Sikami so Binangatan na Atateng Min Mangaro ed Dios

UNONG ED SALAYSAY NEN ELIZABETH TRACY

Si Daddy tan Mommy so pinapaway na armadon lalaki ed kotse, a diad asasakbay ed satan ya agew et angidaulo’d sakey a pangkat ya onsumpa ed sikami. Sikami nen atsik ya atilak ed benegan so nanumameng no kasin napinengnengan mi niray ateng mi. Antoy sengegan na sayan makapakebbiew ya eksperiensia ed asingger na Selma, Alabama, E.U.A., nen 1941? Tan antoy siglaotan ed satan na saray bangat a naawat mi ed atateng mi?

SI Daddy min Dewey Fountain so pinabaleg na sakey a kanayon ed kaumaan na Texas kayari impatey na atateng to sanen mansuso ni labat. Diad saginonor et sikatoy nantrabaho ed saray oil field. Nen 1922, sanen manedad na 23 et inasawa to si Winnie, magangganan marikit a taga-Texas, tan implano toy manpamilya.

Angipaalagey na abung ed makiew a lugar na bandad bukig na Texas ya asingger ed melag a baley na Garrison. Ditan nantanem na nanduruman tanaman, pati met lay kapes tan mais. Nankumponi met na amin a klase na ayayep ed kaumaan. Asabi panaon et sikamin ugugaw so nianak​—si Dewey junior nen Mayo 1924, si Edwena nen Disyembre 1925, tan siak nen Hunyo 1929.

Impakaaral ed Katuaay Biblia

Inisip di Mommy tan Daddy ya atalosan da lay Biblia, ta sikaray membro na Church of Christ. Balet nen 1932, akapangitilak si G. W. Cook na saray libron Deliverance tan Government, ya impalapag na Watch Tower Society, ed kuya nen Daddy a si Monroe Fountain. Lapud gunaet ton inabang ed atateng mi so naaaralan to, mabetbet ya oonla ed sikami si Tio Monroe legay almusal, a manbasa na sakey ya artikulo ed The Watchtower, insan gagalaen ton itilak so magasin. Kayari to et satan so basaen di Mommy tan Daddy.

Sakey a Simba na kabuasan et inimbitaan nen Tio Monroe si Daddy ed abung na kaabay parad panagaral na Biblia. Pinaseguroan to a sarag nen Mr. Cook ya ebatan so amin a tepet nen Daddy manlapud Biblia. Kasempet nen Daddy a nanlapud panagaral et alay liket ton angibalita ed pamilya: “Naebatan ya amin iray tepet ko tan naarumay naamtaan ko! Say abaloan ko et amtak lan amin, balet sanen insalaysay la nen Mr. Cook so nipaakar ed impierno, kamarerwa, gagala na Dios ed dalin, tan no panon ya itarok itan na Panariay Dios, aliknak a diad tua et anggapoy amtak nipaakar ed Biblia!”

Say abung mi so singa sentro na sosyal a pantitipon. Binmibisita iray kakanayon tan kakaaro, nanggagawa na yema tan bola-bolan popcorn, tan nankakanta legan a si Mommy so manpiapiano. Kalkalnan sarayan nagagawa et nagmaliw lan pantotongtong nipaakar ed saray tema ed Biblia. Anggaman sikamin ugugaw et agmi natatalosan ya amin so bengatlan pantotongtongan, say malet a panangaro na atateng mi ed Dios tan ed Biblia so pakapatnagan a balang sakey ed sikamin ananak et akabayubo na mipadparan panangaro ed Dios tan ed Salita to.

Impausar met na arum a pamilya iray ayaman da parad saray sinimban diskusyon nipaakar ed Biblia, a gendagendat a nisentro ed tema ed sankabaloan a magasin a Panag-Bantayan. Sano saray pamilya ed kabangibang iran baley na Appleby tan Nacogdoches so pantitiponan, sikami manseseksekan ed Model A Ford mi pian onla diman, uran man odino agew.

