Kasin Akaparaan Kayo la ed Espiritual a Piesta?

1. No mangiparaan tayoy dakel a tagano, antoray kaukolan tayon gawaen?

¹ Say pangitarya na daakan a tagano et mankaukolan na dakel a preparasyon. Kaukolan so pangaliw na saray rekado, maalwar a pangiprepara, insan pangitarya. Nepeg met ya organisado so pangiserbi na naakan. Sakey ni, kaukolan a presentable so lugar a pakagawaan na panangan. Manparaan met iray bisita, nagkalalo la no arawi ni panlapuan da. Anggaman dakel a preparasyon so kaukolan, say pangan na mananam tan masustansian tagano a kaiba iray kakaaro tan kapamilya et talagan makabkabaliksan. Saray Tasi nen Jehova diad Pilipinas et magano lan mandaragup ed melag tan baleg iran grupo pian panggayagaan so pitalaran da lan espiritual a piesta, salanti, say “Mantultuloy a Manbantay!” a Distriton Kombension. Dakel lan sagpot so ginawa pian makapanparaan parad sayan programa. Amin tayo et imbitado. Pian makaatendi tan makapinabang a maong, kaukolan a manparaan so balang sakey ed sikatayo.​—Uli. 21:5.

2. Anto so kaukolan tayon gawaen pian naatendian so interon programa na espiritual a piesta?

² Pian Makapinabang a Maong: Kasin wala lay plano yo pian naatendian so interon programa na sayan espiritual a piesta? Ompan kaukolan yon ipaamta ed amo yo a sikayoy nepeg ya onatendi ed interon sesyon na kombension, kaibay unonan agew na satan. Wala la kasi inyuksoy yon luganan tan pampundoan? Nepeg a seguroen na saray elder a saray pankaukolan na saray agagin mamatatken, mansasakit, odino arum nin mankaukolan na tulong et naasikaso la.​—Jer. 23:4; Gal. 6:10.

3. Akin a say aka-asainan labat na kongregasyon tayo a kombension so nepeg tayon atendian?

³ Lawas nonoten a balang kongregasyon et niasain ed sakey a distriton kombension. Sanen imprepara irayan uksoyan, maalwar a kinalkula na sangan opisina no panon karakel so onatendi tan inkonsidera da so bilang na yurongan ed pasen na pankombensionan. Ompan manseseksekan odino anggapoy nayurongan na arum ya agagi no onatendi itayo ed kombension anta agkabiangan ditan so kongregasyon tayo.

4. Antoran panonot so ontulong ed sikatayon makapanparaan ed igapo na saray programa kada agew?

⁴ Iplano yo lay onsabin masakbay ed lugar na kombension kada agew pian makalmo kayoy yurongan antis ya onggapo so programa. Pigaran minuto antis ya onggapoy sesyon, basa yo lay programa ed satan ya agew. Ontulong iya pian niparaan yoy puso yo a mangawat ed saray impormasyon a nipresenta. (Esd. 7:10) No ibaga na tsirman ya onggapo la so manangilukas a musika, panggayagaan yoy idengel ed satan legan yon ipaparaan so pibiang ed manangilukas a kanta tan pikakasi.

5. Panon a minabang a maong so pamilya tayo ed programa na kombension?

⁵ No sanaabay ed yurongan so interon pamilya legan na kombension, naseguro na saray ateng ya ondedengel iray anak da. (Deu. 31:12) Papasesegen so amin a nengnengen so teksto ed dilin Biblia ra sano basaen itan na ispiker. Say pannota so ontulong met pian magmaliw kayon atentibo. Sarayan nota so nayarin ontulong ed sikayo a nanonotan iray manunan punto na paliwawa. Paliisan yoy pitongtong odino alis lan alis ed yurongan yo legan na sesyon no agmet nakaukolan. No walay cell phone yo, agyo aabuloyan iya a manisturbo ed sikayo odino ed arum kaleganan na programa. Kayari na kada sesyon, nayari yon ibaga ed arum iray naapresya yo ed programa.

