Aliwan Matantan so Dios Nipaakar ed Sipan To

“JEHOVA, panon kabayag so itawag ko, et agmo ak naani talinengen?” Saratan so imbalikas na Hebreon propeta a si Habacuc, a nambilay nen komapiton siglo K.K.P. Balet agta saratan et walaan na mipadparan punto? Sipor ed too so pankaliktan a nawalaan a tampol odino diad maganon panaon no posibli ed saray bengatlan panpirpirawatan tayo. Tan nagkalalo lan tua iya ed panaon tayo a napno na temporaryon likeliket.​—Habacuc 1:2.

Nen inmunan siglo, walay pigaran mapatnag a nanisip a tinoor la komon a tampol na Dios iray sipan to. Nagmaliw iran agmakankaanos ya impasen da ni ingen so Dios a matantan odino atrasado. Nipaakar ed saya, kaukolan a panonotan ira nen apostol Pedro a say panmoria na Dios ed panaon et midumaan a tuloy ed sikatayo. Insulat nen Pedro: “Agyo lilingwanan so sakey a bengatla: a say sanagew dia ed arap na Katawan singa sanlibon taon, tan say sanlibo a taon singa sanagew.”​—2 Pedro 3:8.

Unong ed sayan paraan na panagkuenta ed panaon, say sakey a 80 años a too so nambilay labat ed loob na duaran oras, tan say intiramintin awaran na katooan so nambayag lambengat na ngalngali anem agew. No talosan tayoray bengatla unong ed sayan punto de bista, mas mainomay tayon natalosan so paraan na Dios ed pidedeneng to’d sikatayo.

Balet, importanti ed Dios so panaon. Diad pidumaan, sikato so sankamaimanoan no nipaakar ed panaon. (Gawa 1:7) Sirin, intuloy ya inkuan nen Pedro: “Say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Aliwan singa saray totoo, agnalalagaan so Dios a manggawa na saray bengatla a singano nanaupot lay panaon to. Bilang say “Ari ya andi angga,” sikato so walaay makapakelaw a pakanengneng ed arapen tan nadetermina to no kapigan ed agus na panaon so ikiwas to parad pankaabigan a tuloy na amin a nalalanor.​—1 Timoteo 1:17.

Kayari ton impaliwawa so rason no akin a singano matantan so Dios, oniay impasakbay nen Pedro: “Say agew na Katawan onsabi a singa matakew.” Salanti, say agew na pikuekuentaan so onsabi ya agnataltalaranan na totoo. Insan, diad ontumbok iran bersikulo, impabitar nen Pedro so makapakelaw ya ilalo parad saramay mangipapatnag na “masantos a panagbilay tan kasimpitan,” salanti, makaliktar ira ed insipan na Dios a ‘balon katawenan tan balon dalin.’​—2 Pedro 3:10-13.

Makasengeg ed saya, lalo tayon naapresia no akin ya agni sinmabi so panangukom na Dios. Lapud inkaanos to, naamtaan tayo so gagala to tan naiyarunsa tayo so kabibilay tayo ta pian nagamoran tayo so insipan to iran bendision. Agtayo ta moriaen a “kilalaban so sungdo [“inkaanos,” NW] na Katawan,” a singa ikakatunongan nen Pedro? (2 Pedro 3:15) Balet, wala so sananey a sengegay panaanos na Dios.