Onkikiwas Unong ed Naaralan Da

Agnambayag et atebek na atateng mi a kaukolan so ikiwas. Kakaukolanen na panangaro ed Dios so panginabang na naaralan ed arum. (Gawa 20:35) Balet sayan kundang a pangiyabawag la’d publiko ed pananisia na sakey so sakey ya angat, nagkalalo la ta saray atateng mi et sipor lan mabaing tan mapaabeban totoo. Ingen, lapud panangaro ra ed Dios et sikami so imbangat dan pirmin manmatalek ed si Jehova. Oniay impangibalikas ed satan nen Daddy: “Mamapawala si Jehova na saray managpulong ed saray dumaralos!” Nen 1933 et insimbolo di Mommy tan Daddy so dedikasyon da ed si Jehova diad bautismo ed danum dia ed sakey a pukok ya asingger ed Henderson, Texas.

Diad kagapo na 1935, sinulatan nen Daddy so Watch Tower Society pian ontepet na pigaran tepet nipaakar ed ilalo na Kristiano ed andi-anggaan a bilay. (Juan 14:2; 2 Timoteo 2:11, 12; Apocalipsis 14:1, 3; 20:6) Naawat to so ebat a mismo nen Joseph F. Rutherford, say presidenti ed saman na Sosyedad. Imbes ya ebatan toray tepet to, si Daddy so inimbitaan nen Brother Rutherford ya onatendi ed kombension na Tastasi nen Jehova dia ed Washington, D.C., ed Mayo.

‘Imposibli!’ inisip nen Daddy. ‘Sikami dumaralos a walaay 26 ektaryan tinaneman na pisipising. Tan diad satan met a panaon a kaukolan a borboren ya amin tan ilako itan ed tindaan.’ Balet, ag-abayag kayari to et sinmabi so delap ya angiyanor ed saray pangibabaraanan to​—saray tanem, alar, tan saray taytay. Kanian akiulop kami ed arum a Tastasi ed kinupadon school bus a nanluganan mi ed 1,600 a kilometro a mamaarap ed amianen-bukig paonla ed kombension.

Diad kombension et nanliketan di Daddy tan Mommy a tinalineng so malinew ya inkisalaysay na pakabidbiran ed “baleg a karaklan” a makaliktar ed “baleg a kairapan.” (Apocalipsis 7:9, 14, King James Version) Diad nakekeraan a kabiangay bilay da, say ilalo ed magnayon a bilay ed paraison dalin so amakiwas ed si Mommy tan Daddy, tan sikami so pinaseseg dan ananak da a ‘bembenay bilay a peteg,’ a say kabaliksan to ed sikami et say iyoopresi nen Jehova ya andi-anggaan a bilay diad dalin. (1 Timoteo 6:19; Salmo 37:29; Apocalipsis 21:3, 4) Anggaman mantaon ak labat na limara ed saman, talagan nanggayagaan koy impila’d pamilyak ed sayan makapaliket ya ebento.

Kasempet mi manlapud kombension, nantanem lamet so pamilya, tan diad saginonor et awalaan kami na sankarakelan ya inani ed kapiganman. Maseguron saya so angombinse ed si Mommy tan Daddy a say sigpot a panagmatalek ed si Jehova so natumangan. Akibiang ira ed nikaduman nengneng na panagpulong a kimey ya akipakna iran mangusar na 52 oras ed kada bulan diad ministeryo. Insan, sanen sinmabi tiempo na panagtanem, inlako ran ami-amin! Si Daddy so walaan na 20 por 8-piye a trailer pian panayaman min lima, tan sikatoy analiw na balon two-door Ford sedan a manguyor ed satan. Ontan met so ginawa nen Tio Monroe, tan sikato met so inmalis la ed sakey a trailer a kaibay pamilya to.

Imbabangat Kami ed Katuaan

Inggapo nen Daddy tan Mommy so manpayunir, a tawag ed sigpot-panaon a panag-ministeryo, nen Oktubre 1936. Bilang sakey a pamilya, inggapo mi so panagpulong diad saray probinsya ed bandad bukig na Texas a mataltalag a nakokobrian na mensahe nipaakar ed Panarian. Diad loob na ngalngali sakey taon, sikami alis-alis ed nanduruman lugar, balet diad intiraminti et talagan nanggayagaan mi so onian bilay. Binangatan kami nen Mommy tan Daddy diad panamegley na salita tan alimbawa ra a magmaliw a singa saray inmunan Kristiano ya intalaga ray inkasikara pian nipasabi so katuaan na Biblia ed arum.