6. Anto so nikadkaduman aspekto na kombension tayo, tan panon tayon napanggayagaan itan?

⁶ Diad distriton kombension, walaan itayo na pankanawnawan panggayagaan so nikadkaduman pankakasakey na sanaagi ya anggapo ed sayan mundo. (Sal. 133:1-3; Mar. 10:29, 30) Akin et agyo ikabat so inkasikayo ed saray kakaabay yo tan mitongtong ed sikara legan na panangugto? Saya et sakey ed saray pankaabigan na pambalon yoy simplin pangugtoan tan pansiansia ed pasen na kombension imbes a mangan kayo ni ed restawran. Agyon balot sasaewen so kada pankanawnawa a makapanpapasesegan.​—Roma 1:11, 12.

7. Antoran preparasyon so kaukolan tayon gawaen nipaakar ed ikawes tayo?

⁷ Panangawes: Makatantanda so impangiganggan nen Jehova ed saray Israelita a peketan day palagoygoy iray saloy na kawekawes da tan paliberan day asul a kordon so tapew na palagoygoy. (Num. 15:37-41, Maung a Balita) Saya et pakabidbiran a sikaray pinilin totoo a manlingkor ed si Jehova. Ontan met natan, say desente tan masimpit a panangawes tayo sano walad kombension et mangibiig ed sikatayo manlapud mundo. Mapuersa iyan pantasi ed saray makakaimaton anggan sano mamangan tayo ed saray restawran kayari na programa. Kanian nonot yo lan maong no antoy isulong yo.

8. Panon itayon makapantasi ed arum legan a wala ed pasen na pankombensionan?

⁸ Mangiter na Pantasi: No akaparaan itayo, nayarin makapantasi itayo ed saray totoo diad pasen na pankombensionan. Walay sakey ya agin laki a kaiba toy asawa to ya angan ed restawran kayari programa. Impanengneng toy badge to ed waiter, insan to inkuan: “Wala la ray anengneng mon akasulong na onia?” Inkuan na waiter a wala la ray naimano to tan mankelaw no antoy usar na saratan a badge. Nanresulta iya ed impantongtong da tan inimbitaan na agi imay waiter ed kombension.

9. Panon tayon nipatnag so apresasyon ed samay Angimbita, si Jehova?

⁹ Anggaman saray agagi tayo so mangipresenta ed amin a paliwawa, interbio, tan demostrasyon, say Ama tayo a walad tawen, si Jehova, so Manangitarya ed sayan tinaon ya espiritual a piesta. (Isa. 65:13, 14) Nipanengneng tayo so panamabli ed samay Angimbita diad iyatendi tayo ed kada agew, tan pangapresya ed amin a parte na espiritual a tagano a nitarya. Kasin akaparaan kayo lan onatendi?

[Kahon ed pahina 5]

Saray Panonot ed Distriton Kombension

◼ Oras na Programa: Onggapo so programa ed alas 8:20 na kabuasan ed Biernes tan Sabado, tan alas 8:50 na kabuasan no Simba. Sano onggapo lay musika, nepeg ya amin tayo so onyurong la pian nigapo so programa ed mauksoy a paraan. No Biernes tan Sabado, manampot so programa ed alas 3:55 na ngarem, tan alas 4:00 na ngarem no Simba.

◼ Paradaan: Diad amin a pankombensionan a walay mauksoy a paradaan, agkaukolan so mangireserba. Lapud kaslakan lan limitado iray paradaan, no nayari et maniiba kayo la ed sakey a luganan.

◼ Pangireserba na Yurongan: Say nayarin ireserbaan yo labat na yurongan et saramay kaiba yon nambiahe odino saramay kaiba yo ed abung.

◼ Panangugto: Ipangasin mangawit kayo lay pangugtoan yo imbes ya ompaway kayo ni ed pasen na kombension pian manaliw. Nayarin usaren so melag a pananginan a niyabay ed salian yo. Saray angkakabaleg a pananginan tan nabetag iran kargaan so agnaabuloyan ed pasilidad na kombension.

