Aapresiaen Mo ta so Organisasyon nen Jehova?
“Onia so kuan nen Jehova, ‘Say tawen sikato so tronok, et say dalin sikato so gagatinan na saray salik.’”—ISAIAS 66:1.
1, 2. (a) Antoy niturom a nanengneng a paneknek ed organisasyon nen Jehova? (b) Iner so panaayaman nen Jehova?
SISIAEN mo ta a walay organisasyon nen Jehova? No ontan, akin a panisiaan mo? Nayarin iyebat mo: ‘Bueno, walaan kami na Kingdom Hall. Walaan kami met na organisadon maong a kongregasyon tekep na ulop na mamatatken. Walaan kami na talagan aturon manangasikaso na sirkito a maparanay ya ombibisita ed sikami. Organisado iran asamblea tan kombension so aatendian mi. Walaan kami na sangan opisina na Watch Tower Society ed bansa mi. Maseguro, sayan amin tan dakel ni so mamaneknek a si Jehova et walaan na onkukurang ya organisasyon.’
2 Saratan a pabitar so misimbangan lan paneknek a walay organisasyon. Balet no say nanenengneng tan bibidbiren tayo labat et say wadiad dalin, andian itayo na nagnap a pakatalos ed organisasyon nen Jehova. Imbaga nen Jehova ed si Isaias a say dalin so gagatinan To lambengat, balet say katawenan so trono To. (Isaias 66:1) Dinan a ‘katawenan’ so tutukoyen nen Jehova? Say atmospera tayo? Say liwang? Odino sakey nin kipapasey bilay? Sinalambit nen Isaias so ‘panagayaman na inkasanto tan gloria’ nen Jehova, tan deneskribe na salmista irayan katawenan bilang “panagayaman to.” Kanian, say ‘katawenan’ ed Isaias 66:1 et tutukoyen toy agnanengneng a pasen na saray espiritu ya ookupaan nen Jehova so supremo, odino sankatagyan, a posisyon.—Isaias 63:15; Salmo 33:13, 14.
3. Panon tayon natalonaan iray panduaruwa?
3 Kanian, no talagan labay tayon namoria tan natalosan so organisasyon nen Jehova, nepeg itayon onnengneng ed katawenan. Tan ditan so kawalaay problema na arum. Lapud agnanengneng so mangatatawen ya organisasyon nen Jehova, panon tayon amta a talagan wala itan? Naeksperiensia ni ingen na arum so peryodoy agpakaseguro, a manuumameng, ‘Panon tayon makaseguro?’ Bueno, panon a natalonaay pananisia so panduaruwa? Say duaran manunan paraan et say pirmin personal a panagaral na Salitay Dios tan regular ya iyaatendi tan pibibiang ed saray Kristianon miting. Insan napaandi tayo’d satan iray panduaruwa tayo diad liwaway katuaan. Walaray ariripen met na Dios a nanduaruwa. Konsideraen tayo pay kaso na aripen nen Eliseo sanen nisilong so Israel ed panangatakiy ari na Sirya.—Ikompara so Juan 20:24-29; Santiago 1:5-8.
Sakey ya Akanengneng ed Mangatatawen ya Ehersitos
4, 5. (a) Antoy problema na aripen nen Eliseo? (b) Panon ya inebatan nen Jehova so pikakasi nen Eliseo?
4 Imbaki na ari na Sirya so baleg a puersay militar ed Dotan diad labi ta pian ereley Eliseo. Sanen abangon ya asaksakbay ed kaimbuasan tan pinmaway so aripen nen Eliseo, anganko ta pian makasungap na preskon dagem ed toktok na panaayaman da ed Kapegleyan a Bukig, ni, alay inkabigla to! Aliber la so baley na ulop na armadan taga-Sirya ya akakabayo tan akakarwahe parad bakal, a manalagar ed pangerel ed propeta na Dios. Kinmelyaw so aripen ed si Eliseo: “Abagey, katawan ko! Panon so gawaen tayo?” Mapatnag, kalmado tan tekep na kombiksion, ya inmebat si Eliseo: “Agka antakot; ta saray wala ed sikatayo sikara so dakdakel nen saray wala ed sikara.” Maseguron nanumameng so aripen, ‘Iner so kawalaan da? Anggapoy nanenengneng ko!’ No maminsan et nayarin ontan met so problema tayo—say agpakanengneng tekep na saray mata na pakatalos tayo, odino pakamoria, ed mangatatawen ya ehersitos.—2 Arari 6:8-16; Efeso 1:18.