Nandinayewan min tuloy ya ananak so ina mi lapud sakripisyo to ed impangikaindan ed ayaman to. Balet, wala labat lay sakey ya agto nikaindan, samay makina to. Maong ta onman. Lapud abilidad to bilang dumarait et lawas to kamin kinawesan a todo. Diad kada kombension et walaan kami na marakep tan balo iran aysing a nisulong.

Nanonotan ko ni sanen si Herman G. Henschel so sinmabi ed lugar mi a kaibay pamilya to ed sakey a sound truck na Watch Tower Society. Iparada ra so trak ed lugar a dakel so totoo, manpatogtog na antikey a nirekord a lektyur, insan bisitaen dan mismo iray totoo pian naikdan na kaaruman ya impormasyon. Nanggayagaan nen Dewey junior so impiulop-ulop ed ilalak nen Herman a si Milton, a walad kapegleyay inka-tinedyer ed saman. Natan si Milton so presidenti na say Watch Tower Society.

Kaleganay kombension nen 1937 diad Columbus, Ohio, nampabautismo si Edwena, tan niyopresi ed si Mommy tan Daddy so pribilihyon panserbi bilang espisyal payunir. Diad saman a panaon et kakaukolanen na satan a kimey so pangusar na ag-onkulang ed 200 ya oras ed kada bulan ed panagpulong. Diad panmolimolik ed apalabas et amoriak so baleg ya agawaan na maabig ya alimbawa nen Mommy diad pananuportak ed masiken ko ed saray Kristianon asainmin to.

Sano niletneg nen Daddy so panagaral na Biblia ed sakey a pamilya, intatagar to kamin ananak to pian niiter so positibon alimbawa ed sikamin ananak da. Impaanap tan impaibasa to ed sikami iray teksto ed Biblia tan impaebatan to iray pigaran manunan tepet. Bilang resulta et dakel ed saramay kalangweran ya inyaaralan mi so manseserbin sitotoor ed si Jehova anggad natan. On, niletneg met ed sikami so malet a pundasyon pian itultuloy min aroen so Dios.

Lapud panbalbalolaki la nen Dewey junior, sikatoy nairapan a manayam ed mainge-inget a kuarton kaibay ading ton bibii. Kanian nen 1940 et denesidi to so onalis tan mibiang ed panagpayunir a ministeryo kaibay sananey a Tasi. Ag-abayag et inasawa to si Audrey Barron. Diad ontan et si Audrey so binangatan met na atateng mi na dakel a bengatla, tan naaro to met a maong si Mommy tan Daddy. Sanen nipriso si Dewey junior nen 1944 lapud Kristianon neutralidad to, si Audrey so kaiba min nanayam ed mainget a trailer mi.

Diad abalbaleg a kombension diad St. Louis, Missouri, nen 1941, nansalita si Brother Rutherford ya insentro to ed saray ugugaw a manedad na 5 ya anggad 18, ya akayurong ed nibiig a seksion ed arap. Sikami nen Edwena so marendeen a tinmalineng ed kalmado tan malinew a bosis; sikato so singa sakey a maaron aman mamibilin ed dilin ananak to ed ayaman. Pinaseseg toray kaatengan: “Natan et tinugyop la nen Kristo Jesus so nisipan a totoo to ed arap to, tan impurpurek to ed sikaran bangatan daray anak da ed dalan na inkatunong.” Inyarum to: “Pansiansiaen yora ed ayaman tan bangatan yo ira na katuaan!” Makapaliket ta ontan so ginawa na atateng mi!

Diad saman a kombension, naawat mi so balon bokletan Jehovah’s Servants Defended, ya angirepaso ed saray kaso’d korte ya analoan na Tastasi nen Jehova, pati saramay denesisyonan na Korte Suprema na Estados Unidos. Inyaral itan nen Daddy ed sikami bilang sakey a pamilya. Agmi naam-amtaan a sikami nipaparaan la ed nagawa’d pigaran simba ed saginonor diad Selma, Alabama.

