Taloran Agew na Espiritual ya Panamabiskeg
1. Antoy iilaloan tayon naawat diad distriton kombension ed sayan taon?
1 Diad sayan mundo nen Satanas a naeerasan ed espiritual, itutultuloy nen Jehova a pepeselen iray lingkor to. (Isa. 58:11) Sakey ed saray intarya nen Jehova pian pabiskegen itayo et say tinaon a distriton kombension. Legan a manasingger so kombension ed sayan taon, antoy gawaen tayo pian makaawat tan makapangiter na espiritual a panamabiskeg?—Uli. 21:5.
2. Antoray kaukolan tayon iyuksoy?
2 No agmo ni nauksoy so eskedyul tan trabahom, kaukolan mo lan gawaen itan natan pian naatendian mo so interon taloran agew a kombension. Kasin atantiyam lay karukey na pambiahem paonla ed kombension pian masakbay kan makasabi tan makayurong la antis ya onggapoy programa? Seguradon agtayo labay a napalampas so anggan dinan a makapabiskeg ed espiritual a tagano ya intarya nen Jehova parad sikatayo! (Isa. 65:13, 14) Kasin wala lay napanpundoan tan naluganan yo?
3. Antoran suhestion so makatulong ed sikatayo tan ed pamilya tayo pian sigpot a nagunggonaan ed programa?
3 Antoy gawaen tayo pian agmanyataw-yataw so nonot tayo legan na sesyon? No nayari, onugip tayo lan masakbay. Onnengneng ed espiker. Anapen iray tekston bitlaen na espiker. Mannota. Maabig no manaabay iray sankapamilya pian naseguro na atateng ya ondedengel iray anak da. (Uli. 29:15) Tan nayari yon pantongtongan bilang pamilya iray balibalin punto ed programa kada labi. Pian napabiskeg kayo anggan kayari na kombension, sarag yoy mangigana na panaon legan na Panagdayew na Pamilya yo pian pantongtongan iray espisipikon punto a niyaplika na pamilya yo.
4. Panon tayon napabiskeg iray kakongregasyon tayo?
4 Pabiskegen so Arum: Labay tayo met a napabiskeg ed espiritual iray arum. Kasin wala ray maedad la odino arum a kakongregasyon a mankaukolan na tulong pian makaatendid kombension? Kasin sarag mo ran tulongan? (1 Juan 3:17, 18) Nepeg a seguroen na saray elder, lalo la ray manangasikaso na grupo, a natulongan iratan a manangipalapag.
5. Panon tayon ibunog iray imbitasyon diad kombension? (Nengnengen met so kahon ed leksab.)
5 Singa nen imbeneg, taloran simba antis na kombension tayo et mibiang itayo ed kampanyan pangimbita ed arum. Nepeg a kalat na kada kongregasyon ya ibunog so imbitasyon ya niiter ed sikara ya anggad nasumpal so interon teritorya no posible. No wala ni ray akeran imbitasyon ed sikayo kayari na kampanya, awit yo iratan ed kombension pian nausar yo parad impormal a panagtasi. Wala ray kaaruman ya impormasyon nipaakar ed saya diad programa no Biernes. Saray imbitasyon ya aglan talaga nausar na pamilya yo legan a walad pankombensionan et nepeg ya iter ed attendant no onloob kayo ed pasilidad. Ipangasin mangikera na sakey a kopya parad sika, lapud kaukolan mo itan diad unor a paliwawa no Simba.
6. Panon tayon nipanengneng so maong ya ugali diad kombension?
6 Makapaseseg so Maong ya Ugali: Diad sayan panaon ya dakel so totoon “maaro ed inkasikaran dili” tan anggapoy pibabali dad liknaan na arum, talagan makapabiskeg so pilimog ed saray kaagian a manggugunaet a mangipanengneng na maong ya ugali! (2 Tim. 3:2) Nipatnag tayoy maong ya ugali no mareen tan mauksoy itayon onlad pankombensionan tan no ireserbaan tayo labat na yurongan iramay kaiba tayod abung, kaiban nambiahe, odino saray iyaaralan tayo. Sano ibaga na tsirman ya onyurong tayo la tan dengelen so musika antis na kada sesyon, ontulok itayo. Pangipatnag na maong ya ugali so pangi-set ed cell phone tayo pian agnadisturbo so arum legan na programa. Tan nipanengneng tayoy maong ya ugali no agtayo mantotongtong, manti-text, mamangan, odino manakar-akar legan na sesyon.
7. Panon itayon makaawat tan makapangiter na panamabiskeg legan a mililimog ed saray agagi?
7 Makapabiskeg ya Panlilimog: Diad kombension et nawalaan itayo ni na pankanawnawan naeksperiensya so Kristianon pankakasakey tan impanaagi. (Sal. 133:1-3) Akin ta no sikatayo lay unonan mikabat ed saray agagi? (2 Cor. 6:13) Nayarin gawaen mon kalat so pikabat ed sakey ya agi odino pamilya kada agew. No panangugto, pankanawnawam a gawaen iya. Kanian imbes ya ompaway ka nin mangaliw na naakan, mangawit ka lay simplin pangugtoan pian makapilimog kad arum. Nayarin manresulta iya ed balo tan agmanganggan pankakaaro.
