Siaanos a Manalagar

SAY managpastol a ludlurey ton inulit-ulit ya inkelyaw so “Lobo!” anta anggapo met manayay lobo et agla ingen tinalineng so tinmumbok ya ikekerew toy tulong. Mipadpara natan, dakel so mangibabaliwala ed kinaasingger la na agew nen Jehova lapud aminpigapiga la ran akadngel na pasakbay a palso met manaya. Say bengatlan dakerakel so onsasaew a manebek no dinan so tuan pasakbay insan talinengen itan so pangaanamotan na baleg a kabusol na Dios, si Satanas, say palson “anghel na liwawa.”​—2 Corinto 11:14.

Mapeligro so agpangingalngalep ya awawey anggan diad saramay abayag lan manlilingkor ed si Jehova. Akin? Nonoten so pasakbay nen apostol Pedro nen inmunan siglo.

Isipen a Malinlinew

Say komaduan apuyanan a sulat nen Pedro et panonot ed inmuunan Kristianos, tan ed sikatayo met. “Inararok ira,” so insulat to, “gawaen ko so saya natan a komaduan sulat ed sikayo, tan diad sikara a dua liingen ko so malinis a kanonotan yo lapud pangipasen ko’d sikayo ed pakanonotan.” (2 Pedro 3:1) Antoy basiyan nen Pedro nipaakar ed sayan kapagaan? Ipapabitar nen Pedro so kiwawala na saray managludlurey a say panaglurey da et mamapakapuy ed nakakaukolan a liknaan na inkaganatan nipaakar ed panaon a pambibilayan na ariripen na Dios. Natan la so panaon a manalwar a napalikdo na saray managkantiaw. Kanian papasesegen nen Pedro iray managbasa to a ‘nonoten iray salita ya imbalikas nen saman na saray masantos a propeta.’ (2 Pedro 3:2; Gawa 3:22, 23) Anto tay imbaga na saray propeta?

Say matoor ya ariripen na Dios so aminpigapiga lan angipaimano ed no panon ya itarok na madibinon panangukom so anggaan na karelmengan. Papanonotan nen Pedro iray managbasa to nipaakar ed Delap ed agew nen Noe ya inusar na Dios bilang paraan ya onsalet sanen napno so dalin na kaugsan. Saman a maples a Delubio so epektibon amanampot ed mundo ed saman a panaon. Balet inliktar na Dios si Noe tan say pamilya to diad sakey a biong a kaibay representasyon na mabilay iran pinalsa “ed amin a laman.” Say inkalapagan iran alamat so manestigo ed inkamatua na Biblikon salaysay.a​—Genesis 6:19; 2 Pedro 3:5, 6.

Tinawag nen Pedro so madibinon isasalet a ‘nalilingwanan a sakey a bengatla’ na arum a totoo. Say arum et nampareen ed agpangingalngalep na saray managludlurey ed saman. Balet, nepeg a sikatayo so agbalot mangililingwan ed agawaan la nen Jehova. Ibabaga nen Pedro ed sikatayo: “Saray tawen a wala natan, tan say dalin, impansiansia ra na dilin salitan niatol ya onkana ed apuy ed agew na panangukom, tan dia ed kaderal na saray mangaruksan totoo.” (2 Pedro 3:7) On, nagawa lamet so madibinon isasalet.

Agmatantan so Dios

Milenyon panaon lay linmabas. Akin a pinabayag ni na Dios so panolbar to ed saray problema na katooan? Lamet, ipapaimano nen Pedro so sananey a katuaan. Inkuanto: “Inarok ira, agyo lilingwanan so sakey a bengatla, a say sanagew dia ed arap na Katawan singa sanlibon taon, tan say sanlibo a taon singa sanagew.” (2 Pedro 3:8) Midumaay panmoria nen Jehova ed panaon ed panmoria tayo. Parad magnayon a Dios, say peryodo manlapud inkapalsa nen Adan anggad natan et anggapo ni ingey sakey simba. Balet antokaman so panmoria tayo ed panaon, kada milenyo tan kada agew ya onlalabas et iyaasingger to itayo’d pakakasumpal na gagala nen Jehova.