5 Impikasi nen Eliseo so kilukas na saray mata na aripen to. Antoy tinmumbok ya agawa? “Si Jehova nilukasan to so saray mata na tobonbalo a laki; et anengneng to; et, nia! say palandey napno ed saray kabayo tan saray luganan ya apuy ed liberliber nen Eliseo.” (2 Arari 6:17) On, anengneng toy mangatatawen ya ehersitos, anghelikon armadan akaparaan a manalimbeng ed aripen na Dios. Diad saman et atalosan to lay inkakompiyansa nen Eliseo.
6. Panon tayon makaalay aralem a pakatalos ed mangatatawen ya organisasyon nen Jehova?
6 Kasin no maminsan et problema tayo met so pakamoria a singa ed samay aripen nen Eliseo? Kasin onkikiling tayon say naiimano tayo labat et saray literal a bengatla a manisigensigen ed sikatayo odino ed Kristianon kimey ed pigaran daldalin? No ontan, kasin makapanilalo tayo na sakey a nikaduman pasingawey a mangibangat ed sikatayo? Andi, lapud walaan tayoy bengatlan anggapo ed aripen nen Eliseo—intiron libro a lugan toy dakel a pasingawey, say Biblia, a makapangiter ed sikatayo na aralem a pakatalos nipaakar ed mangatatawen ya organisasyon. Iiter met na satan ya apuyanan a Salita iray manangigiyan prinsipyo a pakapetekay kaisipan tan kabibilay tayo. Balet, nepeg tayon panggunaetan ya anapey pakatebek tan bayuboay apresasyon parad areglo nen Jehova. Tan nagawaan tayo itan diad personal a panagaral, tekep na pikakasi tan panagdalepdep.—Roma 12:12; Filipos 4:6; 2 Timoteo 3:15-17.
Manaral Pian Namoria
7. (a) Antoy nayarin problema na arum nipaakar ed personal a panagaral na Biblia? (b) Akin a makagungguna so personal a panagaral?
7 Agto labay ya ibagan marakep a posibilidad so personal a panagaral parad dakel a totoo, a singa saramay agdan balot nanggayagaay impaneskuela odino agbalot naikdan na pankanawnawan manaral. Balet, no labay tayon namoria tan naapresia so organisasyon nen Jehova tekep na saray mata na pakatalos tayo, nepeg tayon panpilalekan so manaral. Kasin napenek kay mananam a panangan ya andiay preparasyon? Singa ibaga’d sika na siopaman a chef odino kusinero, dakel a kimey so nakakaukolan ed kipreparay mananam a panangan. Ingen, naupot itan ed loob na kapalduay oras odino onkulang ni. Diad biek a dapag, saray gungguna na personal a panagaral so legay-bilay. Napagmaliw so personal a panagaral a niyugalin kalkaliktanen sano nanenengneng tayoy aligwas a nagawaan tayo. Sustoy impangikuan nen apostol Pablo a kaukolan tayon lawas imanoey inkasikatayo tan say ibabangat tayo tan mantultuloy tayon isekar so inkasikatayo ed mapublikon panagbasa. Nakakaukolay tuloytuloy a panagsagpot, balet saray gungguna to et andi-angga.—1 Timoteo 4:13-16.
8. Anton awawey so irerekomenda na Uliran?
8 Inkuan na sakey a makabat a too nensaman: “Ana’ko, no awaten mo so saray salitak, tan yatol mo so saray ganggan ko ed sika; a singa pangikiling mo na layag mo ed kakabatan, tan ipeket mo so pusom ed pakatalos; on, no kelyawan mo so kaisipan, tan itagey mo so bosis mo nipaakar ed pakatalos; no sikato so anapen mo a singa pilak, tan sikato so usisaen mo a singa saray inyamot a kayamanan, diad ontan natalosan mo so takot ed Jehova, tan naromog mo so pikakabat ed Dios.”—Uliran 2:1-5.
9. (a) Panon a nikompara so balor na balitok ed ‘mismon pikakabat na Dios’? (b) Antoran uusaren so kaukolan tayo pian naalay suston pikakabat?