Kiwas na Pangkat diad Selma

Diad kabuasan na saman a makapakebbiew ya eksperiensia, intulor nen Daddy iray kopya na sakey a sulat ed sheriff, mayor, tan say hepe na polisya diad Selma a manedeskribe ed kanepegan tayo unong ed konstitusyon ya ituloy so ministeryo diad silong na proteksion na say ley. Anggaman kuan et denesidi ran sikami ablogen ed baley.

Diad ngarngarem la et limaran armadon lalaki so sinmabi ed trailer mi tan inala da kami nen Nanay, pati si atsik bilang hostage. Insan da binubukitkit so amin a walad loob, a manaanap na bengatlan subersibo. Si Daddy so walad paway, tan ingganggan dan ikonekta toy trailer ed kotse, ya akapatuyong iray paltog da ed sikato. Diad sayan bekta et agak natatakot. Ompatnag a makapalek ta abaloan na sarayan lalaki a mapeligro kami, sengegay panelelek mi nen atsik. Balet ta sikami nanseryoso sanen nilimgis kami nen Daddy.

Sanen kuan mi lan ombuat, labay da kamin ilugan nen Edwena na saramay lalaki ed kotsi ra. Mapekder a nansalita si Daddy. “Anggad mabilay ak ni agyo nilugan iray mamarikit ko’d kotse yo!” inyabawag to. Kayari impansisingbatan, naabuloyay pamilya min manbiahen sanuulop, a saray armadon lalaki so manumtumbok ed sikami diad kotse ra. Manga 25 kilometro ed paway la na baley, insinyas dan sikami ompireg ed gilig na highway insan da inyarawi si Mommy tan Daddy. Nansusublayan iray lalakin mangukuyong ed sikara: “Itunda yo la itan a relihyon. Pawil kayo la’d kaumaan, tan pabaleg yon susto iray anak yon bibii!” Nanggunaetan nen Daddy so mikatunongan ed sikara balet ta anggapoy nansumpalan.

Diad kaunoran et inkuan na sakey a laki: “Alis kayo la, no bilang ta ompawil kayo diad Dallas County, pateyen mi kayon amin!”

Nainawaan tan saniiba lamet, nambiahe kamin pigay oras insan pinmarada pian manpalabi. Tinandaan mi so numeroy plaka ra. Inreport a tampol nen Daddy so amin ya agawa diad Watch Tower Society, tan pigaran bulan ed saginonor et saraman a lalaki so abidbir tan inerel.

Diad Gilead Missionary School

Naawat nen Edwena so imbitasyon a manaral ed koma-7 klase na Watchtower Bible School of Gilead diad South Lansing, New York, nen 1946. Si Albert Schroeder, a sakey ed saray instruktor so akasalambit ed maabig iran kualidad nen Edwena ed say datin kaiba to’d panagpayunir a si Bill Elrod, a manseserbi ed saman ed Bethel, say sankamundoan a hedkuarter na Tastasi nen Jehova diad Brooklyn, New York.a Impankabat si Edwena tan Bill, tan ngalngali sakey taon kayari impangraduar to ed Gilead et sikaray nankasal. Diad loob na dakel a taon et sikaray nansiansia ed sigpot-panaon a ministeryo, pati lay limay taon ya impanserbi ran dua ed Bethel. Insan sakey ya agew nen 1959, inyanunsio nen Brother Schroeder ed koma-34 klase na Gilead a say pinabli ton kaaro so nagmaliw lan ama na lason, sakey a laki tan bii.

Legan a panseserbik a kaibay atateng ko ed Meridian, Mississippi, bandad unor a kabiangay 1947, sikamin talo so akaawat na imbitasyon a manaral ed koma-11 a klase na Gilead. Sikami abigla ta unong ed saray kakaukolanen et siak so malangwer ni, tan si Mommy tan Daddy so matatken la. Balet ta nikonsidera, tan naawat mi iman ya agkanepegan a pribilihyon nawalaan na malaknab a kibangat ed Biblia.

