Saray Impanusa na Dios​—Kasin Anggapoy Panangasi?

PIAN naebatan iyan tepet, pantongtongan tayo so duaran alimbawa ed Biblia na impanusa na Dios—say Delap ya agawad panaon nen Noe tan say inkaderal na saray Canaanita.

SAY DELAP YA AGAWAD PANAON NEN NOE

NAYARIN ONIAY IBAGA NA ARUM: “Anggapoy panangasi na Dios ta si Noe tan say pamilya to labat so nisalba nen dineral toy totoo panamegley na delap.”

SAY IBABAGA NA BIBLIA: Oniay imbaga na Dios: “Anggapo so liket ko ed ipapatey na marelmeng; noag ingen say marelmeng ompawil komon a manlapu ed dalan to tan manbilay.” (Ezequiel 33:11) Kanian say impakaderal na saray mauges ed panaon nen Noe et agnanliketan na Dios. Balet, akin et ginawa to itan?

Ibabaga na Biblia ya nen dinusa na Dios iray mauges a totoo nensaman, sikatoy angiter na “pangaligan parad saray bengatlan onsabi ed agmaridios a totoo.” (2 Pedro 2:5, 6) Anto itan ya pangaligan?

Unona, impaamta na Dios ya anggano ansakit ed sikatoy paneral ed totoo, amta to no siopa ray sengegan na paniirap tan dusaen to ra unong ed saray ginawa ra. Agla manbayag et panganggaen na Dios so amin ya ag-inkahustisya tan paniirap.

Komadua, saray ginawa na Dios nensaman et mangipaamtad sikatayo a papasakbayan ni na Dios iray totoo antis to ran deralen. Si Noe et managpulong na inkatunong, balet sikatoy agdinengel na karaklan. Ibabaga na Biblia: “Ag-ira nanimano ya anggad sinmabi so delap tan niyanor iran amin.”—Mateo 24:39.

Kasin ontan ya lanang so gagawaen na Dios? On. Singa bilang, pinasakbayan to ray Israelita ya no magmaliw iran singa saray nasyon a walad kaliberliber da, abuloyan to ray kakabusol dan manamsam ed dalin da; maneral ed kabisera dan Jerusalem; tan gawaen da ran priso. Talagan nagmaliw ya mauges iray Israelita, ta anggan saray ananak da et imbagat da. Kasin dineral ira na Dios? On, balet antis ton ginawa itan, aminpigapiga nin angibaki na saray propeta pian pasakbayan iray totoo to ya manguman sakbay ya naatrasado la. Imbaga to ni ingen: “Say Katawan a [Jehova] et agbalot manggawa na antokaman ya agto ni ipaamtad saray aripen ton propeta so plano to.”—Amos 3:7, Maung a Balita.

NO AKIN YA IMPORTANTE IYAD SIKA: Say pangaligan ya impanengneng nen Jehova ed saray impanusa to nensaman et mangiter ed sikatayo na ilalo. Segurado tayon dusaen na Dios iramay panlalapuay irap. Ibabaga na Biblia: “Saray managgawa na mauges napater ira . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.” (Salmo 37:9-11) Antoy nibagam ed panusad saray mauges pian manganggay paniirap na totoo? Kasin wala odino anggapoy panangasi na satan?

INKADERAL NA SARAY CANAANITA

NAYARIN ONIAY IBAGA NA ARUM: “Say impaneral na Dios ed saray Canaanita et singa ed saray nagagawa natan ya anggapoy panangasin panagpatey.”

SAY IBABAGA NA BIBLIA: “Kaptekan so saray amin a dalan to. [Sikatoy] Dios a napanmatalkan tan anggapo so kaugsan.” (Deuteronomio 32:4) Agnayarin ikomparad guerra na totoo so dusa a nanlapud Dios. Akin? Lapud aliwan singa saray totoo, sarag a basaen na Dios so puso, say inkatoo na sakey.

Singa bilang, nen inukom na Dios iray totood syudad na Sodoma tan Gomorra tan determinadon maneral ed saratan, labay a seguroen na matoor a toon si Abraham no kasin duga itan a desisyon. Agton balot naisip ya say Dios ton walaay hustisya et ‘deralen toy matunong a kaiba na mauges.’ Maanos ya impaseguro na Dios ed sikato ya no walay anggan samploran matunong a totoo ed Sodoma, agto la itan deralen nisengeg ed sikara. (Genesis 18:20-33) Talagan inusisa na Dios so puso na saraman a totoo tan anengneng ton grabe so inkauges da.—1 Awaran 28:9.

Mipadpara, anengneng na Dios so inkauges na saray Canaanita kanian manepeg labat a deralen to ra. Kabkabat iran anggapoy panangasi, anggan saray ananak da et ibabagat dan mabilay diad apoy.a (2 Arari 16:3) Amta na saray Canaanita ya ingganggan nen Jehova iray Israelita a manakop ed amin ya dalin. Saramay nandesisyon ya mansiansia tan milaban ed saray Israelita et aglabat milalaban ed saray Israelita, noagta ontan met ed si Jehova ya angipanengneng na mabiskeg ya ebidensyan sikatoy kaiba na saray totoo to.

Kaaruman ni, impanengneng na Dios so panangasi ed saray Canaanitan anguman tan angawat ed saray atagey ya prinsipyo tod moral. Singa bilang, say Canaanitan paabang a bii ya si Rahab et nisalba kaibay pamilya to. Ontan met, nen saray manaayam ed Gibeon, sakey a syudad na saray Canaanita et kinmerew na panangasi, sikara tan amin ya ananak da et nilaban.—Josue 6:25; 9:3, 24-26.

NO AKIN YA IMPORTANTE IYAD SIKA: Walay importantin leksion ya naaralan tayod impanusa ed saray Canaanita. Asingsingger la so nipasakbay ya “agew na panangukom tan kaderal na totoon agmaridios.” (2 Pedro 3:7) No inaro tayoy Jehova, nabendisyonan tayo sano ekalen to lay paniirap na totoo diad paneral tod saray agmalabay a manpauley ed sikato.

Maaron ipapanonot nen Jehova ed sikatayo ya saray desisyon na atateng et mangapektad saray ananak da. Ibabaga na Salita na Dios: “Pilien mo so bilay ta pian manbilay ka, sika tan say kapolian mo, say panangaro ed Jehova a Dios mo, say panumpal ed boses to tan say ipepeket ed sikato.” (Deuteronomio 30:19, 20) Kasin ontan so ibaga na Dios ya anggapoy panangasi to odino Dios ya inaro to ray totoo tan labay ton duga so pilien dan desisyon?