Kasin Aawaten na Arum so Konsehom?

LAWAS a maabig so resulta na matukoy a konseho no niiter ed dugan paraan. Tua ta? Andi! Anggan say ekselentin konseho ya iiter na saray makayarin managkonseho so mabetbet ya ibabaliwala odino ipupulisay.​—Uliran 29:19.

Agawa iya sanen sinimbawa nen Jehova si Cain, ya amayubo’d panggula’d agi to, si Abel. (Genesis 4:3-5) Lapud amta toy kapeligroan ya ipaarap na saya ed si Cain, inkuan na Dios ed sikato: “Akin et pinmetang ka? Tan akin et nalmay so lupam? No manggawa ka na maong, agka ta nitandoro? Et no agka manggawa na maong, say kasalanan onkepkep ed pinto. Et say panpirawatan to dia ed sika et anggaman ontan sikay​—manguley ed sikato?”​—Genesis 4:6, 7.

Inyaliling sirin nen Jehova so kasalanan ed sakey a managsimaw a manaalagar ya ondugpa ed si Cain no itultuloy ton em-emay imbel to’d si agi to. (Ikompara so Santiago 1:14, 15.) Wala ni panaon nen Cain a manguman ed awawey to, pian ‘manggaway maong’ imbes a gemtanen so makadesyang a kurang. Makapaermen, agtinmalineng si Cain. Impulisay toy konseho nen Jehova, tan makapasinagem iray nansumpalan to.

Arum so manimbel tan ipulisay so dinanman a klase na konseho. (Uliran 1:22-30) Agta kasi kasalanan na managkonseho no akin ya ag-inawat so konseho? (Job 38:2) Kasin sikan mangiiter na konseho et gagawaen mon mairap ya awaten itan na arum? Lapud ag-inkayadyari na too et gawaen to itan a peteg a kapeligroan. Balet napamelag moy posibilidad ed pakagawa na satan diad maalwar a panumbok ed saray prinsipyo na Biblia. Konsideraen tayo pay pigara ed saratan.

‘Ipetek ed Espiritu na Kaumildian’

“Agagi, anggan say sakey a too et akapanggawa na antokaman a lingon kundang sakbay ton naamtaan itan, sikayo a walaan na espiritual iran kualipikasyon et panggunaetan yon ipetek so ontan a too ed espiritu na kaumildian, legan yon iimanoen so inkasikayo, ta ompan natukso kayo met.” (Galacia 6:1, NW) Sirin impabitar nen apostol Pablo a saramay walaan na “espiritual iran kualipikasyon” so nepeg a manggunaet a mangipetek ed sakey a Kristiano ya ‘akagawa na lingon kundang sakbay ton naamtaan itan.’ No maminsan et ompatnag a saramay agtanto kualipikadon manggawa ed satan so mas onkiling a mangiter na simbawa. Kanian, agmasyadon maples a manimbawa ed arum. (Uliran 10:19; Santiago 1:19; 3:1) Saray mamatatken ed kongregasyon so manunan kualipikado ed espiritual a manggawa ed saya. Siempre, siopaman a matakken ed espiritual a Kristiano so kaukolan a mangiter na pasakbay no naiimano toy sakey ya agi a mamapaarap la’d kapeligroan.

No bilang ta mangiter kay simbawa odino konseho, seguroen a nibase ed maridios a kakabatan so ibagam, aliwan ed saray teorya tan pilosopiya na too. (Colosas 2:8) Aligen imay maalwar a kusinero a maniseguron dinanman iran irerekado et masustansia tan andian na antokaman a nayarin pakasamalan. Seguroen a say konsehom et mapekder a nibase’d Salita na Dios tan aliwan personal ya opinyon labat. (2 Timoteo 3:16, 17) Diad panggawa’d saya, makaseguro kan say konsehom et agmakapasakit ed siopaman.

