Aligen so Panangasi nen Jehova

“Mapangasi kayo komon, unong a mapangasi so Ama yo.”​—LUCAS 6:36.

1. Panon ya impanengneng na Fariseos ya andian iray panangasi?

ANGGAMAN apalsa unong ed indengan na Dios, mabetbet ya onsaew so totoo a mangalig ed inkapangasi to. (Genesis 1:27) Alimbawa, konsideraen paray Fariseos. Bilang sakey a grupo, ag-ira aliketan ed mapangasin impamaabig nen Jesus ed akaweng a lima na laki ed Sabaton. Imbes, nankokomplot ira sumpad si Jesus “no panon so pamagbag da ed sikato.” (Mateo 12:9-14) Diad sananey ya inkagawa, tinambal nen Jesus so toon nianak lan bulag. Aminsan lamet, agnanliketan na “arum ed saray Fariseos” so impangabagey nen Jesus. Imbes, inreklamo ra: “Sayan too agnanlapu ed Dios, lapu ed agto ngilinan so Sabaton.”​—Juan 9:1-7, 16.

2, 3. Antoy labay ya ibaga nen Jesus ed balikas a, “Paliisan yo so lebadura na saray Fariseos?”

² Say agmanangiyansakit ya awawey na Fariseos et sakey a krimen sumpad sankatooan tan kasalanan ed Dios. (Juan 9:39-41) Tekep na maabig a rason, pinasakbayan nen Jesus iray babangatan to, “Paliisan [yo] so lebadura” na sayan maimpluensian grupo tan arum niran relihyonista, a singa saray Saduceo. (Mateo 16:6) Nausar so lebadura ed Biblia a mangirepresentay kasalanan odino inkabulok. Kanian imbaga nen Jesus a say bangat na “eskribas tan Fariseos” so makaderal ed puron panagdayew. Panon? Diad satan et nibangat so totoo a manmoria lambengat ed Ganggan na Dios unong ed mapeget iran totontonen tan ritual da, bangta ibabaliwalay “ambelbelat a pamakaaran,” a singa say panangasi. (Mateo 23:23) Sayan ritualistikon nengneng na relihyon so nanggawa’d panagdayew ed Dios bilang agnayarian a sasakbaten.

³ Diad mikaduan parti na parabolo to nipaakar ed say managdarak, inwalwal nen Jesus so mauges a panag-isip na saray Judion panguloy relihyon. Diad parabolo say ama, a mangirerepresenta ed si Jehova, so magunaet a mamerdona ed magbabawin anak to. Balet say panguloan na balolaki, a mangirerepresenta ed “saray Fariseo tan saray eskriba,” so walaay dumaruman liknaan ed pamaakaran.​—Lucas 15:2.

Say Impamasnok na Panguloan

4, 5. Diad anton pantalos ya “abalang” so panguloan na managdarak?

⁴ “Bangsay anak to a panguloan wala nensaman ed uma; et nen sinmabi tan inmasingger ed abung, nadngel to so togtog tan sayaw. Et tinawag to so sakey ed saray ariripen, tan tinepe’to ed sikato no anto kasi so saraya a bengatla. Et inkuanto ed sikato, ‘Si agim sinmabi; et si amam pinatey to so pinataba a baka, lapud sikato so inawa’to a nilaban tan maksil.’ Ingen nanpasnok, et agto linmoob.”​—Lucas 15:25-28.

⁵ Malinew, aliwa lambengat a say managdarak ed parabolo nen Jesus so walaay problema. “Say duaran anak a nilitrato dia et abalang,” kuan na sakey a reperensya, “say yogtan et lapud ag-inkatunong ya amabanday ed sikato, say panguloan et makasengeg ed dilin-inkatunong ya amulag ed sikato.” Imanoen a say panguloan na managdarak so aglambengat inmingongot noagta “nanpasnok.” Say Griegon lamot parad “pasnok” so mangisusuheri, aliwan say pirmin imbetag na sanok, noagta mansiasiansian kipapasey kanonotan. Mabitar, say panguloan na managdarak so nan-imbel a maong, kanian inisip ton agmatukoy a selebraan so ipawil na sakey ya agbalot komon tinmaynan ed abung.

