Ginawa Ra so Linawa nen Jehova

Sakey a Kiwas na Panamerdona so Angilukas na Dalan Parad Kisalba

SARAY samploran ilalak a lalaki nen Jacob ya akaalagey ed arap na primo ministro na Ehipto so nankokomplot ed teriblin sekreto. Pigaran taon ed akadkauna et inlako ray Jose ya agi ra’d ama ed inkaaripen, a plaplanoen dan ibaga ed ama ra a sikatoy pinatey na maatap ya ayep.​—Genesis 37:18-35.

Natan, kalabas na manga 20 taon, sarayan samploran lalaki so apaskar lapud pirmin eras ya onla ed Ehipto pian manaliw na trigo. Balet ta agmainomay iray bengabengatla. Say primo ministro, ya inkargado met ed tagano, so angakusa ed sikara bilang espiya. Impaipisok toy sakey ed sikara tan pinasempet toy arum pian awiten day bulirek ya agi ra, si Benjamin. Sanen ginawa ra iman, implano na primo ministro a naaresto si Benjamin.​—Genesis 42:1–44:12.

Sinmuppiat si Juda, sakey ed ilalak nen Jacob. ‘No ompawil kami ya agmi iba si Benjamin,’ inkuanto, ‘ompatey si ama mi.’ Insan walay agawan ag-inilaloan nen Juda nisay siopaman ed kakaiba ton nambaroy. Kayarin ingganggan na primo ministro ya ompaway ed silir so amin likud ed ilalak nen Jacob, sikatoy inmakis a makmaksil. Insan, nen kinmalma la, inkuanto: “Siak si Jose.”​—Genesis 44:18–45:3.

Panangasi tan Inkisalba

“Mabilay [ta] ni amak?” intepet nen Jose ed agagi to’d ama. Anggapoy inmebat. On, ag-amta no antoy ibaga na agagi ed ama nen Jose. Kasin naliketan ira, odino natalagnaw ira? Sakey ni et sikatoy inlako ra ed inkaaripen, 20 taon lay apalabas. Walaan si Jose na autoridad ya ipaipisok ira, pasempeten iran anggapoy tagano, odino​—mas grabe ni​—ipapatey ira! Parad dugan rason, saray agagi nen Jose ed ama so “ag-ira akaebat ta agonigon ira ed arapan to.”​—Genesis 45:3.

Tampol a tinambayo nen Jose irayan lalaki. “Asingger kayo ed siak,” inkuanto. Sikaray tinmulok. Insan inkuanto: “Siak si Jose ya agi yo, ya inlako yo ed Ehipto. Et natan agkayo komon manermen, nisay kasnokan yo so inkasikayo, lapu ed inlako yoak dia: ta say Dios imbaki toak dia ya inmuna nen say sikayo a mangyagel na bilay.”​—Genesis 45:4, 5.

Ag-angasi si Jose ya anggapoy basiyan. Naobserbaan to lay panagbabawi ra. Alimbawa, sanen inakusa nen Jose iray agagi to’d ama bilang espiya, apasikyawan tora a kuanda ed inkasikara: “Peteg ya akapankasalanan itayo a nipaakar ed agi tayo, ta anengneng tayo so irap na linawa to nen akikaskasi ed sikatayo, et agtayo labatla dinengel; kanian ondapo ed sikatayo so saya ya irap na linawa.” (Genesis 42:21) Ontan met, inyopresi nen Juda a sandian toy Benjamin a magmaliw ya aripen ta pian nipawil so kalangweran ed ama to.​—Genesis 44:33, 34.

Kanian, walaay katunongan nen Jose ed impanginatnat na panangasi. On, amoria ton say panggawa ed satan so manresulta’d kisalba na intiron pamilya to. Diad ontan et inkuan nen Jose ed agagi to’d ama ya ompawil ira ed si ama ra’n Jacob, tan ikuan da ed sikato: “Onia so kuan nen anak mo a Jose, ‘Say Dios ginawa toak a katawan na amin ya Ehipto: onla kayo dia ed siak, agkayo mantatantan. Et manayam ka ed dalin na Gosen tan wala ka naani ed asingger ed siak, dia ed siak tan saray anak yo, tan saray anak na saray anak yo tan saray ayayep mon angkekelag man o angkakabaleg, tan amin a wala ed sika. Et taganoen ta kayo’d man.’”​—Genesis 45:9-11.

Babaleg a Jose

Natawag si Jesu-Kristo bilang Babaleg a Jose, ta walaray mapatnag a panulibayan da. Singa si Jose, minaltrato met si Jesus na agagi to, a kapara toran kapolian nen Abraham. (Ikompara so Gawa 2:14, 29, 37.) Ingen, sarayan duan lalaki so akasagmak na nikadkaduman impanguman. Sinmabi panaon, say kipapasen nen Jose bilang aripen so nauman a nagmaliw a primo ministro, ya onkokomadua ed si Faraon. Mipadpara, pinaoli nen Jehova si Jesus manlapud inaatey tan intandoro to ed superyor a posisyon “ed nikawanan na Dios.”​—Gawa 2:33; Filipos 2:9-11.

Bilang primo ministro, nayarian nen Jose so mangiter na tagano ed amin ya onla ed Ehipto pian manaliw na trigo. Natan, say Babaleg a Jose so walaan na matoor tan makabat ya aripen a klase ed dalin a diad panamegley na satan et niiter toy espiritual a tagano ‘diad manepeg a panaon.’ (Mateo 24:45-47; Lucas 12:42-44) On, saramay onaasingger ed si Jesus so “agla ra naerasan, tan agla ra naapgaan . . . ta say Kordero a wala ed pegley na trono sikatoy pastol da, tan sikara so irawa’to ed saray subol na danudanum na bilay.”​—Apocalipsis 7:16, 17.

Leksion Parad Sikatayo

Angitarya si Jose na matalonggaring ya alimbawa na panangasi. Kinaukolan na mapeget a hustisya so panusa to komon ed saramay angilako’d sikato ed inkaaripen. Diad kasunian, lapud sentimento et apakiwas komon ya ibaliwala to lay kasalanan da. Agginawa iratan nen Jose. Imbes, sinubok toy panagbabawi na agagi to’d ama. Insan, sanen anengneng ton masimoon so pagbabawi ra, pinerdona tora.

Naalig tayo si Jose. Sano mangipapanengneng na tuan impapuson panamasimbalo so sakey a nankasalanan ed sikatayo, kaukolan tayon perdonaen. Siempre, agtayon balot abuloyan so sentimento pian sakbongan ti lay graben kasalanan. Diad biek a dapag, agtayo abuloyan iray imbel na linawa a mangamper ed sikatayo a manggawa na puron panagbabawi. Kanian komon ta “[“mantultuloy a,” NW] mantetepelan so sakey tan sakey, tan manpeperdonaan so balang sakey,” ed sikatayo. (Colosas 3:13) Diad panggawa ed satan, naalig tayoy Dios tayo a Jehova, ya ‘akaparaan a mamerdona.’​—Salmo 86:5; Miqueas 7:18, 19.