Nankakasakey ed Sankaabigan a Dalan na Bilay
No say populasyon na mundo et mantultuloy nin ondakel, diad magano et magmaliw lan anemiran bilyon so totoo ed dalin. Anggaman amin et nanlapud saksakey ya inmunan ateng, maslak et ag-ompatnag a mamidbir a sikaray membro na sankagloboan a pamilya tan walaay eebatan ed makabat tan maaron Manamalsa. Say agpankakasakey tan panlalaban na saray nasyon, rasa, tan kultura so mamapaneknek ed sayan maermen a kipapasen na saray pakurang.
NISENGEG ed peles iran kipapasen na mundo, ompatnag ya agnadampot a kalat so sankagloboan a pankakasakey. Onia so ibabaga na The Columbia History of the World: “Diad sankaimportantian a tepet ed no panoy pambilay a nankakasakey, say peles a mundo so andian na anggan sakey a balon ideya a niiter, anggapon balot.”
Balet, say kitarok na pankakasakey ed limog na amin a manaayam ed dalin so agmankakaukolan na balon ideya. Say basbas ed pankakasakey so nidatak ed Masanton Kasulatan. Nisesentro itan ed panagdayew ed samay Sakey ya amalsa ed dalin tan ed amin a bilay ditan. Wala la natan ed limog na totoo na Dios so tuan pankakasakey ed kanonotan, gagala, tan ed dalan na bilay. Manbilang na masulok a limara tan kapalduan milyon ed 233 a daldalin, sikaray nankakasakey ed kombiksion da a say dalan na Dios ed bilay so sankaabigan a dalan. Singa say salmista, ipipikasi ra: “Ibangat moak ed dalan mo, O Jehova; manakar ak ed katuaan mo: ipasakey mo so pusok ya ontakot ed ngaran mo.”—Salmo 86:11.
Sayan pankakasakey na totoo ed puron panagdayew so abayaglan impasakbay nen propeta Isaias. Insulat to: “Nagawa dia ed saray kaunoran ya agew, a say palandey na abung nen Jehova niletneg ed toktok na saray palandey, tan nipatagey ed labas na saray pukdol; et saray amin a nasyon onagus ira ya angga ed sikato. Et dakerakel a baley so onla tan kuanda, Dago kayo, tan ontatdang itayo ed palandey nen Jehova, ed abung na Dios nen Jacob; ta ibangat to itayo ed saray dalan to, tan manakar itayo dia ed saray basbas to.”—Isaias 2:2, 3.
Nikadkaduma so pankakasakey na Tastasi nen Jehova. Diad masulok ya 87,000 a kongregasyon ed sankamundoan, sikaray parparehon natatagano ed espiritual diad saray miting da ed kada sinimba. (Mateo 24:45-47) Balet, diad kapegleyan na 1998 anggad asasakbay na 1999, impanengneng na Tastasi so pankakasakey da ed sananey a dalan—diad impandaragup da ed taloy-agew a “Dalan na Dios ed Bilay” iran Kombension ed intiron mundo. Diad 13 bansa, sarayan pandaragup et inlaktip toy dakel a delegado a nanlalapud nanduruman daldalin tan tinawag iratan ya internasyonal a kombension. Arum so atawag bilang distrito iran kombension. Balet amin na sarayan kombension so angiparungtal na parparehon programa na maespiritual iran maabig a bengatla.
Agaylan makapaliket so pakanengneng ed maliket, aka-desinte iran delegado ya ondaragsa ed saray auditorium tan estadyum pian paibangat ed si Jehova! Kaslakan la so balikas na sakey a delegado ed internasyonal a kombension ya agawa ed Michigan, E.U.A. Inkuanto: “Baleg a gayaga so pakanengneng ed agagi tayo a nanlapud intiron mundo—say Czech Republic, Barbados, Nigeria, Hungary, Inglatera, Holland, Ethiopia, Kenya, tan dakel nin arum a daldalin—a manaabrasaan! Alay santing so pakanengneng ed agagi a nankakasakey, a manag-agus iray lua na gayaga lapud aro ra ed sakey tan sakey tan ed baleg a Dios da, si Jehova.” Usisaen na ontumbok ya artikulo so programa ed kombension a nanggayagaan na minilyon ed sankadalinan.
[Picture Credit Line ed pahina 3]
Mountain High Maps® Copyright © 1997 Digital Wisdom, Inc.