6. Siopay irerepresenta na panguloan na managdarak, tan akin?

⁶ Say panguloan na managdarak so dugarugan mangirerepresenta ed saramay man-iimbel ed panangabagey tan atension ya impanengneng nen Jesus ed saray managkasalanan. Sarayan mantunongtunongan so ag-atenyeg ed panangasi nen Jesus; nisay impatnag da so gayagan niwala ed tawen no naperdona so sakey a managkasalanan. Imbes, sinmulag ira’d panangasi nen Jesus, tan ginmapo iran ‘manisip na mauges’ ed kapusoan da. (Mateo 9:2-4) Diad sakey ya inkagawa et ontanlay insanok na pigaran Fariseo ya impatawag da so lakin pinaabig nen Jesus insan “pinapaway da” ed sinagoga​—a mabitar ya inekal da! (Juan 9:22, 34) Singa say panguloan na managdarak, ya “agto linmoob,” pinmaliis iray Judion papanguloy relihyon sanen walay pankanawnawa ran ‘miliket ed saray manliliket.’ (Roma 12:15) Lalon inwalwal nen Jesus so marelmeng a panagkatunongan da diad impangituloy to’d parabolo to.

Pikelkel a Panagkatunongan

7, 8. (a) Diad anton paraan ya ag-atalosan na panguloan na managdarak so kabaliksan na inkailalak? (b) Panon a miduma so panguloan ya anak ed ama to?

⁷ “Et pinmaway so ama to, tan sikato so akikasian to. Balet inmebat tan inkuan to ed ama to, ‘Nia, dia ed saraya a dakel a taon nanlingkor ak ed sika, tan anggan kapigan agko sinumpa so ganggan mo; et anggan kapigan agmo ak inikdan na sakey a melag a kanding, pian makapiliket ak ed saray kakaarok. Ingen nen sinmabi sayan anak mo, ya inupo’to ray kayarian mo ed saray mauges a bibii, pinatey mo nipaakar ed sikato so baka a pinataba.’”​—Lucas 15:28-30.

⁸ Diad sarayan salita, impabitar na panguloan na managdarak ya agto atalosan so tuan kabaliksan na inkailalak. Pinanlingkoran toy ama to a singa sakey ya empleyadon manseserbi ed amo to. Singa to inkuan ed ama to: “Nanlingkor ak ed sika.” Tua, sayan sankapanguloan ya anak so agbalot tinmaynan ed abung odino sinmumpa ed ganggan na ama to. Balet kasin say katutulok to et pinakiwas na aro? Kasin peteg a pinanggayagaan toy impanserbi to’d si ama to, odino imbes et sikatoy kalkalnan nagmaliw a kampante lan maong, a sisiaen toy inkasikaton maong ya anak lapud basta panggagawa to’d saray obligasyon to “ed uma”? No talagan sikatoy debosyonadon anak, akin a sikatoy sinmaew a mangipatnag ed kanonotan nen ama to? Sanen pankanawnawa to lan ipanengneng so panangasi ed agi to, akin ya anggapon balot so panangabagey ed puso to?​—Ikompara so Salmo 50:20-22.

9. (a) Ipaliwawa no panon a mipadpara iray Judion papanguloy relihyon ed panguloan ya anak.

