“Benditoen si Jehova, O Kamarerwak”

“DIAD agano niran bulan et nagmaliw lan makapasawa tan andian lay gayaga so ministeryok,” so inkuan nen Nancy.a Diad loob lay ngalngalin samploy taon et sikatoy manpapayunir, sigpot panaon a manangiproklama na maong a balita. Ingen, inyarum to: “Agko labay so nagagawa’d siak. Singa anggapoy ligsak tan matabtabang ak lan mangipresenta ed mensahe na Panarian. Antoy nepeg kon gawaen?”

Konsideraen met so kipapasen nen Keith, sakey a matatken ed kongregasyon na Tastasi nen Jehova. Abigbigla sanen nadngel toy inkuan nen asawa to: “Sananey met amoy nononoten mo, ta ni diad pikakasim et akisalamatan moy tagano, anta aliwan oras na panangan!” Inako nen Keith: “Naiimanok a magmamaliw lan apasakey so pikakasik.”

Maseguron agmo labay a magmaliw ya andiay ligsa tan paspasaray iray balikas na panangidayew mo’d si Jehova a Dios. Diad kasunian, labay mon impapuso iratan, a manlalapud liknaan a walaay pisasalamat. Balet, say liknaan et aliwan singa aysing a naisulong odino nalakseb. Nepeg a manlapu itan ed akindalem na too. Panon a nalikna na sakey so pisalsalamat manlapud puso? Say Salmo 103 so mangiter ed sikatayo na aralem a pakatalos nipaakar ed saya.

Insulat nen Arin David ed kadaanan ya Israel so Salmo 103. Ginapoan to ed saray salitan: “Benditoen si Jehova, O kamarerwak, anggan amin ed akindalem ko, say masanton ngaran to.” (Salmo 103:1, NW) “Say salitan bendito, no itukoy ed Dios,” kuan na sakey a libro et “mankabaliksay dayew, a lawas mangipapatnag na mabiskeg a panangaro ed sikato ontan met ed liknaay pisalsalamat.” Lapud panpilalek ya idayew si Jehova a tekep na puson napno na panangaro tan apresasyon, pinaseseg nen David so dili ton kamarerwa​—inkasikato​—a “benditoen si Jehova.” Balet antoy mamapawala ed sayan maligsan liknaan a walad puso nen David nipaakar ed Dios a dadayewen to?

Intuloy nen David: “Agmo lingwanan so amin na saray ipanabang [nen Jehova].” (Salmo 103:2) Say liknaay pisalsalamat ed si Jehova so mapatnag a misiglaotan ed maapresian pandalepdep ed ‘saray ginawa to.’ Diad ami-amin, antoray ginawa nen Jehova a sankanonot nen David? Say inengneng ed pinalsa nen Jehova a Dios, singa say tawen a mabitewen ed malinak a labi, so peteg a mamano ed puso tekep na pisalsalamat ed Manamalsa. Say mabitewen a katawenan so pirmin anenyeg ed si David. (Salmo 8:3, 4; 19:1) Balet, diad Salmo 103, nonodnonoten nen David so kimey nen Jehova ed sananey a nengneng.

Si Jehova “so Mamerdona ed Saray Amin a Kasulitan Mo”

Diad sayan salmo, minolimoli nen David iray kiwas na maaron-panangasi na Dios. Diad impanukoy ed pilimero tan sankamanunaan ed saraya, inkanta to: ‘Perdonaen nen Jehova so amin a kasulitan mo.’ (Salmo 103:3) Seguradon kabat nen David so dilin makasalanan a kipapasen to. Kayarin sikatoy inarap nen propetan Natan nipaakar ed impikalugoran to ed si Bat-seba, inako nen David: “Onsumpa ed sika [Jehova], dia ed sika labat, so nankasalanan ko, tan ginawak so saya a mauges ed nanengneng mo.” (Salmo 51:4) Tekep na maralit a puso, sikatoy inmey-ey: “Kasian moak komon, O Dios, ya unong ed maaro ya abig na linawam, unong na kinaraklan na malamoy a panangasim, bural mo so saray impakasumpak. Urasan moak a maong ed kasulitan ko, tan linisan moak ed kasalanan ko.” (Salmo 51:1, 2) Agaylan pisalsalamat so alikna nen David lapud impakaperdona! Lapud ag-ayadyarin too, sikatoy akagaway arum niran kasalanan ed bilay to, balet agton balot sinmaew a manbabawi, angawat na panamaat, tan pinetek toray dalan to. Say impanmolimoli ed makapakelaw iran kiwas na panangasi na Dios nipaakar ed sikato so amakiwas ed si David pian benditoen si Jehova.

