Panakar a Kaibay Dios—Saray Unonan Kundang

“Singger kayo ed Dios, et sikato so onsingger naani ed sikayo.”​—SANTIAGO 4:8.

1, 2. Akin nibagam a baleg a pribilihyo so panlingkor ed si Jehova?

NANIRAP la’d pangawan so too diad loob na pigaran taon. Insan sikatoy impatawag ya omparisi ed manuley na saman a dalin. Maples a linmabas iray agawa. Kamamangta, say priso so pinanserbi ed sankabiskegan a manuley nensaman diad dalin. Nipuesto so datin priso ed sakey a posisyon a walaay baleg a responsabilidad tan ekstraordinaryon kagalangan. Si Jose​—say toon datin akagolonggolong iray sali to​—so manaakar la natan a kaibay ari!​—Genesis 41:14, 39-43; Salmo 105:17, 18.

² Natan, wala so pankanawnawa na totoon makapanlingkor ed sakey a mas babaleg nen say Faraon na Ehipto. Say Supremon Sakey na uniberso so mangiimbita’d sikatayon amin a manlingkor ed sikato. Agaylan makapasagyat a pribilihyo so panggawa’d satan tan say pamayubo ed maapit a relasyon ed si Jehova, say makapanyarin-amin a Dios! Diad Kasulatan, say engranden pakayari tan karlangan ontan met ed inkaulimek, karakpan, tan inkasanting so nisisiglaot ed sikato. (Ezequiel 1:26-28; Apocalipsis 4:1-3) Napatnagan so aro ed amin a pidedeneng to. (1 Juan 4:8) Agton balot mantila. (Numeros 23:19) Tan agbalot didismayaen nen Jehova iramay matoor ed sikato. (Salmo 18:25) Diad itulok ed saray matunong a kakaukolanen to, napanggayagaan tayoy maliket, makabaliksan a bilay natan, a sankanonot so bilay ya andi-anggaan. (Juan 17:3) Anggapon balot so toon manuley a makapangiyopresi na antokaman a bengatlan mipara’d saratan a bendision tan pribilihyo.

3. Diad anton paraan ya ‘akiulop [si Noe] ed Dios’?

³ Nensaman, determinadon nambilay si patriarkan Noe a mitunosan ed linawa tan gagala na Dios. Nipaakar ed sikato, oniay inkuan na Biblia: “Si Noe sakey a too a maptek tan nagnap ed saray kapolian to, si Noe akiulop-ulop ed [“nanakar a kaibay,” NW] Dios.” (Genesis 6:9) Siempre, aliwan literal a nanakar si Noe a kaiba toy Jehova, lapud ta anggapo ni anggan sakey a toon “akanengneng ed Dios anggan kapigan.” (Juan 1:18) Imbes, nanakar si Noe a kaibay Dios diad pantalos a ginawa toy pagagawa ed sikato na Dios. Lapud intalaga nen Noe so bilay to ed panggaway linawa nen Jehova, nanggayagaan toy maligsa, maapit a relasyon ed Makapanyarin-amin a Dios. Singa si Noe, minilyon natan so ‘manaakar a kaibay Dios’ diad pambibilay a mitunosan ed simbawa tan instruksion nen Jehova. Panon a nigapo na sakey a too so ontan a kurso?

Makanakana so Suston Pikakabat

4. Panon so pangibabangat nen Jehova ed totoo to?

⁴ Pian makapanakar a kaibay Jehova, sikatoy nepeg tayo nin kabaten ya unona. Impasakbay nen propeta Isaias: “Nagawa dia ed saray kaunoran ya agew, a say palandey na abung nen Jehova niletneg ed toktok na saray palandey, tan nipatagey ed labas na saray pukdol; et saray amin a nasyon onagus ira ya angga ed sikato. Et dakerakel a baley so onla tan kuan da, ‘Dago kayo, tan ontatdang itayo ed palandey nen Jehova, ed abung na Dios nen Jacob; ta ibangat to itayo ed saray dalan to, tan manakar itayo dia ed saray basbas to;’ ta manlapu ed Sion ompaway so tunong, tan say salita nen Jehova manlapu ed Jerusalem.” (Isaias 2:2, 3) On, makapanmatalek itayo a bangatan nen Jehova ya amin iramay manggugunaet a mankurang ed saray dalan to. Intarya la nen Jehova so Salita to, say Biblia, tan tutulongan to itayon natalosan itan. Say sakey a paraan a panggagawa to’d saya et diad panamegley na “[say] matoor tan makabat ya aripen.” (Mateo 24:45-47) Uusaren nen Jehova so ‘say matoor ya aripen’ a mangitaryay espiritual ya instruksion diad panamegley na nibase’d Biblia iran palapagan, Kristiano iran miting, tan say uksoyan na libren panangiyaral na Biblia. Tutulongan met na Dios so totoo to a talosan so Salita to diad panamegley na masanton espiritu to.​—1 Corinto 2:10-16.

