; ta say panangasi to magnayon lawas.” Panon tayon nisaklang iyan panangidayew? Diad maseseg a panangipulong ed Panarian! No panon a saraman a taga-Judea et “ginmapo ra a mankanta tan mangigalang,” ontan met ya aruman tayo so pananisia tayo na saray gawa. (2 Awaran 20:21, 22) On, ipanengneng tayo sirin so mipadparan sankaabigan a pananisia legan a manpaparaan lay Jehova ya onkiwas sumpad kakabusol to! Anggaman say dalan et ompatnag ya andukey, determinado tayo komon a mansungdo, aktibo ed pananisia, a singa gagawaen na mananalon agagi tayo ed magulo iran lugar na dalin natan. Diad arum a daldalin anggaman napapairap lapud panamasegsegang, karawalan, eras, tan pirmin irap ed ekonomya, naeeksperiensia na matoor ya agagi tayo so makatantandan ibubulaslas, a singa ipapanengneng na saray report diad 1998 Yearbook of Jehovah’s Witnesses.
Isasalba nen Jehova so Totoo To
6. Panon a say mabiskeg a pananisia et pansiansiaen to itayon matoor natan?
6 Saray agmaridios a nasyon ed kaliberliber na Juda so analin mangalpong ed totoo na Dios, balet tekep na napanuliranan a pananisia, kinmiwas iray ariripen nen Jehova diad impankakanta na panangidayew to. Nibalikas tayo met so parehon pananisia natan. Diad pamano tayo’d bilay tayo na saray kimey na panangidayew ed si Jehova, napabiskeg tayoy espiritual a kinlong tayo, ya agmakasalet iray masilib a patit nen Satanas. (Efeso 6:11) Getemen na mabiskeg a pananisia so tukson kisuawi ed mabanday a panagligliwaan, materyalismo, tan agpananginenen ya ipapanengneng na sayan manpapanabos a mundo ed kaliberliber tayo. Sayan agnatalon pananisia so mamasiansia ed sikatayon sitotoor a manlingkor a kaibay “matoor tan makabat ya aripen” legan itayon mantutultuloy a mamangan na espiritual a tagano a nitatarya “ed panaon a kinepeg to.”—Mateo 24:45.
7. Panon so inkiwas na Tastasi nen Jehova ed nanduruman panangataki sumpad sikara?
7 Say nibase’d-Biblian pananisia tayo so mamabiskeg ed sikatayo ya ontalindeg a malet sumpad gula iran kampanya ya idadagdag na saramay mangipapatnag na espiritu na “mauges ya aripen” ed Mateo 24:48-51. Diad panusumpal ed sayan propesiya ed makatantandan paraan, saray apostata so aktibon mangitatanem na katilaan tan propaganda ed dakel a daldalin natan, a minununong ni ingen ed arum a walad posisyon na autoridad ed limog na nasyones. Inerman a matukoy, saray Tastasi nen Jehova so kinmiwas la, a singa adeskribe diad Filipos 1:7, ‘anggan dia ed panagyagel tan panamatua ed ebanghelyo.’ Alimbawa, nen Setyembre 26, 1996, diad sakey a kaso ed Gresya, say siameran huis na European Court of Human Rights, diad Strasbourg, so nanpepekderan dan “saray Tastasi nen Jehova so napisakup ed deskripsion a ‘kabat a relihyon,’” a walaan na kanepegan a panggayagaan so kawayangan ed nonot, konsiensia, tan sisiaen, tan say kanepegan a mangipakabat ed pananisia ra. Nipaakar ed saray apostata, kuan na panangukom na Dios: “Bangbalet agawa ed sikara so peteg ya uliran: ‘Say aso pinawil to so uta to lamet, tan say kaong a naurasan nantiblak lamet.’”—2 Pedro 2:22.