⁹ Mipadpara iray Judion papanguloy relihyon ed sayan panguloan ya anak. Panisiaan dan matoor ira ed Dios lapud mapeget dan tinumbok so kodigo na saray ganggan. Tua, importanti so katutulok. (1 Samuel 15:22) Balet nagmaliw a mekanikal a rutina so panagdayew ed Dios lapu ed sobran panangidanet da’d saray gawa, sakey ya akinpaway a panangipatnag na debosyon ya andiay tuan espiritualidad. Nigalet so kanonotan da ed saray tradisyon. Andiay aro so kapusoan da. Agayla, impasen daray kabanyakan a totoo a singa dutak ed dapan da, a momodmoraen da ni ingen ira bilang ‘naayew a totoo.’ (Juan 7:49) Peteg, panon a nasagyat so Dios ed saray gawa na saratan a lider sano say kapusoan da et niarawi ed sikato?​—Mateo 15:7, 8.

10. (a) Akin a matukoy a simbawa iray salitan, “Say panangasi so pirawat ko, ya aliwan say bagat”? (b) Panon kaseryoso so kakulangay panangasi?

¹⁰ Imbaga nen Jesus ed saray Fariseo ya “onla kayo . . . tan aralen yo no antoy kabaliksan to nia, ‘Say panangasi so pirawat ko, ya aliwan say bagat.’” (Mateo 9:13; Oseas 6:6) Masuliwet iray prayuridad da, lapud ta no anggapoy panangasi et andi-kakanaan iray amin a bagat da. Talagan seryoson pamakaaran iya, lapud ibabaga na Biblia a saray “andi panangasi” so nibilang ed saramay minoriay Dios bilang ‘nepeg ya ompatey.’ (Roma 1:31, 32) Sirin, agmakapasurprisa ya inkuan nen Jesus a bilang grupo et saray panguloy relihyon so nigana ed andi-anggaan a kadederal. Mapatnag, say inkaandi panangasi ra so lalon amaloor ed pakasagmak da ed sayan panangukom. (Mateo 23:33) Balet nayarin natulongan iray sinansakey manlapud sayan grupo. Diad konklusyon na parabolo to, nambanikelan nen Jesus ya ipetek so panag-isip na saratan a Judio diad panamegley na saray salita na ama ed say panguloan ya anak to. Nengnengen tayo no panon.

Say Panangasi na Ama

11, 12. Panon ya akikatunongan so ama ed parabolo nen Jesus ed sankapanguloan ya anak to, tan anto so nayarin makatantanda ed impangusar na ama ed balikas a “saya so agim”?

¹¹ “Et inkuanto ed sikato, ‘Ana’ko, sika naynay ka ed siak, et amin a kien ko, kien mo. Balet nakaukolan so panliket tan panambegya; ta saya so agim ya inatey, mabilay lamet; tan abalang, et aromog.’”​—Lucas 15:31, 32.

¹² Imanoen pay impangusar na ama ed balikas a “saya so agim.” Akin? Bueno, nonoten a nen akadkauna, diad impisalita to ed ama to, tinawag na panguloan ya anak so managdarak ya “anak mo”​—aliwan “agik.” Ompatnag ya agto awaten so impanagi ra nen yogtan to. Kanian natan say ama, bilang epekto et kuanto ed panguloan ya anak to: ‘Saya et aliwa lambengat ya ana’ko. Sikato et agim, say mismon kalamanan tan kadalaan mo. Walaan kay rason a manliket ed impawil to!’ Malinew so mensahe nen Jesus ed saray Judion lider. Saray managkasalanan a minudmora ra so diad tua et “agagi” ra. On, “anggapo so maptek a too ed tapew na dalin a manggawa na maong, tan agmankasalanan.” (Eclesiastes 7:20) Saray prominentin Judio so walaay rason, sirin, a manliket ed pagbabawi na saray managkasalanan.

13. Say biglan impanampot na parabolo nen Jesus so angitilak ed sikatayo na anton seryoson tepet?

¹³ Kayarin akikasi so ama, biglan asampotan so parabolo. Singano sasagyaten nen Jesus iray ontatalineng ed sikato a manggaway dili ran konklusyon. Antokamay inkiwas na panguloan ya anak, balang ontatalineng so nipaarap ed tepet a, ‘Kasin miulop ka ed gayagan nalilikna ed tawen sano magbabawi so sakey a managkasalanan?’ Wala met so pankanawnawa na saray Kristiano natan ya ipanengneng so ebat da ed satan a tepet. Panon?

Panangalig ed Panangasi na Dios Natan

14. (a) Panon tayon niyaplika so simbawa nen Pablo a naromog ed Efeso 5:1 no nipaakar ed panangasi? (b) Anton lingon pakatalos nipaakar ed panangasi na Dios so kaukolan tayon pambantayan?

¹⁴ Sinimbawa nen Pablo iray taga-Efeso: “Aligen yo sirin so Dios, singa anak to kayon inararo.” (Efeso 5:1) Kanian, bilang Kristianos et kaukolan tayon pablien so panangasi na Dios, ibalap itan a maong ed kapusoan tayo, insan ipatnag iyan kualidad sano pidedenengan tayo so arum. Balet, manepeg so panalwar. Agnepeg a nabaloan so panangasi na Dios bilang panamalemew ed inkaseryoso na kasalanan. Alimbawa, walay arum a nayarin kampanten mangikatunongan, ‘No akapankasalanan ak, lawas a makapanpikasi ak ed Dios parad panamerdona, tan sikatoy magmaliw a mapangasi.’ Mipadpara so ontan ya awawey ed tinukoy na managsulat na Biblia a si Judas “a gagawaen dan baraan so agkanepegan a panangasi na Dios ed malukak a kondukta.” (Judas 4, NW) Anggaman mapangasi si Jehova, “diad anggan anton paraan et agto ipuera so dusa” sano mideneng ed saray agmagbabawin managgaway mauges.​—Exodo 34:7, NW; ikompara so Josue 24:19; 1 Juan 5:16.

15. (a) Akin a kaukolan a mantinien na mamatatken so balansin panmoria ed panangasi? (b) Anggaman agkokonsintien so sigagagalan panaggaway mauges, antoy nepeg a panggunaetan a gawaen na mamatatken, tan akin?

¹⁵ Diad biek a dapag, kaukolan a magmaliw itayon maalwar met ed pambantay sumpad sananey nin inkalablabas​—say tendensyan magmaliw a mapeget tan maukom ed saramay mangipapatnag na puron panagbabawi tan maridios a kaermenan ed saray kasalanan da. (2 Corinto 7:11) Lapud nimatalek ed mamatatken so panangasikaso ed saray karnero nen Jehova, importanti a mantinien da so balansin panmoria ed sayan pamaakaran, nagkalalo la sano mamebemben na hudisyal iran pamaakaran. Nepeg a mansiansian malinis so Kristianon kongregasyon, tan Makasulatan so ‘pangekal ed mauges a too’ diad panispelosip. (1 Corinto 5:11-13) Ontan met, maabig ya inatnat so panangasi sano walay malinew a basiyan na satan. Anggaman agkokonsintien na mamatatken so sigagagalan panaggaway mauges, pambanikelan day magmaliw a maaro tan mapangasi, ya agpapalakbatay inkahustisya. Lawas a kabisado ray prinsipyo na Biblia a: “Say panangukom andi-panangasi to ed ag-angipatnag na panangasi; et say panangasi maliket ya onsumpa ed panangukom.”​—Santiago 2:13; Uliran 19:17; Mateo 5:7.

16. (a) Diad pangusar na Biblia, ipanengneng no panon a talagan pilalek nen Jehova ya ompawil ed sikato iray managkasalanan. (b) Panon tayon nidemostra ya aabrasaen tayo met so ipawil na magbabawin managkasalanan?

¹⁶ Malinew ed parabolo na managdarak a pilalek nen Jehova ya ompawil ed sikato iray managkasalanan. On, inanatnat toy imbitasyon ed sikara anggad sano napaneknekan ya ag-ira talagan magbabawi. (Ezequiel 33:11; Malaquias 3:7; Roma 2:4, 5; 2 Pedro 3:9) Singa say ama na managdarak, tratratoen nen Jehova iramay ompawil tekep na dignidad, ya aawaten ira bilang sigpot a membro na pamilya. Kasin aaligen moy Jehova ed sayan pamaakaran? Sano akapawil so sakey a kapananisiaan, ya abayag ya adispelosip, antoy reaksion mo? Amta tayo lan walay “liket ed tawen.” (Lucas 15:7) Balet wala tay liket ed dalin, diad kongregasyon yo, pati diad pusom? Odino, singa say panguloan ya anak ed parabolo, wala tay pan-iimbelan, a singano agmakanepegan ya abrasaen so sakey ya agbalot komon tinmaynan ed pulok na Dios?

17. (a) Anton situasyon so agawa ed inmunan-siglon Corinto, tan panon a binilin nen Pablo iramay walad kongregasyon a mangaasikaso ed pamaakaran? (b) Akin a praktikal so simbawa nen Pablo, tan panon tayon niyaplika itan natan? (Nengnengen met so kahon ed kawanan.)

¹⁷ Pian nausisa tayoy inkasikatayo ed sayan pamaakaran, konsideraen pay agawa nen ngalngali taon 55 K.P. diad Corinto. Diman, walay toon inekal ed kongregasyon a diad kaunoran et intubat toy malinis a kabibilay to. Antoy nepeg a gawaen na agagi? Nepeg da kasin panduaruwaan so panagbabawi to tan itultuloy dan paliisan? Misunian, pinaseseg nen Pablo iray taga-Corinto: “Nepeg yo komon a perdonaen tan ligliwaen yo, agla piga no sayan too nalener ed alabas ya ermen to. Kanian pikasik ed sikayo a paeleten yoy aro yo ed sikato.” (2 Corinto 2:7, 8) Mabetbet, saray magbabawin managgaway mauges so nagkalautlan mainomay a naapektaan na liknaay kababaingan tan inkaermen. Kanian, kaukolan a napaseguroan iraya ya aaroen ira na saray kapananisiaan da tan nen Jehova. (Jeremias 31:3; Roma 1:12) Importanti iya. Akin?

18, 19. (a) Panon so pilimeron impangipanengneng na saray taga-Corinto so pagmamaliw a maluklukak? (b) Panon a say andiay-panangasin awawey so nanresulta ed pagmaliw ya ‘atalonggaringan nen Satanas’ iray taga-Corinto?

¹⁸ Diad panisimbawa ed saray taga-Corinto a mangagamil na panamerdona, inter nen Pablo so sakey ed saray rason ta “pian si Satanas agkomon manalonggaring ed sikatayo ed bengatla; ta aliwa itayon andi-kabat ed saray kasiliban to.” (2 Corinto 2:11) Antoy labay ton ibaga? Bueno, nen pilimero et kaukolan a baaten nen Pablo so kongregasyon na Corinto lapud nagmaliw a maluklukak. Inabuloyan dan mantultuloy iman a too ed kasalanan to ya anggapoy pananusa. Diad panggagawa’d satan, say kongregasyon​—nagkalautla’d mamatatken to​—so akapanpaliket ed si Satanas, lapud ta panliketan ton naderal so ngaran na kongregasyon.​—1 Corinto 5:1-5.