5. Akin a mabmabli so Makasulatan a katuaan?

⁵ Anggano agtayo babayaran na kuarta so katuaan na Biblia, mabmabli itan. Legan tayon aaraley Salitay Dios, nakakabatan tayon mismo so Dios​—say ngaran to, say personalidad to, say gagala to, tan say paraan na pidedeneng to’d totoo. Naamtaan tayo met iray manangibulos ya ebat ed saray manunan tepet nipaakar ed bilay: Akin a wadia itayo? Akin ya aabuloyan na Dios so kairapan? Anto so itatarya na arapen? Akin ya ontakken tan ompatey itayo? Wala tay bilay kayari patey? Niarum ni, naaralan tayo so linaway Dios ed sikatayo, salanti, no panon so nepeg a panakar tayo ta pian sikatoy napaliket tayon maong. Naamtaan tayon saray kakaukolanen to et makatunongan tan alay abig a makagungguna sano manbilay tayon unong ed saratan. No anggapo so instruksion na Dios, agtayon balot natalosan iratan.

6. Anton kurso so nasarag tayon gegemtanen lapu ed suston pikakabat ed Biblia?

⁶ Mabiskeg so katuaay Biblia tan pakiwasen to itayon manggaway pananguman ed kabibilay tayo. (Hebreos 4:12) Sakbay tayon nawalaay pikakabat ed Kasulatan, makapanakar ti lambengat “unong ed kaugalian na sayan mundo.” (Efeso 2:2) Balet detalyadon idaratak ed sikatayo na suston pikakabat ed Salitay Dios so duman kurso ta pian ‘makapankurang itayon makana ed Katawan ya onarap ed amin a makapaliket [ed sikato].’ (Colosas 1:10) Agaylan liket so unona iran ikurang tayo diad panakar a kaibay Jehova, say sankatalonggaringan a Persona ed intiron uniberso!​—Lucas 11:28.

Duaran Importantin Kundang​—Dedikasyon tan Bautismo

7. Legan tayon aaralen so Salitay Dios, anton katuaan nipaakar ed panangidauloy too so nalinewan?

⁷ Sano ombulaslas itayo ed pakatalos ed Biblia, onggapo itayon mangusisa ed pakpakurang na totoo tan say mismon kabibilay tayo unong ed espiritual a liwawa na Salitay Dios. Nalinewan sirin so importantin katuaan. Satan a katuaan so imbalikas la nensaman nen propeta Jeremias, ya angisulat: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Say totoo​—amin tayo​—so mankakaukolay panangidirehi na Dios.

8. (a) Anto so mamapakiwas ed totoo pian mangidedika ed Dios? (b) Anto so Kristianon dedikasyon?

⁸ Say pakatalos ed sayan makanan katuaan so mamakiwas ed sikatayon paiwanwan ed si Jehova. Tan pakiwasen itayo na aro ed Dios pian idedika tayoy bilay tayo’d sikato. Say kabaliksay pangidedika ed Dios et onasingger ed sikato diad pikakasi tan masimoon ya isipan ya usaren so bilay tayon manlingkor ed sikato tan sitotoor a mankurang ed saray dalan to. Diad panggawa’d saya, natutumbok tayo so alimbawa nen Jesus, ya angipresentay inkasikato ed si Jehova tekep na mapekder a determinasyon a manumpal ed linawa na Dios.​—Hebreos 10:7.

9. Akin ya idededika na saray indibidual so bilay da ed si Jehova?

⁹ Agbalot dedetdetan odino papaskaren nen Jehova a Dios so siopaman pian mangidedika’d sikato. (Ikompara so 2 Corinto 9:7.) Niarum ni, ag-iilaloan na Dios so siopaman a mangidedikay bilay to ed Sikato makasengeg ed sigbosigbon emosyon. Antis a nabautismoan, nepeg lan magmaliw a babangatan so sakey a too, tan mankakaukolan itan na masimoon a sagpot pian nawalaay pikakabat. (Mateo 28:19, 20) Akikasi si Pablo ed saramay abautismoan la ya ‘ipatnag day laman da a mabilay a bagat, masantos, makapaliket ed Dios, ta sikato so maespiritu a lingkor da [“ya atekepay pakayari na panagkatunongan,” NW].’ (Roma 12:1) Dia met ed pangagamil tayo’d pakayari na panagkatunongan tayo so makapanggawa tayoy dedikasyon ed si Jehova a Dios. Kayarin naamtaan no antoy nalalanor tan maalwar a makapankatunongan ed pamaakaran, mabulbulos tan magaygayaga tayon idedikay bilay tayo’d Dios.​—Salmo 110:3.

10. Panon a misiglaotan so dedikasyon ed bautismo?

¹⁰ Kayari na personal ya inyasingger ed Dios diad pikakasi pian ibalikas tayoy determinasyon tayon mankurang ed saray dalan to, gawaen tayoy ontumbok a kundang. Ipaamta tayo’d publiko so dedikasyon tayo diad panamegley na panpabautismo tayo ed danum. Saya so mapublikon panangiyabawag a sinambaan tayoy manggaway linawa na Dios. Kagapoy mangaraldalin a ministeryo to, si Jesus so binautismoan nen Juan, ya angipanengneng sirin ed sikatayo na alimbawa. (Mateo 3:13-17) Saginonor, ingganggan nen Jesus iray patumbok to a manggaway babangatan tan bautismoan ira. Kanian, say dedikasyon tan bautismo so makanakana iran kundang parad siopaman a manpipilalek a manakar a kaibay Jehova.

11, 12. (a) Panon a nayarin nipara so bautismo ed kasal? (b) Anton panpadpara so naala manlapud say relasyon tayo’d si Jehova tan ed say relasyon na asawan laki tan bii?

¹¹ Say pagmaliw a dedikado, bautismadon babangatan nen Jesu-Kristo so mipadpara lawari ed piaasawa. Diad dakel a daldalin, wala niray pigaran kundang sakbay na agew na kasal. Makapandumog so laki tan bii, makapankabat ira ed balang sakey, tan makapaninaroan. Insan mansipanan. Nipabitar ed kasal so adesisyonan dan dua​—say iloob ed panamaley tan panamong bilang sanasawa. Say kasal so mapublikon pakatandaan ed gapoan na satan a nikadkaduman relasyon. Satan a petsa so mananda ed gapoan na panamaley. Mipadpara, say bautismo so mananda ed gapoan na sakey a bilay a nitalaga ed panakar diad nidedikan relasyon ed si Jehova.

¹² Konsideraen so sakey nin panpadpara. Kayari agew na kasal, kaukolan ya onaralem tan onnelet so aroan na asawan laki tan bii. Pian mas onapit ed balang sakey, nepeg a mabulos a panggunaetan na sankapareha so panmantini tan pamabiskeg ed relasyon dan sanasawa. Anggaman ag-itayo mikasamento ed Dios, kayari bautismo tayo et nepeg tayon mantinien so maapit a relasyon ed si Jehova. Iimanoen tan aapresiaen toray sagpot tayon manggaway linawa to tan onaapit met ed sikatayo. “Singger kayo ed Dios,” so insulat nen babangatan a Santiago, “et sikato so onsingger naani ed sikayo.”​—Santiago 4:8.

Panakar ed Saray Bakat nen Jesus

13. Diad panaakar a kaibay Dios, siopan alimbawa so kaukolan tayon tumboken?

¹³ Pian makapanakar a kaiba si Jehova, nepeg tayon tumbokey alimbawan impanengneng nen Jesu-Kristo. Insulat nen apostol Pedro: “Ta saya so inkatawag yo, ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Lapud ayadyari si Jesus tan aliwa itayon ayadyari, agtayo naspot a natumbok so alimbawan impanengneng to. Anggaman kuan, iilaloan itayo nen Jehova a gawaen so sankaabigan a nayarian tayo. Konsideraen tayo pay limaran aspekto na bilay tan ministeryo nen Jesus a kaukolan a panggunaetan ya aligen na dedikadon Kristianos.

