Ginawa Ra so Linawa nen Jehova

Tinmalona si Pablo ed Kairapan

WALAD kaandiay ilalon situasyon si Pablo. Sikato tan say 275 ya arum ni so akalugan ed sakey a bapor ya ibabansiwet na Euroclidon​—say sankabiskegan a dagem ed Mediteraneo. Manasibengbeng so bagyo a say agew so agnanengneng, nisay bibitewen no labi. Natalosan, natatakot iray pasahero lapud bilay da. Ingen, niligliwa ira nen Pablo diad impangisalaysay to’d imparungtal na Dios ed sikato ed sakey a kugip: “Anggapo naani nabalang a bilay ed sikatayo, noag bukor na sakayan.”​—Gawa 27:14, 20-22.

Diad koma-14 a labi na bagyo, makapakelaw so nalmoan na saray tripulante​—20 depa labat lay kaaralem na danum.a Kaarawi ray daiset, tinukor da lamet. Natan et say danum so 15 depa ed kaaralem. Asingger lay dalin! Balet saman a marakep a balita so nantarok met na kapeligroan. Lapud nibabansiwet diad labi ed atapew a danum, ompan ombasig so bapor ed saray bato et nagaygay. Sikakabat, impepelag na saray tripulante iray pataga. Arum ed sikara so malabay a mangileksab ed paraw tan onlugan ed satan, a mipalaran lara diad dayat.b Balet inamper ira nen Pablo. Inkuanto ed opisyal tan saray sundalo: “No ag-iraya manayam labat ed sakayan, agyo nayari nilaban.” Dinengel na opisyal si Pablo, tan amin a 276 ya akalugan so mapagpagan manatalaran ed iliwawa.​—Gawa 27:27-32.

Inkakneb na Bapor

Diad tinmumbok a kabuasan, abantag na saray pasahero na bapor so baybay. Tekep na apasimbalon ilalo, saray tripulate so angesat ed saray pataga tan intagey day layag. Say bapor so amaarap ed gilig na dayat​—andi-duaruwan mankelyaw ira lapud gayaga.​—Gawa 27:39, 40.

Balet, biglan say bapor so nisubsob. Say mas grabe ni, binmasig iray angkabaleg a daluyon ed popa na bapor, ya angaygay ed satan. Amin a pasahero so kaukolan a manaynan ed bapor! (Gawa 27:41) Balet amawala iya na problema. Dakel ed saramay akalugan​—pati si Pablo​—et priso. Diad silong na Romanon ley, say guardian paulyan toy priso to a makabatik so nepeg a managmak ed dusan inggana parad priso to. Alimbawa, no akabatik so sakey a managpatey, say mapaulyan a guardia so napapatey bilang bayar to.

Lapud takot ed saratan a pansumpalan, determinado iray sundalo a mamatey la ed amin a priso. Balet, samay opisyal na sundalo, a makaaro ed si Pablo, so sinmalet. Ingganggan ton ontaboy ed danum ya amin iramay makasarag pian onsakbit. Saramay agmakalangoy so nepeg ya ombemben ed saray malapar a tabla odino arum a kagawaan manlapud baloto. Sansakey a nankusaykusay a sinmakbit kalamor iray pasahero manlapud agaygay a bapor. Unong ed saray salita nen Pablo, anggapoy anggan sakey ya inatey!​—Gawa 27:42-44.

Milagro ed Malta

Say makapkapuy lan grupo so akaromog na salimbeng diad islan tinawag a Malta. Saray manaayam et “mansasalitay dayo a totoo,” a literal a “barbariko” (Griego, barʹba·ros).c Balet aliwan maruksan totoo iray taga-Malta. Diad kasunian, si Lucas, kaiba nen Pablo a managbiahe, so angireport a sikaray “angipanengneng ed sikatayo na nikaduman panangasi na too, ta anelsel ira na apoy tan matulong ya angawat ed sikamin amin lapud uran tan lapud betel.” Angiban mismo si Pablo ed saray tubo ed Malta ed impantitipon tan impansusunglor ed apoy.​—Gawa 28:1-3, NW, paimano’d-leksab.

Bigla, sakey ya uleg so pinmolipot ed lima nen Pablo! Impasen na saray taga’d saman ya isla a managpatey si Pablo. Anganko et inisip dan dudusaen na Dios iray managkasalanan diad pangataki ed parti na laman da a nausar ed kasalanan. Balet nia! Alay inkabigla na saray taga’d man, inwagsil nen Pablo so uleg ed apoy. Unong ya inkuan na akatasin salaysay nen Lucas, “aalagden da ya onlarag, odino bigla ya ompatey [si Pablo].” Inuman na saray taga-isla so nononoten da tan inkuan dan sakey a dios si Pablo.​—Gawa 28:3-6.

Taloy bulan nen Pablo diad Malta, legan to diman et pinaabig toy ama nen Publio, say manunaan a too ed isla, ya amarawes ed si Pablo, tan arum ya anagmak na sakisakit. Niarum ni, angitanem si Pablo na saray bukel na katuaan, a nanresulta ed pirmin inkabendisionan na maparawes iran manaayam ed Malta.​—Gawa 28:7-11.

Leksion ed Sikatayo

Legay ministeryo to, nipaarap si Pablo ed dakel ya angat. (2 Corinto 11:23-27) Diad salaysay ed tagey, sikatoy priso nisengeg ed maong a balita. Nilikud ni et kaukolan ton arapen iray ag-inilaloan a subsubok: sakey a maksil a bagyo tan tinumbokan na inkakneb na bapor. Diad amin na saya, agbalot kinmapuy so determinasyon nen Pablo a magmaliw a maseseg a managpulong na maong a balita. Base ed eksperiensia to, insulat to: “Dia ed amin a bengatla inaral ko so maamot ya anggan kapesel tan kaerasan, anggan mamarakel tan mankaukolan. Nayarian ko a gawaen so ganagana ed saman so mamabiskeg ed siak.”​—Filipos 4:12, 13.

Nepeg a saray problema ed bilay so agbalot mamaletey ed determinasyon tayon magmaliw a maseseg iran ministro na tuan Dios! Sano onlesa iray ag-iilaloan a subok, ipiya tayoy awit tayo ed si Jehova. (Salmo 55:22) Insan, siaanos tayon alagaren no panon ton pagmaliwen a posibli ed sikatayo a nasungdoay subok. Kaleganan, itultuloy tayoy manlingkor ed sikato a sitotoor, matalek ya asikasoen to itayo. (1 Corinto 10:13; 1 Pedro 5:7) Diad pansiansian agnagiing, antokaman iray problema, sikatayo​—singa si Pablo​—so makatalona ed kairapan.

[Saray paimano ed leksab]