Akin a Panisiaan si Jesu-Kristo?

“ANGGAN say dakel a totoo ya aliwan Kristiano et manisia a Sikato so sakey a matalonggaring tan makabat a managbangat. Maseguron sikatoy sakey ed sankaimpluensiaan a totoo a nambilay ed kapiganman.” (The World Book Encyclopedia) Siopa imay natutukoy a “Sikato”? Si Jesu-Kristo, say manangiletneg na Inkakristiano.

Balet, anggaman ed inkuan na encyclopedia, si Jesu-Kristo so agkabkabat na nilasus milyon a totoo ed Bukig tan ed arum nin pasen, a nayarin say ngaran to lambengat so nanonotan da manlapud saray libron panag-aralan diad haiskul. Anggan diad saray relihyon na Kakristianoan, walaray teologo tan klerigo a mangibabagan agtayon talaga kabat si Jesus tan panduaruwaan da so inkasusto na apatiran walan salaysay na bilay to (saray Ebanghelyo) a naromog ed Biblia.

Nasarag kasi na saray managsulat na Ebanghelyo a pabrikaen so istoryay bilay nen Jesus? Andin balot! Oniay insulat na bantog a manag-awaran a si Will Durant, kayari ton inanalisa iratan a salaysay na Ebanghelyo: “A saray pigaran ordinaryon totoo na sakey a kailalakan so ontanlan mabiskeg tan makaay-ayat a personalidad, ontanlan katagey a totontonen tan ontanlan makapaligsan pasingawey na impanaagi na too, so magmaliw a sakey a milagro a lalon agnapanisiaan nen say dinanman a nikurit ed saray Ebanghelyo. Kayari na duaran siglo na Madelikadon Panangituring (higher criticism), saray nidaldalatdat ya istorya na bilay, impanwalna, tan bangat nen Kristo, so nansiansian malinlinew, tan amawala na makapaay-ayat a tuloy ya aspektoy awaran na too ed Sagur.”

Siansia, wala niramay mangipupulisay ed si Jesu-Kristo a singano sikatoy agmakana ed imano ra lapud ginawa na saray mankuan a patumbok to. ‘Sikaray angipelag na bomba atomika ed Nagasaki,’ so ikuan na arum ed Hapon. ‘Tan say Nagasaki so walaan na mas dakel a Kristiano nen say maslak a syudad ed Hapon.’ Balet kasin tetelen moy doktor lapud sakit na pasienti no agtumboken na pasienti so panangigiya na doktor? Maslak a totoon mankuan a Kristianos so abayaglan angibaliwala ed bilin nen Jesus pian natalonaan iray paniirap na katooan. Ingen, inter nen Jesus so remedyo ed agew-agew a problema tayo ontan met ed saray paniirapan na katooan ed sankamundoan. Satan no akin ya imbitaan mi kan manbasa ed ontumbok ya artikulo tan talosan mon mismo no anton klase so inkatoo to.