Say Bendision nen Jehova ed “Dalin” Tayo
“Amin a bengatla nabilay anggan iner so sabien na ilog.”—EZEQUIEL 47:9.
1, 2. (a) Panon kaimportanti so danum? (b) Anto so ililitrato na danum ed pasingawey nen Ezequiel nipaakar ed ilog?
MAKANAKANA so danum. Akadependi ed satan so amin a pisikal a bilay. Anggapo ed sikatayo so manbilay no anggapo itan. Mandedependi itayo met ed satan parad panaglinis, lapud tunawen tan ekalen na danum iray dutak. Kanian satan so panaames, panpepesak, tan panuuras tayo ni ingen na tagano. Say panggawa’d saya so mangisalba ed bilay tayo.
2 Uusaren na Biblia so danum pian ilitrato so espiritual iran probisyon nen Jehova ed bilay. (Jeremias 2:13; Juan 4:7-15) Lalaktipen na saraya so probisyon na panaglinis ed saray totoo to diad panamegley na dondon bagat nen Kristo tan say pikakabat na Dios a naromog ed Salita to. (Efeso 5:25-27) Diad pasingawey nen Ezequiel nipaakar ed templo, say mamilagron ilog ya onaagus manlapud templo so mangisisimbolo ed ontan iran manangiter-bilay a bendision. Balet kapigay inyagus na satan ya ilog, tan antoy kabaliksan to ed sikatayo natan?
Sakey ya Ilog ya Onaagus ed Nipawil a Dalin
3. Anto so naeksperiensia nen Ezequiel, a singa nireport ed Ezequiel 47:2-12?
3 Bilang kautibo ed Babilonia, kaukolan a tuloy na totoo ed panaon nen Ezequiel iray probisyon nen Jehova. Sirin, agaylan makapaseseg ed si Ezequiel so pakanengneng ed iyaagus na danum a manlalapud santuaryo tan onaagus itan manlapud nipasingawey a templo! Sakey ya anghel so manusukat ed kulos diad 1,000-kasiko iran leetan. Manaralem itan manlapud kalitkalit anggad pueg ya anggad tapi anggad nagmaliw ya ilog a kaukolan lan langoyen. Say ilog so mangiiter na bilay tan inkabuna. (Ezequiel 47:2-11) Nibaga’d si Ezequiel: “Ed abay na ilog ed tapew na pangdel to, ed saya a gilig tan ed saman a gilig, ontubo so amin a kiew a nayari a pambilay.” (Ezequiel 47:12a) Onsalindak so bilay legan ya onaagus so ilog ed Inatey a Dayat—say andiay-bilay a danum! Ondakel iray sira. Onaligwas so panagnegosyoy sira.
4, 5. Panon a mipara so propesiya nen Joel nipaakar ed ilog ed propesiya nen Ezequiel, tan akin a makanakana iya?
4 Sayan marakep a propesiya so nayarin angipanonot ed saray Judion adestiero ed sakey nin propesiyan nirekord ed masulok lan duaran sigloy linmabas: “Ompaway naani so sakey a subol ed abung nen Jehova, et salogen to naani so lawak na Sitim.”a (Joel 3:18) Ipapasakbay na propesiya nen Joel, a singa ed propesiya nen Ezequiel, ya onagus so sakey ya ilog manlapud abung na Dios, say templo, tan mangitarok itan na bilay ed naklangan a pasen.
5 Abayag lan impaliwawa na The Watchtower a say propesiya nen Joel so nasusumpal la ed panaon tayo.b Sirin, maseguron ontan met so walad pasingawey nen Ezequiel. Diad nipawil a dalin na totoo na Dios natan, a singa ed kadaanan ya Israel, talagan onaagus iray probisyon tan bendision nen Jehova.
