Panon a Napasimbalo nen Jesus so Bilay Mo?

SI Jesu-Kristo so sakey a Matalonggaring a Managbangat a nambilay ed Palestina ngalngali 2,000 a taon lay apalabas. Agtanton kabat so nipaakar ed impanugaw to. Balet, apaneknekan itan a tuloy sanen sikatoy man-edad lay manga 30, inggapo toy ministeryo to pian ‘mantasi ed katuaan.’ (Juan 18:37; Lucas 3:21-23) Inyapasakey na apatiran babangatan ton nansulat ed saray salaysay so nipaakar ed bilay to diad talora tan kapalduan taon a sinmaginonor.

Legan na ministeryo to, walay ingganggan nen Jesu-Kristo ed saray babangatan to a magmaliw a remedyo ed dakel a paniirap ed mundo. Anto itan? Inkuan nen Jesus: “Sakey a balon ganggan so iter ko ed sikayo, a manaaroan so sakey tan sakey ed sikayo: salanti unong na impangarok ed sikayo, pian manaaroan met so sakey tan sakey ed sikayo.” (Juan 13:34) On, say solusyon ed dakel a problema na katooan et say aro. Diad sananey ya inkagawa, sanen atepetan si Jesus no dinan so sankabalgan a ganggan, oniay inyebat to: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikato ya so baleg tan unonan ganggan. Tan say komadua a mipadpara ed sikato saya, Aroen mo so kaparam a too unong ed sikan dili.”​—Mateo 22:37-40.

Impanengneng nen Jesus ed sikatayo diad saray salita tan gawa no panon ya aroen so Dios tan kaparan totoo. Konsideraen tayo so pigaran alimbawa tan imanoen tayo no antoy naaralan tayo ed sikato.

Saray Bangat To

Diad sakey ed sankabantogan iran sermon ed awaran, inkuan nen Jesu-Kristo ed saray patumbok to: “Anggapoy too a makapanlingkor ed duaran katawan: ta balang la ya gulaen to so sakey et aroen to so sananey; ono andi mansiansia ed sakey et balawen to so sananey. Agyo nayarian so manlingkor ed Dios tan saray Kayamanan.” (Mateo 6:24) Kasin praktikal ni natan so bangat nen Jesus nipaakar ed pangiyuna ed Dios diad bilay tayo, anta panisiaan na dakerakel a totoo a say kuarta so makasolbar ed amin a problema? Tua, nakaukolan tayoy kuarta pian makapambilay. (Eclesiastes 7:12) Ingen, no paaripen itayo ed saray “Kayamanan,” “say aro ed kuarta” so mangontrol ed sikatayo, a mandomina ed intiron bilay tayo. (1 Timoteo 6:9, 10, NW) Say nansumpalan na dakel ya akulabot ed sayan patit et abalang day pamilya, bunigas da, tan anggan say bilay da.

Diad biek a dapag, say panilalo ed Dios bilang Katawan tayo so mangiter na kabaliksan ed bilay. Bilang say Manamalsa, sikato so Subol na bilay, tan sirin, sikato lambengat so makanepegan parad panagdayew tayo. (Salmo 36:9; Apocalipsis 4:11) Saramay makaaral ed saray kualidad to tan mangaro ed sikato so napakiwas a mangunor ed saray ganggan to. (Eclesiastes 12:13; 1 Juan 5:3) Diad panggawa ed satan, nagunggunaan tayoy inkasikatayo.​—Isaias 48:17.

Diad Sermon ed Palandey, imbangat met nen Jesus iray babangatan to no panon ya ipanengneng so aro ed kaparan totoo. Inkuanto: “Amin a bengabengatla sirin a labay yo a gawaen na totoo ed sikayo, ontan so gawaen yo met ed sikara.” (Mateo 7:12) Say salitan “totoo” ya inusar dia nen Jesus so mangilaktip ed anggan saray kabusol na sakey. Diad satan met a sermon, inkuanto: ‘Aroen yoray kabusol yo, tan ipikasi iray mamasegsegang ed sikayo.’ (Mateo 5:43, 44) Agta say ontan ya aro so makasolbar ed dakel ed saray probleman aarapen tayo natan? Ontan so inisip na lider na Hindu a si Mohandas Gandhi. Sikatoy inaon ya angikuan: “Sano . . . mankasakey [itayo] ed saray bangat ya indatak nen Kristo ed sayan Sermon ed Palandey, naresolbi tayoray problema . . . ed intiron mundo.” No iyaplika so bangabangat nen Jesus nipaakar ed aro, nasolbar so dakel ya ir-irap na katooan.