14. Antoy nalalanor ed pakapikabat ed Salitay Dios?

¹⁴ Walaan si Jesus na susto tan nagnap a pikakabat ed Salitay Dios. Legan na ministeryo to, si Jesus so mabetbet ya angaon ed Hebreon Kasulatan. (Lucas 4:4, 8) Siempre, angaon met iray marelmeng a papanguloy relihyon ed saraman ya agew manlapud Kasulatan. (Mateo 22:23, 24) Say pidumaan to et atalosan nen Jesus so kabaliksan na Kasulatan, tan inyaplika to iratan ed bilay to. Agto labat amta so direktan talos na Ganggan noagta say peteg a kabaliksan na satan. Legan tayon tutumboken so alimbawa nen Kristo, kaukolan ti met a panggunaetan a talosan so Salitay Dios, randanen so talos, odino peteg a kabaliksan, na satan. Diad panggawa ed satan, magmaliw itayon naabobonan na Dios a komikimey a makayarin ‘mangagamil a matunong ed salita a tua.’​—2 Timoteo 2:15.

15. Panon ya impanengneng nen Jesus so alimbawa diad pangitongtong nipaakar ed Dios?

¹⁵ Intongtong nen Kristo Jesus ed arum so nipaakar ed mangatatawen ya Ama to. Agto inkibot so pikakabat to’d Salitay Dios. Anggan say kakabusol to so anawag ed sikato bilang “Managbangat,” lapud inerman a laen to et intongtong to ed arum so nipaakar ed si Jehova tan ed saray gagala To. (Mateo 12:38) Mapublikon nampulong si Jesus diad sular na templo, diad saray sinagoga, diad saray syudad, tan diad nikaumaan. (Marcos 1:39; Lucas 8:1; Juan 18:20) Sikatoy nambangat tekep na panangabagey tan panangasi, ya impalikna toy aro ed saramay tinutulongan to. (Mateo 4:23) Saramay ontutumbok ed alimbawa nen Jesus so makaromog met na dakel a pasen tan paraan pian nibangat so arum nipaakar ed si Jehova a Dios tan say makapakelaw iran gagala to.

16. Panon kaapit so siglaotan nen Jesus ed saray kaparan managdayew ed si Jehova?

¹⁶ Walaan na maapit a pisisiglaotan si Jesus ed saramay mandadayew ed si Jehova. Legan a mansasalita si Jesus ed saray totoo ed sakey ya inkagawa, sinmabi so ina tan saray agmananisian agagi to pian misalita ed sikato. Ibabaga na salaysay na Biblia: “Inkuan na sakey ed Jesus: ‘Nengneng mo, si inam tan saray agim wala’ra ed paway, ya anapen day pakapisalita ed sika.’ Inmebat balet tan inkuanto’d samay angibaga ed sikato, ‘Siopa so inak, tan siopara so saray agik?’ Et inturo to so lima to’d saray babangatan to, tan inkuan to, ‘Niraya, so inak tan saray agik! Ta siopaman a manggawa na linawa nen Amak a wala’d tawen sikato so agik a laki, tan agik a bii, tan inak.’” (Mateo 12:47-50) Agto labay ya ibagan intalirak la nen Jesus so pamilya to, lapud ta napaneknekan diad saray sinmaginonor ya ebento ya aliwan ontan so ginawa to. (Juan 19:25-27) Ingen, idadanet na sayan salaysay so panangaro nen Jesus ed saray kapananisiaan. Ontan met natan, saramay manaakar a kaibay Dios so miuulop ed arum a lingkor nen Jehova tan aaroen da iran maong.​—1 Pedro 4:8.

17. Panoy impakalikna nen Jesus ed panggaway linawa na mangatatawen ya Ama to, tan panon itan a mangapekta’d sikatayo?

¹⁷ Diad panggagaway linawa na Dios, impanengneng nen Jesus so aro to ed mangatatawen ya Ama to. Tinulok nen Jesus si Jehova diad amin a bengatla. Inkuanto: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Inkuan met nen Kristo: “Gawaen ko lawas so saray bengatla a makapaliket ed [Dios].” (Juan 8:29) Ontanlay impangaro nen Jesus ed mangatatawen ya Ama to a “nampaabeba a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].” (Filipos 2:8) Bilang resulta, si Jesus so binendisionan nen Jehova, ya intandoro to ed posisyon a walaay autoridad tan kagalangan ya onsesegunda labat ed si Jehova a mismo. (Filipos 2:9-11) Singa si Jesus, ipanengneng tayo so aro tayo ed Dios diad panumpal ed saray ganggan to tan diad panggawa’d linawa to.​—1 Juan 5:3.