8. Akin et maabig so manboluntaryo diad kombension, tan panon tayon nagawaan itan?
8 Talagan makapabiskeg so mikimeyan ed saray agagi diad sagradon panaglingkor! Kasin sarag moy manboluntaryo ed sakey a departamento odino ontulong ed asainmin na kongregasyon yo diad panaglinis? (Sal. 110:3) No anggapo ni pamboluntaryoan mo, ipangasin onasingger ed Volunteer Service Department. No dakel so mankimey, maliket tan mainomay so trabaho.
9. Akin et nepeg tayon imanoen so kondukta tan itsura tayo legan na kombension?
9 Makapadinayew ed Saray Makakaimaton so Kondukta Tayo: Delegado itayo diad interon taloran agew a kombension, aliwa labat a legan na programa. Kanian nepeg a nibiig na saray makakaimaton so pidumaan tayo ed saray aliwan Tasi. (1 Ped. 2:12) Kaukolan a say panangawes tan panag-ayos tayo diad kombension, pundoan, tan restawran et mamagalang ed si Jehova. (1 Tim. 2:9, 10) No isulong tayo so badge tayo, naamtaan na saray mangoobserba a Tasi itayo nen Jehova. Diad ontan et nawalaan tayoy pankanawnawan ibagad sikara so nipaakar ed kombension tayo tan napulongan tayo ra.
10. Panon tayon naseguron marakep so impresyon na saray empleyado ed hotel tan restawran nipaakar ed kombension tayo?
10 Nayarin walaray arum ed sikatayo ya ontuloy ed hotel legan na kombension. Panon tayon mikoopera ed saray empleyado na hotel tan restawran? Kaukolan tayon tumboken iray totontonen no pigaray naabuloyan ya onugip ed kada kuarto. Ontan met, nepeg ya agtayo maingal pian agnadisturbo iray arum. No busy iray empleyado sano man-check in odino man-check out tayo, kaukolan ya mapasensia tan makonsidera tayo. (Col. 4:6) Kaukolan tayoy mangiter na tip a kanepegan na saray waiter diad restawran tan ed saray empleyado na hotel ya mangaawit na bagahe, manlilinis na kuarto, tan mangiiter na arum ni ran serbisyo.
11. Antoran eksperiensya so mangipapanengneng a say maabig ya kondukta tayo et manresultad maabig a pantasi?
11 Antoy epekto na maabig a kondukta tayo ed arum? Unong ed sakey ya dyaryo, oniay imbaga na sakey ya manedyer na pasilidad ya inusar parad kombension: “Magakgalang ira. Labay min wadia ran tinaon.” Nen katantaon walay sakey ya aliwan Tasi ya abalang toy wallet tod hotel ya tutuloyan na saray agagi. Sanen impawil na manedyer na hotel so wallet ya anggapoy abalang, oniay imbaga to ed akan-gawa: “Maong labat ta kombension na saray Tasi nen Jehova tan sikaray walad hotel. Ta no andi, agla seguro nipawil ed sika tay wallet mo.”
12. Legan a manasingger so kombension, antoray kaukolan tayon gawaen, tan akin?
12 Magano lay kombension tayo ed sayan taon. Dakel ya panaon tan sagpot so inggana pian makapaseseg so programa tan marakep so pankombensionan. Pansagpotan moy makaatendi ed interon taloran agew, tan manparaan kan mangawat ed intarya nen Jehova tan na organisasyon to parad sika. Panggunaetan mon pabiskegen so arum panamegley na maong ya ugali, maliket a pililimog, tan maabig a kondukta. Diad ontan et naliknam imay alikna na sakey a delegado nen katantaon, ya insulat to: “Anggapo lay mipara ed sayan makapnek ya eksperiensyak!”
[Blurb ed pahina 3]
Singa nen imbeneg, taloran simba antis na kombension tayo et mibiang itayo ed kampanyan pangimbita ed arum
[Blurb ed pahina 4]
Kaukolan a say panangawes tan panag-ayos tayo diad kombension, pundoan, tan restawran et mamagalang ed si Jehova
[Blurb ed pahina 4]
Panggunaetan mon pabiskegen so arum panamegley na maong ya ugali, maliket a pililimog, tan maabig a kondukta
[Kahon ed pahina 5]
Saray Panonot Ed 2011 A Distriton Kombension
◼ Oras na Programa: Onggapo so programa ed alas 8:20 na kabuasan ed Biernes tan Sabado, tan alas 8:50 na kabuasan no Simba. Sano niyanunsio lay igapo na musika, nepeg ya amin tayo et akayurong la pian naigapo so programa ed mauksoy a paraan. No Biernes tan Sabado, manampot so programa ed alas 4:00 na ngarem, tan alas 3:15 na ngarem no Simba.
