Sigagayagan Paiwawanwan ed si Jehova

UNONG ED SALAYSAY NEN ULYSSES V. GLASS

Nikadkaduman okasyon iman. Wala labat lay 127 ya estudyanten mangraduar, balet ta walay 126,387 ya entusiastikon inmatendi, a nanlapud amayamay a nasyon. Saman imay graduation na koma-21 klase na Watchtower Bible School of Gilead, ya agawa ed Yankee Stadium na New York City nen Hulyo 19, 1953. Akin ya ontanlan makatantanda iman ya inkagawa ed bilay ko? Ikdan ta kayo pa na daiset ya impormasyon nipaakar ed satan.

NIANAK ak diad Vincennes, Indiana, E.U.A., nen Pebrero 17, 1912, manga duay taon sakbay na kianak na Mesianikon Panarian, a singa adeskribe ed Apocalipsis 12:1-5. Diad apalabas a taon ginapoan na atateng ko ya inaral so Biblia tekep na saray tomon Studies in the Scriptures. Kada Simbay kabuasan et ibasa nen Dad ed pamilya so sakey ed saraman a libro, insan mi’d satan pantongtongan.

Inusar nen Nanay so naaaralan to pian imoldi so kanonotan na ananak to. Sikatoy maomaong a too​—mapangpangasi tan matultulong. Apatira kamin ananak, balet ta say panangaro nen Nanay et ninmatnat ni ed arum ya ananak na kakaabay mi. Sikatoy angitalagay panaon ed sikami. Nanliketan toy pangisalaysay na saray istorya ed Biblia tan pikanta ed sikami.

Nanduruman sigpot-panaon a ministros so inimbitaan to met ed abung. Sikaray nansiansia ed loob na sakey odino duaran agew labat, mabetbet pian mangorganisa na saray miting tan mangiter na saray paliwawa ed mismon ayaman mi. Labalabay mi iramay angusar na saray ilustrasyon tan angiistorya ed sikami. Diad sakey ya inkagawa nen 1919, ngalngali sakey taon kayari impangangga na inmunan guerra mundial, indirekta na say ombibisitan agi iray komento to nagkalalo la ed sikamin ugugaw. Siningbat toy nipaakar ed panangitalaga​—a suston tutukoyen tayo la natan bilang dedikasyon​—tan tinulongan to kamin talosan no panon a mangapekta itan ed bilay mi. Saginonor sanen onugip ak la ed saman a labi, nampikasi ak ed mangatatawen ya Amak a labay kon sikatoy lawas kon panlingkoran.

Balet, kayari 1922 walaray problema’d bilay ya impagmaliw ton segundaryo labat itan a desisyon. Nandurumay nanayaman mi tan agkami akapilimog ed kongregasyon na totoo nen Jehova. Si Tatay so andin naynay ed abung lapud trabaho to’d riles. Aliwan regular met so panagaral mi na Biblia. Siak so angala na saray kurso diad gagalan magmaliw ak a commercial artist tan plaplanoen ko lay paneskuela’d sikat ya unibersidad.

Panangipetek ed Direksion na Bilay Ko

Kaleganay kapegleyan na dekaday 1930, amaarap lamet so mundo ed sankagloboan a bakal. Sikami manaayam ed saman diad Cleveland, Ohio, sanen dinalaw kami na sakey ed Tastasi nen Jehova. Inisip min maong iray naaralan mi sanen ugugaw kami ni. Si kuyak Russell so nagkalalo lan seryoson-impannonot, kanian sikatoy inmunan abautismoan. Medyo aliwan onman ak kaseryoso, balet kasabi Pebrero 3, 1936, siak met so nanpabautismo. Onaaralem met la’d saman so pakatalos ko ed no antoy sasaglawien na dedikasyon ed si Jehova, tan paiwawanwan ak la ed si Jehova. Diad saman lanlamang a taon et nampabautismo met so duaran agagik a bibii, si Kathryn tan si Gertrude. Sikami ya amin so linmoob ed sigpot-panaon a serbisyo bilang payunir.

