Saray Panonot ed Kombension
Oras na Programa: Lukas lay pankombensionan ed alas-7 na kabuasan. Diad taloran agew, onggapo so programa ed alas-8:20 na kabuasan. Diad satan ya oras, nepeg ya onyurong tayo lan amin pian mauksoy a nigapoy programa. No Biernes tan Sabado, alas-3:55 na ngarem so oras na pansaran kanta tan pikakasi, tan alas-2:45 na ngarem no Simba.
Idayew si Jehova Panamegley na Kansion: Saray totoo na Dios nensaman et indayew day Jehova panamegley na kansion, tan anggad natan et importantin kabiangan na tuan panagdayew so musika. (Sal. 28:7) Kada sesyon na regional a kombension et onggapod musika. Aliwa iyan basta background music labat, noagta ginawa iya pian niparaan so puso tayo ed pandayew tan pamaaralem na pikakabat ed si Jehova. Kanian no iyanunsio na chairman ya onggapo lay musika, onyurong tayo la tan ondengel a maong. No ontan, ipapanengneng tayon papablien tayoy sagpot na saray membro na Watchtower orchestra. Mamiduad sakey taon, sarayan agagi et oonlad Patterson, New York diad sarili dan gastos pian manggaway balibalin musika ya usaren tayo. Kayari na idengel a maong ed musika, amin et mibansag ya mangansion na Kingdom song pian mankakasakey ya idayew si Jehova.
Paradaan: Diad amin a pankombensionan et walay paradaan tan say uksoyan et first-come, first-served. Lapud kaslakan et limitado iray paradaan, maabig no maniiba lad sakey a luluganan. Seguradoen na saray responsablin brother ya saray luluganan labat ya walay lugan dan disabled so nayarin manparking ed akareserban paradaan.
Pangireserba na Yurongan: Kalukas na pankombensionan kada kabuasan, ipangasin agmanaapuran onlad yurongan ya singa miuunaan ed arum ya onatendi. Magmaliw a makonsiderad arum tan ipalugar ti ni ingen iray panlabayan tayo parad pankaabigan na saray agagi. Say panagsakripisyo et pakabidbiran na saray tuan Kristiano, napakiwas iray makakaobserba ya idayew si Jehova no ontay nanengneng dad sikatayo. (Juan 13:34, 35; 1 Cor. 13:5; 1 Ped. 2:12) Say nayari labat ya ireserbaan yoy yurongan et saray kaiba yod abung, kaiba yon nambiahe, odino iyaaralan yoy Biblia. Agkayo mangikakargay gamit ed saray yurongan ya agyo inreserba. No unoren tayo iya, natulongan tayoy arum ya nanengneng iray bakantin yurongan. Wala met so akareserban yurongan parad saray maedad tan walay sakit. Lapud limitado irayan yurongan, sakey odino duara labat so mangasisti ya onyurong ed abay na maedad odino walay sakit.
Masimpit a Panangawes: Nepeg ya pormal tan masimpit so kawes tayo legan na kombension, ya agtayo aaligen so alablabas iran estilon uso ed mundo. (1 Tim. 2:9) Anggano manbiabiahe manlapu tan pasempet ed pampupundoan tayo, tan legan tayon manpapainawa antis tan kayari sesyon, labay tayo met ya paliisan so masyadon kasual odino akulastay ya panangawes tan itsura. Diad ontan et proud tayon mangisulong na badge tayo tan agtayo nababaingan ya manpulong no walay pankanawnawa. Say itsura tan maong ya ugali tayod manasingger lan kombension et aglabat makasagyat ed saray mauyamon totoo ya amtaey mensahe na Biblia, noagta napaliket ti met si Jehova.—Sof. 3:17.
Maabig ya Kondukta ed Pangusar na Gadyet: Nipanengneng tayoy maabig ya kondukta legay programa no i-adjust tayo ray cell phone tan arum nin gadyet tayo pian agnadisturboy arum. No mangusar tayoy camera, video recorder, tablet, o arum nin gadyet, nikonsidera tayoy arum no seguroen tayon ag-ira nadisturbo odino nasaniban. Nipanengneng tayo met so maabig ya kondukta no ag-itayo manti-text o mani-email legan na programa no agmet kaukolan.
Panangugto: Ipangasin mangawit kayo lay pangugtoan imbes ya ompaway nin mangaliw. Nayarin usaren so melag a pananginan a sarag ton iyabay ed salian yo. Saray angkakabaleg a pananginan tan napisit iran kargaan et agnaabuloyan ed pankombensionan.
Donasyon: Nipatnag tayoy apresasyon tayo ed impangiyuksoy na kombension diad pangiter na boluntaryon kontribusyon parad sankamundoan a kimey diad pankombensionan. No walay mandonasyon na tseke, nepeg ya ingaran itan ed “Watch Tower.” Sarag to met so mandonasyon panamegley na debit o credit card.
Tambal: No wala ray tambal ya iinumen yo, ipangasin agyo lilingwanan so mangawit, lapud anggapo irayad kombension. Saray injection parad diabetis et nepeg ya ikargad bantakan parad hazardous waste, aliwan diad saray basuraan ed pankombensionan.
Paliisay Pakadisgrasya: Ipangasin naynay ya manalwar pian agnarisgo lapud pakakuranyas o pakapatatba. Kada taon et wala ray naririsgo ed sulong dan sapatos, lalo la ray akatakong. Kanian maabig no mamili tayoy masimpit tan komportablen sapatos pian napaliisay pakadisgrasya no onsegep tan onlasur ed takayan o manakar ed arum a dadalanan.
Saray Makapuy so Pakadngel da: Diad arum a kombension, narengel so programa diad FM radio frequency. Pian napinabangan iyan probisyon, mangusar kayoy gadyet ya onkonektad FM tan man-earphone.
Please Follow Up (S-43) Form: Nepeg ya usaren so Please Follow Up form a pangisulatan na impormasyon na interesadon apulongan legan na kombension. Saray asulatan a form et nayarin iter ed Book Room odino ed sekretaryo na kongregasyon yo.
Restawran: Nidayew tayoy ngaran nen Jehova panamegley na maabig a kondukta tayo diad saray restawran. Nanengneng komon ed panangawes tayo ya Kristianon ministro itayo. Mangiter na tip, no ontan so gagawaen ed satan a lugar.
Pamboluntaryo: Siopaman a labay toy manboluntaryo diad kombension et kaukolan a manpalista ed Volunteer Service Department. Saray kalangweran ya anggapo ni 16 años et nayari met ya manboluntaryo no kaiba day ateng o mangaasikasod sikara, odino arum ya adulton inyabuloy na ateng o manangasikaso ra.