Saray Ginawa To

Aglambengat imbangat nen Jesus so aralem iran katuaan nipaakar ed no panon so pangipanengneng na aro noagta inagamil to met so imbangat to. Alimbawa, inyuna toy paninteresan na arum nen say sikaton dili. Sakey ya agew et ontanlay inkaokupado nen Jesus tan saray babangatan to ya ontutulong ed totoo kanian agda la anggan nalimen so mangan. Atebek nen Jesus so pankaukolan na saray babangatan to a manpainawan magano, kanian intagar tora ed mareen a pasen. Balet sanen akasabi ra’d man, wadman laray ulop a manaalagar ed sikara. Panoy ikiwas mo sano nanengneng mo so ulop a maniilalo ed sikan ontulong anta kaukolan mo lay manpainawa? Bueno, si Jesus et “naabagey tora” tan “ginapoan to so nambangat ed sikara na amayamay a bengabengatla.” (Marcos 6:34) Si Jesus so apakiwas ya ontulong ed sikara lapud onian panangiyansakit ed arum.

Aglambengat imbangat nen Jesus so totoo. Innatnat to met so praktikal a tulong. Alimbawa, diad sakey ya inkagawa et pinakan toy masulok a 5,000 a totoo ya onderengel ed sikato ya angga la’d pankapisdem. Kayarin tampol na satan, pinakan to so sananey nin dakerakel a totoo​—a diad sayan pankanawnawa et masulok a 4,000​—ya onderengel ed sikato ed loob lay taloy agew tan anggapoy la nakan da. Diad inmunan inkagawa, inusar toy limaran sankabukel a tinapay tan duaran sira, tan diad saginonor et pitoran sankabukel a tinapay tan pigaran angkekelag a sira. (Mateo 14:14-22; 15:32-38) Milagro? On, sikato et managgaway milagro.

Pinaabig met nen Jesus iray dakel a mansasakit. Tinambal to iray bulag, piley, saray akating, tan say telek. Agayla, pinaoli to ni ingen so inaatey! (Lucas 7:22; Juan 11:30-45) Aminsan et akikaskasi ed sikato so sakey ya akating: “No labay mo, nayarian moak a linisan.” Panon so inyebat nen Jesus? “Lapud atenyeg so panangabagey to, inuna’toy lima to, et sikatoy diniwi’to tan inkuanto, ed sikato, Labay ko; nalinisan ka komon.” (Marcos 1:40, 41) Diad panamegley na saratan a milagro, impanengneng nen Jesus so aro to ed saray naiirapan.

Mairap mo kasin panisiaan iray milagro nen Jesus? Ontan so arum. Balet, nodnonoten a ginawa nen Jesus iray milagro diad publiko. Anggan saray onsusumpa ed sikato, a manaalmoy pamakasalananan ed sikato diad amin a pankanawnawa, so agmakapangiburi a sikato et managgaway milagro. (Juan 9:1-34) Niarum ni, walaan na gagala iray milagro to. Ontulong iratan ed totoo pian sikatoy nabidbir da bilang say Sakey ya imbaki na Dios.​—Juan 6:14.

Diad impanggawa to’d saray milagro et ag-impaarap nen Jesus so imano ed inkasikato. Imbes, inggloria toy Dios, say Lapuan na pakayari to. Diad Capernaum, sikato so aminsan a walad abung ya apusek na totoo. Labay na sakey a paralisadon too so natambal balet ta agmakaloob. Kanian sikatoy inyabeba na saray kaaro to manlapud atep panamegley na amakan akadukolan to. Diad impakanengneng nen Jesus ed pananisia ra, tinambal to so paralitiko. Bilang resulta, say totoo et “inggalgalang da so Dios” tan inkuanda: “Ag-itayo ni akanengneng na onia.” (Marcos 2:1-4, 11, 12) Saray milagro nen Jesus so akapangitarok na dayew ed si Jehova, say Dios to, tan tinmulong ed saramay mankaukolan.

Balet, say mamilagron panagtambal ed saray mansasakit so aliwan manunan gagala na ministeryo nen Jesus. Oniay impaliwawa na sakey a nansulat ed salaysay nipaakar ed bilay nen Jesus: “Saraya balet insulat ira, pian manisia kayo a si Jesus sikato so Kristo, ya Anak na Dios; tan diad pananisia yo nawalaan kayo na bilay ed ngaran to.” (Juan 20:31) On, linma si Jesus diad dalin pian nawalaan na bilay iray manisian totoo.

Say Bagat To

‘Linma si Jesus diad dalin?’ so nayarin itepet mo. ‘Iner so nanlapuan to?’ Inkuan mismo nen Jesus: “Linmasor ak a nanlapu ed tawen, aliwan piano gawaen ko so linawak a dili, noag say linawa na angibaki ed siak.” (Juan 6:38) Sikato so walaan na sakbay-toon kiwawala bilang bogbogtong ya Anak na Dios. Anto sirin so linawa na samay Sakey ya angibaki ed sikato diad dalin? “Ontanlay impangaro na Dios ed mundo, ya inter to so bogbogtong ya Anak to,” so kuan nen Juan, sakey ed saray managsulat na Ebanghelyo, “pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Panon iyan posibli?

