Seguroen a Niyuna Iray Prayuridad!

Labin walay miting, balet ta walay gagawaen mo. Dinan so iyunam?

SAKEY kan asawan laki tan ama. Legan a magano lan nasumpal so andukey, makapakesaw a sanagew a trabaho, onsublay a sankanonot moy niyeskedyul a miting ed kongregasyon ed satan a labi. No onalis kan tampol ed trabaho, walaan ka na magenap labat ya oras pian manames, manpales, tan masiglat a pangan sakbay ya ompikal a miaral. Biglaan, inasinggeran kay amom tan kekerewen ton man-overtime ka. Insipan ton bayaran to kay baleg. Kaukolan moy kuarta.

Odino sakey kan asawan bii tan ina. Legan mon ipaparaan so pangdeman et naimanom so abunton a papalansaen iran kawes, arum ed saratan so kaukolan ed kaimbuasan. Itepet mo’d inkasika, ‘No miaral ak natan a labi, kapigan kasi pakapanpalansak?’ Lapud agano nin impangalay sigpot panaon a trabaho, naaamtaan mo no panon kairap so pangasikaso ed saray kimey ed abung legan a manaanap na pambilay.

Odino sakey kan estudyante. Diad kuartom et abuntonan so desk mo na asainmin. Maslak et abayag lan niasain, balet ta impaleen mo, tan natan et pigaran asainmin so bansag ya isasambot. Nampatanir ka’d atateng mo ya agni miaral pian sumpalen moy asainmin mo.

Dinan so unaen mo: say ekstran sekular a trabaho, say panpalansa, say asainmin, odino say miting ed kongregasyon? Diad espiritual a panangibaga, antoy kabaliksan na pangiyuna ed saray prayuridad? Antoy panmoria nen Jehova?

Antoy Nepeg ya Iyuna?

Ag-abayag kayari impakaawat na Israelitas ed Samploran Ganggan, sakey a laki so nalmoan a mantitipon na kiew ed Sabaton. Mapeget iyan isesebel ed Ganggan. (Numeros 15:32-34; Deuteronomio 5:12-15) Panon mon husgaan so kaso? Kasin ikatunongan moy too, ya ipilit a, tutal, sikatoy agmankikimey pian mantinien so luhon estiloy-bilay noagta pian itarya iray nakakaukolan parad pamilya to? Kasin ikatunongan mon dakel ya okasyon ed intiron taon pian ngilinan so Sabaton tan saman ya asaew a pankanawnawa, anganko lapud insaew na laki a manplanon masakbay et mainomay a naperdona?

Minoria nen Jehova so kaso a seryoson tuloy. “Et,” kuan na Biblia, “si Jehova inkuan to ed Moises: ‘Satan a too napapatey naani a tuatua.’” (Numeros 15:35) Akin a mapekder a tuloy si Jehova nipaakar ed ginawa na saman a laki?

Walaan na anemiran agew so totoo pian mantipon na kiew ontan met pian asikasoen iray pankaukolan da parad tagano, kawesen, tan siruman. Say komapiton agew so nepeg ya ideboto ed saray pankaukolan da ed espiritual. Anggaman aliwan makapuy so pantipon na kiew, mauges so pangusar na panaon a nepeg a nigana ed panagdayew ed si Jehova. Anggaman anggapo’d silong na Mosaikon Ganggan iray Kristiano, agta sayan inkagawa so mangibangat ed sikatayo na sakey a leksion diad suston panangiyuna tayo’d saray prayuridad tayo natan?​—Filipos 1:10.

Kayari 40 taon ya impanyatawyataw ed kalawakan, saray Israelita so akaparaan lan onloob ed Insipan a Dalin. Arum so sinmawa lan mamangan ed intaryay Dios a manna ed kalawakan tan andi-duaruwan maniilalo’d pakauman na pakatagano. Pian tulongan iran napansiansia so manepeg a panmoria legan ya onloloob ira ed dalin “a panagusan na gatas tan dilo,” pinanonotan ira nen Jehova: “Say too agnabilay ed tinapay labat, noag say amin a pamaakaran ya ombesngaw ed sangi nen Jehova so kabilayan na too.”​—Exodo 3:8; Deuteronomio 8:3.