Pamantoken so Belat na Kasalanan

No aralen tayoy apalabas iran impideneng na Dios ed katooan, naimano tayon mabetbet ton pokpokan so panangukom to anggad anggapo lan balot so pakapatnagay ilalon manguman. Singa bilang, mitunosan ed impangukom na Dios ed saray Canaanita, impabitar to laray kasalanan da ed si Abraham kasakbayan to ni. Balet ta agni asabi so panaon ya ipaakseb toy panangukom to ed saman. Akin ya andi ni? Ibabaga na Biblia: “Lapud agni amantok so kasalanan na saray Amorreo [Canaanita],” odino singa say patalos na bersyon a Knox: “Say inkarelmeng na saray Amorreo so ag-akasabi ed inkagnap to.”​—Genesis 15:16.a

Balet, manga 400 taon ed saginonor, sinmabi so panangukom na Dios, tan sinalin na saray kapolian nen Abraham, saray Israelita, so dalin. Pigara ed saray Canaanita a singa si Rahab tan saray Gabaonita, so nisalba lapud awawey tan kiwakiwas da, balet diad kaslakan, asabi ray alablabas a sukat na inkarutak, unong ya imparungtal na saray akotkot ed kaplesan na saray arkeologo. Inagamil day panagdayew ed kayarian na laki (phallic worship), panagbalangkantis ed templo, tan panagbagat ed ugaw. Oniay salaysay na Halley’s Bible Handbook: “Pankelawan na saray arkeologon angotkot ed gerageray na saray syudad na Canaanita no akin a sikaray agdineral a tampol na Dios.” Diad kaunoran, say ‘belat na kasalanan na [saray Canaanita] so nagnap la’; say inkarelmeng da so “akasabi ed inkagnap to.” Anggapo so makanepegan a mangakusa ed Dios a sikatoy manlalabi sanen inabuloyan ton nalinisan so dalin balet ta inliktar to iramay angipanengneng na dugan awawey.

Ontan met so kipapasen ed panaon nen Noe. Anggaman ed katuaan a marelmeng so totoo sakbay na Delap, mapangasin denisidi na Dios a mantultuloy ni so panaon da ed kaaruman nin 120 taon. Kaleganan na satan a panaon, nanlingkor si Noe bilang “managpulong na katunongan.” (2 Pedro 2:5) Diad inlabas na panaon, mapatnag ya amantok la so inkarelmeng da. “Say Dios ninmengneng ed dalin, et, nia, sikato so inmuges; ta amin a laman pinauges to so kagagawa to ed dalin.” (Genesis 6:3, 12) Say ‘belat na kasalanan [da] so nagnap la’; diad inlabas na panaon et amantok so mauges ya inklinasyon da. Sanen kinmiwas so Dios et sikato so nagnap a makatunongan. Walwaloran totoo so apaneknekan a matunong ed imaton na Dios, kanian inliktar tora.

Mipadparan padron met so nanengneng ed impantrato na Dios ed Israel. Anggaman ed inkiwas dan agmatoor tan mabanday, inanosan ira na Dios ed loob na nilasus a taon. Oniay ibabaga na rekord: “Si Jehova, . . . nambaki . . . na saray igaganggan to, a binangon to ya asaksakbay tan imbaki to, lapu ed walaan na pangabagey ed baley to . . . Balet . . . minudmora ra so saray salita to, tan binalaw da so saray propeta to, angga ed sanok nen Jehova inmalagey sumpa ed baley to, angga ed anggapo so pamaakaran.” (2 Awaran 36:15, 16) Asabi na totoo so punton imposibli lay panguman. Si Jeremias tan walay pigpigara labat so nilaban. Agnatawag so Dios a manlalabi sanen inukom toray amin lan akera.

Natan Lay Panaon ya Ikiwas na Dios

Unong ed sarayan alimbawa, natalosan tayo a popokpokan na Dios so panangukom ed sayan kaplesan a sistema na bengabengatla angga labat ed nasabi lay nagnap a panaon. Nibalikas iya ed ganggan ya inter na Dios ed simbolikon manangipaakseb: “Ibakim so kompay mo a makdem, tan tiponen to so saray bukel na ubas na dalin; ta aluto laran tuloy so ubas to. Et say anghel imbuntok to so kompay to ed dalin, et tinipon to so ubas na dalin, tan inyan to ed darapilan na alak, a baleg a darapilan na alak na sanok na Dios.” Imanoen a say inkarelmeng na katooan so “aluto la,” salanti, asabi to lay punton imposibli lay panguman. Sano ipaakseb na Dios so panangukom, andi-duaruwan makatunongan so isalet to.​—Apocalipsis 14:18, 19.