Agta makasalanan itayo met? (Roma 5:12) Anggan si apostol Pablo et inyagogol to: “Unong na too ed dalem ko manliket ak ed ganggan na Dios: Bangbalet wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko. Alay kasegsegangan ko a too! Siopa so mangilaban ed siak ed laman na sayan patey?” (Roma 7:22-24) Agaylan pisalsalamat tayo ta agbibilangen nen Jehova iray impakalukso tayo! Malikeliket ton buburalen iratan sano magbabawi tan onkekerew itayoy panamerdona.

Pinanonotan nen David so inkasikato: “Paabigen [nen Jehova] so amin a sakisakit mo.” (Salmo 103:3) Lapud say panamaabig et sakey a kipapawil, sasaglawien toy mas nen say panamerdona ed gawan mauges. Lalanoren toy pangekal ed ‘sakisakit’​—saray mauges a nansumpalan lapud impakalingo ed saray dalan tayo. Diad balon mundo a gawaen to, talagan sigpot ya ekalen nen Jehova iray epekto na kasalanan ed pisikal, singa say sakit tan ipapatey. (Isaias 25:8; Apocalipsis 21:1-4) Balet, anggan natan et papaabigen nen Jehova iray sakit tayo ed espiritual. Parad arum, lalaktipen na saraya so mauges a konsiensia tan apakset a relasyon ed sikato. ‘Aglilingwanan’ so agawaan la nen Jehova ed balang sakey ed sikatayo nipaakar ed saya.

Sikato “so Manondon na Bilay Mo”

“[Si Jehova] so manondon na bilay mo ya aleen to ya ekalen ed kabagbagan [“mismon abot,” NW],” so inkanta nen David. (Salmo 103:4) ‘Say mismon abot’ et say kaslakan a lubok na katooan​—Sheol, odino Hades. Anggan sakbay na impagmaliw ton ari ed Israel, naimano nen David so inkasikaton mamepeligro diad ipapatey. Alimbawa, inem-eman nen Arin Saul na Israel so makapatey a pambusol ed si David tan ginetma ton pateyen diad nanduruman inkagawa. (1 Samuel 18:9-29; 19:10; 23:6-29) Kaliktan met na saray Filisteo a pateyen si David. (1 Samuel 21:10-15) Balet lawas a sikatoy ililiktar nen Jehova manlapud ‘say mismon abot.’ Agaylay pisalsalamat nen David sano sankanonot to irayan ginawa nen Jehova!

Komusta ka ey? Kasin inantabayan ka nen Jehova ed saray panaoy gonigon odino inateyan? Odino kasin akabatan moray inkagawa ed panaon tayo sanen insalba toray matoor a Tastasi to manlapud ipapatey? Nayarin atenyeg ka ed impakabasa ed saray salaysay na saray gawa na panangiliktar to ed saray pahina na sayan magasin. Akin ya ag-ipanaon a maapresian molimolien irayan ginawa na tuan Dios? Tan, siempre, amin tayo so walaay rason a misalsalamat ed si Jehova ed ilalon kioli.​—Juan 5:28, 29; Gawa 24:15.

Inikdan itayo nen Jehova na bilay tan bengatlan manggawan makapagayaga tan makabaliksay pambilay. Inyabawag na salmista a say Dios “balangetan toka na maaro ya abig na linawa tan matamoy ira a panangasi.” (Salmo 103:4) Diad panaon na pankaukolan tayo, ag-itayo ikaindan nen Jehova noagta sikatoy ontulong ed sikatayo diad panamegley na nanengneng ya organisasyon to tan ed aturon mamatatken, odino saray pastol, diad loob na kongregasyon. Saratan a tulong so mamasarag ed sikatayon natalonaay makapasubok a kipapasen ya agnaandi so dilin-kagalangan tan dignidad tayo. Aasikasoen a maong na saray Kristianon pastol iray karnero. Papasesegen daray mansasakit tan nagogonigon tan gagawaen day anggaay nayarian da pian ipawil iramay nankasalanan. (Isaias 32:1, 2; 1 Pedro 5:2, 3; Judas 22, 23) Papakiwasen na espiritu nen Jehova irayan pastol a magmaliw a maabagey tan maaro ed pulok. Say “maaro ya abig na linawa tan matamoy ira a panangasi” to so talagan singa korona a mamaparakep ed sikatayo tan mangiiter ed sikatayo na dignidad! Agbalot lilingwanan iray ginawa to, benditoen tayo si Jehova tan say masanton ngaran to.

