Tumboken si Kristo Diad Pangipatnag na Dignidad
1. Panon a say tema na kombension ed sayan taon so mikonektaan ed pangipatnag na dignidad?
1 Deneskribe na Biblia so Soberano ed Talba, a si Jehova, ya akawesan na kagalangan odino dignidad. (Sal. 104:1) Si Jesus so lawas nansalita tan kinmiwas diad paraan ya amagalang ed Ama to tan ed saray uksoyan nen Ama to. (Juan 17:4) Balang sakey ed sikatayo so walaay pankanawnawan mangalig ed si Jesus tan makapangidayew ed si Jehova diad onsasabin “Tumboken so Kristo!” iran Distriton Kombension tayo.
2. Panon a napagalangan si Jehova no manparaan itayo lan onatendi ed amin a sesyon?
2 Mapagalang a Panagdayew: Napagalangan tayo si Jehova no manparaan itayo lan onatendi ed espiritual a ponsia ya intarya to parad sikatayo. Kasin nampatanir kayo la ed amo yo tan inasikaso yo lay eskedyul yo pian naatendian so taloy agew a kombension, kaiba lay Biernes? Akaplano la kasi isabi yon masakbay pian magenap ni panaon yon makalmoy yurongan tan makapibiang kayo ed panlukas a kanta tan pikakasi? Kasin akaplano lay pangugtoan yo pian dia kayo la mangan ed pankokombensionan a kaiba iray agagi? Diad igapo na kada sesyon, sano kerewen la na tsirman so iyurong tayo, nepeg ya itunda tayo lan tampol so pantotongtong tan onyurong la, lapud onggapo la so programa.
3. Panon a napagalangan so panagdayew tayo diad italineng tayon maong ed programa?
3 Napagalangan met so Ama tayon walad tawen no talinengen tayon maong so programa. Sanen naobserbaan na sakey a reporter so distriton kombension ed lugar da, insulat to a no walaray makanengneng et pandinayewan day “napanuliranan a walna na saramay wadman, legan a mapagalang tan marendeen dan dedengelen so ipapaliwawa tan ipapatnag da ya interesado ira ed maespiritual iran bengatla.” Sinalambit to met so nipaakar ed “dakerakel ya ugugaw . . . , ya amin et nikadkadumay inkamakalakal da tan atentibo ni ingen iran manbubukay ed saray bersikulo ed Masanton Biblia.” Sano peles na sesyon, aliwa itan a panaon na paniistoryaan, pan-text, pangan, odino panakar-akar. Nepeg a kaabay na atateng iray kalangweran ya ananak da ta pian natulongan da ran minabang ed programa. (Deu. 31:12; Uli. 29:15) No gawaen tayo iratan, nipapanengneng tayoy panagrespeto ed arum tan apresasyon ed makanan espiritual a tagano ya ipaparungo ed sikatayo.
4. Akin a nepeg a mapagalang so itsura tayo sano walad kombension?
4 Mapagalang ya Itsura: Dakel ya agagi so akisalamat ed saray panonot ed paliwawa diad distriton kombension nen katantaon ya atemaan na “Ipatnag so Makristianon Dignidad ed Amin a Panaon.” Indanet na saman a paliwawa a nepeg a panggunaetan na saray lingkor na Dios so pangipatnag na Makristianon dignidad diad panangawes tan panag-ayos da. Diad sayan taon, nepeg a seryoson imanoen tayo lamet iyan pamaakaran. Nipapatnag na itsura tayo so nalilikna tayo ed si Jehova tan ed pribilehyo tayo bilang Tasi to. Nepeg a say panangawes tayo et mipara ed saramay “mankuan a mangigagalang ed Dios.”—1 Tim. 2:9, 10, NW.
5. Panon tayon napansiansiay mapagalang ya itsura anggan sano wala la’d paway na pankokombensionan?
5 Nepeg kasin dia labat la’d kombension so pangipanengnengan tayoy mapagalang ya itsura? Tandaan, dakel so makaimano ed saray badge tayo legan a wala itayo ed pasen a pankokombensionan. Nepeg a napatnagan ed itsura tayo a duma itayo ed saray totoon agmandadayew ed si Jehova. Kanian, anggan sano wala itayo la ed paway pian mangdem kayari programa, nepeg a say panangawes tayo et matukoy parad saray ministro. Nagkalalo la lapud wadtan itayo ed satan a pasen pian atendian so kombension na saray Kristiano. Sirin et agnepeg a mangisulong na pantalon a maong, shorts, odino T-shirt. Seguradon maabig itan a pantasi ed saray manaayam ditan! Naliliketan si Jehova sano isisindag na itsura tayo so inkaministro tayo.
6. Antoray maabig a resulta na pangipatnag na Makristianon dignidad?
6 Makapalikliket Iran Resulta: Say pangipatnag na dignidad bilang Kristiano diad saray kombension tayo so mamawala na saray pankanawnawa pian makapantasi ya impormal, insan sakey ni, maabig so impresyon a nitilak tayo ed saray totoon makakanengneng. Sanen asumpal so sakey a kombension, oniay inkuan na sakey ya opisyal: “Natan kami labat akanengneng na makalkalakal a totoo. