Saray Ugali ya Mangigloria ed Dios

1. Akin ya naiimano iray Tasi nen Jehova sano onaatendid distriton kombension?

¹ Kada no onaatendi tayod saray distriton kombension, walan walay makakaimano ed sikatayo. Walay badge tayo tan grupo-grupo tayon manbiabiahe kada agew. Nia ray pigaran panonot ya makatulong pian nigloria so Dios panamegley na maong ya ugali legan ya walad syudad a pankokombensionan.​—1 Ped. 2:12.

2. Panon ya nigloria so Dios na masimpit a panangawes tayo legan ya walad syudad a pankokombensionan?

² Masimpit ya Panangawes: Mabetbet a pandinayewan na saray makakanengneng so masimpit a panangawes tayo legan ya onaatendid kombension. Balet, mas baleg so epekto na panangawes tayo sano wala tayod restawran odino mall. Nepeg ya masimpit nin siansia so kawes tayo tan aliwan masyadon kasual. Kaukolan a nanengneng na arum ya duma tayod saray aliwan Tasi. (Roma 12:2) Tan nepeg ya akasulong so badge tayo pian nipaamtay kombension, makapanpulong, tan nabidbir itayo na arum ya agagi.

3. Panon tayon nipanengneng so inkaanos tan inkamagalang?

³ Maanos tan Magalang: Diad mundon dakel so makasarili, talagan pandinayewan na saray makakanengneng so inkaanos tan inkamagalang tayo! (2 Tim. 3:1-5) Sano mangirereserba tayo na yurongan odino ompipila pian mangalay release ed kombension, kaukolan ya anapen tayoy pankaabigan na arum, aliwan say pankaabigan tayo. (1 Cor. 10:23, 24) Sanen inmunan akaatendid kombension so sakey ya interesadon laki, imbaga ton, “Agko natandaan iramay paliwawa, balet agko nalingwanan so anengneng kon ugali na saray Tasi.”

4. No sarag tayo, akin ya manboluntaryo tayod kombension?

⁴ Saray Mabulos a Boluntaryo: Tanda na tuan Kristiano so mabulos a panagboluntaryo. (Sal. 110:3) Diad sakey a lugar a pankombensionan, namboluntaryon nanlinis antis na kombension so manga 600 ya agagi. Oniay imbaga na sakey ya empleyado: “Makapabilib so anengneng mi! Agak makapanisian boluntaryo irayan amin.” Maliket tayon tatalaranan so 2013 ya distriton kombension tan say pankanawnawan nigloria so Dios panamegley na ugali tayo.

[Litrato ed pahina 3, 4]

Saray Panonot ed 2013 a Distriton Kombension

◼ Oras na Programa: Diad taloran agew, onggapo so programa ed alas 8:20 na kabuasan. Diad satan, nepeg ya onyurong tayo lan amin pian nigapoy programa ed mauksoy a paraan. No Biernes tan Sabado, onggapo so pansaran kanta tan pikakasi diad alas 3:50 na ngarem, tan alas 2:35 na ngarem no Simba.

◼ Pangireserba na Yurongan: Say nayarin ireserbaan yo labat na yurongan et saray kaiba yon nambiahe, kaiba yo ed abung, odino saray iyaaralan yo na Biblia.​—1 Cor. 13:5.

◼ Panangugto: Ipangasin mangawit kayo lay simplin pangugtoan yo imbes ya ompaway ni pian mangaliw. Nayarin usaren so melag a pananginan a niyabay ed salian yo. Saray angkakabaleg a pananginan tan napisit iran kargaan so agnaabuloyan ed pankombensionan.

◼ Donasyon: Nipatnag tayoy apresasyon tayo ed saray uksoyan na kombension diad pangiter na boluntaryo iran kontribusyon parad sankamundoan a kimey diad pankombensionan. No walay mandonasyon na tseke, nepeg ya ingaran itan ed “Watch Tower.”

◼ Aksidente tan Emergency: No wala ray medikal ya emergency diad pankombensionan, ipangasin ipaamta iya ed sankaasinggeran ya attendant, a mangipaamtan tampol ed First Aid ta pian naamtaan na saray kualipikadon boluntaryo so kipapasen tan makapangiter iray nakaukolan a tulong. No nakaukolan, ontawag irad sankaasinggeran ya ospital.

◼ Tambal: No wala ray tambal ya iinumen yo, ipangasin agyo lilingwanan so mangawit na magenap, lapud anggapo iraya ed kombension.

◼ Please Follow Up (S-43) Form: Nepeg ya usaren iyan form a pangisulatan na impormasyon nipaakar ed siopaman ya interesado diad impormal ya impantasi tayo legan na kombension. Saray asulatan a form et nayarin iter ed Book Room odino ed sekretaryo na kongregasyon yo kasempet yo.

◼ Restawran: Igalang so ngaran nen Jehova panamegley na maabig a kondukta yo diad saray restawran. Say panangawes yo et nepeg a mangipanengneng a Kristianon ministro kayo. Mangiter na tip, no satan so niyugali.

◼ Pamboluntaryo: Siopaman a malabay a manbulontaryo et kaukolan a manpalista ed Volunteer Service Department diad kombension. Saray kalangweran ya anggapo ni 16 años da et nayari met ya mankimey kaibay balanglan ateng da, guardian, odino arum ya wala lad edad ya inabuloyan na ateng o guardian ya nakaiba ra.