Melag ya Impan-Laman Balet Mabunlok ya Impanpuso
ANTO kasi so situasyon sano mitongtong ka ed saray estranghero nipaakar ed Panarian na Dios no say katagey mo et 30 a pulgada labat? Idalatdat ed sika nen Laura. Diad edad a 33, ontan so kaatagey to, 30 pulgada labat. Sikaran sanagi nen Maria, a mantaon na 24 a say katagey to et 34 a pulgada, so manaayam ed Quito, Ecuador. Paisalaysay tayo ed sikara iray babeng a kidudungetan da ed Kristianon ministeryo ra.
“Ta pian makasabi kami ed teritoryan pampulongan mi tan ed saray Kristianon pantitipon, akaren mi so ngalngali kapalduay kilometro pian makalugan ed bus. Diad epasan mi et manakar kami lamet na ngalngali kapalduay kilometro ta pian makalugan ed komaduan bus. Makapaermen ta diad idalan mi ed sayan karsada et walaray limaran masesebeg ya aso. Katatakotan miray aso ta parad sikami et singa la ra kabayo. Ta pian naabol ira, no kapilitan, awit-awit mi so bislak, ya iyaamot mi ed gilig na karsada sakbay na ilugan mi ed bus ta pian wala lay akaparaan diad idalan min pasempet lamet.
“Talagan literal a baleg a kundang so isapat ed bus parad sikami. Ontoon kami ed tambak na dalin diad tundaan na bus ta pian nainomayan kamin onsapat. Walaray drayber ya itunda ra ed asingger na bunton, balet ta say arum et agda itunda diman. No ontan so kipapasen, say atatagey ed sikami so ontulong ed memelag ta pian makasapat. Say ilugan ed komaduan bus et kakaukolanen toy ibaliw ed karsadan manbabwes iray luluganan—talagan alay irap lapud antirikey a bikking mi. Lapud kamelag mi, kaaruman nin irap ed sikami so pangawit na ambelat a bag. Pian napalemew so bag, manguusar kami na ibubulsan Biblia tan lilimitaan mi met iray awiten min literatura.
“Nanlapula’d kaugawan mi et sikami so mabaing. Amta na saray kakaabay mi a natatakot kamin mitongtong ed saray estranghero. Kanian sikaray asurprisa tan mandinayew nen anengneng da kamin ontotoktok la ed kaabungan da, tan kaslakan lan sikaray ontalineng. Balet diad saray lugar ya agkami kabkabat, mabetbet a say pakanengneng na totoo ed sikami et unano; kanian, agda kami lawas iimanoen a kanepegan na mensahe mi. Anggaman kuan, say pakalikna ed panangaro nen Jehova so manpapapakpel ed sikami ta pian makapantultuloy so panag-ebanghelyon kimey. Say pandalepdep ed Uliran 3:5, 6 so mangiiter met ed sikami na tepel.”
Singa ipapanengneng di María tan Laura, say pansiansia anggaman ed saray pisikal a kakapuyan so kigloriaan na Dios. Impikasi nen apostol Pablo a say “sabit ed laman” to, anganko et pisikal a kakapuyan, so naandi la komon ed sikato. Balet ta inkuan na Dios ed sikato: “Say grasyak so masarag ed sika: ta say pakayarik agawan ayadyari ed kakapuyan.” On, say deperensia ed laman so agla nakaukolan a naekal pian sikatayoy makapanserbi ed Dios. Say sigpot a panmatalek ed Dios so makatulong ed sikatayo a gawaey sankaabigan unong ed saray sirkumstansia tayo. Lapud impasen nen Pablo so “sabit ed laman” ed onian dalan, nibaga ton: “Sano siak so makapuy, dia ed satan mabiskeg ak.” (2 Corinto 12:7, 9, 10) Pigaran taon ed saginonor insulat nen Pablo: “Nayarian ko a gawaen so ganagana ed saman so mamabiskeg ed siak.”—Filipos 4:13.
Diad modernon panaon, susumpalen na Dios so abalbaleg a kimey diad panamegley na lalaki, bibii, tan ugugaw a sigpot a debosyonado ed sikato. Pigara ed sikaray walaay deperensia ed nambabangil a dalan. Anggaman amin da so maniilalo parad madibinon katambal ed silong na Panariay Dios, agda aalagden a paandien nin unona na Dios iray problema ra sakbay dan panggunaetay panserbi ed sikato.
Wala tay kakapuyan mo ed pisikal? Manpakpel! Diad panamegley na pananisiam magmaliw kan sakey ed saramay singa ed si Pablo, Laura, tan María. Nipaakar ed sikara et nibaga so unong a nibaga ed lalaki tan bibii na pananisia nensaman a panaon: “Akala’ra na biskeg ed kakapuyan da.”—Hebreos 11:34.
[Litrato ed pahina 8]
María
Laura
[Litrato ed pahina 9]
Tutulongan nen María si Laura a makasapat ed bus
[Saray litrato ed pahina 9]
“Katatakotan miray aso ta parad sikami et singa lara kabayo”
Leksab: Kaiba di Laura tan María iray iyaaralan da na Biblia