Kaukolan a pankimeyan a maong na saray Israelita so “gatas tan dilo” ra. Walaray armada a taloen, kaabungan ya ipaalagey, kaumaan a taneman. Anggano ontan, ginanggan nen Jehova so totoo a mangigana na panaon kada agew pian dalepdepen iray espiritual a pamaakaran. Kaukolan da met so pangipanaon ed pangibangat ed saray dalan na Dios ed ananak da. Inkuan nen Jehova: “Ibangat yo so saraya naani ed saray anak yo, a sikaraya so salitaen yo ed sikara no manyudyurong ka ed abung mo, tan no manaakar ka ed dalan, tan no ondukol ta ombangon ka.”​—Deuteronomio 11:19.

Mamitlo ed sakey taon et kada lakin Israelita tan proselita ed dalin so niganggan ya onapireng ed si Jehova. Diad impakaimanon say intiron pamilya so nagunggunaan ed espiritual manlapud saratan ya okasyon, dakel ya ulo na pamilya so angiyareglo ed asawa tan ananak da a mangulop ed sikara. Balet siopa so manalimbeng ed saray ayaman tan saray kaumaan da manlapud ilubak na kakabusol legan a say pamilya et anggapo diman? Insipan nen Jehova: “Anggapo met naani mankaliket ed dalin mo no ontatdang ka a manpatnag ed arapan nen Jehova a Dios mo a mamitlo ed loob na sakey taon.” (Exodo 34:24) Kaukolan so pananisia parad Israelitas pian manisia a no iyuna day espiritual ya intereses, ag-ira naperdi ed materyal a paraan. Kasin pinaneknekan nen Jehova so salita to? Petegpeteg a ginawa to!

Itultuloy ya Anapen ya Unona so Panarian

Binangatan nen Jesus iray babangatan to ya iyuna niray espiritual a kablian sakbay na arum nin bengatla. Diad Sermon to’d Palandey, binilin toray dumerengel to: “Agkayo sirin mapaga, ya ikuan yo, ‘Anto kasi kanen mi?’ ono, ‘Anto kasi inumen mi?’ ono, ‘Anto kasi pankawes mi?’ Anapen yo nin unona so panarian, tan say inkatunong to; et amin iraya [nakakaukolan a materyal] a bengatla niarum ira ed sikayo.” (Mateo 6:31, 33) Ag-abayag kayari impatey nen Jesus, tinumbok na saray balon abautismoan a Kristiano itan a simbawa. Dakel iray Judio odino Judion proselitas a nambiahen amaarap ed Jerusalem parad selebrasyon na piesta na Pentecostes nen 33 K.P. Legan iran wadman, walay bengatlan ag-inilaloan ya agawa. Nadngel tan inabrasa ra so maong a balita nipaakar ed si Jesu-Kristo. Diad gunaet a lalon makaaral nipaakar ed balon nalmoan dan pananisia, nansiansia nira’d Jerusalem. Kinmisir iray probisyon da, balet saray materyal a pankaukolan so onkokomadua labat. Nalmoan day Mesias! Innabang na Kristianon agagi ra so materyal iran bengatlan walad sikara ta pian amin so makapantultuloy a “malet ed bangat na saray apostoles, tan . . . ed saray pikakasi.”​—Gawa 2:42.

Asabi panaon, imbaliwala na pigaran Kristianos so pankaukolan parad maparanay a piduduypo diad saray miting. (Hebreos 10:23-25) Anganko et nagmaliw iran materyalistiko, ya ibabaliwalay espiritual iran pamaakaran bangta panggugunaetan so pakaseguro ed pinansyal a seguridad parad inkasikara tan ed saray pamilya ra. Kayari pamapaseseg ed agagi ton agpaulyan iray miting, onia so insulat nen apostol Pablo: “Nabulos kayo komon manlapu ed aro na pilak, panliketan yo so bengatla a wala ed sikayo: ta sikaton dili imbaga to: ‘Agta ka naani taynan, tan agta ka naani ikaindan.’”​—Hebreos 13:5.