9 Naiimanom ta no siopay responsabli a manggunaet? Say “no . . . mo” so naulit. Tan imanoen pay balikas a, ‘No sikatoy anapen mo a singa saray inyamot a kayamanan.’ Isipen pa iray minero a diad loob na saray siglo et nankokotkot parad pilak tan balitok diad Abalaten ya Aprika, Bolivia, Mexico, tan arum niran bansa. Amasya iran nankimey, ya anguusar na saray gabyon tan suklar, pian kotkoten iray angkabaleg a baton napangalaan day ankabli iran metal. Mabalor a tuloy ed sikaray balitok a diad sakey a minas ed California, E.U.A. et angotkot ira na 591 a kilometro iran tunnel, a say kaaralem to et ngalngali 1.5 kilometro—diad pananap labat na balitok. Balet, nakan mo tay balitok? Nainum mo tay balitok? Kasin nasustini to ka diad desierto no manpapanabos ka la lapud keerasan tan kapgaan? Andi, say balor to ed diad teorya labat tan unong labat ed pankaliktan, manguman-uman ed inagew-agew a singa ipapanengneng na saray international market. Anggano ontan et inateyan na totoo itan. Natan kaunongan sirin a sagpot so isekar ta pian nagamoray espiritual a balitok, ‘say mismon pikakabat na Dios’? Isipen pa itan, say mismon pikakabat na Soberanon Katawan ed uniberso, ed organisasyon to, tan ed saray gagala to! Diad onian paraan, a nausar tayoray espiritual a gabyon tan suklar tayo. Saraya imay nibase’d-Biblian palapagan ya ontutulong ed pakakotkot tayo ed Salita nen Jehova tan pakatebek ed kabaliksan to.—Job 28:12-19.
Pankotkot Parad Aralem a Pakatalos
10. Antoy anengneng nen Daniel ed pasingawey?
10 Gawaen tayo pay espiritual a panagkotkot ta pian nagamoray mismon pikakabat nipaakar ed mangagatatawen ya organisasyon nen Jehova. Parad manunan aralem a pakatalos, ombaliksat tayo pa’d pasingawey nen Daniel nipaakar ed Kadaanan ya Agew ed trono to. Insulat nen Daniel: “Ninengneng ko angga ed nipasen so saray yurongan, et sakey a masiken na saray ag-agew so imyurong. Say kawes to amputi a singa niebe, et say buek na ulo to, singa malinis a bago na karnero. Say yurongan to mandarlang a liob, tan saray dalig to apuy a mandarlang. Sakey a manliob ya agos so binmutay tan pinmaway ed arap to; libolibo so saray nanlingkor ed sikato, tan samplon-libo ed maminsamplon libo so inmalagey ed arap to; say pangukom nigeter, tan saray libro abuskag ira.” (Daniel 7:9, 10) Siopa irayan nilibon manlilingkor ed si Jehova? Ipapaarap itayo na saray mardyinal a reperensya ed New World Translation, a nausar bilang saray “gabyon” tan “suklar,” ed saray reperensya a singa say Salmo 68:17 tan Hebreos 1:14. On, saray manlilingkor et saray mangatatawen ya anghel!
11. Panon itayon natulongan na pasingawey nen Daniel pian natalosan iray salita nen Eliseo?
11 Ag-ibabaga na salaysay nen Daniel ya anengneng ton amin iray matoor ya anghel a walad panangimando na Dios. Anganko ta minilyon nira. Balet ta seguradon natalosan tayo la natan no akin a sarag nen Eliseo ya ibagan: “Samay wala ed sikatayo sikara so dakdakel nen saray wala ed sikara.” Say armada na ari na Sirya, anggano suportadoy agmatoor ya angheles, dedemonyo, so daiset a tuloy ed mangatatawen ya armada nen Jehova!—Salmo 34:7; 91:11.
12. Panon yon lalon nakabatay nipaakar ed angheles?
12 Anganko ta labay mon nagkalalon nakabatan so kipaakaran na sarayan anghel, singa bilang say betang da ed panaglingkor ed si Jehova. Manlapud Griegon salita parad anghel, natalosan tayo a sikaray mensahero lapud satan so mankabaliksan met na “mensahero.” Balet, nagkakalo ni nalalanor ed saray susumpalen da. Balet, pian naamtaan no anto itan, nepeg a mankotkot ka. No walay Insight on the Scriptures mo, aral moy artikulon “Angels,” odino ontupleg ka ed apalabas iran artikulo na Say Panag-Bantayan nipaakar ed angheles. Nakelawan ka ed naamtaan mo nipaakar ed sarayan ariripen na Dios ed tawen diad ontan et nabidbir moy pananuporta ra. (Apocalipsis 14:6, 7) Balet, diad mangatatawen ya organisasyon na Dios, walaray espiritun palsa a manlilingkor ed nidesigna iran gagala.