Balet agto labay ya ibagan satan labat so nononoten mi. Madengedengel ak ed imbaga na ayrok ed siak nipaakar ed magangganan biin manngaran na Ann a diad impakadngel to ed katuaan et sikatoy “maligligsa” tan atendian to met iray miting ed abung mi. Diad saman a panaon et si Ann so sekretarya ed sakey ya opisinay abogasya, tan diad loob na sakey a taon et sikato lay nampabautismo. Anggapoy planok nin mangasawa, balet ta sankapatnag a 100 porsiento si Ann parad katuaan. Labay toy sigpot a mibiang ed serbisyo ed si Jehova. Sikato imay agbalot mangibagan, “Nayarin gawaen ko itan?” Imbes, sikato imay mangitepet na, “Anto kasi sankaabigan a paraan pian nagawaan ko itan?” Tan sikatoy desididon ontundas. Saman a positibon awawey so anagyat ed siak. Nilikud ni et sikatoy magangganan maong ya angga nid natan. Sikatoy nagmaliw ya asawak, tan ag-abayag et nagmaliw a kaibak ed panagpayunir.

Makanakanan Inkipasal Bilang Payunir

Bilang payunir et naamtaan mi sekreto no panon so pagmaliw a kontento balanglan sikami walad kakisiran man odino diad inkadaakan. (Filipos 4:11-13) Sakey ya agew et mansirunget la, tan anggapoy nakan mi. Limlimaran sentimos labat so kuarta mi. Linma kami ed lakoay karne, tan intepet ko, “Nayarin ikdan yo kami mankantidad na limaran sentimos a longganisa?” Ninengneng to kami tan anegteg na apatira. Segurado ak a mankantidad na masulok a limaran sentimos iman, tan saman so anagano ed sikami.

Naynay kamin makakaabet na pirmin isusumpa lapud panmiministeryo mi. Diad sakey a baley ya asingger ed Syracuse, New York, sikami walad lansangan a mangibubunog na saray handbill tan akasulong na saray plakard ta pian nipaimanoy espisyal a publikon miting. Duaran maregkel a san-amigo so anegkem tan pinoponiti da ak. Say sakey et polis, balet ta akasibilyan ed saman, tan binaliwala toy kerew kon nengnengen so tsapa to. Kamangta, si Grant Suiter a taga Brooklyn Bethel so sinmabi tan inkuanton sikami onlad istasyon na polisya pian aregloen iman. Insan to tinawagan ed telepono so opisina na Sosyedad diad Brooklyn, tan sikamin dua nen akulaw ko so abilin a makapanpulong lamet ed saman met ya agew tekep na saray plakard tan handbill ta pian walay pakapangibasiyan ed arapen a kaso. Singa nailaloan la, sikami naaresto. Balet, sanen inkuan mi ed polisya a sikaray idemanda lapud agmarason ya inkaaresto mi, sikami imbulos da.

Diad tinmumbok ya agew diad sugsog na pari, sakey a grupo na tin-edyer a manaanap na gulo so linmusob ed pandaragupan mi, tan anggapo labat so popolis. Impepekpek na saray pangkat iray baseball bat ed datal a tabla, inaablog day dumerengel manlapud saray bleacher, tan linma ra ed entablado, ya inyatagey day bandera na Amerika tan inyeeyag, “Saludoan! Saludoan!” Insan ira nankasion na “Beer Barrel Polka.” Sigpot dan apatunday miting. Aktual a naeksperiensia mi labay ya ibaga nen Jesus sanen inkuanto: “Lapud aliwa kayo a taga mundo, noag say pinili ta kayo ed mundo, kanian say mundo busolen to kayo.”​—Juan 15:19.

Say publikon paliwawa et sakey ya implakan diskurso nen J. F. Rutherford, a presidenti ed saman na Watch Tower Society. Sikami nen Ann so nansiansia ed saman a baley diad loob na pigaran agew tan dinmadalaw ed totoo pian naikdan ira na pankanawnawan narengelan so paliwawa ed saray abung da. Walaray pigaran angawat.

Panagboluntaryo ed Biek-taew

Asabi panaon, nilukas iray balon nengneng na serbisyo. Si kuyak a Russell tan say akulaw to, si Dorothy, so naimbitaan bilang sanasawa ya onatendi ed onunan klase na Gilead School, nen 1943, tan sikaray nibaki bilang misionaryo diad Cuba. Si atsik Kathryn so kabiangay komapat a klase. Sikato met so niasain ed Cuba. Diad saginonor et sikatoy niasain lamet diad Dominican Republic insan diad Puerto Rico. Sikami balet nen Ann ey?

Sanen nadngelan mi so nipaakar ed Gilead School tan ed panlabay na Sosyedad a mangibaki na saray misionaryo ed arum a bansa, mabulos kamin manserbi ed biek taew. Diad inmuna, ninonot mi so personal lan iyakar, anganko et diad Mexico. Ingen deneside min magmaong no manalagar tan manpa-asain kami la ed Sosyedad kayari pakasumpal mi ed Gilead School. Amoria min satan so areglon uusaren nen Jehova.