8. Diad agew nen Josafat, panon ya impaakseb nen Jehova so panangukom to’d saray kabusol na totoo To?
8 Diad agew nen Josafat, impaakseb nen Jehova so panangukom sumpad saramay labay dan pasakitay totoo To. Nabasa tayo: “Si Jehova angipasen na saray saneb sumpa ed saray anak nen Ammon, Moab, tan palandey Seir, a sumpa ed Juda; et sikara so akabil. Ta saray anak nen Ammon tan Moab inmalagey ira sumpa ed saray manaayam ed palandey Seir, pian pateyen tan bagbagen da ra a sigpot; et sanen asumpal da ya inupot so saray manaayam ed Seir, balang sakey tinmulong a mamagbag ed sananey.” (2 Awaran 20:22, 23) Tinawag na saray taga-Judea iman a pasen ya Abeban Patar na Beraca, say Beraca et kabaliksan toy “Bendision.” Diad modernon panaon met, say panangipaakseb nen Jehova na panangukom to ed kakabusol so mansumpal ed kabendisionan na mismon totoo to.
9, 10. Sioparay angipanengneng la a makanepegay pirmin panangukom nen Jehova?
9 Nitepet tayo, Siopa ed modernon panaon so mangawat na pirmin panangukom nen Jehova? Pian naamtaay ebat ed satan a tepet, pawilen tayoy propesiya nen Joel. Sasaglawien na Joel 3:3 so arum ed kakabusol na totoo to ya “insalat da so sakey ya ugaw a laki ed sakey a balangkantis, tan inlako ra so sakey ya ugaw a bii ed alak.” On, momoriaen day ariripen na Dios bilang abebbeba, saray anak da et mankantidad na bayar na balangkantis odino bili na sakey a buyog na alak. Eebatan da itan.
10 Manepeg met labat ed kaukom iramay mibabali ed espiritual a panagbalangkantis. (Apocalipsis 17:3-6) Tan nagkalalo lan natetel et saramay manusugsog ed politiko iran pakayari a pasegsegangen so Tastasi nen Jehova tan amperen so aktibidad da, a singa gagawaen na pigaran manamasagyat a pangkat a relihyoson lider diad Mamabukig a Europa ed agano ni. Ipapanengneng nen Jehova so determinasyon ton onkiwas sumpad saratan a komikimey na kaugsan.—Joel 3:4-8.
“Iparaan Yo so Bakal!”
11. Panon nen Jehova ya aangaten iray kabusol to a mibakal?
11 Insan, tatawagen nen Jehova so totoo to ya iyabawag da iyan angat ed limog na saray nasyon: “Iparaan yo so bakal! Liingen yo so saray mabayani a lalaki! Amin so saray lalaki a mibabakal onasingger ira komon, ondago ra komon!” (Joel 3:9) Deklarasyon iya na nikadkaduman pibabakal—matunong a pibabakal. Onsasaral iray matoor a Tastasi nen Jehova ed espiritual iran ayura legan ya aarapen day tilan propaganda, a susuppiatey katilaan panamegley na katuaan. (2 Corinto 10:4; Efeso 6:17) Agmanbayag, pasantosen na Dios so “bakal na baleg ya agew na Dios, a Makapanyarin amin.” (Apocalipsis 16:14) Punasen na satan ed dalin so amin ya onsusumpa ed inkasoberano na Dios. Saray totoo to ed dalin ed satan so agmibali diad pisikal. Diad literal tan piguratibon paraan, ‘pipitpiten da so saray kampilan da a pagmaliwen da a dingding na lukoy, tan saray gayang da a komkompay.’ (Isaias 2:4) Diad pidumaan, aangaten nen Jehova iray manlalaban a nasyon pian gawaen so kasunian: “Pitpiten yo so tarem na saray lukoy yo a gawaen a kampilan, ta saray kalawit yo a gayagayang.” (Joel 3:10) Iimbitaan toran ipaway da lan amin iray armas da. Balet ta sikaray ag-ontalona, lapud say bakal tan pambiktorya et kien nen Jehova!
12, 13. (a) Anggaman angangga lay Cold War, panon a nipapanengneng na dakel nin nasyon a sikaray mahilig ed bakal? (b) Antoy agni aparaanan na nasyones?
12 Diad asasakbay a dekaday 1990, indeklara na saray nasyon ya asumpal lay Cold War. Nisesengeg ed satan, kasin nadadampot la na Nasyones Unidas so manunan kalat ton kareenan tan kaligenan? Andin balot! Antoy ibabaga ed sikatayo na agano niran agawgawa ed Burundi, say Demokratikon Republika na Congo, Iraq, Liberia, Rwanda, Somalia, tan say datin Yugoslavia? Diad saray salita na Jeremias 6:14, kuanda, “‘Deen, deen!’ Anta anggapo so deen!”