Mabiskeg ya Agus na Saray Bendision
6. Anto komon so nipanonot ed saray Judio nipaakar ed panangiwalsik na dala ed nipasingawey ya altar?
6 Anto so lapuan na saray bendision ed nipawil a totoo na Dios? Bueno, imanoen a say danum so onaagus manlapud templo na Dios. Ontan met natan, saray bendision so manlalapud si Jehova panamegley na baleg ya espiritual a templo to—say uksoyan parad puron panagdayew. Inyarum na pasingawey nen Ezequiel so importantin detalyi. Diad akindalem a saban, say kulos so onaagus ed altar, diad abalaten na satan. (Ezequiel 47:1) Say altar et walad mismon sentro na nipasingawey a templo. Maas-asigtan deneskribe itan nen Jehova ed si Ezequiel tan ingganggan ton iwalsik ditan so dala na sakey a bagat. (Ezequiel 43:13-18, 20) Satan ya altar so walaan na baleg a kabaliksan parad amin ya Israelita. Say impisipanan da ed si Jehova so abayag lan apaletan sakbay ni na impangiwalsik nen Moises ed dala diad altar a walad leksab na Palandey Sinai. (Exodo 24:4-8) Angipanonot komon ed sikara so panangiwalsik na dala diad nipasingawey ya altar a bektan akapawil la ra ed nipawil a dalin da, onagus iray bendision nen Jehova daput no sumpalen day impisipanan da ed sikato.—Deuteronomio 28:1-14.
7. Anto so kabaliksan a naromog na saray Kristiano natan ed simbolikon altar?
7 Mipadpara, nabebendisionan iray totoo na Dios natan panamegley na sakey a sipanan—sakey a magmaong, say balon sipanan. (Jeremias 31:31-34) Abayag met la itan ya apaletan panamegley na dala nen Jesu-Kristo. (Hebreos 9:15-20) Natan, balanglan alanaan itayo, a kabiangan ed satan a sipanan, odino kabiangan itayo ed “arum a karnero,” a nagunggunaan ed satan, naamtaan tayoy baleg a kabaliksan ed simbolikon altar. Isisimbolo toy linawa na Dios a misiglaotan ed bagat nen Kristo. (Juan 10:16; Hebreos 10:10) No panon a say simbolikon altar et walad mismon sentro na espiritual a templo, say dondon bagat nen Kristo so makana ed puron panagdayew. Satan so basiyan parad kaperdona na saray kasalanan tayo tan sirin parad amin ya ilalo tayo ed arapen. (1 Juan 2:2) Pambanikelan tayo sirin so pambilay unong ed ganggan a nisiglaot ed balon sipanan, “[say] ganggan nen Kristo.” (Galacia 6:2) Daput no gawaen tayo itan, nagunggunaan itayo ed saray probisyon nen Jehova parad bilay.
8. (a) Anto so anggapo’d man ed akindalem a saban na nipasingawey a templo? (b) Diad antoran paraan so pakapanlinis na saray saserdote ed inkasikara?
8 Sakey ed satan a probisyon et say malinis a talindeg ed arap nen Jehova. Diad nipasingawey a templo, walay bengatlan anggapo ed akindalem a saban ya importantin tuloy ed saban na tabernakulo tan ed templo nen Solomon—sakey a baleg a palanggana, a tinawag ed saginonor a dayat, a panag-urasan na saray saserdote. (Exodo 30:18-21; 2 Awaran 4:2-6) Anto sirin so panlinis na saray saserdote diad pasingawey nen Ezequiel a nipaakar ed templo? Agayla, satan et say mamilagron kulos ya onaagus anggad akindalem a saban! On, bendisionan ira nen Jehova na saray paraan pian panggayagaan so malinis, odino masanto, a talindeg.