Sikami naimbitaan ed komapat a klase na Gilead School. Balet sakbay ya onggapo so klase, si N. H. Knorr, a presidenti ed saman na Watch Tower Society et amta ton tuloy iray limitasyon nen Ann lapud impakapolio to sanen ugaw ni. Intongtong to iya ed siak tan adesiden agmarakep no sikami nibakin manlingkor ed sananey a bansa.

Ngalngali duay taon ed saginonor, sanen tratrabahoen toy preconvention work, akitongtong lamet ed siak si Brother Knorr tan tinepetan to no siansian interesado kami ni a maneskuela ed Gilead. Imbaga ton agkami ni-asain ed biek-taew, balet ta walay sananey a walad kanonotan to. Kanian sanen nirehistro so koma-siam a klase nen Pebrero 26, 1947, sikami kaiba ed ulop na estudyante.

Saraman ya agew ed Gilead so agbalot nalingwanan. Saray asignatura so makapayaman ed espiritualidad. Niwala iray legay bilay a pankakaaroan. Balet ta mas ni nen say satan so impakapibiang ko ed say eskuelaan.

Diad Washington tan Gilead

Balobalo ni ed saman so Gilead School. Agni tanton kabisado na gobiernoy Estados Unidos iray gagala na eskuelaan, kanian dakerakel a tepet so napapalesa. Labay na Sosyedad a walay manangilaman to ed Washington, D.C. Ditan so akabakian mi pigaran bulan kayari impangraduar ed Gilead. Siak so mangasisti ed pakagamor na saray visa parad saramay naimbitaan a manaral ed Gilead a manlalapud arum a bansa pati met lay pangamor na legal a papeles ta pian nibaki iray nangraduar ed biek-taew a manmisionaryo. Walaray opisyales ya agmalabi tan matulong. Arum met so pirmin sumpa ed Tasi. Tan impilit na pigaran mabiskeg iray panmoria ra ed politika a sikatayo kuno so konektado ed saray grupo ya ipapasen dan agkaliktan.

Pirmi balaw ed sikatayo na sakey a lakin nakar koy opisina to lapud agtayo panagsaludo ed bandera odino pibiang ed bakal. Kayari ton nantami nipaakar ed satan, diad kaunoran et imbagak ed sikato: “Labay kon naamtaan yo, tan amta yo met la, ya agmibabali iray Tastasi nen Jehova ed bakal ed siopaman diad mundo. Agkami akibabali ed saray pakurang na mundo. Agkami akibiang ed saray bakal tan politika ra. Sikami so sigpot a neutral. Natatalonaan mi laray probleman aarapen yo; walay pankakasakey ed organisasyon mi. . . . Natan, anto ni labay yon gawaen mi? Labay yo ta a pawilen miray paraan yo tan ibaliwala iray paraan mi?” Sikatoy ag-akaskasel.

Duaran agew ed loob na sakey a simba so nigeter a pantrabahok a nisiglaot ed saray opisinay gobierno. Nilikud ni ed satan et sikami manlilingkor bilang espisyal payunir. Diad saman a panaon, mankabaliksan itan na pangusar na 175 ya oras ed lawak a ministeryo ed kada bulan (diad saginonor et nagmaliw itan ya 140 oras), kanian mabetbet a sikami manpupulong anggad lablabi la. Nanliketan mi itan. Dakel a maabig a panangiyaral so nikondukta mi ed saray intiron pamilya, et maabig so aligwas da. Anggaman deneside mi nen Ann so agpanilalak, diad espiritual a pantalos et sikami awalaan na aliwa labat ya ananak noagta na saray apo tan apo ni ingen ed pueg. Agaylan sengegan ira na gayaga mi!

Diad bandad sampot na 1948, akaawat ak ni na sakey ya asainmin. Insalaysay nen Brother Knorr a si Brother Schroeder, say registrar tan sakey ed saray instruktor na Gilead School, so okupado ed arum ya importantin kimey, kanian siak so akerew a manbangat ed saray klase ed Gilead no nayadyari. Anggaman talawan et pinmawil ak ed Gilead, diad South Lansing, New York, a kaibay Ann nen Disyembre 18. Diad inmuna et sikami walad Gilead ed loob na pigaran simba, insan sikami so ompawil ed Washington. Balet, diad kaunoran et babaleg a panaon so nauusar mi ed Gilead nen say diad Washington.