18. Diad anton paraan ya impanengneng nen Jesus so alimbawa nipaakar ed pikakasi?

¹⁸ Si Jesus so toon mapikasi. Sikatoy nampikasi diad inkabautismoan to. (Lucas 3:21) Sakbay ton pilien so 12 apostoles to, inggana toy sanlabi pian manpikasi. (Lucas 6:12, 13) Imbangat nen Jesus iray babangatan to no panon so manpikasi. (Lucas 11:1-4) Diad samay labin sakbay na impatey to, impikasi to tan akipikasi ed saray babangatan to. (Juan 17:1-26) Say pikakasi et importantin kabiangay bilay nen Jesus, a singa met ed kabibilay tayo, lapud ta papatumbok to itayo. Agaylan kagalangan so pakapitongtong ed Sankatalbaan a Soberano diad pikakasi! Niarum ni, eebatan nen Jehova iray pikakasi, ta oniay insulat nen Juan: “Saya so katalkan tayo ed sikato, a no mankerew itayo na bengatla unong ed linawa to, sikato dengelen to itayo. Tan no amta tayo a sikato dengelen to itayo ed bengatla a kerew tayo ed sikato, amta tayo a wala ra so saray kerew a kinaliktan tayo ed sikato.”​—1 Juan 5:14, 15.

19. (a) Antoran kualidad nen Jesus so kaukolan tayon aligen? (b) Diad antoran paraan a nagunggunaan itayo manlapud panaral ed bilay tan ministeryo nen Jesus?

¹⁹ Dakel ni so naaralan diad maapit a pangusisa ed mangaraldalin a bilay tan ministeryo nen Jesu-Kristo! Molimolien iray kualidad ya impatnag to: aro, panangabagey, panangasi, biskeg, inkabalansi, inkamakatunongan, inkamapaabeba, pakpel, tan inkamabulos. No lalo tayon naaralan so nipaakar ed si Jesus, mas panpilalekan tayoy magmaliw matoor a papatumbok to. Say pikakabat ed si Jesus so mangiyapit met ed sikatayo ed si Jehova. Likud ni, si Jesus so naspot a manangiyaninag ed mangatatawen ya Ama to. Ontanlay inkaapit to’d si Jehova a nibaga ton: “Say akanengneng ed siak anengneng to [met] so Ama.”​—Juan 14:9.

Manmatalek ed Dios a Sustunien To Ka

20. Panon tayon nawalaay kompiyansa diad panakar a kaibay Jehova?

²⁰ No manaaral ni labat ya onakar so ugugaw, aliwan diretso iray kakukurang da. Panon dan naaralay makapanakar a walaay kompiyansa? Dia lambengat ed panagpasal tan inkaanos. Bueno, pambanikelan na saramay manaakar a kaibay Jehova a mankurang a walaay kompiyansa, dirediretson kakukutbang. Mankaukolan met iya na panaon tan inkaanos. Indanet nen Pablo so kaimportantian na inkaanos a manakar a kaibay Dios sanen insulat to: “Kaunoran sirin, agagi, pikasi mi kayo tan bangatan mi kayo ed Katawan tayo a Jesus, pian unong na inawat yo ed sikami no panon so manepeg a panakar yo tan pamaliket yo ed Dios, ontan so panakar yo, pian sikayo so ondakerakel komon.”​—1 Tesalonica 4:1.

21. Legan tayon manaakar a kaibay Jehova, antoran bendision so panggayagaan tayo?

²¹ No sikatayoy sigpot a debosyonado ed Dios, sikatoy ontulong ed sikatayo pian mansiansian makapanakar a kaiba to. (Isaias 40:29-31) Anggapoy naiyopresi na sayan mundo a makapipara ed saray bendision ya iiter to’d saramay manaakar ed saray dalan to. Sikato so ‘mangibangat ed sikatayo nipaakar ed nabang tayo, a mangitonton ed sikatayo ed dalan a laen tayo komon. Tan no komon ta dinengel tayo so saray bilin to, dia ed ontan say deen tayo singa komon sakey ya ilog, tan say inkatunong tayo singa komon daluyon na dayat.’ (Isaias 48:17, 18) Diad pangawat na imbitasyon a manakar a kaibay Dios tan diad matoor a panggawa’d satan, napanggayagaan tayoy pikakareenan ed sikato ed ando lan ando.

Panon Yon Ebatan?

◻ Akin a kagalangan so panakar a kaibay tuan Dios?

◻ Akin a say panagaral, dedikasyon, tan bautismo so unona iran kundang diad panakar a kaibay Jehova?

◻ Panon tayon nayarin tumboken iray bakat nen Jesus?

◻ Panon tayon naamtaan a sustunien itayo nen Jehova diad piiiba tayo’d sikaton manakar?

[Saray litrato ed pahina 13]

Say panagaral, dedikasyon, tan bautismo so unona iran kundang diad panakar a kaibay Dios