◼ Parking: Diad amin a pankombensionan et walay paradaan, tan say uksoyan et first-come, first-served. Lapud kaslakan lan limitado iray paradaan, no nayari et maniiba kayo la ed sakey a luganan.
◼ Pangireserba na Yurongan: Say nayarin ireserbaan yo labat na yurongan et saray kaiba yon nambiahe, kaiba yo ed abung, odino saray iyaaralan yo na Biblia.—1 Cor. 13:5.
◼ Panangugto: Ipangasin mangawit kayo lay pangugtoan yo imbes ya ompaway kayo ni ed pasen na kombension pian manaliw. Nayarin usaren so melag a pananginan a niyabay ed salian yo. Saray angkakabaleg a pananginan tan nabetag iran kargaan so agnaabuloyan ed pasilidad na kombension.
◼ Saray Donasyon: Nipatnag tayoy apresasyon tayo ed saray uksoyan na kombension diad pangiter na boluntaryo iran kontribusyon parad sankamundoan a kimey diad Kingdom Hall tayo odino diad pankombensionan. No walay mandonasyon na tseke ed kombension, nepeg ya ingaran itan ed “Watch Tower.”
◼ Saray Aksidente tan Emerhensia: No walaray medikal ya emerhensia diad pankombensionan, ipangasin ipaamta iya ed sankaasinggeran ya attendant, a mangipaamtan tampol ed First Aid ta pian saray kualipikadon namboluntaryo ed satan a departamento et naamtaan day kipapasen tan makapangiter iray nakaukolan a tulong. No nakaukolan, ontawag iray boluntaryo na First Aid diad sankaasinggeran ya ospital.
◼ Tambal: No walaray tambal ya iinumen yo, ipangasin agyo lilingwanan so mangawit na magenap, lapud anggapo iya ed kombension.
◼ Sapatos: Kada taon et walaray naririsgo lapud sapatos. Kanian maabig no mamili itayo na masimpit, komportablen sapatos pian mainomay so kakasegep tan kakaepas.
◼ Panagrekord: Saray kagawaan a panagrekord so agnepeg ya ikonekta ed sound system odino elektrisidad na pasilidad, tan usaren labat iratan no agmakadisturbo ed arum.
◼ Panlitrato: No manlitrato kayo legan na saray sesyon, ipangasin agkayo manguusar na flash, tan agyo sasaniban iray agagin onderengel.
◼ Saray Please Follow Up (S-43) Form: Nepeg ya usaren so Please Follow Up form a pangisulatan na impormasyon nipaakar ed siopaman ya interesado lapud impormal ya impantasi tayo legan na kombension. Nepeg a mangawit iray manangipalapag na sakey odino duaran follow-up form diad kombension. Saray asulatan a form et nayarin iter ed Book Room a mangasikaso ed satan odino ed sekretaryo na kongregasyon yo no onsempet kayo.—Nengnengen so Nobyembre 2009 a Ministeryo Tayo ed Panarian, pahina 4.
◼ Saray Restawran: Igalang so ngaran nen Jehova panamegley na maabig a kondukta yo diad saray restawran. Diad dakel a pasen, ugali da la so pangiter na tip.
◼ Saray Badge Card: Ipangasin ipeket so badge card yo legan a walad kombension tan sano manbiabiahe a paonla tan pasempet ed pankombensionan. Saray badge card et naala labat ed kongregasyon yo. Agyo ipapaleen so pangala na saray badge card a parad sikayo tan ed pamilya yo.
◼ Bautismo: Nepeg ya onyurong la ray kandidato ed bautismo diad saray yurongan a nigana parad sikara antis ya onggapo so programa na kombension ed Sabado na kabuasan. Balang sakey so mangawit na masimpit a pampabasa tan tuwalya. Pian naseguron saramay manpabautismo et mansulong na matukoy parad ontan ya okasyon, saya so itongtong ed sikara na saray elder a mangirepaso ed saray tepet ed libron Organisado.
◼ Pamboluntaryo: Mas maliket tayo diad iyatendi ed sayan kombension no manboluntaryo itayon ontulong ed saray nakaukolan a kimey. (Gawa 20:35) Siopaman a malabay a manbulontaryo et kaukolan a manpalista ed Volunteer Service Department diad kombension. Saray kalangweran ya anggan anggapo ni 16 años da et nayari met ya ontulong diad pankimey dan kaiba na balanglan say atateng da odino guardian odino arum nin wala la’d edad ya inabuloyan dan nakaiba to.
[Kahon ed pahina 3]
Panoy Pangimbita Tayo?
Pian nasumpal tayoy teritorya tayo, kaukolan ya magano tayo labat. Nayarin oniay ibaga tayo: “Kumusta kayo? Kaiba kamid saray mangibubunog ed sayan imbitasyon diad interon mundo. Niay kopya yo. Nabasa yod sayan imbitasyon iray detalye.” Say arap na sayan imbitasyon et makapainteres kanian seguroen yon nanengneng iya na unabung legan yon idederew. Magmaliw a maligsa. Sano mangibubunog kayo diad weekend, kaukolan ya mangiyopresi kayo met na magasin no matukoy.