Say gagala na konseho et pian “ipetek” so nankasalanan, ya ag-ipapaskar so agmabulos a panguman. Say Griegon salitan nipatalos ya “ipetek” so mitukoyan ed termino ya ontutukoy ed pangilira lamet ed akidduas a pukel ta pian ag-onloor. Unong ed si leksikograpon W. E. Vine, isusuheri to met so “kapilitan a pananos tan pantepel ed proseso.” Nonoten pay inkamaamoyot tan dunong a kakaukolanen pian napaliisay agkapilitan a panot-ot. Mipadpara, kaukolan na managkonseho ya agamilen so pirmin alwar ta pian napaliisan so pakapasakit ed samay sisimbawaen. Saya so nagkalalo lan mairap sano walay onkerew na konseho. Sano agkinerew so konsehom, lalon nakakaukolan so babaleg a dunong tan taktika.

Peteg ya agmo ‘nipetek’ so sakey no paningongoten mo. Pian napaliisan iya, lawas nonoten so pankaukolan ed pangipanengneng na “sakey a puso a maabagey, maong a linawa, kauyamoan, kadeenan, kasungdoan.” (Colosas 3:12) No agmaanos so sakey a doktor ed pasiente to, nayarin ibaliwala na pasiente so bilin to tan aglan balot ompawil parad nakakaukolan a panagtambal.

Agkabaliksan na saya a say konseho et kaukolan a kulang na inkapekder. Mapekder si Jesu-Kristo sanen sinimbawa toy pitoran kongregasyon ed distritoy Asia. (Apocalipsis 1:4; 3:1-22) Inikdan tora na pigaran direktaan a tuloy a konseho a nakaukolan dan narengel tan iyaplika. Balet say inkamapekder nen Jesus so lawas atimplaan na kualidades a singa say panangabagey tan inkamapangasi, ya isisindag so maaron espiritu na mangatatawen ya Ama to.​—Salmo 23:1-6; Juan 10:7-15.

Mankonsehon Atekepan na Liga

“Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.” (Colosas 4:6) Say asin so manpananam ed tagano, a gawaen ton makapaayat. Ta pian makapaayat so konsehom, nepeg a niparungtal itan ‘tekep na liga, atimplaan na asin.’ Balet, anggan sankaabigan iray rekadom, nayarin niparungo so tagano ya agmarakep odino niiyan ed plato ya abunbunton. Ontabang so panangan na sakey. Diad tua, ompan mairap ni ingen a bikleren so anggan sankakamot ya aglabay a kanen.

Sano mangokonseho, importanti so pamili na duga iran salita. Inkuan nen makabat a Solomon: “Say salita a makana so kisalita to sikato so singa saray mansanas a balitok.” (Uliran 25:11) Nayarin walad kanonotan to so marakep a pilak a pananginan a masansanting a walaay kinurtin balitok iran mansanas. Agaylan marakdakep a nengnengen itan, tan agaylan apresiaen yon awaten itan bilang sakey a regalo! Ontan met, say pinilin-maong, maliga iran salita so makapaayat a tuloy ed too a panggugunaetan yon tulongan.​—Eclesiastes 12:9, 10.

Diad pisunian, “say masagapsap a salita patoloen to so sanok.” (Uliran 15:1) Say agmatukoy iran salita so mainomay a manresulta’d ot-ot tan sanok imbes ya otang a linawa. Diad tua, aliwan say makapuy iran salita labat noagta pati say aliwan tono na bosis so nayarin pansengegay agpangawat na sakey ed nakakaukolan a maabig a konseho. Say pangiter na konseho ya agmataktika, agmililiknan paraan so aliling toy pangaataki ed sakey tekep na ayura. “Wala so mansalita a botaktak a singa saray kisaksak na kampilan,” kuan na Uliran 12:18. Akin a mansalitan bengatbengat tan mamairap ed sakey ya ontalineng ed konseho?​—Uliran 12:15.

Unong ya inkuan nen Solomon, say konseho so kaukolan a ‘nisalita diad dugan panaon parad satan.’ Importantin tuloy so pangitiempo pian epektibo so konseho! Mapatnag ya agnaapresia na sakey so tagano no anggapoy ganas ton mangan. Anganko et napnapsel ni, odino nayarin sikatoy mansasakit. Say pamilit ed sakey ya agto labay so mangan et agmakabat odino aliwaliwa.