No Antoy Anengneng nen Isaias
13, 14. Antoy anengneng nen Isaias ed pasingawey, tan panon iyan angapekta ed sikato?
13 Mankotkot tayo pa ed pasingawey nen Isaias. Sano basaen moy kapitulo 6, bersikulo 1 ya anggad 7, talagan mandinayew ka. Inkuan nen Isaias ya “anengneng [to] so Katawan a manyudyurong ed sakey a trono,” tan “ed tagey to akaalagey so saray serapin.” Iproproklama ray gloria nen Jehova, ya idadayew so kasantosan to. Anggan diad panbasam labat ed sayan salaysay et naapektoan ka la. Antoy reaksion nen Isaias? “Diad saman inkuanko: ‘Abagey ak la! Ta nabalang ak [ed Sheol] lapu ed too ak a marutak so saray bibil, tan manaayam ak dia ed pegley na baley a marutak so saray bibil; ta saray matak anengneng da so Ari, si Jehova na saray ehersito.’” Agaylan nandinayewan to itan a pasingawey! Ontan ka ta met?
14 Kanian panon ya atalindegan nen Isaias iyan maglorian nenengnengen? Insalaysay ton inliktar na sakey a serapin diad impangikuan: “Say inkauges mo nakal, tan say kasalanan mo apaandi.” (Isaias 6:7) Akapanmatalek si Isaias ed panangasi na Dios tan angimano ed saray salita nen Jehova. Natan, agmo ta labay a nagkalalon naamtaan ni nipaakar ed sarayan atagey-rangkon espiritun palsa? Sirin antoy nepeg mon gawaen? Mankotkot na dakel nin impormasyon. Sakey ya uusaren a katulongan et say Watch Tower Publications Index, diad pamasa ed saray impanukoy to’d dakel a palapagan na manamalinew ya impormasyon.
Antoy Anengneng nen Ezequiel?
15. Antoy mangipapanengneng a say pasingawey nen Ezequiel et napanmatalkan?
15 Isublay tayo pan imanoey sananey a klasen espiritun palsa. Apribilihyoan si Ezequiel na makapadinayew a pasingawey bangta akautibo ni ed Babilonia. Ibukay mo pay Bibliam ed Ezequiel kapitulo 1, say unonan taloran bersikulo. Panoy inkigapoy salaysay? Kasin imbaga ton, ‘Aminsan a panaon, diad arawdawin dalin . . .’? Andi, aliwa iyan tongtong basilyo diad sakey a miton eksena. Kuan na bersikulo 1: “Bang nen saman agawa ed komatalomplo a taon, dia ed komapat a bulan, dia ed komalima ya agew na bulan, unong a walaak ed nanleleetan na saray dinakep ed abay na ilog a Chebar, a saray tawen alukasan ira, et anengneng koray pasingawey na Dios.” Antoy naimanom ed sayan bersikulo? Iiter to so eksakton petsa tan pihon pasen. Sarayan detalye so mangituturo ed komaliman taon na inkadakep nen Arin Joachin, say taon a 613 K.K.P.
16. Antoy anengneng nen Ezequiel?
16 Say lima nen Jehova so sinmabi ed si Ezequiel, tan anengneng to’d satan so makapataktakot a pasingawey nipaakar ed trono nen Jehova diad abalbaleg a mangatatawen a karwahe a walaay angkakabaleg a dalig ya atatek na mata iray rim. Say detalyen pakainteresan tayo’d dia et walaray apatiran palsa, walay manalalagey ed abay na kada dalig. “Saya nensaman so nengneng da: Wala so nengneng da a singara too. Et balang sakey walaan na apatira a lupa, tan balang sakey ed sikara walaan na apatira a payak. . . . Nipaakar ed kapadpara na saray lupa ra, walaan ira na lupa na sakey a too; et sikara ya apat walaan ira na lupa na sakey a leon ed nikawanan a diking; et sikara ya apat walaan ira na lupa na sakey a baka ed nikawigi a diking; sikara ya apat met walaan ira na lupa a sakey ya agila.”—Ezequiel 1:5, 6, 10.
