Say Mablin Tawir Tayo—Anto so Kabaliksan na Satan ed Sikayo?
“Galidia, sikayo bendito nen Amak, tawiren yoy panarian ya imparaan ed sikayo a nanlapu ed inletneg na mundo.”—MATEO 25:34.
1. Antoran klase na bengatla so atawir na totoo?
AMIN a totoo so walaan na tawir. Say tawir na arum et nayarin mangilaktip ed materyal a pakainawaan ed bilay. Parad arum et kairapay bilay. Diad arum a kipapasen, saray akaunan kailalakan so angipasa na legasya na pirmin panggula ed arum a tribu, lapud asagmakan da odino nadngelan da. Balet, walay sakey a bengatla ya atawir tayon amin. Atawir tayon amin so kasalanan ed pilimeron too, si Adan. Satan a tawir so mansumpal ed ipapatey.—Eclesiastes 9:2, 10; Roma 5:12.
2, 3. Anton tawir so intarya la nen Jehova parad saray ilalak nen Adan tan Eva, tan akin ya agda agamoran itan?
2 Si Jehova, bilang maaron mangatatawen ya Ama, so inmuna lan angitarya ed katooan na nikadkaduman tawir—magnayon a bilay tekep na inkayadyari diad Paraiso. Say pilimeron atateng tayo, si Adan tan Eva, so naikdan na ayadyari, naspot a gapoan. Say planetan Dalin so inter nen Jehova a Dios ed katooan bilang langkap. (Salmo 115:16) Intadia to so hardin na Eden bilang pangaligan ed say pagmaliwan na intiron globo tan pinabtangan to so pilimeron atateng tayo na alay abig tan makapasagyat a kimey. Mananak ira, asikasoen da so dalin tan amin na saray nanduruman tanaman tan ayayep, tan paawangen da so ketegan na Paraiso ed intiron globo. (Genesis 1:28; 2:8, 9, 15) Mibiang met iray ilalak da ed sayan kimey. Agaylan abig so nipatawir ed sikara!
3 Balet, nakaukolan a nawalaan si Adan tan Eva, pati saray ilalak da, na maong a siglaotan ed Dios, ta pian napanggayagaan dan amin iratan. Nepeg dan aroen tan tuloken si Jehova, balet ag-inapresia nen Adan tan Eva so ginawa na Dios ed sikara tan sinunggay da so ganggan to. Abalang da so Paraison ayaman da, pati ed saray maglorian ilalo ya intarya na Dios ed sikara. Kanian, agda iraya nipatawir ed saray ilalak da.—Genesis 2:16, 17; 3:1-24.
4. Panon tayon nagamoran so tawir ya abalang nen Adan?
4 Mapangasin intarya nen Jehova ed saray ilalak nen Adan tan Eva so pankanawnawan makagamor ed tawir ya abalang nen Adan. Panon? Diad aturon panaon na Dios, insaklang na mismon Anak to, si Jesu-Kristo, so ayadyarin bilay to bilang too nisesengeg ed ilalak nen Adan. Panamegley na saya et sinaliw iran amin nen Kristo. Balet, satan a tawir so ag-automatikon niwala’d sikara. Kaukolan a nawalaan ira na naabobonan a talindeg ed Dios, a nagamoran da diad pangagamil day pananisia ed mananakbong-kasalanan a balor na bagat nen Jesus tan diad pangipatnag ed satan a pananisia panamegley na katutulok. (Juan 3:16, 36; 1 Timoteo 2:5, 6; Hebreos 2:9; 5:9) Kasin napapatnagan ed kurso na panagbilay yo so panamabli ed satan a probisyon?
Sakey a Nipatawir Panamegley nen Abraham
5. Panon ya impanengneng nen Abraham so panamabli ed relasyon to’d si Jehova?
5 Diad panusumpal nen Jehova ed gagala to diad dalin, nikadkaduma so impideneng to ed si Abraham. Sayan matoor a too so ingganggan Ton ontaynan ed bansa to tan onalis ed dalin a pangidirehian na Dios ed sikato. Mabulos a tinmulok si Abraham. Nen sinmabi si Abraham diman, inkuan nen Jehova a say ilalak nen Abraham, aliwan si Abraham a mismo, so makatawir ed satan a dalin. (Genesis 12:1, 2, 7) Anto so reaksion nen Abraham? Sikato so mabulos a manlingkor ed si Jehova diad inerman a pasen tan antokaman so iganggan ed sikato na Dios pian narapat na ilalak to so tawir da. Diad loob na 100 a taon, si Abraham so nanlingkor ed si Jehova diad dalin ya agto kayarian, angga la’d impatey to. (Genesis 12:4; 25:8-10) Ontan met kasi so gawaen yo? Inkuan nen Jehova a ‘kaaro’ to si Abraham.—Isaias 41:8.
