Report na Saray Manangiyabawag na Panarian
Anamoten so Amin a Pankanawnawa
KABKABAT iray Tastasi nen Jehova ed sankamundoan lapud edukasyonal a kimey da nipaakar ed Biblia. Balet ta sikara met so mangikokondukta na saray programan mangitatarok na arum niran gungguna ed sosyedad. Sayan serbisyo publiko so naaawat a tuloy, a singa ipapanengneng na onggendan iran eksperiensia manlapud Ecuador.
◻ Saray manangipakurang na baleg a pabrikay salming so malabay a mangorganisa na pigaran lektyur nipaakar ed pankaabigay pamilya parad saray impleado ra. Say direktor na human resources so angimbita na pigaran Katolikon pari pian mibiang balet ta anggapoy ebat. Inkuan ed sikato na sakey a pari a pigpigaran pari so kualipikadon makapangipaliwawa ed ontan a tema ta maseguron anggapoy anggan sakey a naala. Diad impakabalita ed saya, kinatongtong na sakey a Tasin impleado so sakey ya agin laki a mabetbet a mankikimey ed saray panagnegosyoan a teritorya ya ombisita ed pabrika.
Diad mismon tinmumbok ya agew, inasinggeran na Tasi so direktor na human resources tekep na proponin panagaral. Sakey a listaan na saray tema so inala manlapud nanduruman palapagan na Watch Tower Society. Asagyat so direktor. Pinili toy taloran tema parad tongtongan—relasyon ed too, saray etika ed trabaho, tan saray etika ed pamilya. Diad ontan et niyaregloy pangonsidera ed impormasyon a kaibay amin a trabahador.
Saray impleado so inapag ed pitoran grupo a tunggal 30, insan imparungtal na taloran kualipikadon agagin lalaki so impormasyon ed sikara. Antoray resulta? Dakel ya impleado so kinmerew a pabisita ed saray ayaman da, tan 216 a katulongan ed panagaral na Biblia so nipalima. Saray manangipakurang so asagyat a tuloy a kinerew da no makapangiparaan ni iray Tastasi na sananey lamet iran serye na diskurso.
◻ Agano ni, angipaway so Ecuador na ley a mangiyaabuloy ed kibangat na relihyon ed eskuelaan. Sakey a misionira so dinmalaw ed biin superintendent na eskuelaan na elementarya tan kinomusta toy kina-epektibo na balon ley. Impaliwawa na superintendent a sinali ran inggapo so sakey a programa nipaakar ed panagdayew ed si Maria balet ta anggapon balot so nansumpalan to. Sanen impaimano na agin bii a say ontan a panagdayew et mamawalay problema parad aliwan-Katolikon ugugaw, inmabobon so superintendent. “Anggaman ontan,” inkuan na misionira, “walaan kami na programa parad panangibangat ed moral iran prinsipyo manlapud Biblia ya agto obligaey toon awaten so sakey a relihyon.” Inmebat so superintendent: “Kapigay pakaonlam dia ey? Nabuas a sakey?” Kayarin impanengneng na misionira ed sikato so libron Listening to the Great Teacher, denesiden singbaten day kapitulon “Happy Are the Peaceable.”
Diad impawil to, say misionira so angusar na taloran oras diad impanbibisita ed pitoran nanduruman panklaklasian a mandengdengel so superintendent. Kayari sesyon ed komaliman-grado a klase, inkuan na sakey ed saray eskuela: “Miss, ipangasi yon seguroen a bisitaen so komanem a grado. Naynay da kamin sasakitan tan mangigagapoy laban!” Inkuan na sakey a maestra: “Say karawalan so sakey ya importantin tema. Kaukolan tayo ni malaglaem ya oras ya isingbat iyan pamaakaran.”
Inyuksoy so panagpawil ed eskuelaan pian singbaten iray teman singa katutulok tan panagtila. Diad kaplesan, makapenek iray resulta. Natan sano manaakar so misionira ed lansangan, mankibatiktik iray ugugaw a mangibano tan mantepet ed sikato nipaakar ed Biblia. Arum et sikatoy sikikinon dan inkabat ed atateng da. Niarum ni, nigapoy sakey a panagaral na Biblia ed duaran eskuela.