¹⁹ No onsobra ira met ed biek a dapag tan agda perdonaen so managbabawi, ontalonggaring si Satanas ed sikara diad sananey a direksion. Panon? Naanamot to so pagmamaliw dan maruksa tan andiay-panangasi. No say magbabawin managkasalanan et nagmaliw a “nalener ed alabas ya ermen to”​—odino singa ipapatalos na Today’s English Version, “ontanlay ermen to a nagnap lan onsuko”​—agaylan ambelat a responsabilidad so sakbaten na mamatatken ed arap nen Jehova! (Ikompara so Ezequiel 34:6; Santiago 3:1.) Tekep na maabig a rason, kayarin pinasakbayan iray papatumbok to sumpad pakapangigapol ed “saraya ya angkekelag ya ugugaw,” inkuan nen Jesus: “Nengnengen yo so inkasikayo lanlamang; no mankasalanan so agim, sikatoy banoen mo; et no magbabawi, sikatoy palabasen mo.”a​—Lucas 17:1-4.

20. Diad anton paraan a walay liket ed tawen tan diad dalin sano magbabawi so sakey a managkasalanan?

²⁰ Saray nilibon ompapawil diad puron panagdayew a kada taon so misalsalamat ed panangasin inanatnat nen Jehova ed sikara. “Anggapo lay nanonotan kon panaon ed bilay ko ya ontanlay liket ko ed amin a bengatla,” so inkuan na sakey a Kristianon agin bii nipaakar ed inkipawil to. Siempre, onaaniweng so gayaga to ed limog na saray anghel. Komon ta mibiang tayo met ed “liket ed tawen” a nagagawa sano magbabawi so sakey a managkasalanan. (Lucas 15:7) Diad panggawa’d saya, naaalig tayoy panangasi nen Jehova.

[Saray paimano ed leksab]

Diad Panrepaso

◻ Diad anton dalan a mipadpara so panguloan na managdarak ed Judion papanguloy relihyon?

◻ Diad anton paraan ya ag-atalosan na panguloan na managdarak so tuan kabaliksan na inkailalak?

◻ Diad panmorekdek ed panangasi na Dios, anton duaran inkalablabas so kaukolan tayon paliisan?

◻ Panon tayon naalig so panangasi na Dios natan?

[Kahon ed pahina 17]

“PAELETEN YOY ARO YO ED SIKATO”

Nipaakar ed inekal a managgaway mauges ya angipatnag na panagbabawi, oniay inkuan nen Pablo ed kongregasyon na Corinto: “Pikasik ed sikayo a paeleten yoy aro yo ed sikato.” (2 Corinto 2:8) Nipatalos so Griegon salita a “paeleten” ed legal a termino a mankabaliksay “paletan.” On, kaukolan a natebek na saray managbabawin akapawil a sikaray aaroen tan aabrasaen lamet bilang membro na kongregasyon.

Anggaman ontan, nepeg tayon tandaan a maslak ed kongregasyon so agmikabisado ed partikular iran sirkumstansia ya angitonton ed inkaekal na sakey a too odino ed inkipawil to. Niarum ni, nayarin walay pigaran personal a naapektaan odino asakitan​—anganko et mabayag ni ingen​—ed gawan-mauges na sakey a managbabawi. Kanian, say pagmaliw a sensitibo ed ontan iran pamaakaran sano niyanunsio so kipawil et natalosan ya amperen tayoray balikas na panangabrasa anggad nagawaan la itan ed personal a paraan.

Agaylan makapabiskeg-pananisia a naamtaan na saramay nipapawil ya aabrasaen lamet ira bilang membro na Kristianon kongregasyon! Napaseseg tayo iratan a managbabawi diad pitongtong ed sikara tan panggayaga’d pakapitutuyaw ed sikara diad Kingdom Hall, diad ministeryo, tan diad arum a matukoy ya okasyon. Diad panamegley sirin na pamaelet, odino panamalet, ed aro tayo ed sarayan pinabpabli, agtayo leleglemewen ed antokaman a paraan so inkaseryoso na saray kasalanan ya agawaan da. Imbes, kaiba so mangatatawen iran armada, manliket itayo ed katuaan ya inwaklit da lay makasalanan a kurso ra tan pinmawil la ra’d si Jehova.​—Lucas 15:7.

[Litrato ed pahina 15]

Agnanliketan na panguloan ya anak so impawil na agi to