Akin ya Ibabaga na Totoon Anggapoy Panangasi na Dios?

KASIN abigla kad samay tepet ed arap na sayan magasin? Ontan so reaksion na arum. Balet dakel iray totoon manduaruwa no kasin anggapoy panangasi na Dios tan wala met iray manisian anggapoy panangasi to. Akin?

Oniay itetepet na saray akaliktar ed kalamidad: “Akin et aabuloyan na Dios irayan nagawa? Kasin anggapoy pibabali to, odino anggapoy panangasi to?”

Ontan so nalilikna na arum no babasaen day Biblia. Singa bilang no nabasa da ’may Delap ya agawad panaon nen Noe, ibabaga ran, ‘Akin a pinatey na maaron Dios iraman ya totoo? Kasin anggapoy panangasi to?’

Ontan met kasi naiisip mo? Odino agmo itan naebatan no walay mantepet ed sika? Pantongtongan tayo pa so sakey ya tepet a makatulong.

AKIN A KABUSOL TAYOY ANGGAPOY PANANGASI?

Lapud amta tayo no antoy maong tan mauges. Satan so baleg a pidumaan tayod saray ayep. Pinalsa itayo na Dios ed “indengan ton dili.” (Genesis 1:27) Antoy labay ya ibaga na satan? Inikdan to itayoy abilidad ya ipanengneng iray kualidad tan prinsipyo tod moral, no antoy duga tan aliwa. Isipen pa iya: No say abilidad tayon naamtaay duga tan aliwa et nanlapud Dios tan kabusol tayoy anggapoy panangasi, agta mas lalon kabusol itan na Dios?

Duga itan lapud susuportaan itan na Biblia. Oniay ibabaga na Dios: “Saray dalan ko atagtagey ira nen saray dalan yo, tan saray kanonotan ko nen saray kanonotan yo.” (Isaias 55:9) No ibaga tayon anggapoy panangasi na Dios, agta babaliktaren tayoy ibabaga na Biblia—singa tayo ibabagan mas atagtagey iray dalan tayo nen saray dalan na Dios? Mas maabig no amtaen tayo ni ray detalye antis tayon manhusga. Ompan say importantin itepet tayo et aliwan no kasin anggapoy panangasi na Dios noagta no akin a say inkiwas to et singa anggapoy panangasi to. Pian natalosan iya, amtaen tayo no anton talagay labay ya ibaga na “anggapoy panangasi.”

No imbaga tayon anggapoy panangasi na sakey, huhusgaan tayoy intension to. Say sakey ya anggapoy panangasi to et labalabay ton nanengneng so paniirap na arum tan anggapoy pibabali tod sikara. Kanian anggapoy panangasi na sakey ya aman manudusad anak to lapud labalabay ton nasakitan so liknaan na anak to. Balet say sakey ya aman mandidisiplinad anak to pian naibangat odino naprotektaan et maong ya ama. Mainomay tayon husgaay motibo na arum lapud agtayo amtan amin so rason no akin ya onmay ikikiwas da.

Pantongtongan tayo pay duaran rason no akin ya iisipen na arum a say Dios et anggapoy panangasi to—saray kalamidad tan saray impanusa na Dios ed totoo ya nabasad Biblia. Kasin pruebaan na saratan ya anggapoy panangasi na Dios?