Mankonseho Tekep na Kaabebaan na Nonot

“Gawa yon naspot so liket ko, . . . anggapon balot komon so gawaen yo a lapud kasusumpa o panpasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili; agnengnengen na balang sakey ed sikayo so kayarian ton dili, noag balang sakey ed sikayo nengnengen to met so saray bengatlan kayarian [“personal a kaabigan,” NW] na saray arum.” (Filipos 2:2-4) No maong kan managkonseho, pakiwasen ka na “personal a kaabigan” parad pankaabigan na arum. Ipatnag mo met so “kaabebaan na kalakal” sano mideneng ed saray agagim ed espiritual, ya ikokonsideray arum a superyor nen say sika. Antoy kabaliksan na saya?

Say kaabebaan na nonot so mangamper ed sika ed pangagamil na superyor ya awawey odino tonada. Anggapo’d sikatayo so walaan na rason pian manliknan superyor ed saray kapananisiaan. Balang sakey ed sikatayo so makakalukso a panapanaon. Lapud agmo nabasay puso, nagkalalo lan importantin aghuhusgaan so motibo na sakey a sisimbawaen mo. Nayarin anggapoy mauges a motibo to tan agto amta a wala manayay makapuy ya ugali odino ikikiwas to. Anggan amta to ni bilang a sikatoy makakalukso ed saray kakaukolanen na Dios, andi-duaruwan mas mainomay ton awaten so konseho no niiter a mapaabeba tekep na puron interes ed espiritual a pankaabigan to.

Isipen pa no antoy liknaan mo no inimbitaan ka’d sakey a panangan balet ta ambetebetel tan aliwliway panagtrato na manasangkaili ed sika! Seguradon anggapoy ganas mon mangan. On, “magmaong so pangugtoan ya agagayep, a kawalaan na aro, nen say pinataba a baka tan kawalaan na gula.” (Uliran 15:17) Ontan met, anggan say sankaabigan a konseho so nayarin mairap ya awaten no ipatnag na managkonseho so agto panlabay ed sisimbawaen to odino leleglemewen tan pabpabaingan to. Balet, say aro, respeto ed sakey tan sakey, tan talek so mamainomay ed konseho ya iter tan awaten.​—Colosas 3:14.

Konsehon Inawat

Impanengneng nen propeta Natan so kaabebaan na nonot sanen sinimbawa toy Arin David. Napatnagan so panangaro tan respeto nen Natan ed si David diad imbaga tan ginawa to. Inggapo nen Natan ed sakey ya ilustrasyon ya inkonsidera so posiblin ag-italineng nen David ed simbawa. (2 Samuel 12:1-4) Tinenyeg na propeta so panangaro nen David ed inkahustisya tan inkatunong, anggaman ag-itan apatnagan ed ginawa to ed si Bat-seba. (2 Samuel 11:2-27) Sanen nidanet so punto na ilustrasyon, say impapuson reaksion nen David so: “Nankasalanan ak sumpa ed Jehova.” (2 Samuel 12:7-13) Aliwan singa si Cain, ya agtinmalineng ed si Jehova, sipapaabeban impakorehi si David.

Andi-duaruwan inggiya nen Jehova si Natan, ya ikokonsideray ag-inkayadyari nen David tan say posibilidad ya ompan sikatoy onkiwas ya agpaborabli. Intuloy nen Natan tekep na pirmin taktika tan mapatnag ya inkonsideray David a superyor lapud posisyon to bilang tinuro nen Jehova ya ari. No wala ka’d posisyon a walaay autoridad, nayarin mangiter ka na manepeg a konseho, balet ta mairap ya awaten itan no agka mangipanengneng na kaabebaan na nonot.

Impetek nen Natan si David diad espiritu na kaumildian. Maliga tan maalwar iray salita na propeta ta pian onkiwas si David ed paraan a pankaabigan ton mismo. Agpinakiwas na personal ya interes si Natan, nisay sinali ton impasen a sikatoy superyor ed moral odino espiritual nen say si David. Agaylan alimbawa parad pangibagay duga iran salita ed matukoy a paraan! No ipatnag moy mipadparan awawey, lalon maseguron awaten na arum so konsehom.

[Litrato ed pahina 22]

Singa say masustansian tagano, kaukolan a say konsehom et makapabunigas

[Litrato ed pahina 23]

Gagawaen mo ta’n makaayat so konsehom a singa ra mansanas a balitok ed pilak a pananginan?

[Litrato ed pahina 24]

Sipapaabeban tinenyeg nen Natan so panangaro nen David ed inkahustisya tan inkatunong