Diad impangonsidera ed tagey, malinew ya asingsingger lay pangukom na Dios ed mundo lapud nipapatnag la na mundo iray walengwaleng a sengegan na impangukom na Dios nensaman. Inermay lingawan tayo, napno so dalin na karawalan, a singa ed kasakbayan na Delap ed panaon nen Noe. Saray awawey na totoo so lalon magmamaliw a singa samay adeskribe ed Genesis 6:5: “Mauges labat a lanang so amin a pimorekdek na nonot na puso [na too].” Anggan say ambelat a kasalanan ya impangukoman na Dios ed saray Canaanita so kaslakan la natan.

Nagkalalo la nanlapula’d Guerra Mundial I, naeksperiensia la na katooan so makapatalagnaw ya impanguman. Apamintuan so dalin ya aleteb lay dala na minilyon. Say pambabakal, panagpalanit, terorismo, krimen, tan kaugsan so tinmulasok la ed sankamundoan. Say eras, sakit, tan imoralidad so manetekmel ed globo tayo. Ipapabitar na amin ya ebidensia a manbibilay itayo la ed limog na marelmeng a kailalakan a sinalita nen Jesus: “Sayan kapolian agnaani napaso angga ed kagawa na sarayan bengatla.” (Mateo 24:34) Say mundo natan so mamapantok ed “belat na kasalanan” to. “Saray bukel na ubas na dalin” so naluluto la parad panagani.

Panaon lan Onkiwas Ka

Nikuan ed si apostol Juan a diad panaasingger lay panaon na panangukom, nagawa so duaran klase na kapantokan. Say sakey et ‘samay aliwa a matunong, yabuloy ni a manggawa na aliwan matunong; tan say marutak, yabuloy ni a marutak.’ Balet say sananey, ‘samay matunong, yabuloy ni a manggawa na matunong: tan say masanto, yabuloy ni a napasantos.’ (Apocalipsis 22:10, 11) Say unor ya asalambit a nagawa so misiglaotan ed sankamundoan a kimey na panagbangat na Biblia ya ikokondukta na Tastasi nen Jehova. Say gagala na satan a kimey et say pambangat ed totoo ed no anto so kakaukolanen na Dios ed sikara ta pian nibilang iran makana a mangawat na andi-anggaan a bilay. Sayan kimey so makakasabi la ed 233 a daldalin diad panamegley na manga 87,000 a kongregasyon.

Aliwan matantan so Dios. Maan-anos ton iyaabuloy so nakaukolan a panaon ed saray indibidual a ‘mangikawes na balo ya inkatoo’ ta pian napidasig ed saray sipan to. (Efeso 4:24) Natan et siansia nin manaalagar so Dios, anggaman ed lalon idedenden na saray kipapasen ed mundo. Gagawaen na Tastasi nen Jehova ed intiron mundo so anggaay nayarian da ta pian nainabang ed kakaabay da so pikakabat a mangitonton ed magnayon a bilay. (Juan 17:3, 17) Makapaliket, kada taon et masulok a 300,000 a totoo so onkikiwas tan nababautismoan.

Sinononot ed andi-anggaan a bilay, natan la so panaon na ikiwas, aliwan manalagar. Agmanbayag, nanengneng tayo so kasumpalan na sipan nen Jesus: “Siopaman a manbilay tan manisia ed siak agbalot ompatey.”​—Juan 11:26.

[Paimano ed leksab]

[Litrato ed pahina 6]

Niganggan ed manangipaakseb na Dios ya isingwat to so kompay sano naluto la so ubas ed dalin

[Litrato ed pahina 7]

Tutulongan na Tastasi nen Jehova ed sankamundoan so totoo a napidasig ed saray magnayon a bendision na Dios