Ontalindeg a Nagnap tan Tekep na Mapekder a Kombiksion

Saray Kombension​—Makapagayagan Paneknek ed Impanaagi Tayo

SAY 50-años ed saman a Joseph F. Rutherford, a walad maletey a bunigas lapud ngalngalin sakey taon ya agmakatunongan ya inkipriso, so malikeliket a nanserbi a singa sakey a bellhop (manag-asisti ed hotel). Alay anos ton nambitbit na saray maleta tan angasisti ed saray kaparan Kristiano ed saray pankuartoan da ed hotel. Duara ed datin kakaiba ton apriso​—a kaparan Estudyante na Biblia​—so angiyuksoy ed saray kuarton panugipan na dakel a manaalagar na pampundoan. Nantultuloy itan anggad kayari pegley-labi. Tampol ya alikna ran amin so espiritu na inkaliket. Anto so okasyon?

Say taon et 1919, tan saray Estudyante na Biblia (a kabat natan bilang Tastasi nen Jehova) so ompapawil la ed normal manlapud abayag a maruksan panamasegsegang. Pian ombiskeg lamet so impanaagi ra, sikaray angiyuksoy na kombension diad Cedar Point, Ohio, E.U.A., manlapud Setyembre 1 anggad 8, 1919. Diad unor ya agew na kombension, mapetepet a tinmalineng so malikeliket a nandaragup a 7,000 sanen pinaseseg nen Brother Rutherford so balang inmatendi ed oniaran salita: “Embahador kayo na Ari na arari tan Katawan na kakatawan, a mangiyabawag ed totoo . . . na maglorian Panarian na Katawan tayo.”

Diad limog na totoo nen Jehova, et agawa la iray kombension diad panaon na kadaanan ya Israel. (Exodo 23:14-17; Lucas 2:41-43) Saray ontan a pantitipon et maliket ya okasyon, ya ontutulong ed amin ya onaatendi a nodnonoten da so Salita na Dios. Mipadpara, saray kombension na Tastasi nen Jehova natan so nisentro ed espiritual iran interes. Parad masimoon iran maniimaton, say ontan iran maliket a pantitipon so peteg a mamapaneknek a saray Tastasi so pankakasakeyen na malet a bedber na Kristianon impanaagi.

Saray Sagpot Pian Makaatendi

Momoriaen na saray Kristiano natan a saray kombension da et panaon parad espiritual a pakainawaan tan pakaibangatan ed Salita na Dios. Sikaray mangipapasen ed sarayan ankabaleg a pandaragup bilang makanan paraan a makatulong ed sikara pian “ontalindeg a nagnap tan tekep na mapekder a kombiksion ed amin a linawa na Dios.” (Colosas 4:12, NW) Kanian, sigpot-puson susuportaan na Tastasi irayan pantitipon, a mansasagpot iran maong pian atendian iratan.

Parad arum, nakaukolan so pangagamil na pananisia tan panalona ed singa-palandey iran babeng pian sikaray makaatendi ed ontan iran kombension. Alimbawa, konsideraen pa so sakey ya akulaw lan Tasi ed Austria. Anggaman walaan na diabetes tan nakaukolan ya ineksionan na insulin ya inagew-agew, sinegurado ton naatendian so amin ya agew na distriton kombension diad kawalaan ton bansa. Diad India, sakey a baleg a pamilya na Tastasi a masyado so irap na bilay da et talagan ngalngali imposible so pakaatendi ra ed kombension. Sakey a membro na pamilya so nanggaway polaing. Oniay inkuanto: “Lapud agko labay a nasaew so okasyon, inlakok iray balitok ya ikaw ko pian walay pamasahe mi. Ag-aperdi so impansakripisyo, lapud say panlilimog tan saray eksperiensya et amabiskeg ed pananisia mi.”

Diad Papua New Guinea, sakey a grupo na agbautismado tan interesadon totoo so determinado pian atendian so distriton kombension diad kabisera. Inasinggeran da so sakey a laki ed baryo ra a walaan na pampublikon luluganan tan intepet da no pigaray arkila to no iyakar ira ed kombension. Lapud kulang so kuarta ra parad kantidad na arkila, sikaray akipakna a mantrabaho ed abung na laki, ya apigeren so kusina to. Diad ontan sikaray akakar ed distriton kombension tan agunggonaan ira manlapud inyatendi ed interon programa.

Say kinaarawi so aliwan agnatalonaan a problema parad Tastasi nen Jehova a desididon onatendi diad saray kombension. Nen 1978, sakey a malangwer a delegadon taga-Poland et binisikleta to so 1,200 kilometro ed loob na anem agew pian naatendian so kombension diad Lille, Pransya. Legan na tiagew na 1997, nambiahe so duaran Tasi a taga-Mongolia na 1,200 kilometro pian naatendian so Kristianon pantitipon diad Irkutsk, Russia.

Onkukurang so Tuan Impanaagi

Say pankakasakey tan impanaagi ya ipapanengneng na saray Tastasi diad saray kombension da so sankaimano na saray makatunongan a maniimaton. Dakel so mandinayew lapud anggapo so panaglabi ed limog na saray onaatendi tan lapud wala so puron inkaligsa anggan diad limog na saraman so nayarin akapankabat labat ed unonan pankanawnawa.

Diad agano nin internasyonal a kombension diad Australia, sakey a tour guide ya angulop ed saray ombibisitan delegado ed kombension ed loob na sakey simba et nambayag ni na daiset a kaiba ra pian panggayagaan so pilimog ed sikara. Sikatoy nandinayew ed panaaroan tan pankakasakey da, ya agto makapanisian mantutunosan iran maong, lapud maslak ed sikara et agsankakabat. Sanen asabi panaon a sikato lay onalis, sikatoy kinmelyaw pian lingawen da. Sikaray tinawag ton “brothers tan sisters,” tan inggapo ton akisalamatan ira balet agto nasumsumpal, lapud sikatoy tinalonaan na emosyon tan inmagus iray lua to.

Nen 1997, agawa so primeron nankatlon-lenguahe a distriton kombension diad baleg ya istadyum diad Sri Lanka. Say interon programa so nambabansag ya impresenta ed Ingles, Sinhala, tan Tamil. Dia ed sakey a mundon ompapalalo iray etnikon gotgotan, say ontan a pantitipon na taloran grupo na lenguahe so sankaimano. Tinepetan na polis so sakey ya agi: “Siopay mangidadaulo ed sayan kombension​—saray Sinhala, saray Tamil, odino saray Ingles?” Inmebat so agin laki: “Anggapo so grupon mangidadaulo ed kombension. Amin mi so mangipapakurang ed saya.” Say polis so agmakapanisia. Sanen nankakasakey so amin a taloran grupo na lenguahe parad unor a pikakasi tan nadngel so nambabansag ya “Amen” ed interon istadyum, inmungol iray nandaragup diad biglan impantipak. Anggapo lawari so nanengneng ed saray dumerengel ya ag-akalua. On, saray kombension so peteg a makapagayagan paneknek na impanaagi tayo.​—Salmo 133:1.a

[Paimano ed leksab]