Diad pantultuloy ed say dilin-panamilin to, oniay inkanta nen salmista David: “Peselen [nen Jehova] so pirawat mo na maong ira a bengabengatla, say kaugawan mo napasimbalo a singa say agila.” (Salmo 103:5) Say bilay ya iiter nen Jehova et pakapenekan tan pakapanggayagaan. Agayla, say mismon pikakabat ed katuaan et sakey a kayamanan ya agbalot nikompara tan sakey a lapuan na pirmin gayaga! Tan konsideraen pa no panon a pirmin makapnek so kimey ya inter nen Jehova ed sikatayo, salanti say panagpulong tan panaggaway babangatan. Agaylan liket so pakanengneng ed sakey ya interesadon manaral nipaakar ed tuan Dios tan tulongan itan a makapikabat ed si Jehova tan benditoen to! Ingen, balanglan walay ondengel odino anggapo ed lugar tayo, baleg a pribilihyo so pibiang ed kimey a misiglaotan ed kapasantos na ngaran nen Jehova tan say kiyalangon na inkasoberano to.

Siopa kasi so agnakekesawan odino ompapakil leleg a manpupursigi ed kimey na panangiyabawag na Panarian na Dios? Balet tuloytuloy a papabiskegen nen Jehova iray lingkor to, a papagmaliwen toran ‘singa saray agila’ a walaay mabiskeg iran payak a mamatayong ed tawen. Agaylan pisasalamat tayo a say maaron mangatatawen ya Ama tayo so mangitatarya na ontan a ‘biskeg’ ta pian matoor tayon nasumpal so ministeryo tayo ed agew-agew!​—Isaias 40:29-31.

Diad pangiyilustra: Mantratrabahon sigpot-panaon si Clara tan manguusar met na ngalngali 50 ya oras a binulan ed lawak na ministeryo. Oniay inkuanto: “No maminsan et naknaksawan ak, tan isekar koy inkasiak pian ompaway ed lawak na kimeyan lapud walay kasipan kon piulopan. Balet sano wala ak la’d kimeyan, lawas ak a napapakasil.” Nayarin naeksperiensiam met lay inkasil a resultay impanuporta na Dios diad Kristianon ministeryo. Napakiwas ka komon a mangibaga, singa si David diad manangilukas iran balikas ed sayan salmo. “Benditoen si Jehova, O kamarerwak, anggan amin ed loob ko, say masanton ngaran to.”

Ililiktar nen Jehova so Totoo To

Inkanta met na salmista: “Si Jehova gawaen to so inkatunong tan panangiyagel ya onkana ed saray amin a napapairap. Impakabat to so saray dalan to ed Moises, saray gawagawa to impaamta to ed saray anak na Israel.” (Salmo 103:6, 7) Nayarin sankanonot nen David so ‘kapapairap’ na saray Israelita diad silong na saray managlames ya Ehipsio ed panaon nen Moises. Lapud pandadalepdep ed no panon ya impaamta nen Jehova iray dalan to nipaakar ed impangiliktar ed si Moises, amawala itan na liknaay pisalsalamat ed puso nen David.

Napakiwas itayo met ed miparan pisalsalamat diad panmolimoli ed saray impideneng nen Jehova ed saray Israelita. Balet agtayo komon ibaliwalay panmorekdek ed saray eksperiensia na modernon-agew iran lingkor nen Jehova, a singa ed saramay asaglawi ed kapitulo 29 tan 30 na libron Jehovah’s Witnesses​—Proclaimers of God’s Kingdom. Saray salaysay a nisulat ditan tan ed arum a palapagan na Watch Tower Society so ontulong ed sikatayon natalosan so impanulong nen Jehova ed totoo to ed modernon panaon pian sungdoay inkipangaw, panaglusob na pangkat, saray pananebel, saray panangipangawan a kampo, tan ed slave-labor iran kampo. Dakel iray pakasubokan ed atabek na bakal a daldalin, singa say Burundi, Liberia, Rwanda, tan say datin Yugoslavia. Kapiganman a nagaway panamasegsegang, lawas a mangaantabay so lima nen Jehova ed saray matoor a lingkor to. Diad panmolimoli ed sarayan ginawa na matalonggaring a Dios tayo, si Jehova et panimatleken to itayo ed salaysay na panangiliktar ya agawa’d Ehipto a singa met ed si David.