9. Panon a nawalaan natan na malinis a talindeg iray alanaan tan saray baleg ya ulop?
9 Ontan met natan, nabebendisionan iray alanaan na malinis a talindeg ed arap nen Jehova. Ipapasen ira nen Jehova bilang masanto, ya idedeklara to iran matunong. (Roma 5:1, 2) Komusta met so nipaakar ed “baleg ya ulop,” ya inlitrato na aliwan makasaserdote iran tribu? Mandadayew ira ed akinpaway a saban, tan say parehon kulos so onaagus anggad satan a kabiangan na nipasingawey a templo. Agaylan matukoy sirin ya anengneng nen apostol Juan so baleg ya ulop ya akasulong na malinis, amputin kawekawes leleg a mandadayew ira ed saban na espiritual a templo! (Apocalipsis 7:9-14) Anggan panon lay katratrato ra ed sayan abulok a mundo, sikaray napaseguroan a daput no agamilen day pananisia ed dondon bagat nen Kristo, moriaen ira nen Jehova bilang malinis tan puro. Panon dan agamiley pananisia? Diad panumbok ed saray bakat nen Jesus, a walaan na sigpot a kompiyansa ed dondon bagat.—1 Pedro 2:21.
10, 11. Anto so sananey nin importantin kabiangan na simbolikon danum, tan panon iyan misiglaotan ed pirmin iyaawang na ilog?
10 Singa asalambit la, wala ni sananey a makanan kabiangan na sayan simbolikon danum—say pikakabat. Diad nipawil ya Israel, benendisionan nen Jehova so totoo to na Makasulatan ya instruksion panamegley na inkasaserdote. (Ezequiel 44:23) Diad mipadparan dalan, bebendisionan nen Jehova so totoo to natan na daakan ya instruksion nipaakar ed Salita to a katuaan, diad panamegley na “peteg ya inkasaserdote.” (1 Pedro 2:9) Say pikakabat nipaakar ed si Jehova a Dios, nipaakar ed saray gagala to parad katooan, tan nagkalalo la nipaakar ed si Jesu-Kristo tan ed Mesianikon Panarian so onaagus la diad manaralem a kulos diad sarayan kaunoran ya agew. Agaylan engrande so pakakaawat tayo ed sayan manleppuan espiritual a pakarepreskoan!—Daniel 12:4.
11 No panon a say ilog a sinukat na anghel et manaralem, ontan met so ileleppuan tuloy na agus na manangiter-bilay iran bendision a manlalapud si Jehova ta pian nataryaan so ondaragsan totoo ed abenditon espiritual a dalin tayo. Nipasakbay ed sakey nin panangipawil a propesiya: “Say daiset magmaliw naani a sanlibo, et say melag magmaliw naani a mabiskeg a nasyon. Siak, si Jehova, sikato naani gawaen ko a magano ed panaon to.” (Isaias 60:22) Tuan nagagawa irayan salita—a minilyon so ondaragsan miulop ed sikatayo ed puron panagdayew! Itatarya nen Jehova so daakan a “danum” parad amin ya ondapag ed sikato. (Apocalipsis 22:17) Seseguroen ton say mangaraldalin ya organisasyon to so mangibubunog na saray Biblia tan literaturay Biblia ed sankamundoan, ed nilasus a lenguahe. Mipadpara, niyaareglo iray Kristianon miting tan saray kombension ed sankamundoan ta pian amin so naikdan na singa kalinew na kristal a danum na katuaan. Panoy pangaapekta na saratan a probisyon ed totoo?
Say Danum so Mangitarok na Bilay!
12. (a) Akin a makapanbubunga iray kakiewan ed pasingawey nen Ezequiel? (b) Anto so irerepresenta na sarayan mabungan kakiewan legan na kaunoran iran agew?