6. (a) Anto so impatnag nen Abraham diad mabulbulos ya impangibagat to’d ilalak to? (b) Anto so mablin ipatawir nen Abraham ed ilalak to?
6 Nanalagar si Abraham ed loob na dakel a taon pian nailalak to, si Isaac, ya inad-aro to. Sanen binmalolaki la so ugaw, ingganggan nen Jehova si Abraham ya itarok to so ugaw tan iyapay to bilang bagat. Ag-amta nen Abraham ya ipatnag to so gawaen na Dios a mismo diad pangiter toy Anak to bilang dondon; ingen, sikatoy tinmulok tan sanen iyaapay to lay Isaac bilang bagat, sikatoy inamper na anghel nen Jehova. (Genesis 22:9-14) Imbaga la nen Jehova a nasumpal iray sipan to ed si Abraham panamegley nen Isaac. Kanian, si Abraham so walaay pananisia a, no nakaukolan, bilayen na Dios si Isaac, anggano agnin balot agawa itan nensaman. (Genesis 17:15-18; Hebreos 11:17-19) Lapud ag-inkibot nen Abraham so ilalak to, oniay inyabawag nen Jehova: “Dia ed ilalak mo so pakapikapalaranan na saray amin a nasyon dia.” (Genesis 22:15-18) Ipatnag na saya a say Bini ya abitla ed Genesis 3:15, say Mesianikon manangiliktar, so ompaway ed boleg nen Abraham. Agaylan mablin ipatawir!
7. Panon ya impanengneng di Abraham, Isaac, tan Jacob so panamabli ra ed tawir da?
7 Agni amta nen Abraham so kabaliksan na gagawaen nen Jehova ed saman; anggan say ilalak ton si Isaac odino si apo ton Jacob, a nagmaliw “a mitawir ed saman met a dilin sipan.” Balet amin da so walaay kompiyansa ed si Jehova. Ag-ira nanilalo ed antokaman iran panarian a niletneg ed syudad ed saman a dalin lapud walay iilaloan dan magmaong—“say syudad a walaan na saray peteg a pundasyon, a say managpaalagey tan managgawa ed satan a syudad et say Dios.” (Hebreos 11:8-10, 13-16, NW) Ingen, aliwan amin ya ilalak nen Abraham so angapresia ed kablian na tawir panamegley nen Abraham.
Say Arum a Nanmudmora ed Tawir
8. Panon so impangipatnag nen Esau ya agto pinabli so kablian na tawir to?
8 Si Esau, a sankapanguloanan ya ilalak nen Isaac, so ag-amabli ed kanepegan to bilang panguloan. Agto inapresia iray sagradon bengatla. Kanian sanen narnarasan si Esau, inlako toy inkapanguloan to ed si agi ton Jacob. Parad anto? Insalat to ed pangan labat na tinapay tan inlambong a lentehas! (Genesis 25:29-34; Hebreos 12:14-17) Say nasyon a pakasumpalan na saray sipan na Dios ed si Abraham so sinmabi anggad si Jacob, a say ngaran to et sinalatan na Dios bilang Israel. Antoran pankanawnawa so inlukas ed sikara na satan a partikular a tawir?
9. Lapud espiritual a tawir to, anton panangiliktar so naeksperiensia na ilalak nen Jacob, odino Israel?
9 Legan na panaoy eras, inmalis si Jacob tan say pamilya to diad Ehipto. Diman ira dinmakel tan nagmaliw iran amayamay, balet ta nagmaliw met iran ariripen. Balet agnilingwanan nen Jehova so sipanan to’d si Abraham. Diad aturon panaon na Dios, inliktar to ray anak na Israel manlapud inkaaripen tan impasabi to’d sikara ya itarok to ra ed “sakey a dalin a panagusan na gatas tan dilo,” say dalin ya insipan to’d si Abraham.—Exodo 3:7, 8; Genesis 15:18-21.
