Gawaen so Sankaabigan ed Bilay Mo

SAY ama so walad abung, diad katri, ompapatey la lapud kanser. Say anak to so walad puesto, uuksoyen toray kagawaan nen tatay to ed panagkarpentero. Leleg a sankaegnaan toray kagawaan, sankanonot toray marakep a bengatlan agawaan nen tatay to diad impangusar ed saratan. Anggaman abay labat na abung day puesto, amta ton aglan balot makaloob lamet diman si tatay to, aglan balot makabemben lamet na saray kagawaan ya alay dunong ton mangusar ed saratan. Apalabas la itan a panaon.

Sankanonot na anak so teksto diad Eclesiastes 9:10: “Anggan anto a say limam naromog to a gawaen, sikato so gawaen mo ed pakapanyarim, ta anggapo so gawa, no kanonotan, no pakaamta, no kakabatan, dia ed Sheol [say lubok], a laen mo.” Kabisado to itan a teksto. Aminpigapiga to lan inusar itan sanen ibabangat to’d arum so katuaan na Biblia a say patey et sakey ya inka-inaktibon kipapasen. Natan say puersa na argumento nen Solomon so tinmanek ed puso to​—kaukolan a manbilay itayon apenepenek tan panggayagaan tayoray agew tayo leleg a nagawaan tayo ni lapud onsabi panaon sano agtayo la nagawaan itan.

Panggayagaay Bilay

Diad intiron libro na Eclesiastes, bibilinen nen makabat ya Arin Solomon iray managbasa to a panggayagaay bilay. Alimbawa, ibabaga na kapitulo 3: “Amtak ya anggapo so bengatla a magmaong nipaakar ed sikara [totoo], nen say panliket, tan panggawa na maong ed leleg na pambilay da. Et ontan met a balang too mangan tan oninum, tan manliket a maong ed amin a kimey to, sikato so pamalangkap na Dios.”​—Eclesiastes 3:12, 13.

Pinuyanan na Dios si Solomon a mangulit ed sayan kanonotan: “Nia! Saman so anengneng ko a maong tan marakep nipaakar ed sakey sikato so pangan tan iyinum, tan panliket a maong ed amin a kimey to, a pankimeyan to ed leksab na banwa, ed saray amin ya agew na pambilay to a say Dios initer to ed sikato: ta saya sikato so betang to.”​—Eclesiastes 5:18.

Mipadpara, bibilinen toray kalangweran: “Manggayaga ka, O tobonbalo a laki [odino bii], dia ed kaugawan mo, tan say pusom paliketen to ka komon ed saray agew na inkaugaw mo, tan manakar ka ed saray dalan na pusom, tan dia ed pakanengneng na saray matam.” (Eclesiastes 11:9a) Agaylan abig so sigpot a panggayaga ed biskeg tan kasil na inkatobonbalo!​—Uliran 20:29.

‘Nonoten Moy Manamalsam’

Siempre, aglabay ya ibaga nen Solomon a makabat so pangemtan ed amin a bengatla a makasagyat ed puso tan mata tayo. (Ikompara so 1 Juan 2:16.) Malinew iya ed ontumbok ya insulat to: “Balet amtaen mo, a lapu ed saraya ya amin a bengatla [saray gegemtan a mamenek ed saray pilalek mo] say Dios yakar to ka ed kaukom.” (Eclesiastes 11:9b) Antokaman so edad tayo, kaukolan tayon tandaan ya iimatonan na Dios iray gagawaen tayo ed bilay tayo tan ukomen to itayo unong ed saratan.

Agaylan kakulangkulangan so pangirason a makapambilay itayon makasarili tan ikuntang so maridios a debosyon diad itatakken tayo! Ompatey itayo antokaman ya oras. Anggano andi bilang, say panaglingkor ed Dios et agla mainomay diad inkatakken. Bibidbiren iyan katuaan, insulat nen Solomon: “Nonoten mo met so Manamalsam diad ed saray agew na inkaugaw mo, ed arapen a saray mauges ya agew onsabi, tan saray taon onasingger ira, sano ikuan mo: ‘Andian ak na liket ed sikara.’”​—Eclesiastes 12:1.

Say itatakken so onsingil. Diad simboliko iran termino et insublay nen Solomon a deskribien iray epekto na itatakken. Onmayegmeg iray lima tan taklay, onkapuy iray sikla, tan ondaiset iray ngipen. Omputi tan ompagpag iray buek. Atapew lay ugip na sakey a naliing diad uni labat na billit. Saray sentido​—pakanengneng, pakarengel, pakalikas, pakaangob, tan pakataway​—amin so onkapuy la. Say kinmapuy lan laman so mansumpal ed takot ed pakatumba tan arum ‘niran makapataktakot’ ed publiko iran dalan. Kabekta ompatey so too.​—Eclesiastes 12:2-7.

Say inkatakken so nagkalautlan makadesyang parad saramay sinmaew a ‘mannonot ed Manamalsa ra’ legay inkatobonbalo ra. Lapud panadarak ed bilay to, satan a too so ‘andian na liket’ diad saginonor iran taon. Say andiay-dios ya istiloy-bilay so makaarum met ed saray problema tan ot-ot na inkatakken. (Uliran 5:3-11) Makapaermen, sano onnengneng ed arapen, anggapoy nailaloan na saratan ya arapen noagta say lubok.

Panggayaga ed Inkatakken

Agto labay ya ibagan agla makapanggayaga ed bilay iray maedad la. Diad Biblia, “say karukey na saray agew, tan saray taon na bilay” et walay pisiglaotan to met ed bendision na Dios. (Uliran 3:1, 2) Inkuan nen Jehova ed kaaro ton Abraham: “Et sika . . . ; niponpon ka naani ed inkamasiken mo lan tuloy.” (Genesis 15:15) Anggaman ed saray pakaalipanesan lapud inkatakken la, naeksperiensia nen Abraham so deen tan inkaligen ed inkamasiken to, a ninmengneng ed apalabas tekep na inkapenek ed bilay ya indeboto’d si Jehova. Sikato met so nanilalo tekep na pananisia ed sakey a “baley a wala so semento to,” say Panarian na Dios. (Hebreos 11:10) Kanian, sikatoy inatey a “masiken la a napnek na taotaon.”​—Genesis 25:8.

Kanian insimbawa nen Solomon: “No say sakey a too manbilay ed dakerakel a taon, manliket komon dia ed sikara ya amin.” (Eclesiastes 11:8) Balanglan ugaw ni odino matakken tayo la, say tuan gayaga so nisisiglaot ed relasyon tayo’d Dios.

Leleg ya ipipireg na samay kalangweran a laki so unor a kagawaan nen ama to diad puesto, sankanonot to irayan bengatla. Sankanonot ton amin a totoon kabat to a manggugunaet a manggagaway sankaabigan ed bilay da balet ta ag-akaromog na liket lapud andian ira na relasyon ed Manamalsa ra. Agaylan mapatnag a matukoy a kayari impamaseseg a manggayaga legay bilay na sakey, sinumaryo nen Solomon iray pamaakaran ed saray salitan: “Saya sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan na too”!​—Eclesiastes 12:13.