Kasin Manmatalek Kad Dios?

IMADYIN mon walay kaarom ya rerespetoen mon maong, balet ta walay ginawa ton agmo natalosan. Sikatoy babalawen na arum lapud ginawa to tan kukuestionen da iray motibo to, ya ibabaga ran anggapoy panangasi to. Kasin manisia kan tampol ed ibabaga ra, odino alagaren mon ipaliwawa na kaarom so ginawa to? No anggapod man pian idepensay sarili to, kasin mananos ka tan agmon tampol husgaan?

Antis kan onebat, ompan wala ni ray kaukolan mon naamtaan. Nayarin itepet mo, ‘Kasin kabat ko lan maong iyan kaarok, tan akin et rerespetoen kon maong?’ Duga labat ya ontay gawaen mo. Natan, nonot mo pa iya: Agta ontan met so nepeg tayon gawaen no wala ray mangibabagan anggapoy panangasi na Dios?

Ompan nairapan kan natalosan so arum a ginawa na Dios, odino pankelawan mo no akin ya inabuloyan ton nagawa iratan. Dakel iray totoon mangibagad sikan anggapoy panangasi na Dios tan impluensyaan da kan kuestionen iray motibo to a singa gagawaen da. Kasin husgaan mon tampol anta agmo ni amta so amin ya detalye? Say ebat et akadepende ed no talaga kasin kabat moy Dios bilang kaarom. Tepetan moy sarilim, ‘Anton klase na kaaro so Dios ed siak?’

No dakel so problemam, ompan nibagam ya anggapon talagay maabig a ginawa na Dios parad sika. Balet isip mo pan magano, Kasin say Dios a kaarom so sengegan na saray problemam, odino panlalapuan na saray bendisyon? Unong ed amta tayo la, si Satanas so “manuley na sayan mundo,” aliwan si Jehova. (Juan 12:31) Kanian si Satanas so natetel ed dakel a problema tan ag-inkahustisya ed mundo. Tan seguradon mipakna ka ya say lapuan na arum a problema et say agtayo inkaperpekto tan ag-iilaloan iran situasyon.

Anto ra balet so agawaan la na Dios? Imanoen pa iyan ibabaga na Biblia: Sikatoy “Nanggawa na tawen tan dalin”; ontan met ed laman tayo, ya “makapakelkelaw so inkagawa” to; tan si Jehova et “Dios a dia ed lima to so kawalaan na panlinawam.” (Salmo 124:8; 139:14; Daniel 5:23) Antoy labay ya ibaga na sarayan amin?

Labay ton ibaga ya utang tayoy bilay tayod Amalsa. (Gawa 17:28) Inregalo met na Dios ed sikatayo so bilay, marakep a kaliberliber, liket na panaaroan tan pankakaaro, pan-enjoy ed pakataway, pakalikna, pakadngel, tan pakaangob. (Santiago 1:17) Agta lapud saratan ya bendisyon et nibagan sikatoy sakey ya Kaaro a manepeg ya igalang tan panmatalekan?

Nayarin nairapan kan manmatalek ed Dios. Ompan iisipen mon agmo ni kabat a maong kanian agmo ni tanton napanmatalkan. Natural labat itan. Diad sarayan artikulo, agtayo napantongtongan so amin ya rason no akin ya ibabaga na arum ya anggapoy panangasi na Dios. Balet seguradon nabawbawim so sagpot mon kabaten a maong so Dios.a No gawaen mo itan, naamtaan moy katuaan nipaakar ed Dios. Kasin anggapoy panangasi to? Andi, ta “say Dios et aro.”—1 Juan 4:8.