12 Say ilog ed pasingawey nen Ezequiel so mangitatarok na bilay tan bunigas. Sanen naamtaan nen Ezequiel so nipaakar ed saray kiew ya ombaleg ed gilig na ilog, nibaga ed sikato: “Saray bulong da agnalenes, agmet onkulang so bunga to. . . . Say bunga to sikato nayari a kanen, tan say bulong to nayari a panambal.” Akin a sarayan kiew so manbubunga ed onian makapakelkelaw a paraan? “Lapu ed saray danum to onagus ira a manlapu ed santuaryo.” (Ezequiel 47:12b) Iyaanino na sarayan simbolikon kiew so amin a probisyon na Dios parad kipawil na katooan ed inkayadyari diad letnegan na dondon bagat nen Jesus. Diad dalin ed kaplesan, mangidadaulo so alanaan a nakdaan ed pangitatarya na espiritual a tagano tan panamaabig. Kayarin naawat na amin a 144,000 so mangatatawen a tumang da, saray gungguna ya onaagus manlapud makasaserdoten serbisyo ra bilang kaiba nen Kristo a manuley so ninatnat ed arapen, a diad kaunoran et mansumpal ed kompleton kaandi na Adamikon ipapatey.—Apocalipsis 5:9, 10; 21:2-4.
13. Anton panagtambal so nagagawa ed panaon tayo?
13 Onaagus so nipasingawey ya ilog ed andiay bilay ya Inatey a Dayat tan mamapaabig ed amin a nasabi to. Ililitrato na sayan dayat so inatey ed espiritual a kaliberliber. Balet onsalindak so bilay ed “balang pasen a sabien na ilog.” (Ezequiel 47:9) Mipadpara, diad kaunoran iran agew, nabibilay so totoo ed espiritual inermay sabien na danum na bilay. Saray inmunan apabilay et saray alanaan a nakdaan nen 1919. Sikaray binmilay ed espiritual manlapud singa-inatey, inaktibon kipapasen. (Ezequiel 37:1-14; Apocalipsis 11:3, 7-12) Saraman a makanan danum so akasabi met la ed arum ya inaatey ed espiritual, tan saraya so binmilay tan anugyop ed lawas-ondaraak a baleg ya ulop na arum a karnero, a mangaaro tan manlilingkor ed si Jehova. Agmanbayag, ninatnat iyan probisyon ed baleg a bilang na saray apaoli.
14. Anto so iyiilustra natan na onaadilantan panagnegosyoy sira ed gilig na Inatey a Dayat?
14 Say inkabiskeg ed espiritual so manresulta ed inkamabunga. Niyilustra iya na panagnegosyoy sira ya onaadilanta diad saray gilig na dayat a datin inatey. Inkuan nen Jesus ed saray patumbok to: “Gawaen ta kayon somisigay na totoo.” (Mateo 4:19) Diad kaunoran iran agew, say panagsigay so ginmapo ed katitipon na saray nakekeraan ed alanaan, balet ta ag-anampot ditan. Say manangiter-bilay a danum a manlalapud espiritual a templo nen Jehova, pati say bendision na suston pikakabat, so makakasabi la ed totoo ed amin a nasyon. Inermay sabien na satan a kulos, manresulta itan ed espiritual a bilay.
15. Anto so mangipanengneng ya aliwan amin et mangawat ed saray probisyon na Dios ed bilay, tan anto so pansumpalan na saratan?
15 Siempre, aliwan amin so onkiwas a paborabli ed mensahe na bilay natan; nisay amin na saramay napaoli legan na Milenyon Uley nen Kristo et onkiwas. (Isaias 65:20; Apocalipsis 21:8) Inyabawag na anghel a walaray parti na dayat ya ag-inmabig. Sarayan mapitek, andiay bilay a paspasen et ‘niiter ed asin.’ (Ezequiel 47:11) Nipaakar ed totoo ed panaon tayo, aliwan amin a naopresian na manangiter-bilay a danum nen Jehova so mangawat ed satan. (Isaias 6:10) Diad Armagedon, amin na saramay nansiansia ed andiay bilay tan mansasakit ed espiritual a kipapasen so niiter ed asin, salanti, naderal ya ando lan ando. (Apocalipsis 19:11-21) Balet, saramay matoor ya oniinum ed sarayan danum so makapanilalon makaliktar tan makanengneng ed unor a kasumpalan na sayan propesiya.