10. Diad Palandey Sinai, anto niray nikabkabiig ya agawa a mitunosan ed say tawir na saray anak na Israel?
10 Sanen mamapaarap laray ananak na Israel ed Insipan a Dalin, dinagup ira nen Jehova diad Palandey Sinai. Oniay inkuanto’d sikara diman: “No tuloken yo so bosis ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo; ta amin a dalin kien ko. Et sikayo naani singa sakey a panarian na saray saserdote, tan sakey a masimpit a nasyon.” (Exodo 19:5, 6) Kayari na mabulos tan nankakasakey ya impipakna na totoo ed saya, inter nen Jehova so Ganggan to’d sikara—bengatlan agto ginawa ed arum a totoo.—Salmo 147:19, 20.
11. Anto so pigara ed saray ankablin bengatla a nilaktip ed espiritual a tawir na saray anak na Israel?
11 Agaylan espiritual a tawir so niwala’d sayan balon nasyon! Dadayewen da labat so alenleneg a tuan Dios. Sikara so niliktar ed Ehipto tan apamintuan da so makapakelkelaw iran ebento sanen niiter ed sikara so Ganggan diad Palandey Sinai. Say tawir da so nagkalalo lan apalaknab sanen naawat da so kaaruman a “salita na Dios a nimatalek ed sikara” panamegley na saray propeta. (Roma 3:1, 2) Sikara so tinawag nen Jehova a tastasi to. (Isaias 43:10-12) Say Mesianikon Bini so ompaway ed nasyon da. Sikato so tinukoy na Ganggan, angipabidbir ed sikato, tan tinmulong ed sikara pian natalosan da so pankaukolan da’d sikato. (Galacia 3:19, 24) Niarum ni, naikdan ira na pankanawnawan manlingkor kaiba so Mesianikon Bini bilang sakey a panarian na saray saserdote tan masanton nasyon.—Roma 9:4, 5.
12. Anggaman akaloob la ra ed Insipan a Dalin, anto so agnaeksperiensia na saray Israelita? Akin?
12 Mitunosan ed sipan to, inwanwan nen Jehova iray Israelita ed Insipan a Dalin. Balet unong ya impaliwawa’d saginonor nen apostol Pablo, satan a dalin so ag-apaneknekan a ‘pasen na painawa,’ lapud kakulangan day pananisia. Bilang sakey a baley, ag-ira akaloob ed ‘painawa na Dios’ lapud agda-atebek tan ag-ira nankimey unong ed gagala na mismon agew na painawa na Dios, a ginmapo nen apalsa si Adan tan Eva.—Hebreos 4:3-10.
13. Lapud agda inapresia so espiritual a tawir da, anto so abalang na nasyon na Israel?
13 Say silalaman ya Israel so akapangitarya komon na kompleton bilang na saramay miiba ed Mesias diad mangatatawen a Panarian to bilang panarian na saray saserdote tan masanton nasyon. Balet ta agda inapresia so mablin tawir da. Dagdaiset lambengat ya Israelitas so angawat ed Mesias sanen sikatoy sinmabi. Bilang resulta, daiset lambengat so apibilang ed nipasakbay a panarian na saray saserdote. Say Panarian so inekal manlapud silalaman ya Israel tan ‘niiter itan ed sakey a nasyon a mamapaway na saray bungabunga to.’ (Mateo 21:43) Anton nasyon itan?
Say Tawir ed Katawenan
14, 15. (a) Kayari na impatey nen Jesus, panon ya abendito iray nasyon panamegley na say “bini” nen Abraham? (b) Anto so natawir na saray membro na “Israel na Dios”?
14 Say nasyon a niiteran na Panarian et say “Israel na Dios,” say espiritual ya Israel, a tugyopen na 144,000 a nailalak ed espiritun papatumbok nen Jesu-Kristo. (Galacia 6:16; Apocalipsis 5:9, 10; 14:1-3) Arum ed saramay 144,000 et silalaman a Judio, balet maslak la et nanlapud Gentil iran nasyon. Diad ontan a paraan et ginmapon asumpal so sipan nen Jehova ed si Abraham, a diad panamegley na “bini” to et nabendito so amin a nasyones. (Gawa 3:25, 26; Galacia 3:8, 9) Diad satan a pilimeron kasumpalan, say totoo ed nasyones so alanaan na masanton espiritu tan tinagibi ira nen Jehova a Dios bilang espiritual ya ananak, ya agagi nen Jesu-Kristo. Kanian nagmaliw met ira a segundaryon kabiangan na satan a “bini.”—Galacia 3:28, 29.