Say simbawa nen Pablo so pinmaway a nipanpanaon a tuloy. Ngalngalin limay taon kayari insulat nen Pablo so sulat to ed saray Hebreo, niliktob na saray Romanon sundalo nen Cestius Gallus so Jerusalem. Anonotan na saray matoor a Kristiano so pasakbay nen Jesus: “Sano nanengneng yo [iya] . . . , say wala ed toktok na abung ag-onlasor, ono onloob, a mangala na anggan anto ed abung to; tan say wala ed uma agkomon ompawil a mangala na kolibemben to.” (Marcos 13:14-16) Amta ran akadependi so kililiktar da, aliwan diad maligen a trabaho ra odino balor na materyal a kaykayarian da, noagta diad katutulok da ed saray bilin nen Jesus. Saramay kinmiwas ed konseho nen Pablo tan angiyuna ed espiritual ya intereses so andi-duaruwan akaimanon mas mainomay so panaynan ed ayaman, trabaho, kawekawes, tan personal iran kayarian tan ombatik ed kapalandeyan nen say siopaman ya agmakabulos lapud aro ed kuarta.

No Panoy Pangiyuuna na Arum ed Saray Prayuridad Natan

Papablien na matoor a Kristianos natan so maparanay a pililimog ed agagi ra, tan dakel so mansasakripisyo ta pian makaatendi ed saray miting. Walaray lugar, a say napantrabahoan labat et mankakaukolay piturnoan. Sakey ya agin laki so mangiyoopresin sandian toray katrabahoan to diad saray labi na Sabado, a lablabayen na maslak a totoo ed lugar da ya usaren ed panagligliwaan, tan sikatoy sandian da ed turno to diad saray labi na miting. Arum ya agagin mituturnoan a trabahador so onaatendi ed saray asingger a kongregasyon no bilang ta sebelan ira na trabaho ra ed iyatendi’d mismon kongregasyon da. Diad onian dalan et ngalngalin ag-iran balot makasaew ed miting. Sakey a balo nin interesado ed Canada so tampol ya akamoria ed kaimportantian na Teokratikon Eskuelaan Parad Panagministro tan Service Meeting, balet ta ag-iyabuloy na eskedyul to’d trabaho so iyatendi to. Kanian, binayaran toy katrabahoan to ya itrabahoan to ed turno to ta pian naatendian irayan importantin miting.

Dakel a grabe sakit da so mataltalag a makasaew ed miting. Sikaray ondedengel ed programa diad ayaman ed panamegley na akakonektan telepono odino nirekord a tape sano agda nayariay miaral diad Kingdom Hall. Ipapanengneng day baleg ya apresasyon ed saray espiritual a probisyon nen Jehova ed panamegley na “matoor tan makabat ya aripen”! (Mateo 24:45) Talagan aapresiaen na saray Kristianon managkumponi ed saray maedad lan atateng da sano iyopresi na sakey ya agi ya ibantayan tora ta pian naatendian day miting diad kongregasyon.

Iplano lan Masakbay!

Tulongan na atateng a sinononot ed dilin espiritual iran pankaukolan da iray ananak da a mangapresia ed Kristiano iran miting. Bilang inkalapagan a totontonen, iilaloan day ananak dan manggawa ed saray asainmin da unong ed inkiasain to imbes ya ipaleen. Diad saray labin walay miting et gawaen na saray ananak so asainmin da kasempet dan tuloy manlapud eskuelaan. Saray hobby tan arum ya aktibidad so agnaabuloyan a manebel ed saray miting ed kongregasyon.

Bilang asawan laki tan ama, kasin iyuunam so iyaatendi ed miting? Bilang asawan bii tan ina, kasin panggugunaetan mon iplano iray responsabilidad mo ta pian makaatendi ed saray miting? Bilang tin-edyer, kasin ipapasen mon mas importanti iray miting nen say asainmin mo odino say asainmin mo so mas importanti nen say saray miting?

Say miting ed kongregasyon so maaron probisyon nen Jehova. Kaukolay pansagpot pian minabang ed satan ya uksoyan. Mayamyaman a bendisionan ka nen Jehova no iyunam iray prayuridad!