Ipapasal Itayo nen Jehova Parad Sayan Kimey
1. Sano iikdan nen Jehova na asainmin iray totoo, anto ni arum ya iiter to?
1 Sano iikdan nen Jehova na asainmin iray totoo, sikatoy mangiiter met na tulong a nakaukolan da pian nasumpal da itan. Alimbawa, sanen ingganggan nen Jehova si Noe a manggaway biong ya agto nin balot asalin ginawa, imbangat To met no panon itan a gawaen. (Gen. 6:14-16) Sanen imbaki to so mauyamon managpastol a si Moises a mitongtong ed mamasiken na Israel tan ed si Faraon, impaseguro nen Jehova ed sikato: “Onla ka sirin natan ta wala ak ed sangim tan ibangat ta ka naani ed salitaen mo.” (Exo. 4:12) No nipaakar ed asainmin tayon pangipulong ed maong a balita, ibabangat itayo met nen Jehova no panon itan a gawaen. Ipapasal to tayo ed sayan kimey panamegley na Teokratikon Eskuelaan Parad Ministeryo tan Pantitipon Parad Panagserbi. Panon tayon nagunggonaan ed sayan panangipasal?
2. Panon tayon minabang ed Teokratikon Eskuelaan Parad Ministeryo?
2 Say Teokratikon Eskuelaan Parad Ministeryo: Antis kan miaral, basaen tan aralen iray niyeskedyul a materyal. Insan, sano naiimatonan mo no panon ya iprepresenta na saray estudyante so impormasyon ed betang da, lalom ya naaralan no panon so pambangat. (Uli. 27:17) Awit moy librom ya Eskuelaan Parad Ministeryo tan usar mo itan a pinagka-workbook. No kayari betang na kada estudyante et walay salambiten na manangasikaso na eskuelaan ed sayan libro, gulisan mo ray manunan punto ya labay mon iyaplika tan usar mo iray margin a pansulatan. Balet say sankaabigan a paraan pian minabang ed sayan eskuelaan et say pibiang. Nampa-enroll ka la? No naikdan kay asainmin, manparaan kan maong tan iyaplikam so konseho ed sika. Sano manpupulong ka, usar moy naaralan mo.
3. Panon tayon minabang ed Pantitipon Parad Panagserbi?
3 Say Pantitipon Parad Panagserbi: Mas natandaan tayo iray suhestion ya impresenta ed sayan miting no masakbay ti lan basaen so materyal tan manparaan a mankomento. No antikey labat so komento tayo, mas dakel so makapibiang. Imanom a maong iray demostrasyon, tan usar mo ray suhestion ya iisipen mon lalon mamaaligwas ed ministeryom. Iyatol mo ray artikulo ed Ministeryo Tayo ed Panarian a makatulong ed arapen.
4. Akin et nepeg tayon iyaplika so teokratikon panangipasal?
4 Singa saray asainmin ya inter ed si Noe tan Moises, aliwan mainomay so ganggan ed sikatayon pangipulong ed maong a balita diad interon dalin. (Mat. 24:14) Ontalona itayo no manmatalek tayo ed si Jehova, say Makapadinayew a Managbangat, tan iyaplika so panangipasal to.—Isa. 30:20.