17. Antoy irerepresenta na apatiran lupa na kerubines?
17 Anto irayan apatiran mabilay a palsa? Ibabagan mismo ed sikatayo nen Ezequiel a kerubines ira. (Ezequiel 10:1-3, 14) Akin balet a balang sakey et apatiray lupa ra? Pian irepresentay apatiran matalonggaring ya atributo na Soberanon Katawan a Jehova. Say lupa na agila so simbolo na matudion kakabatan. (Job 39:27-29) Antoy inrepresenta na lupay kalakian a baka? Diad pirmin inkabiskeg na tenger tan saray takeb to, kabkabat lan say ilalaban a kalakian a baka et sarasarag ton bakwiten so sakey a kabayo tan say akakabayo. Maseguro, say kalakian a baka so simbolo na ag-agetaran a pakayari nen Jehova. Say leon so uusaren bilang simbolo na makpel ya inkahustisya. Kaunoran, matukotukoy ya irerepresentay lupa na too so aro na Dios, ta say too lambengat so mangaraldalin a palsa a makapangipatnag na sayan kualidad tekep na intelehensia.—Mateo 22:37, 39; 1 Juan 4:8.
18. Panon itayon tutulongan nen apostol Juan a namoriay mangatatawen ya organisasyon?
18 Wala niray arum a pasingawey a makatulong ed sikatayo pian nakompleto so litrato. Lalaktipen na saraya iray pasingawey nen Juan a nisiglaot ed libro na Biblia ya Apocalipsis. Sikato, singa si Ezequiel, so akanengneng ed si Jehova a walad maglorian trono ya uulopey kerubines. Antoy gagawaen na saray kerubin? Iyaaniweng day proklamasyon na serapines ed Isaias kapitulo 6, a mankuan: “Santo, santo, santo, so Katawan a Dios, say Makapanyarin-amin, a sikato so wala nensaman tan sikato so wala natan, tan sikato so onsabi naani.” (Apocalipsis 4:6-8) Nanenengneng met nen Juan so sakey a kordero’d asingger na trono. Siopa kasi irerepresenta na saya? Say mismon Kordero na Dios, si Jesu-Kristo.—Apocalipsis 5:13, 14.
19. Diad panamegley na sayan panagaral, antoy amoriam nipaakar ed organisasyon nen Jehova?
19 Kanian diad panamegley na sarayan pasingawey, antoy amoria tayo? A say pantok na mangatatawen ya organisasyon et si Jehova a Dios ed trono to ya uulopen na Kordero, si Jesu-Kristo, say Salita, odino Logos. Insan anengneng tayon walay mangatatawen ya ehersiton angheles, pati saray serapines tan kerubines. Kabiangan ira na sakey ya abalbaleg, nankakasakey ya organisasyon ya onkakana’d saray gagala nen Jehova. Tan sakey ed saratan a gagala et say kipulong na maong a balita ed sankamundoan ed sayan panaoy anggaan.—Marcos 13:10; Juan 1:1-3; Apocalipsis 14:6, 7.
20. Anton tepet so naebatan ed ontumbok ya artikulo?
20 Kaunoran, walaan tayo na Tastasi nen Jehova ed tapew na dalin a mantitipon ed saray Kingdom Hall da ta pian aralen da no panon a nasumpal day linawa na Soberanon Katawan. Segurado, atalosan tayo la natan a dakel so wala ed dapag tayo nen saramay walad dapag nen Satanas tan kakabusol na katuaan. Say tepet ni et, Antoy pisiglaotan na mangatatawen ya organisasyon ed kipulong na maong a balita na Panarian? Say onggendan ya artikulo so mangusisa ed satan tan ed arum niran pamaakaran.
Tepetepet Parad Repaso
◻ Pian naapresia so organisasyon nen Jehova, antoy nepeg tayon namoria?
◻ Antoy naeksperiensia na aripen nen Eliseo, tan panoy impamaseseg na propeta ed sikato?
◻ Panon tayon moriaey personal a panagaral?
◻ Panon so impangidetalye di Daniel, Isaias, tan Ezequiel ed mangatatawen ya organisasyon?
[Litrato ed pahina 13]
Saray gungguna ed personal a panagaral et palumbasan da iramay nipreparan maong a panangan
[Litrato ed pahina 15]
Say pasingawey nipaakar ed mangagatawen ya ehersito so ebat nen Jehova ed pikakasi nen Eliseo