Palandey Athos—Sakey Kasin “Masanto a Palandey”?
PARAD masulok a 220 milyon a membro na Orthodox Church, say Palandey Athos, sakey a mabaton pukdol diad bandad amianen a Gresya, so “sanka masanto a palandey a walad sakop na Kristianon Orthodox.” Parad dakel ed sikara, say iyakar ed “masanto a palandey” na Athos so talagan pantintindekan. Anto kasi iyan “masanto a palandey”? Panon ton agamoran so ontanlan kaimportantian? Tan kasin satan a “palandey” so nepeg a tuplegan na matakot ed Dios a totoo parad kiwanwan ed espiritual tan ed tuan panagdayew?
Say balikas a “masanto a palandey” so talagan nabasa ed Biblia. Nisisiglaot itan ed masanto, puro, tan nitandoro a panagdayew ed say tuan Dios, si Jehova. Say Palandey Sion diad Jerusalem nensaman so nagmaliw a “masanto a palandey” sanen intarok nen Arin David diman so kaban na sipan. (Salmo 15:1; 43:3, NW; 2 Samuel 6:12, 17) Kayarin nipaalagey so templo nen Solomon ed Palandey Moria, walad sakop na “Sion” so kawalaay templo; kanian say Sion so nansiansian “masanto a palandey” na Dios. (Salmo 2:6; Joel 3:17) Lapud walad Jerusalem so templo na Dios, no maminsan satan a syudad et tinawag met a “masanto a palandey” na Dios.—Isaias 66:20; Daniel 9:16, 20.
Komusta met natan? Kasin say Palandey Athos—odino dinanman nin palandey—so “masanto a palandey” a nepeg a tatdangan na totoo pian naabobonan a mandayew ed Dios?
Sakey a Monastikon “Masanto a Palandey”
Say Palandey Athos so walad nibukig a sampot na Chalcidice Peninsula diad toktok na makisir a gisgis na dalin ya ompugta ed Aegean Sea a walad bukig na modernon-agew a Thessaloníki. Talagan sakey a makapadinayew a marmol a pukdol a sabien toy katagey a 2,032 metro manlapud dayat.
Abayag lan impasen so Athos bilang masanto a pasen. Unong ed mitolohiya na Griego, satan so ayaman na saray dirios sakbay iran nanayaman ed Palandey Olympus. Asabi panaon kayari nen Konstantino a Baleg (komapat a siglo K.P.), nagmaliw a masanto a pasen so Athos parad saray iglesia na Kristiano. Unong ed sakey ya alamat, si “birhen” Maria, ya inibaan nen Juan ya Ebanghelista ya onla ed Cyprus pian bisitaen si Lazaro et sinmakda ed Athos lapud biglan manasibengbeng a bagyo. Lapud impandinayew ed karakpan na palandey, kinerew to itan ed si Jesus. Kanian, nagmaliw a bantog so Athos bilang “say Harden na Masanto a Birhen.” Diad kapegleyan na panaoy Byzantine, say intiron mabaton kaliberliber so akabatan bilang say Masanto a Palandey. Sayan impanawag so opisyal ya inadapta tan pinekderan nen kapegleyan na koma-11 a siglo diad impangiganggan nen Emperador Konstantino IX Monomachus.
Lapud nikotkotlaong tan nisulinek a kipapasen, say Athos et sakey a nengneng na pasen a mismon ontulong ed pakaagamil na asetikon kabibilay. Diad inlabas na saray siglo, asagyat toray relihyoson totoo manlapud sakop na Orthodox—saray Griego, Serbiano, Romaniano, Bulgariano, Ruso, tan arum ni—a nampaalagey ira na dakel a monasteryo, ontan met la ed saray simbaan tan komunidad da. Onliligada’d 20 ed saraya so wala ni natan.
Say Palandey Athos Natan
Natan, say Athos so sakey lan rehyon a walaan na dili ton pananguley, tekep na sakey a karta a pinekderan nen 1926. Kayari na saray taon ya inkesay ed bilang na manaayam iran monghe, natan et dinmakel la ya anggad masulok lan 2,000.