13 Anggaman say parungtalan a panbabakal so tinmunda la ed pigaran pasen, siansian manlalaslasan iray membron nasyon na NU ed pamapawala na lalon pinaaligwas iran ayura ed bakal. Itutultuloy na arum a mantinien iray akasimpen a nuklear ya ayura. Bangta say arum et mamapawala ra na kemikal odino bakteriolohiya iran ayura a palanit so panagderal da. Legan a mandaragup iraman a nasyones ed simbolikon lugar a tatawagen ya Armagedon, aangaten tora: “Saray makapuy ikuanda komon, ‘Mabiskeg ak.’ Mangganat kayo, et dago kayo, sikayo ya amin a nasyon ed liberliber, tan mandaragup kayo.” Insan insalet nen Joel so dilin apelo to: “Diman palasuren mo so saray mabayanim, O Jehova.”—Joel 3:10, 11.
Proproteksionan nen Jehova so Kien To
14. Sioparay mabayani nen Jehova?
14 Sioparay mabayani nen Jehova? Say tuan Dios so atawag a “Jehova na saray ehersito,” a 280 danay diad Biblia. (2 Arari 3:14) Sarayan ehersito so anghelikon sundalo ed tawen a lawas akaparaan a manumpal ed pagawa nen Jehova ed sikara. Sanen sinalin erelen na saray Siriano si Eliseo, diad kaunoran et nilukasan nen Jehova so kamataan na ayudante nen Eliseo ta pian nanengneng to no akin ya ag-ira ontalona: “Nia, say palandey napno ed saray kabayo tan saray luganan ya apuy ed liberliber nen Eliseo.” (2 Arari 6:17) Inkuan nen Jesus a nakerew to ed Ama to so “masulok a labinduan lehion na angeles.” (Mateo 26:53) Diad panideskribe’d inkabayo nen Jesus pian ipaakseb so panangukom diad Armagedon, oniay ibabaga na Apocalipsis: “Saray ehersitos a wala ed tawen sikato so tutumboken da a sikakabayo ra na amputi, sikakawes na pino a lienzo ya amputi tan malinew. Tan dia ed sangi to ompapaway so sakey a kampilan a makdem pian sikato so panuga’to ed saray nasyones; et sikara so uleyan to ed sakey a tayukor a balatyang; et sikato igatin to so darapilan na alak na petang tan say sanok na Dios a Makapanyarin-amin.” (Apocalipsis 19:14, 15) Satan a simbolikon darapilan na alak so adeskribe ed malinew iran termino bilang say “baleg a darapilan na alak na sanok na Dios.”—Apocalipsis 14:17-20.
15. Panon so panideskribe nen Joel ed bakal nen Jehova sumpad saray nasyon?
15 Panon, sirin, ya ebatan nen Jehova so kerew nen Joel pian itarok iray dilin mabayani na Dios? Diad sarayan manangiyilustran salita: “Saray nasyon onliing ira komon, tan ontatdang ira ed lawak na Josafat; ta diman onyurong ak naani a mangukom ed saray amin a nasyon ed liberliber. Yan yo so kompay; ta say anien aluto la: Dago kayo, onggatin-gatin kayo; ta say panagpespesan na alak napno, saray samang manlepwas ira; ta say inkauges da sikato so baleg. Dakerakel, dakerakel a totoo dia ed lawak na panangigeter! Ta say agew nen Jehova sikato so asingger ed lawak na panangigeter. Say banwa tan say bulan onkuyep ira, ta saray bitewen isiblet da so pansinag da. Et si Jehova manungol naani a manlapud ed Sion, tan ibesngaw to naani so bosis to a manlapu ed Jerusalem; et saray tawen tan say dalin onyegyeg ira naani.”—Joel 3:12-16.