“Say banbantayan a banga agbalot onluag” so diparan a mangipapakabaliksan a no diman aalagaren et diman ombabayag so pakagawa to. Balet, say irerekomenda nen Pedro et “panalagar tan panpilalek . . . ed isabi na agew na Dios.” (2 Pedro 3:12) Panon tayon nabayuboan so mental ya awawey a mamasiansia ed sikatayon alerto ed asingsingger lan madibinon isasalet?

Mas Epektibo Iray Kiwas nen Saray Salita

Iyaapasakey nen Pedro so imano ed saray gawa tan kiwas. Tinukoy toy “masanto iran kiwas na kondukta” pati “saray gawa na maridios a debosyon.” (2 Pedro 3:11, NW) Antoy sasaglawien na saraya?

Say tudtuan aripen na Dios so onkikiwas ed paraan a mamapaliket ed Sikato. Say pananisia na ontan a tuan managdayew so nisisindag ed kondukta to. Saya so mangibiig ed sikato manlapud saramay mangibabagan panisiaan day Dios tan saray sipan to. Anganko et naiimano yon say mapublikon panagministro na Tastasi nen Jehova so mangiduduma ed sikara. Sikaray ondadalaw ed ayaman yo ta pian ipaimano daray sipan na Dios a nidatak ed Biblia. Balet ta sikara met so mantatasi nipaakar ed saray ilalo tan sisiaen da inermay pakaabetan da ed totoo.

Say Tasin okupadon mangidedeklara’d pananisia to ed arum et napapaelet tan napapabiskeg iray sisiaen to. Say panangibalikas so mamapaaralem ed impresyon tan kabansag to et mangitatarok na akindalem a gayaga tan inkakontento. Sano iyaabawag tayo so maong a balita na Panarian na Dios, napapaliket tayo met si Jehova. Amta tayo a sikato so ‘aliwan agmatunong pian lingwanan toy gawa tan aro ya impanengneng tayo parad ngaran to,’ unong ya indeklara na kaapostolan nen Pedro a si Pablo.​—Hebreos 6:10; Roma 10:9, 10.

Antoy resulta na sayan panpapaga ed panangilaknab ed maong a balita na Panarian legan na sarayan kaunoran ya agew na sayan peles a marelmeng a sistema? Nilasus nilibo a matuan-impanpuson totoo so makakaaral no panon a paapitey pakapisiglaotan ed si Jehova, pian nagunggunaan manlapud agkanepegan a panangasi to tan naromog so tuan liket diad ilalon magnayon a bilay ed paraison dalin.

Pikakabat lan Akauna

Anggaman amta tayon manlapud Biblia a si Jehova a Dios so onsalet diad dugan panaon to, kaukolan tayon talinengen so kaaruman nin impasakbay nen Pedro. “Diad pikakabat ed sarayan bengatla alwaran yo ompan, dia ed kasagyat yo ed lingo na saray mangarumsis a totoo napelag kayo ed satan a kaligenan yo.”​—2 Pedro 3:17.

Seguradon amta la nen Jehova ya arum ya andiay mabiskeg a pananisia so nadismaya lapud singa pakababaya na madibinon isasalet. Amta to met a say impluensia na agmaridios a totoo so maneral ed tuan ariripen to odino, ompan, onkapuy so sisiaen da a say kapasantos na ngaran na Dios et asingger la. Agaylan makapasinagem so kapelag manlapud inka-agnagiing ed sarayan kaunoran ya agew!

