Saray Distriton Kombension—Panaon Parad Magayagan Panagdayew
1. Panon a mipara iray piesta ed Israel nensaman diad saray distriton kombension tayo natan?
1 Regular ya oonla ed Jerusalem ira di Jose, Maria, saray ananak da, tan arum ni ra pian onatendi ed tinaon iran piesta. Diad sarayan pankanawnawa, sikara tan saray arum niran managdayew et lilingwanan da nin magano iray inagew-agew ya aktibidad da tan isesentro day imano ra ed mas importantin aspekto na espiritualidad da. Saray piesta et pankanawnawa pian dalepdepen tan pantongtongan so kaabigan nen Jehova tan pian nikonsideray Ganggan to. Say manasingger lan distriton kombension tayo so mangiiter met ed sikatayo na pankanawnawa parad magayagan panagdayew ed si Jehova.
2. Antoran preparasyon so kaukolan tayon gawaen parad manasingger lan distriton kombension?
2 Kaukolan so Panagparaan: Manlapud Nazaret, kaukolan na pamilya nen Jesus so manakar na manga 200 a kilometro a paonla tan pasempet. Anggaman agtayo amta no pigaray agagi nen Jesus, seguradon mankaukolan iya na panagplano tan baleg a sagpot ed biang di Jose tan Maria. Kasin ginawa yo la iray nakaukolan a preparasyon pian naatendian so amin a taloran agew na manasingger lan distriton kombension? Ompan kaukolan yoy manbakasyon manlapud trabaho odino mitongtong ed amo yo odino diad maestra na anak yo pian ipatanir so agda iloob diad saratan a petsa. Sarag yo kasi manboluntaryo pian tulongan so siopaman ed kongregasyon a mankaukolan na tulong pian makaatendi ed kombension?—1 Juan 3:17, 18.
3. Panon ya angitarya na pankanawnawa iray piesta ed Israel parad makapaseseg a panlilimog?
3 Makapaseseg a Panlilimog: Alay abig a pankanawnawa so itatarya na saray piesta na saray Judio pian makapanpapasesegan iray managdayew! Andi-duaruwan tatalaranan na pamilya nen Jesus so pakapilimog lamet ed saray abayag lan kakaaro ra. Panggagayagaan da met so pankanawnawan nawalaan na saray balon kakaaro diad limog na saray Judio tan proselitan wadman odino kaiba ran manbiabiahe a paonla tan pasempet manlapud Jerusalem.
4. Panon tayon nipanengneng ya aapresyaen tayoy nankakasakey a Kristianon impanaagi?
4 Say sakey a rason no akin ya inyuksoy na matoor tan makabat ya aripen a mantitipon tayo pian ondengel ed saray paliwawa diad distriton kombension imbes ya ipresenta so parehon impormasyon ed saray niimprintan publikasyon et pian makapanpapasesegan itayo. (Heb. 10:24, 25) Kanian, iplano so isabin masakbay kada agew pian napanggayagaan so panlilimog antis ya ipresenta na tsirman so musika, a mangipaamtan kaukolan tayo lay onla’d saray yurongan tayo. Imbes ya ompaway ni pian mangaliw na pangugtoan, mas maabig no manbalon itayo lay simplin panangan tan mansiansia ed pasilidad pian makapikomustaan tan makapitongtong ed saray agagi. Say nankakasakey a Kristianon impanaagi tayo et regalon nanlapud si Jehova a kaukolan tayon apresyaen.—Miq. 2:12.
5. Antoy makatulong ed sikatayo pian sigpot a minabang ed saray programa?
5 Panaon Pian Makaaral: Manlapud inkaugaw, inanamot nen Jesus iray panaon na piesta pian makaaral nipaakar ed mangatatawen ya Ama to. (Luc. 2:41-49) Anto so makatulong ed sikatayo tan ed pamilya tayo pian sigpot a minabang ed saray partin narengelan tayo? Legan na saray sesyon, mansiansia kayo’d yurongan yo tan paliisay pantotongtong no agmet nakaukolan. Agyo aabuloyan so cell phone yo odino arum niran gadyet a mangisturbo ed sikayo tan ed arum. Nengneng kayo ed manpapaliwawa tan mangalay antikey iran nota. Manaabay kayon sankapamilyaan pian naseguro yon ondedengel met iray ananak yo. Diad labi, mangigana na panaon pian pantongtongan yon sankakaiba iray punton nanggayagaan yo.