Konsideraen met no panon itayon matamoy ya inliktar nen Jehova ed belat na kasalanan. Intarya to ed sikatayoy “dala nen Kristo” pian ‘nalinisay konsiensia tayo ed saray inatey a gawa.’ (Hebreos 9:14) Sano pagbabawian tayoray kasalanan tayo tan onkerew na panamerdona diad basiyan na nipaagus a dala nen Kristo, iyarawi na Dios ed sikatayo iray pakaluksoan tayo​—“unong na kaarawi letakan [“bubutayan,” NW] a manlapu ed seselekan”​—insan ipawil to itayo ed pabor to. Tan isipen iray probisyon nen Jehova diad paraan na saray Kristianon miting, makapabiskeg a panlilimog, saray pastol ed loob na kongregasyon, tan nibase’d Biblia iran palapagan a naaawat tayo diad panamegley na “matoor tan makabat ya aripen.” (Mateo 24:45) Agta amin na sarayan ginawa nen Jehova so ontulong ed sikatayon napabiskeg so siglaotan tayo ed sikato? Inyabawag nen David: “Si Jehova so mapangasi tan magrasya, mabanayat a manpasnok tan daakan ed panangasi. . . . Sikato agto ginawa ed sikatayo so unong na kanepegan na saray kasalanan tayo, nisay intumang to ed sikatayo so kanepegan na saray kasulitan tayo.” (Salmo 103:8-14) Say pandalepdep ed maaron panangasikaso nen Jehova so maseguron mamakiwas ed sikatayon igloria tan itandoro so masanton ngaran to.

‘Benditoen si Jehova, Amin Yo a Gawa To’

Diad panangipareng ed imortalidad nen Jehova, say “magnayon a Dios,” “saray agew” na ‘mortal a too’ so talagan magangano​—“singa ra dika.” Balet maapresian impatnag nen David: “Say maaron abig na linawa nen Jehova sikato so manlapu ed andi angga ya angga ed andi angga ed saraman so ontakot ed sikato, tan say inkatunong to angga ed saray anak na saray anak; dia ed saray totoo a mangunor na sipan to, tan saraman so mannodnonot ed saray ganggan to pian sumpalen da ra.” (Genesis 21:33, NW, paimano’d leksab; Salmo 103:15-18) Agbalot lingwanan nen Jehova iramay ontatakot ed sikato. Diad dugan panaon, pagamoran tora na andi-anggaan a bilay.​—Juan 3:16; 17:3.

Diad impangibalikas na apresasyon to ed inka-ari nen Jehova, inkuan nen David: “Si Jehova impaletneg to so trono to ed saray katawenan; tan say panarian to uleyan to ya amin.” (Salmo 103:19) Anggaman mapatpatnag a nibalikas so inka-ari nen Jehova ed abaybayag a panaon diad panarian na Israel, say trono to so talagan diad tawen. Makasengeg ed say Inkamanamalsa to, si Jehova so Soberanon Manuley ed uniberso tan aagamilen toy madibinon linawa to ed tawen tan ed dalin unong ed saray dilin gagala to.

Sinimbawa ni ingen nen David iray mangatatawen a pinalsan anghel. Inkanta to: “Galangen [“Benditoen,” NW] yo si Jehova, sikayo angheles to, a mabiskeg, a manguunor na salita to; ondengel na bosis na salita to. Galangen yo si Jehova, amin ya ehersitos to; sikayo a ministros to, a manggawa na kaliktan to. Galangen yo si Jehova amin yo a gawa to, ed amin a paspasen na panuleyan to: galangen mo si Jehova, O kamarerwak.” (Salmo 103:20-22) Agta say panmolimoli ed saray kiwas na maaron-panangasi nen Jehova ed sikatayo so mamakiwas met ed sikatayon sikatoy benditoen? Sigpot ya ontan! Tan makaseguro itayo a say tanol na bosis tayo ed personal a panangidayew ed Dios so agnaandi ed limog na mabiskeg a koro na saray manangidayew a kaiba ni ingen iray matunong ya anghel. Ipapuso tayo komon ya idayew so mangatatawen ya Ama tayo, a lawas tayon itongtong a maong so nipaakar ed sikato. On, ipapuso tayo komon iray balikas nen David, “Benditoen si Jehova, O kamarerwak.”

[Paimano ed leksab]

[Litrato ed pahina 23]

Nanimatlek si David ed saray kiwas na maaron-panangasi nen Jehova. Kasin ontan ka met?