15 Sakbay na impatey to, imparungtal nen Jesus ed saray prospektibon Judion membro na satan a balon nasyon so balon sipanan, a napaletan na mismon dala to. Base ed pananisia ra ed satan a bagat a pamaletan, saramay napibiang ed satan a sipanan so magmaliw ya ‘ayadyari ed andi-anggaan.’ (Hebreos 10:14-18) Sikara so ‘niyabawag a matunong’ tan naperdona iray kasalanan da. (1 Corinto 6:11) Kanian, diad ontan a pantalos et singa ra si Adan sakbay na impankasalanan to. Balet, ag-iraya manbilay diad paraison dalin. Inkuan nen Jesus ya iparaanan to ra na pasen diad tawen. (Juan 14:2, 3) Intalirak day mangaraldalin iran ilalo ra ta pian nagamoran da so ‘tawir ed sikara a nigana dia ed katawenan.’ (1 Pedro 1:4) Anto so gawaen da diman? Impaliwawa nen Jesus: “Misipanan ak ed sikayo . . . parad sakey a panarian.”—Lucas 22:29, NW.
16. Anton makapakelaw ya asainmin na serbisyo so manatalaran ed saray alanaan a Kristiano?
16 Manlapud katawenan, saramay miuley ed si Kristo, kaiba ed arum nin bengatla, so ontulong a mangekal ed amin a pakasuysoyan na rebelyon diad dalin a sumpa ed inkasoberano nen Jehova. (Apocalipsis 2:26, 27) Bilang segundaryon kabiangan na espiritual a bini nen Abraham, sikara so mibiang ed pangitarok na bendision na ayadyarin bilay ed totoo na amin a nasyones. (Roma 8:17-21) Agaylan kamabli so tawiren da!—Efeso 1:16-18.
17. Antoran aspekto na tawir da so panggayagaan na saray alanaan a Kristiano legan a wadia nira’d dalin?
17 Balet aliwan diad arapen ni so pakagamor na saray alanaan a patumbok nen Jesus ed tawir da. Diad paraan ya agnagawaan na siopaman, tinulongan ira nen Jesus a makapikabat ed si Jehova, say alenleneg a tuan Dios. (Mateo 11:27; Juan 17:3, 26) Panamegley na salita tan alimbawa, imbangat to’d sikara so kabaliksan na ‘panmatalek ed si Jehova’ tan say lalanoren na itulok ed si Jehova. (Hebreos 2:13; 5:7-9) Inmatalek ed sikara nen Jesus so pikakabat ed katuaan nipaakar ed gagala na Dios tan pinaseguroan tora a say masanton espiritu so mangiwanwan ed sikara pian nagnap dan natalosan itan. (Juan 14:24-26) Impaslep to’d kanonotan tan kapusoan da so kaimportantian na Panarian na Dios. (Mateo 6:10, 33) Inmatalek met nen Jesus ed sikara so pampulong tan panggawa na babangatan diad Jerusalem, Judea, Samaria, tan diad sankaarawian a parti na dalin.—Mateo 24:14; 28:19, 20; Gawa 1:8.
Say Mablin Tawir na Baleg ya Ulop
18. Diad anton dalan a nasusumpal la natan so sipan nen Jehova a nabendito so amin a nasyones panamegley na “bini” nen Abraham?
18 Nayarin say kompleton bilang na espiritual ya Israel, say “melag a pulok” na saray manawir ed Panarian, so apili la. (Lucas 12:32) Diad pigara lan dekada et impaarap nen Jehova so imano to’d panagtipon ed baleg ya ulop na arum nin totoo a nanlapud amin a nasyones. Nasusumpal la sirin ed malaknab a paraan so sipan nen Jehova ed si Abraham a diad panamegley na “bini” to et nabendito so amin a nasyones. Magaygayaga met irayan abendito a mangisasaklang na sagradon serbisyo ed si Jehova tan bibidbiren dan say kilalaban da so akateen ed pananisia ra ed Kordero na Dios, si Jesu-Kristo. (Apocalipsis 7:9, 10) Inawat yo la kasi so alay abig ya imbitasyon nen Jehova a magmaliw a kabiangan na satan a maliket a grupo?