Aliwan panaon natan na panisip ed panduaruwa odino agpakaseguro nipaakar ed gawaen nen Jehova. (Hebreos 12:1) Imbes, natan la so panaon ya ombulaslas ed apresasyon ed nitarok la na inkaanos nen Jehova​—say ilalon kisalba na minilyon a magmamaliw a kabiangan na internasyonal a baleg ya ulop tan manatalaran ed arapen a pakaliktar ed onsasabin baleg a kairapan. (Apocalipsis 7:9, 14) Isisimbawa nen Pedro: “Noag ingen ombuna kayo komon ed grasya tan pikakabat ed Katawan tan Manangilaban tayo a Jesu-Kristo. Dia ed sikato komon so gloria natan tan andi anggaan.”​—2 Pedro 3:18.

“Mansiansia Kayo ed Panangaro na Dios”

Diad pagmaliw ya okupado ed panangipulong na Panarian tan regular ya iyaatendi ed saray Kristianon miting parad panagdayew tan panagaral ed Salitay Dios so manalimbeng ed sikatayo. Sirin, andian itayo na panaon a magmaliw a masyadon mapaga ed ompapalalo iran kipapasen na marelmeng a sistema natan. Saray takot tan kapagaan so kaukolan ya agmandomina ed bilay na tuan Kristianos. (1 Corinto 15:58) No mas okupado itayo ed panaglingkor ed si Jehova, mas maples so ilalabas na panaon.

Si Judas, a kapanaonan nen Pedro tan agi’d ina nen Jesus, so manisimbawa ed sikatayo: “Sikayo, inararo, ipaalagey yo so inkasikayo ed sankasantosan a pananisia, a manpipikasi kayo ed espiritu santo, mansiansia kayo ed panangaro na Dios, tan manalagar kayo ed panangasi na Katawan tayo a Jesu-Kristo ya onkana ed bilay ya andi angga.” (Judas 20, 21) Imanoen pay kaimportantian na positibon awawey a nababayuboan diad pantultuloy ed pikakasi. (1 Tesalonica 5:17) Insan inyarum nen Judas: “Diad saray arum walaan kayo na panangasi, a wala ra’d panduaruwa. Ilaban yo ra balet so arum, dia ed panamsam yo ed sikara ed apuy; tan dia ed arum walaan kayoy panangasi a katekep na takot; tan busolen yo so pati kawes ya atilolan na laman.” (Judas 22, 23) Agaylan makana so pampapabiskegan legan na sarayan mairap a panaon! Tan agaylan importanti so agpakatukso, ya uusaren iyan ninatnat ya ‘agew na kilalaban’ bilang baraan parad ‘malukak a kondukta,’ a kasmak a tuloy natan ed abulok ed moral a mundo ed panaon tayo.​—Judas 4; 2 Corinto 6:1, 2.

Diad italineng ed maaron simbawa nen Pedro, Pablo, tan Judas tan diad pagmaliw ya okupado tan aktibo ed serbisyo na Dios, siaanos kan makapanalagar ed isasalet nen Jehova. Balet gawaen mo ta?

Agmasuyat a mitongtong ed Tastasi ed lugar mo parad tulong pian pabiskegen so pananisiam ed isisipan na Manamalsa ya andi-anggaan a bilay. Aralen so kakaukolanen pian onkualipikan mibiang ed sayan aglan-balot-naulit a sankagloboan a panagpulong a manampot diad manasingger a baleg a kairapan. (Marcos 13:10) Diad ontan et nawalaan ka na ilalon manbilay ed balon mundo na inkatunong ya isisipan nen Jehova. (2 Pedro 3:13) Talinengen iray panonot to! Siaanos a manalagar! Magmaliw ya okupado!

[Paimano ed leksab]

[Litrato ed pahina 7]

Aralen la natan so nipaakar ed saray sipan na Dios a Paraiso

[Picture Credit Line ed pahina 5]

Lobo: Animals/Jim Harter/Dover Publications, Inc.; ugaw nin pumapastol: Children: A Pictorial Archive from Nineteenth-Century Sources/Grafton/Dover Publications, Inc.