Impanmisionaryo a Kaibay Atateng Ko

Say asainmin mi bilang misionaryo et diad Colombia, Abalaten ya Amerika. Balet, anggad asabi so Disyembre 1949, sakey taon lay linmabas kayari impangraduar mi, akasabi kami ed Bogotá ed misionaryon ayaman a talora lay wadman. Diad inmuna et inisip nen Daddy a mas mainomay so pangibangat ed arum a totoo diad lenguahen Ingles nen say aralen to so Español! On, walaray impakasalsalian, balet ta, agaylay karakel na bendision! Kulang nin sanlasus so Tastasi diad Colombia nen 1949, balet natan et masulok lan 100,000!

Kayari impanserbi ed Bogotá ed loob na limay taon, si Mommy tan Daddy so nibaki ed syudad a Cali. Kaleganan to, nen 1952, nikasal ak ed si Robert Tracy, kaparak a misionaryo ed Colombia.b Nansiansia kami ed Colombia anggad 1982, insan sikami so niasain ed Mexico, a panseserbian mi anggad natan. Kamangta nen 1968 et kaukolan ya ompawil so atateng ko ed Estados Unidos pian manpatambal. Sanen inmabig la ra, nantultuloy ira bilang espisyal payunir diad asingger na Mobile, Alabama.

Panangasikaso ed Atateng Mi

Diad inlalabas na taotaon, onkakapuy met la ra di Mommy tan Daddy tan kaukolan da lay malaglaem a suporta tan panangasikaso. Kinerew dan sikaray niasain a manlingkor ed asingger di Edwena tan Bill diad Athens, Alabama. Saginonor say kuya mi, si Dewey junior et inisip ton mas marakep no man-aasinggeran so pamilya diad South Carolina. Kanian inyalis nen Bill so pamilya to ed Greenwood, pati met ira di Mommy tan Daddy. Sayan maaron impangiyuksoy et pinagmaliw ton posibli parad sikami nen Robert a nituloy so serbisyo mi bilang misionaryo ed Colombia, ya amta min naasikason maong iray atateng ko.

Insan nen 1985 et naataki si Daddy a sengeg lay agto pakasalita tan akadukol la. Agaway komperensia bilang pamilya pian tongtongey sankaabigan a pakaasikaso ed atateng mi. Apanpaknaan a si Audrey so magmaliw a manunan mangasikaso ed si Dad tan say sankaabigan a nitulong mi nen Robert et say sinimban pangipawit na sulat tekep na saray makapaseseg ya eksperiensia tan no nayadyari et diad mabetbet ya idalaw ed sikara.

Agko nalinglingwanan so unor ya imbisitak ed si Daddy. Gendagendat ya agnabelasan so panagsalita to, balet kayari impangibaga mi ed sikaton ompawil kami ed Mexico, nanir-irapan ton imbalikas so salitan, “Adios!” Diad ontan et atebek mi a diad puso to et sikatoy masuporta ed desisyon min ituloy so asainmin mi bilang misionaryo. Sikatoy inatey nen Hulyo 1987 tan siam bulan ed saginonor et si Mommy so inatey met.

Say sulat ed siak na abiyudan atsik so marakerakep ya anegek ed nalilikna min apresasyon parad atateng mi. “Pablien ko so mayaman a Makristianon tawir ko tan agkon balot aliknan mas maliket ak komon no dumay impamabaleg da ed sikata. Lapud alimbawa ran mabiskeg a pananisia, dilin-panagsakripisyo, tan sigpot a panagmatalek ed si Jehova et atalonaan koy panaon na depresyon ed bilay ko.” Insan sinampotan nen Edwena: “Pisalamatan koy Jehova parad atateng a diad panagsalita tan alimbawa ra et nipanengneng da ed sikatayo a walay niwalan liket ed sikatayo no isentro tayoy bilay tayo diad panaglingkor ed maaron Dios tayo, si Jehova.”

[Saray Paimano ed leksab]

[Saray litrato ed pahina 22, 23]

Pamilyan Fountain: (kawigin manpakawanan) Dewey, Edwena, Winnie, Elizabeth, Dewey junior; kawanan: Di Elizabeth tan Dewey junior ya akayurong ed saray tapaludo na “sound truck” na pamilyan Henschel (1937); kawanan ed bandad leksab: Si Elizabeth ed kimey na panangawit na placard ed edad a 16