Diad sayan panaon, a singa asalambit ko la nen niman, a nangraduar so koma-21 klase na Gilead ed Yankee Stadium diad New York. Kanian bilang sakey ed saray instruktor et apribilihyoan ak a naikday betang ed programa na graduation.

Serbisyo ed Sankamundoan a Hedkuarter

Nen Pebrero 12, 1955, ginmapo so sananey nin asainmin ed serbisyo parad sikami. Sikami nagmaliw a membro na pamilyan Bethel diad sankamundoan a hedkuarter na nanengneng ya organisasyon nen Jehova. Balet antoy lalanoren na satan? Manuna’d amin et say pagmaliw a mabulos a gawaen so antokaman a nipabtang ed sikami, mibiang ed saray proyekton kakaukolanen toy pikokoopera ed arum. Siempre, agawaan mi la itan, balet natan et magmaliw kami lan kabiangan na lalon babaleg a grupo, saray hedkuarter na pamilyan Bethel. Magayaga min inawat iyan balon asainmin bilang pakapatnagan na panangiwanwan nen Jehova.

Say baleg a kabiangan na kimey ko et sasaglawien toy media. Nisesengeg ed panpilalek parad makapaay-ayat iran istorya tan lapud naaalan agsuston impormasyon manlapud saray walaay panaglabi, angisulat so media na mabanday iran bengatla nipaakar ed Tastasi nen Jehova. Nambanikelan min parakepen itan a situasyon.

Labay a seguradoen nen Brother Knorr ya amin mi et walaan na dakel a trabahoen, kanian walaray niarum ya asainmin. Sakey ed saraya et say akapangusaran ko na inaral ko bilang commercial artist. Arum so makalanor ed istasyon na radyo na Sosyedad, a WBBR. Wala so trabahon kaukolan a gawaen nipaakar ed pelikulan pinawala na Sosyedad. Siempre, say teokratikon awaran so kabiangay kurso ed Gilead, balet natan et nanduruma iray proyekton nigapo ta pian lalon nakabisado na totoo nen Jehova iray detalyi na satan ya awaran na modernon-panaon na teokratikon organisasyon tan pian nipawala met iya ed publiko. Sakey nin aspekto na panangipasal ed Gilead et nipaakar ed publikon panagsalita, tan wadtan met so kimey a kaukolan a sumpalen nipaakar ed kiwala na saray manunan totontonen ed publikon panagsalita parad agagi ed saray kongregasyon. Kanian dakel a kimey so kaukolan a gawaen.

Regular la ed Gilead

Nen 1961, lapud igapo lay paneskuela na saray managbaroy a manangasikaso tan mankikimey ed sanga, nialis so Gilead School diad Brooklyn, a kawalaay manuna iran opisina na Watch Tower Society. Nipawil ak lamet ed kuarton-panaralan​—diad sayan bekta et aliwan bilang kasandi ya instruktor balet ta regular lan membro na say faculty. Agaylan pribilihyo! Kombinsido ak a tuloy a regalon nanlapud si Jehova so Gilead School, regalon pakabebenepisioan na intiron nanengneng ya organisasyon to.

Saray nanklase ed Gilead dimad Brooklyn so awalaan na saray pankanawnawan anggapo’d saramay inmuuuna lan nangraduar. Mas dakel so bisitan managlektyur tan lalon maapit so pilimog ed Mananguley ya Ulop tan apalaknab so pitutuyaw ed pamilyan Bethel ed saray hedkuarter. Posibli met so kipasal na saray estudyante ed kikurang na opisina, ed Bethel home, tan ed nambabangil ya aspekto na kimey ed paktorya.

Diad loob na saratan a taon et nandurumay bilang na saray estudyante, ontan met ed bilang na saray instruktor. Say lugar na eskuelaan so aminpigan asalatan. Natan et naromog itan ed marakdakep a kaliber-liber diad Patterson, New York.

Pikikimeyan ed Saray Estudyante

Talagan agaylan gayaga so pangibangat ed sarayan klase! Kalangweran iran ag-interesadon manggawa na bengabengatla diad daan a sistema. Tinaynan day pamilya ra, kakaaro ra, abung da, tan totoon kalenguahe ra. Say klima, tagano​—amin a bengatla so magmaliw a duma. Agda anggan amta so bansan kibakian da, balet ta say kalat da et say pagmaliw dan misionaryo. Agkaukolan a dagdagen so ontan a nengneng na totoo.