19. Anton tawir so iilaloan na saramay nabebenditon walad nasyones?
19 Anton mablin tawir so iyoopresi nen Jehova ed saramay aliwan kabiangan na melag a pulok? Aliwa balet a tawir ed katawenan. Satan imay impatawir komon nen Adan ed saray ilalak to—say ilalon bilay ya andi-anggaan ed inkayadyari diad paraiso a kalkalnan onsaknap ed globo. Satan so mundo ya “anggapo la naani ipatey; tan anggapo la naani onnangis o dageyem, o ot-ot.” (Apocalipsis 21:4) Diad sikayo, sirin, so angibagaan na sayan apuyanan a Salita na Dios: “Manmatalek ka ed Jehova tan manggawa ka na maong; manayam ka dia ed dalin, tan tuatua a natagano ka. Manliga ka a dili met ed Jehova: et iter to ed sika so saray pirawat na pusom. Ta wala ni so daiset, et say bagel onandi . . . Ingen ta saray mauyamo tawiren da naani dalin: tan manliket ira a dili ed inkadaakan na kareenan. Say matunong tawiren to so dalin tan manayam diman lawas.”—Salmo 37:3, 4, 10, 11, 29.
20. Panon a panggayagaan na “arum a karnero” so dakel nin espiritual a tawir na saray alanaan a Kristiano?
20 Say “arum a karnero” nen Jesus so walaan na tawir diad mangaraldalin a sakop na mangatatawen a Panarian. (Juan 10:16a) Anggano ag-ira onla’d tawen, say dakerakel ed espiritual a tawir a nanggayagaan na saray alanaan so nipapatawir ed sikara. Diad panamegley na intiron tugyop na saray alanaan, “say matoor tan makabat ya aripen,” nilukas ed arum a karnero so pakatalos ed ankablin sipasipan a lugan na Salitay Dios. (Mateo 24:45-47; 25:34) Amin da, saray alanaan tan arum a karnero so makapikabat tan mandayew ed alenleneg a tuan Dios, si Jehova. (Juan 17:20, 21) Amin da so misalsalamat ed Dios lapud mananakbong-kasalanan a balor na bagat nen Jesus. Nankakasakey iran manlilingkor bilang sakey a pulok ed silong na sakey a Pastol, si Jesu-Kristo. (Juan 10:16b) Amin da so kabiangan ed sakey a maaro, sankagloboan ya impanaagi. Amin da so manggagayaga ed pribilihyon magmaliw a Tastasi nen Jehova tan ed Panarian to. On, no dedikado tan bautismado kayo lan lingkor nen Jehova, amin na saya so kaiba ed espiritual a tawir yo.
21, 22. Panon tayon nipanengneng so pamapabli tayo ed espiritual a tawir tayo?
21 Agaylan kamabli iyan espiritual a tawir parad sikayo? Kasin papablien yon maong so panggaway linawa na Dios bilang say sankaimportantian ed bilay yo? Pian napaneknekan itan, kasin tatalinengen yo so simbawa na Salita to tan organisasyon to a magmaliw a regular ed amin a miting na Kristianon kongregasyon? (Hebreos 10:24, 25) Kasin satan a tawir et mabmabli ed sikayo a sengegay pantultuloy yon manlingkor ed Dios anggaman ed kairapan? Kasin say apresasyon yo’d satan so putel la a mamabiskeg ed sikayon resistian so antokaman a tukson pakagegemtanan na kurso a pakabalangan tayo’d satan?
22 Komon ta pabpablien tayo so espiritual a tawir tayo ya inter ed sikatayo na Dios. Diad pangiyaapasakey tayo’d kanonotan tayo ed Paraison walad arapen, komon ta sigpot itayon mibiang ed saray espiritual a pribilihyon ipapagamor ed sikatayo natan nen Jehova. Diad peteg a pangisesentro tayo’d bilay tayo ed pisisiglaotan tayo’d si Jehova, nipatnag tayo so makakombinsin ebidensia ed no panon kamabli ed sikatayo so tawir ya inter na Dios. Komon ta kaiba itayo ed saramay mangiyaabawag na: “Itandoro taka, Dios ko, O Arik; tan igalang ko so ngaran mo lawas lan lawas.”—Salmo 145:1.
Panon Yon Ipaliwawa?
• No nanmatoor si Adan ed Dios, anto so nipatawir to komon ed sikatayo?
• Panoy impantrato na saray ilalak nen Abraham ed tawir a walad sikara nensaman?
• Anto so kaiba ed tawir na saray alanaan a patumbok nen Kristo?
• Anto so tawir na baleg ya ulop, tan panon dan nipanengneng a papablien dan maong itan?
[Saray litrato ed pahina 20]
Agamoran na saray ilalak nen Abraham so sipan a nipaakar ed mablin tawir
[Saray litrato ed pahina 23]
Kasin papablien yo so espiritual a tawir yo?