Ipaparungtal na Biblia no panon a say ipapatey so nagmaliw ya agnapaliisan a sasagmaken na katooan. Say inmunan sankaparis a too so akaawat na bilay manlapud Dios tekep na ilalon manbilay ya ando lan ando. Balet, nilabay day manrebeldi ed Nanggawa ed sikara. (Genesis 3:1-19) Bilang resulta na sayan kiwas, say inmunan kasalanan na too, atawir na ilalak di Adan tan Eva so agkalkaliktan a tawir ya ipapatey. (Roma 5:12) Ta pian nipagamor ed katooan so peteg a bilay, nepeg a naekal so kasalanan tan ipapatey.

Anggapo so sientistan makapangekal ed ipapatey diad panamegley na pigaran klase na genetic engineering. Ingen, say Manamalsa na katooan so walaan na saray paraan pian nitarok so matulok a katooan ed inkayadyari ta pian makapambilay ira na ando lan ando. Diad Biblia, sayan probisyon so tinawag a dondon. Inlako na inmunan sankaparis a too so inkasikaran dili tan saray ilalak da ed panangaripen na kasalanan tan ipapatey. Insalat day bilay bilang ayadyari a totoon matulok ed Dios ed bilay a biig ed Dios, ya akauley la ran mandesisyon no anto so duga tan aliwa. Pian narondon so ayadyarin bilay bilang too, nakaukolan a bayaran so bili a misimbangan ed ayadyarin bilay bilang too a pinerdi na inmunan atateng tayo. Lapud impakatawir ed ag-inkayadyari, agnayarian na totoo a pawalaen itan a bili.​—Salmo 49:7.

Kanian sinmalet so Dios a Jehova pian ontulong. Inyalis toy ayadyarin bilay na bogbogtong ya Anak to ed panag-anakan na sakey a birhen, ya angiyanak ed si Jesus. Pigaran dekada lay apalabas, nayarin impulisay moy ideya nipaakar ed pananak na birhen. Balet, natan, kokopyaen (clone) na saray sientista iray mammal tan itetekep da iray genes a nanlapud sakey ya ayep ed arum ya ayep. Siopa sirin so makanepegan a manuppiat ed pakayari na Manamalsa a mamalumbas ed ordinaryon proseso na panag-anak?

Diad inkiwalay sakey ya ayadyarin bilay bilang too, say bili a manondon ed katooan manlapud kasalanan tan ipapatey so niwala la. Ingen, say ugaw a nianak ed dalin bilang si Jesus so kaukolan ya ombaleg pian magmaliw a “managtambal” a makayarin mamawalay “tambal” a mamaabig ed saray sakit na katooan. Ginawa to iya diad impambilay to bilang ayadyari tan andiay-kasalanan. Aglambengat anengneng nen Jesus so kagogonigon na katooan a walad silong na kasalanan noagta naeksperiensia toray pisikal a limitasyon diad pagmaliw a too. Lapud saya, sikatoy nagmaliw ni ingen a mas maabagey a managtambal. (Hebreos 4:15) Saray mamilagron panagtambal a ginawa to legan na bilay to ed dalin so amaneknek a sikato so walaan na pilalek tan pakayarin mamaabig ed saray mansasakit.​—Mateo 4:23.

Kayari na ministeryo to ed loob na talora tan kapalduan taon diad dalin, si Jesus so pinatey na saray onsusumpa ed sikato. Impanengneng ton say ayadyarin too so nayarin magmaliw a matulok ed Manamalsa anggaman ed sankagrabian iran subok. (1 Pedro 2:22) Say imbagat ton ayadyarin bilay to bilang too so nagmaliw a bili na dondon, a makayarin manondon ed katooan manlapud kasalanan tan ipapatey. Inkuan nen Jesu-Kristo: “Andian so too na babaleg ya aro nen saya, a sakey a too italaga to so bilay to nipaakar ed saray kakaaro to.” (Juan 15:13) Diad mikatlon agew kayari na impatey to, apaoli si Jesus ed espiritun bilay, tan manga pigaran simba ed saginonor et sikatoy tinmokotok ed tawen pian ipresenta so bili na dondon ed si Jehova a Dios. (1 Corinto 15:3, 4; Hebreos 9:11-14) Diad impanggawa’d saya, nayarian nen Jesus ya iyaplika so merito na dondon bagat to ed saramay ontumbok ed sikato.

Mabulos ka kasin pagunggunaan ed onian paraan na panagtambal ed saray sakit ed espiritual, emosyonal, tan pisikal? Pian nagawaan itan, kaukolan a nawalaan kay pananisia ed si Jesu-Kristo. Akin ya agka mismon onasingger ed Managtambal? Nagawaan mo itan diad panaral nipaakar ed si Jesu-Kristo tan say betang to diad pangisalba ed matoor a katooan. Maliket iray Tastasi nen Jehova ya ontulong ed sika.

[Litrato ed pahina 5]

Si Jesus so walaan na pilalek tan pakayari a mamaabig ed saray mansasakit

[Litrato ed pahina 7]

Panon kan naapektaan ed impatey nen Jesus?