6. Anto so lawas tayon nonoten nipaakar ed panangawes tan panag-ayos tayo?
6 Panangawes tan Panag-ayos: Magmainomay a nibiig na saray manbiabiahen negosyante so pamilya nen Jesus tan arum ni ran Judion managdayew a manbiabiahen paonla tan pasempet manlapud saray piesta lapud saray palagoygoy ed saloy na kawekawes da tan say asul a kordon ed tapew na palagoygoy. (Num. 15:37-41, Maung a Balita) Anggaman agmansusulong na nikaduman kawes iray Kristiano, kabkabat itayo lapud masimpit a panangawes tan lapud mauksoy tan malinis itayo. Nepeg tayon imanoen so itsura tayo legan itayon manbiabiahe a paonla tan pasempet manlapud kombension tan legan a walad lugar na kombension. Anggano mansalat itayoy kawes tayo kayari na programa, nakaukolan tayon pansiansiaen a mapagalang so itsura tayo tan agtayo eekaley badge card tayo. Diad ontan et nibiig itayo manlapud saray aliwan Tasi tan makapangiter itayoy maabig ya impresyon ed saray makakaimaton.
7. Akin et nakaukolan tayon iplano so pambulontaryo ed saray kimey diad pankombensionan?
7 Nakaukolan Iray Boluntaryo: Nakaukolan so dakel a mankimey pian magmaliw a mauksoy so kombension. Sarag yo kasi manbulontaryon ontulong? (Sal. 110:3) Saray kimey ed kombension et kabiangan na sagradon panaglingkor tayo tan mangiiter na maabig a pantasi. Nandinayewan a maong na manedyer na sakey a pasilidad a nankombensionan iray boluntaryon nanlinis ditan tan oniay inkuan to: “Labay ta kayon pisalamatan ed sayan sankarakepan a programan naimatonan ko. Naynay kon narerengel a saray Tasi nen Jehova et nikadkaduman totoo ya abayag lan kabkabat ed negosyo mi a naynay dan tataynan iray pasilidad a mas malinis ni nen say nen asabian da. Ginawa yo tan say organisasyon yo iyan lugar a mas marakep a pasen parad saray totoo tan ginawa yo iya kaiba iray grupo na totoo a sankakalakalan ed amin ya akabat mi.”
8. Antoran pankanawnawa pian makapantasi so posible ed saray pasen na kombension?
8 Saray Pankanawnawan Mantasi: Diad saray lugar na kombension et dakel so makaimano ed saray bisita a desente so panangawes da tan akasulong na badge card, tan saya so nayarin sengegan na panusisa ra, a mamawala ed sikatayo na pankanawnawan inabang ed sikara so nipaakar ed kombension. Kayari na programa et inawit ed restawran na sakey ya apat-taon ya ugaw so kopya to na balon release a publikasyon tan impanengneng to itan ed waitress. Saya so amawala na pankanawnawa ed saray ateng na ugaw pian imbitaan imay bii ya onatendi ed kombension.
9. Panon tayon naalig so apresasyon na pamilya nen Jesus ed saray espiritual a probisyon nen Jehova?
9 Saray piesta nensaman et maliket ya okasyon a tatalaranan na saray Judion sinononot ed espiritualidad da. (Deu. 16:15) Maliket so pamilya nen Jesus a manggawa na antokaman a sakripisyo pian makaatendi tan sigpot a minabang. Ontan met so panangapresya tayo ed saray distriton kombension tayo, ya ipapasen iratan bilang regalon nanlapud maaron mangatatawen ya Ama tayo. (Sant. 1:17) Natan la so panaon na pamparaan parad sayan tinaon a magayagan panangidayew ed si Jehova!
[Kahon ed pahina 5]
Saray Panonot ed Distriton Kombension
◼ Oras na Programa: Onggapo so programa ed alas 8:20 na kabuasan ed Biernes tan Sabado, tan alas 8:50 na kabuasan no Simba. Sano onggapo lay musika, nepeg ya amin tayo et akayurong la pian nigapo so programa ed mauksoy a paraan. No Biernes tan Sabado, manampot so programa ed alas 3:55 na ngarem, tan alas 3:15 na ngarem no Simba.
