Prayuridad so Regular a Piaral
1 Prayuridad na saray Kristianon pamilya so iyatendin regular ed saray aral ed kongregasyon. Balet nayarin onlesa so problema lapud saray pankaukolan ed bilay natan. Kasin nasasamsam lay kimkimey ed abung, sekular a trabaho, odino asainmin ed eskuelaan so panaon ya inggana yo parad panagdayew ed si Jehova? No moriaen tayo so bengabengatla unong ed panmoria nen Jehova, natulongan itayon napansiansia iray prayuridad tayo.—1 Sam. 24:6; 26:11.
2 Diad impankiew na sakey ya Israelitan laki legan na Sabaton, inggagala ton ag-imanoen so panmoria nen Jehova. Nayarin inkatunongan ton ginawa to iman nisesengeg ed pamilya to odino impasen ton agtanto makana itan a bengatla. Balet, impanengneng nen Jehova diad impangipaakseb to na panangukom a say panggawa na ordinaryon kimkimey diad panaon ya intalaga parad panaglingkor et sakey a seryoson pamaakaran.—Num. 15:32-36.
3 Pangarap ed Angat: Parad dakel, mairap a napansiansian agmakasbel so sekular a trabaho ed piaral da. Atalonaan iya na arum diad impitongtong da ed amo ra, impisalatan na turno ed katrabahoan da, impananap na mas matukoy a trabaho, odino impamasimpli ed panagbilay da. Seguradon satan a panagsakripisyo nisesengeg ed tuan panagdayew so talagan makapaliket ed Dios.—Heb. 13:16.
4 Sakey met ya angat iray asainmin ed eskuelaan. Oniay inkuan na sakey a kalangweran: “Gagawaen ko iray arum ya asainmin ko antis na aral tan say nakekeraan et sano kasempet ko.” No agnagawaan so amin ya asainmin diad labi a wala so aral, ipapaliwawa na arum ya atateng ed saray mamaestra odino mamaestro a prayuridad ed pamilya ra so iyatendi ed saray Kristianon miting.
5 Say kooperasyon tan maabig a panagplano so tombok pian nagawaan iray kimey ed abung tan makapanparaan so pamilya parad masakbay a piaral. (Uli. 20:18) Anggan saray ankelag nin ugugaw et nayarin ibangat a manpales la pian akaparaan lan onlan miaral diad inggetar ya oras. Panamegley na ehemplo ra, nipurek na atateng ed ananak da so kaimportantian na saray miting.—Uli. 20:7.
6 Legan ya ompapalalo so pananesdes na sayan peles a sistema na bengabengatla, importante ya atendian tayon regular iray miting ed kongregasyon. Komon ta itultuloy tayon moriaen iray pamaakaran unong ed panmoria nen Jehova tan gawaen a prayuridad so regular a piaral.—Heb. 10:24, 25.