◼ Saray Donasyon: Nipatnag tayoy apresasyon tayo ed saray uksoyan na kombension diad pangiter na boluntaryo iran kontribusyon parad sankamundoan a kimey diad Kingdom Hall tayo odino diad pankombensionan. No walay mandonasyon na tseke ed kombension, nepeg ya ingaran itan ed “Watch Tower.”

◼ Saray Aksidente tan Emerhensia: No walaray medikal ya emerhensia diad pankombensionan, ipangasin ipaamta iya ed sankaasinggeran ya attendant, a mangipaamtan tampol ed First Aid ta pian naamtaan na saray walad satan a departamento so kipapasen to tan makapangiter iray nakaukolan a tulong. No nakaukolan, ontawag iray boluntaryo ed First Aid diad sankaasinggeran ya ospital.

◼ Saray Makapuy so Pakadngel Da: Diad arum a kombension, narengel so programa na kombension diad FM radio frequency. Pian napinabangan iyan probisyon, mangawit kayo na de-baterya a radyo a walaan na earphone.

◼ Panagrekord: Saray kagawaan a panagrekord so agnepeg ya ikonekta ed sound system odino elektrisidad na pasilidad, tan usaren labat iratan no agmakadisturbo ed arum.

◼ Panlitrato: No manlitrato kayo legan na saray sesyon, ipangasin agyo uusaran na flash, tan agyo sasaniban iray agagin onderengel.

◼ Saray Pager tan Cell Phone: Nepeg ya i-silent iraya pian agmakadisturbo legan na saray sesyon na kombension.

◼ Saray Follow-Up Form: Nepeg ya usaren so Please Follow Up form (S-43) a pangisulatan na impormasyon nipaakar ed siopaman a nagmaliw ya interesado lapud impormal ya impantasi tayo legan na kombension. Nepeg a mangawit iray manangipalapag na sakey odino duaran follow-up form diad kombension. Saray asulatan a form et nayarin iter ed Book Room a mangasikaso ed satan odino ed sekretaryo na kongregasyon yo no onsempet kayo.​—Nengnengen so Pebrero 2005 a Ministeryo Tayo ed Panarian, p. 6.

◼ Saray Restawran: Igalang so ngaran nen Jehova panamegley na maabig a kondukta yo ed saray restawran. Diad dakel a pasen, ugali da la so pangiter na 10 porsiento a tip, depende ed serbisyo.

◼ Saray Badge Card: Ipangasin ipeket so badge card yo legan a walad kombension tan sano manbiabiahe a paonla tan pasempet ed pankombensionan. Saray badge card et naala labat ed kongregasyon yo. Agyo ipapaleen so pangala na saray badge card a parad sikayo tan ed pamilya yo.

◼ Bautismo: Nepeg ya onyurong la ray kandidato ed bautismo diad saray yurongan a nigana parad sikara antis ya onggapo so programa na kombension ed Sabado na kabuasan. Balang sakey so mangawit na masimpit a pampabasa tan tuwalya. Pian naseguron saramay manpabautismo et mansulong na matukoy parad ontan ya okasyon, saya so itongtong ed sikara na saray elder a mangirepaso ed saray tepet ed libron Organisado.

◼ Konduktan Mangidayew ed Dios: Sano ipapatnag tayo iray bunga na espiritu, diad panagsalita tan ugali tayo legan a wala’d saray restawran, diad saray hotel, odino legan a manbiabiahe, napaliisan tayoy pakagapol ed arum tan mangarum iya ed maabig a reputasyon na saray totoo nen Jehova. (1 Cor. 10:31; 2 Cor. 6:3, 4) Komon ta say iyatendi tan say kondukta yo so mangidayew ed Dios diad 2009 a Distriton Kombension!​—1 Ped. 2:12.