◼ Paradaan: Diad amin a pankombensionan a walay mauksoy a paradaan, agkaukolan so mangireserba. Lapud kaslakan lan limitado iray paradaan, no nayari et maniiba kayo la ed sakey a luganan.
◼ Pangireserba na Yurongan: Say nayarin ireserbaan yo labat na yurongan et saramay kaiba yon nambiahe, kaiba yo ed abung, ontan met ed saramay iyaaralan yo na Biblia.
◼ Panangugto: Ipangasin mangawit kayo lay pangugtoan yo imbes ya ompaway kayo ni ed pasen na kombension pian manaliw. Nayarin usaren so melag a pananginan a niyabay ed salian yo. Saray angkakabaleg a pananginan tan nabetag iran kargaan so agnaabuloyan ed pasilidad na kombension.
◼ Saray Donasyon: Nipatnag tayoy apresasyon tayo ed saray uksoyan na kombension diad pangiter na boluntaryo iran kontribusyon parad sankamundoan a kimey diad Kingdom Hall tayo odino diad pankombensionan. No walay mandonasyon na tseke ed kombension, nepeg ya ingaran itan ed “Watch Tower Society.”
◼ Saray Aksidente tan Emerhensia: No walaray medikal ya emerhensia diad pankombensionan, ipangasin ipaamta iya ed sankaasinggeran ya attendant, a mangipaamtan tampol ed First Aid ta pian saray kualipikadon namboluntaryo ed satan a departamento et naamtaan day kipapasen to tan makapangiter iray nakaukolan a tulong. No nakaukolan, ontawag iray boluntaryo na First Aid diad sankaasinggeran ya ospital.
◼ Saray Makapuy so Pakadngel da: Diad arum a kombension, narengel so programa na kombension diad FM radio frequency. Pian napinabangan iyan probisyon, mangawit kayo na de-baterya a radyo a walaan na earphone.
◼ Panagrekord: Saray kagawaan a panagrekord so agnepeg ya ikonekta ed sound system odino elektrisidad na pasilidad, tan usaren labat iratan no agmakadisturbo ed arum.
◼ Panlitrato: No manlitrato kayo legan na saray sesyon, ipangasin agkayo manguusar na flash, tan agyo sasaniban iray agagin onderengel.
◼ Saray Follow-Up Form: Nepeg ya usaren so Please Follow Up form (S-43) a pangisulatan na impormasyon nipaakar ed siopaman a nagmaliw ya interesado lapud impormal ya impantasi tayo legan na kombension. Nepeg a mangawit iray manangipalapag na sakey odino duaran follow-up form diad kombension. Saray asulatan a form et nayarin iter ed Book Room a mangasikaso ed satan odino ed sekretaryo na kongregasyon yo no onsempet kayo.—Nengnengen so Nobyembre 2009 a Ministeryo Tayo ed Panarian, p. 4.
◼ Saray Restawran: Igalang so ngaran nen Jehova panamegley na maabig a kondukta yo diad saray restawran. Diad dakel a pasen, ugali da la so pangiter na 10 porsiento a tip, depende ed serbisyo.
◼ Saray Badge Card: Ipangasin ipeket so badge card yo legan a walad kombension tan sano manbiabiahe a paonla tan pasempet ed pankombensionan. Saray badge card et naala labat ed kongregasyon yo. Agyo ipapaleen so pangala na saray badge card a parad sikayo tan ed pamilya yo.
◼ Bautismo: Nepeg ya onyurong la ray kandidato ed bautismo diad saray yurongan a nigana parad sikara antis ya onggapo so programa na kombension ed Sabado na kabuasan. Balang sakey so mangawit na masimpit a pampabasa tan tuwalya. Pian naseguron saramay manpabautismo et mansulong na matukoy parad ontan ya okasyon, saya so itongtong ed sikara na saray elder a mangirepaso ed saray tepet ed libron Organisado.
◼ Boluntaryon Panagkimey: Lalon daakan a liket so nagamoran tayo diad iyatendi ed sayan kombension no manboluntaryo itayon ontulong ed saray nakaukolan a kimey. (Gawa 20:35) Siopaman a malabay a manbulontaryo et kaukolan a manpalista ed Volunteer Service Department diad kombension. Saray kalangweran ya anggan anggapo ni 16 años da et nayari met ya ontulong diad pankimey dan kaiba na balanglan say atateng da odino guardian odino arum nin wala la’d edad ya inabuloyan dan nakaiba to.