16. Sioparay napilaktip ed saramay pangipaakseban nen Jehova na panangukom?
16 No panon kaseguradoy kabaliksan na ngaran nen Josafat a “Si Jehova so Ukom,” ontan met kaseguradoy Dios tayo, a Jehova, a sigpot ton iyalangon so inkasoberano to sano ipaakseb toy panangukom. Dedeskribien na sayan propesiya iramay mangawat na pirmin panangukom bilang ‘karaklan, karaklan diad abeban patar na desisyon.’ Siopaman niran atilak a mangitatandoro ed palson relihyon so napibilang ed saraman a karaklan. Kalaktip met iramay adeskribe diad komaduan Salmo—saray nasyon, saray totoo, saray arari dalin, tan saray manuley—a mas malabay ed abulok a sistema na sayan mundo imbes a say ‘panlingkor ed si Jehova tekep na takot.’ Agda labay ya ‘angoban so Anak.’ (Salmo 2:1, 2, 11, 12) Agda bibidbiren si Jesus bilang kaiba nen Jehova ya Ari. Sakey ni, saray karaklan ya amarkaan parad kadederal so mangilaktip ed amin a totoon ukomen na maglorian Ari bilang “saray kanding.” (Mateo 25:33, 41) Diad aturon panaon nen Jehova pian onaglem manlapud mangatatawen a Jerusalem, say tinuro ton Ari na arari so onkabayo pian mangipaakseb ed satan a panangukom. Say tawen tan dalin so petepeteg a nayegyeg! Balet, apaseguroan itayo: ‘Si Jehova so magmaliw a salimbeng parad totoo to, tan ilang ed ananak na Israel.’—Joel 3:16.
17, 18. Sioparay nipapaamta bilang akaliktar ed baleg ya irap, tan antoran kipapasen so panggayagaan da?
17 Ipapaamta na Apocalipsis 7:9-17 iramay makaliktar ed baleg ya irap bilang “baleg ya ulop” a tugyopen na saramay mangaagamil na pananisia ed mananondon a pakayari na dala nen Jesus. Saraya so naprotektaan ed agew nen Jehova, bangta say ondaragsan ulop ed propesiya nen Joel so mangarap ed pirmin panangukom. Kuan nen Joel ed saray akaliktar: “Dia ed ontan naamtaan yo naani a siak si Jehova a Dios yo, a manayamak dia ed Sion a masanto a palandey ko,”—say mangatatawen ya ayaman nen Jehova.—Joel 3:17a.
18 Diad ontan et ipapaamta ed sikatayo na propesiya a say sakop na mangatatawen a Panarian na Dios et “masantos naani tan anggapo la so saray sankaili ya onlabas ed sikato.” (Joel 3:17b) Diad tawen tan ed mangaraldalin a nasasakopan na satan a mangatatawen a Panarian, anggaporay sangkaili, ta amin so mankakasakey ed puron panagdayew.
19. Panoy impaneskribe nen Joel ed malaparaison liket na totoo na Dios natan?
19 Anggan natan et naromog lay daakan a kareenan ed limog na totoo nen Jehova diad dalin. Nankakasakey dan iyaabawag iray panangukom to ed masulok a 230 daldalin tan ed masulok a 300 a nanduruman lenguahe. Sayan inkabulaslas so marakdakep ya impropesiya nen Joel: “Nagawa naani dia ed satan ya agew, a saray palandey mantedter ira naani na masamit ya alak, tan saray pukdol panagusen da naani so gatas, tan saray amin a kulos na Juda panagusan ira naani na danum.” (Joel 3:18) On, ituloy nen Jehova ya ikalbo ed saray manangidayew to ed dalin so daakan a magayagan bendision tan inkaaligwas tan ondaraak ya agus na mabli iran katuaan. Say inkasoberano nen Jehova ed satan so sigpot a niyalangon diad abeban patar na desisyon, tan say gayaga so onleppua legan a sikatoy manaayam a maando ed limog na adondon a totoo to.—Apocalipsis 21:3, 4.
Kasin Nanonotan Yo?
◻ Panon ya inlegyas nen Jehova so totoo to ed saray agew nen Josafat?
◻ Siopay ukomen nen Jehova a makanepegay kadederal diad “abeban patar na desisyon”?
◻ Sioparay mabayani na Dios tan antoy betang da ed pinal a panlalaban?
◻ Antoran liket so panggagayagaan natan na saray matoor a managdayew?
[Litrato ed pahina 21]
Nibaga ed Juda: ‘Agka ontakot ta say bakal et agmo kayarian noagta kien na Dios’
[Litrato ed pahina 23]
Aangaten nen Jehova iray kabusol to a ‘pitpiten daray tarem na lukoy da pian gawaen a kampilan’
[Litrato ed pahina 24]
Ipapaamta na Biblia so baleg ya ulop na saray makaliktar ed baleg ya irap