Balang sakey ed saray monasteryo so walaan na dili ton simpok na saray kaumaan, kapelya, tan saray ayaman. Say ultimon santuaryo na saray ermitanyo so naromog ed pasen na Karoúlia, a walad tagey diad maparpareng iran toktok na kelas diad sampot na Palandey Athos. Wadtan so simpok na sinansakey iran alolong a nasabi labat panamegley na palikoliko iran basbas, balitang iran bato, tan golonggolong. Diad Athos, saray monghe so siansia nin mangaagamil ed kadaanan a ritual ya inagew-agew, ya uusaren so panag-orasan a Byzantine (onggapo so agew diad kaselek na agew) tan say Julian a kalendaryo (atrasado na 13 agew ed say Gregorian).
Anggaman nikuan a say “inkasanto” na sayan relihyoson pasen et lapu ed sakey a bii, diad loob na 1,000 taon, inyabawag na saray monghe tan saray ermitanyo to ya agmakaloob ed intiron pulo so amin a klase na bii—too tan ayep—pati met lay siopaman ya eunoko odino anggapoy balbas a laki. Diad agano ni, linmemew lay totontonen nipaakar ed anggapoy balbas tan pigaran kabatyan ya ayayep, balet siansia nin pinegetan a maong so bibii ya agmakaasingger na anggad 500 metro diad gilig na dayat na Athos.
“Masanto a Palandey” a Parad Amin
Kasin say Athos so “masanto a palandey” a laen a pandayewan na matakot ed Dios iran Kristiano? Diad impitongtong nen Jesus ed Samaritana a manisian say Dios so nepeg a dayewen diad Palandey Gerizim, nilinew to ya anggapo lay aturon literal a palandey bilang pasen a pandayewan ed Dios. “Say oras onsabi, sano anggan dia ed [Gerizim], nisay dia ed Jerusalem, agyo igalang so Ama,” so inkuan nen Jesus. Akin? “Say Dios sikatoy sakey ya espiritu; et saray mangigalang ed sikato nepeg dan igalang ed espiritu tan katuaan.”—Juan 4:21, 24.
Diad panutukoy to ed panaon tayo, impasakbay nen Isaias a say simbolikon “palandey na abung nen Jehova” so “niletneg ed toktok na saray palandey” tan “nipatagey ed labas na saray pukdol,” tan saray totoo ed amin a nasyon so piguratibon ontatdang ditan.—Isaias 2:2, 3.
Imbitado iray lalaki tan bibii a malabay a nawalaay naabobonan a relasyon ed Dios pian mandayew ed si Jehova diad “espiritu tan katuaan.” Minilyon ed sankamundoan so akalmo lay dalan da a mamaarap ed ‘palandey nen Jehova.’ Mipadpara so liknaan da ontan met ed arum ni, ed liknaan na abogadan Griego ya angikuan nipaakar ed Athos: “Panduaruwaan ko no say espiritualidad et naromog ed asikop iran pasen odino ed saray monasteryo.”—Ikompara so Gawa 17:24.
[Kahon ed pahina 31]
Aromog so Abayag lan Akaamot a Kayamanan
Diad loob na saray siglo, akatipon iray monghe a taga-Athos na ankablin kayamanan a laktipen toy atantya a 15,000 a manuskrito, ya arum ed saratan so nibagan manpetsay manlapud komapat a siglo, a nagmaliw itan a sakey ed sankamablian iran koleksion ed mundo. Walaray lukot, kompleton tomo tan saray peligo na saray Ebanghelyo, salmos tan saray himno, likud ed dagdaan iran painting, icon, eskultora, tan tinurno iran metal. Atantyan walad Palandey Athos so kakapat ed saray walan Griegon manuskrito ed mundo, anggaman kaukolan nin iyan iratan ed katalogo. Nen 1997, diad inmunan pankanawnawa, inabuloyan na saray monghe ya ipanengneng so pigara ed saray mablin koleksion da diad Thessaloníki.
[Picture Credit Line ed pahina 31]
Telis/Greek National Tourist Organization