Onagus so Ilog Diad Paraiso
16. Kapigan tan panon so kaunoran a kasumpalan na pasingawey nen Ezequiel nipaakar ed templo?
16 Singa ed arum a propesiyan nipaakar ed panangipawil, say pasingawey nen Ezequiel nipaakar ed templo so nanengneng ed kaunoran a kasumpalan to legan na Milenyo. Anggapo la’d satan so makasaserdoten klase diad dalin. “Sikara so nagawa a saserdote na Dios tan si Kristo, et miari ra ed sikato [diad tawen] ed sanlibon taon.” (Apocalipsis 20:6) Mibiang irayan mangatatawen a saserdote ed si Kristo diad panangipakurang ed sigpot iran gungguna na dondon bagat nen Kristo. Kanian, say matunong a katooan so nilaban tan nipawil ed inkayadyari!—Juan 3:17.
17, 18. (a) Panon ya adeskribe ed Apocalipsis 22:1, 2 so manangiter-bilay ya ilog, tan kapigan so manunan panaon na kiyaplikaan na satan a pasingawey? (b) Diad Paraiso, akin a kaukolan lan pirmin onlaknab so ilog na danum na bilay?
17 Bilang resulta, say ilog ya anengneng nen Ezequiel so onagus la’d satan tekep na makapanyarin tuloy a danum na bilay. Saya so manunan panaon na kiyaplikaan na propesiyan nirekord ed Apocalipsis 22:1, 2: “Impanengneng to ed siak so sakey a malinis ya ilog na danum na bilay a manesiab a singa kristal, ya ompapaway ed trono na Dios tan say Kordero, dia ed pegley na lansangan to. Tan dia ed biek na saya ya ilog tan dia ed saman wala so kiew na bilay, a wala so bunga to a labindua, a binulan so pangiter to na bunga to. Tan saray bulong to nipaakar onkana’ra a pakatambal ed saray nasyones.”
18 Legan na Milenyo et natambal so amin a sakit—diad pisikal, mental, tan emosyonal a paraan. Saya so ililitraton tuloy na “pakatambal ed saray nasyones” diad panamegley na simboliko iran kiew. Maong ta wala iray probisyon ya ipapakurang nen Kristo tan say 144,000, ta “say manaayam agto naani ikuan: ‘Mabeblay ak.’” (Isaias 33:24) Tan say ilog so onagus ed panaon to a sankalaknaban. Onawang tan onaralem itan ta pian nataryaan so minilyon, ompan binilyon nin apaolin totoo ya oninum na sarayan puron danum na bilay. Pinaabig na nipasingawey ya ilog so Inatey a Dayat, a mangiiter na bilay inermay agusan to. Diad Paraiso, saray lalaki tan bibii so ombilay ed sigpot a pantalos, a napaabig ed atawir ya Adamikon ipapatey no agamilen day pananisia ed saray gungguna na dondon a ninatnat ed sikara. Ipapasakbay na Apocalipsis 20:12 unong ed New World Translation a nalukasan “iray lukot” ed saraman ya agew, a mangitarya na kaaruman a liwawa na pakatalos a pakagunggunaan na saray apaolin inaatey. Makapaermen, aglabay na arum so napaabig, anggan diad Paraiso. Sarayan rebeldi so ‘niiter ed asin’ na andi-anggaan a kadederal.—Apocalipsis 20:15.
19. (a) Panon a nasumpal ed Paraiso so panangapag ed dalin? (b) Anton kabiangan ed Paraiso so ililitrato na syudad? (c) Anto so kabaliksan na inkipasen na syudad ed medyo arawi ed templo?
