Sikami Iray Klasen Walaan na Pananisia
Pangiyaabawag ed Panarian na Dios Diad Saray Isla na Fiji
AMINSAN et sinalita nen Jesu-Kristo so nipaakar ed duaran dalan. Say sakey et maawang tan ompugta ed ipapatey. Samay sakey et mainget balet ta ompugta ed bilay. (Mateo 7:13, 14) Pian natulongan iray totoo a pilien so dugan dalan, gagala nen Jehova a Dios a say maong a balita na Panarian so nipulong ed intiron mundo. (Mateo 24:14) Kanian, saray totoo ed amin a pasen so makakarengel ed mensahe na Panarian, tan arum so mamipili ed bilay diad pagmaliw a “[nengneng a] walaan na pananisia ed kilalaban na kamarerwa.” (Hebreos 10:39) Imbitaan mi ka a manbasa nipaakar ed bilay a pinili na pigara diad Fiji tan arum niran kakaabay ya isla na South Pacific.
Nanmatalek Ira ed si Jehova
Si Mere so maneeskuela ni sanen pilimeron nadngel toy mensahe na Panarian nen 1964. Lapud inkisian to ed nisulinek ya isla, sikatoy matalag a nakatongtong na Tastasi nen Jehova. Balet, diad kaunoran et agamoran to so suston pikakabat ed Biblia. Diad saman et sikato lay naasaway lakin pangulo na sakey ya ulopan diad baryo da. Bilang resulta na desisyon nen Mere a manbilay a mitunosan ed saray prinsipyo na Biblia, sikatoy maruksan tinrato na masiken to tan kakanayon to, tan sikatoy binusol met la na saray kabaryoan to. Anggaman ontan, sikatoy abautismoan nen 1991.
Ag-abayag kayari na saman, say masiken nen Mere, si Josua, et maabuloy la tan migrugrupo met la ed pangisisingbat nen Mere ed Biblia ed saray ananak da. Intunda la nen Josua so iyaatendi ed Methodist Church. Balet, bilang pangulo, sikato nin siansia so mangidadaulo ed sinimba iran miting diad baryo. Diad imaton na saray taga-baryo et agmatoor si Josua, lapud say Methodist Church so manunan kabiangan na bilay na saray taga-baryo na Fiji. Kanian, say pastor diman so mamapapawil ed si Josua ed dati ton relihyon.
Makpel a pinekderan nen Josua a sikato tan say pamilya to so nandesisyon la tan determinado a mandayew ed si Jehova “ed espiritu tan katuaan.” (Juan 4:24) Diad tinmumbok a miting ed baryo et inyabawag na manunaan a pangulo a si Josua tan say pamilya to so nepeg a pataynanen ed baryo. Sikaray naikdan na pitoran agew pian taynanan so isla tan say abung, dalin, tan saray tanem da—on, say intiron pangaalaan day pambilay da.
Saray espiritual ya agagi ed arum ya isla so tinmulong ed si Josua tan ed pamilya to, a tinulongan da ira parad napanayaman tan napandalusan da. Si Josua tan say panguloan ya anak ton laki so bautismado la natan, tan say sakey nin anak ton laki so manlilingkor bilang agbautismadon manangipalapag na maong a balita. Agano nin nampalista si Mere bilang regular payunir (sigpot panaon a manangiyabawag na Panarian). Say desisyon dan manlingkor ed si Jehova so nanresulta ed inkaandi na posisyon tan materyal iran kayarian, balet singa si apostol Pablo, impasen dan ag-iya makapipara ed walan agamoran da.—Filipos 3:8.
Desisyon a Manasaglawi ed Konsiensia
Say desisyon a tumboken so nipasal ed Biblia a konsiensia et mankakaukolan na pananisia tan tepel. Onia so peteg a kipapasen na balo nin abautismoan a si Suraang, sakey a kalangweran a bii a manaayam ed Tarawa, sakey ed saray isla na Kiribati. Kinmerew na permiso si Suraang pian sikatoy nipuera la ed sakey ya aspekto na trabaho to bilang sakey a nurse diad ospital. Say kerew to so ag-inabobonan, a nanresulta ed inkibaki to a mangasikaso ed melag a medical center diad niarawin isla a sengeg na inkiarawi to ed saray kapananisiaan to.