Sano onloob ak ed kuarton panaralan, say lawas a kalat ko et pagmaliwen a komportabli iray estudyante. Anggapo so makaaral a maong sano sikatoy nanenerbiyos tan kabado. Tua, siak so instruktor da, balet ta amtak met no antoy liknaan na sakey ya estudyante. Datin siak so akayurong ed saraman a yurongan. Siempre, sikaray nanaral a maong tan akaaral a maong ed Gilead, balet ta labay kon panliketan da met so inkiwala ra’d Gilead.

Amtak a sano sikaray makasabi ed kibakian da, walaray bengatlan nakaukolan da ta pian ontalona ra. Kaukolan day mabiskeg a pananisia. Kaukolan a magmaliw iran mapaabeba​—a nagkalalo ed saya. Kaukolan dan aralen no panon dan pidenengan so arum a totoo, awaten iray situasyon, tan mabulos a mamerdona. Kaukolan dan tuloytuloy a bayuboan iray bunga na espiritu. Kaukolan da met ya aroen so totoo tan pablien so kimey ya inkibakian da. Saratan a bengatla so naynay kon idanet ed saray estudyante legan a wala ra’d Gilead.

Agko amta no pigaran estudyante lay imbangat ko. Balet amtak no antoy liknaan ko nipaakar ed sikara. Kayari limay bulan ya impaniiba ed kuarton panaralan, apaapit ak ed sikara. Kanian sano bantayan ko lay iyakar da’d entablado pian alaen da laray diploma ra ed agew na pansumpal da, namoriak a matalonan akapansumpal la ra tan diad agmabayag et sikara met lay onalis. Singano walay kapamilyaan ya onalis la. Panon ton agmo napokpokay inkasikan mangaro ed totoon mabulos dan iter so inkasikara tan gawaen so asaimin a niiter ed sarayan kalangweran?

Pigaran taon ed saginonor, sano ombisita ra, istoryaen daray gayaga ra ed serbisyo, tan amtak a mansiasiansia nira’d asainmin da, a gagawaen day inkipasalan da. Anto kasiy naliknak ed satan? Siempre, agaylan liket.

Inengneng ed Arapen

Kurabdab lay pakanengneng ko, tan nasasagmak ko laray epekto to. Agak la makapanbangat ed kuarton panaralan a Gilead. Diad inmuna et mairap kon akoen itan, balet legay pambibilay ko et naaralan kon awaten iray situasyon tan talonaan iratan. Mabetet kon nonoten si apostol Pablo tan say “sabit [to] ed laman.” Amitlon danay ya impikasi nen Pablo a naekal la komon itan a sakit, balet ta imbaga na Katawan ed sikato: “Say grasyak so masarag ed sika; ta say pakayarik agawan ayadyari ed kakapuyan.” (2 Corinto 12:7-10) Nantultuloy si Pablo a nambilay tekep na satan. No ayarian to, nepeg kon salien met. Anggaman agak la makapambabangat ed saray klase, pisalamatan ko ta say opisinak et asingger ed eskuelaan. No maminsan et makapitotongtong ak ed sikara, tan panggayagaan kon isipen so nipapanengneng dan maabig ya awawey.

Say itatarya na arapen so marakdakep a nodnonoten. Nipapaalagey la natan so sakey a pundasyon. Say Gilead so walaan na prominenten betang ed satan. Kayari na baleg a kairapan, sano saray lukot a tutukoyen na Apocalipsis 20:12 so nalukasan, wadtan so sanlibon taon na mas malaknab ya edukasyon diad saray dalan nen Jehova. (Isaias 11:9) Balet ta agmanampot ditan. Satan so gapoan lambengat. Diad inkamagnayon et dakel ni kaukolan ya aralen nipaakar ed si Jehova tan dakel ni gawaen legan tayon naaamtaan iray niparungtal a gagala to. Sigpot kon panmatalkan a tooren nen Jehova so amin ya engranden sipan to, tan labay kon wadtan ak a mibiang ed pangawat na saray direksion nen Jehova parad sikatayo.

[Litrato ed pahina 26]

Impangraduar ed Gilead diad Yankee Stadium na New York nen 1953

[Litrato ed pahina 26]

Si Gertrude, siak, Kathryn, tan Russell

[Litrato ed pahina 26]

Mikikimeyan ed si N. H. Knorr (bandad kawigi) tan M. G. Henschel diad panangorganisa na kombension

[Litrato ed pahina 26]

Diad WBBR broadcasting studio

[Litrato ed pahina 29

Diad kuarton panaralan a Gilead

[Litrato ed pahina 31]

Kaibay Ann, diad agano ni