19 Diad satan met a panaon, say panangapag ed dalin diad pasingawey nen Ezequiel so nasumpal ed kaultimoan to. Anengneng nen Ezequiel so dalin a dugan naapag; makapanseguro so kada matoor a Kristiano a nawalaan na pasen, sakey a tawir, diad Paraiso. Maseguron say pilalek na sakey ed pakawalaan na dilin abung a panayaman tan asikasoen so nagawa diad mauksoy a paraan. (Isaias 65:21; 1 Corinto 14:33) Say syudad ya anengneng nen Ezequiel so matukotukoy a mangililitrato ed panangipakurang ya uksoyan a ginagala nen Jehova parad balon dalin. Diad pisikal a paraan, anggapo lay alanaan a makasaserdoten klase ed limog na katooan. Nagkalalon isusuheri na pasingawey diad pangililitrato ed syudad bilang “naagamil ed karaklan” a dalin a medyo arawi manlapud templo. (Ezequiel 48:15) Legan a miuley so 144,000 ed si Kristo diad tawen, say Ari so nawalaan na saray manangilaman ed dalin. Nagunggunaan a tuloy iray totoon uuleyan to manlapud maaron panangiwanwan tan direksion na pangulon klase. Balet, say peteg a sentro na gobierno et aliwan diad dalin, noagta diad tawen. Amin ed dalin, pati say pangulon klase, so nisilong ed Mesianikon Panarian.—Daniel 2:44; 7:14, 18, 22.
20, 21. (a) Akin a matukoy so ngaran na syudad? (b) Antoran tepet so nitepet tayo’d inkasikatayon dili lapud impakatalos tayo ed pasingawey nen Ezequiel?
20 Imanoen so unor iran salita ed propesiya nen Ezequiel: “Say ngaran na syudad manlapu ed satan ya agew sikato naani so, Si Jehova Wadtan.” (Ezequiel 48:35) Agniwala iyan syudad pian mangiter ed lalaki na pakayari odino impluensia; nisay wadtan itan ta pian mangiyimpuersay antokaman a linawa na too. Syudad itan nen Jehova, a lawas mangisindag ed kaisipan to tan ed maaro, makatunongan iran paraan to. (Santiago 3:17) Saya so makapalikliket a mamapaseguro ed sikatayo a bendisionan nen Jehova so nauksoy a ‘balon dalin’ a sosyedad na katooan ed magnayon ya arapen.—2 Pedro 3:13.
21 Agtayo ta naliliketan ed ilalon walad arapen tayo? Matukotukoy sirin ya itepet na balang sakey ed sikatayo, ‘Panon so ikiwas ko ed makapakelkelaw iran bendision a niparungtal ed pasingawey nen Ezequiel? Kasin matoor kon susuportaan so kimey a gagawaen na saray maaron manangasikaso, pati saramay alanaan a nakdaan tan saray prospektibon membro na pangulon klase? Kasin inyapasakey ko lay puron panagdayew ed bilay ko? Kasin sigpot kon aanamoten so danum na bilay a daakan ya onaagus natan?’ Komon ta balang sakey ed sikatayo so mantultuloy a manggawa’d satan tan manliket ed saray probisyon nen Jehova ed inkamagnayon!
[Saray paimano ed leksab]
a Nayarin tutukoyen na sayan nankulosan a lawak so Lawak na Kidron, a ninatnat ed abalaten-bukig a manlapud Jerusalem tan mansampot ed Inatey a Dayat. Say abebeban pasen to nagkalautla so amagamaga tan intiron taon lan naklangan.
b Nengnengen iray paway na Watchtower a Mayo 1, 1881, tan say Hunyo 1, 1981.
Panon Yon Ebatan?
◻ Anto so ililitrato na danudanum ya onaagus manlapud templo?
◻ Anton panagtambal so gagawaen nen Jehova diad panamegley na simbolikon ilog, tan akin ya onaaralem so ilog?
◻ Anto so ililitrato na saray kakiewan a walad saray pangdel na ilog?
◻ Anto so ilitrato na syudad legan na Milenyon Uley, tan akin a matukoy so ngaran na syudad?
[Saray litrato ed pahina 23]
Irerepresenta na ilog na bilay so probisyon na Dios parad kilalaban