Diad satan ya isla et kaugalian parad amin a balon sabi a mangiyatang. Sisiaen na totoo a say agpanggawa ed satan et mansumpal ed ipapatey. Lapud ag-inabuloyan nen Suraang iyan gawa na idolatriya parad sikato tan ed saray kaiba to, tinalaranan na saray taga-baryo so panikel ed sikato na naopendi ya espiritu. Sanen anggapoy mauges ya agawa ed si Suraang odino ed saray kaiba to, dakel a pankanawnawa so nilukas ed sikato pian mangiter na maabig a pantasi.
Balet agtinmunda iray subok ed si Suraang. Arum ed saray kalangweran a lalaki ed satan ya isla so angipasen a sakey ya angat so pangingganyo ed saray kalangweran a bibiin ombibisita. Balet, impulisay nen Suraang so pananangguyor da tan nanmatoor ed Dios. Diad tua, ayarian toy manlingkor bilang regular payunir, anggaman sikatoy aka-duty na 24 ya oras bilang nurse.
Antis na sakey a panangan a ginawa parad pamagalang ed si Suraang sanen manpipikal lan ontaynan ed isla, saray mamasiken ed baryo so angikuan a sikatoy pilpilimeron peteg a misionaryo a binmisita ed sikara. Lapud mapekder a talindeg to parad saray prinsipyo na Biblia, arum ed satan ya isla so kinmiwas a paborabli ed mensahe na Panarian.
Saray Angat ed Pisikal
Lapud ararawi iray pigaran baryo et kabaliksan ton saray totoo nen Jehova so kaukolan a pirmin mansagpot ed pibiang ed ministeryo tan ed iyaatendi ed saray Kristianon miting. Konsideraen so alimbawa na apatiran bautismadon Tastasi—sakey a laki tan taloran bibii—a manakar na pigay oras a paonla tan pasempet manlapud saray miting. Say panakar da et saglawien toy ibaliw da ed taloran ilog a paonla labat. Sano aralem so danum, say agin laki so mangilangoy ya unona ed baleg a kaldiro ya angikargaan da ed saray bag, libro, tan saray kawes dan piaral. Insan to pawilen so taloran agagin bibii pian tulongan.
Sakey nin melag a grupo, ya onaatendi ed saray miting ed nisulinek ya isla na Nonouti diad Kiribati, so akaabet na duma iran angat. Say onsusto labat ed abung a panaaralan da et pitora odino waloran totoo. Arum ya onaatendi so akayurong la ed paway tan ontakiling la ed saray de-alambri a dingding. Say panaaralan so nalalabasan na saray arum a taga-baryo a pasempet tan paonla ed saray mararakep iran kapilya ra. Siempre, namomoria na saray lingkor nen Jehova a saray totoo, aliwan saray bilding, so peteg a makapaliket ed panmoria na Dios. (Aggeo 2:7) Say sakey a bautismadon agin bii diad isla et akulaw la tan agmapanakar na arawi. Ingen, sikatoy tutulongan na sakey ya agbautismadon manangipalapag a kalangweran a bii ed panagpulong, a mangitutulak ed karkariton na saman ya akulaw lan agi. Agaylan apresasyon so ipapanengneng da parad katuaan!
Say masulok a 2,100 a manangipalapag a manlilingkor diad saray isla na Fiji et determinado a mangituloy ed pangiyabawag na maong a balita na Panariay Dios. Tan sikaray matalek a dakel ni so magmaliw a ‘nengneng a walaan na pananisia ed kilalaban na kamarerwa.’
[Mapa ed pahina 8]
(Parad aktual a format, nengnengen so publikasyon)
Australia
Fiji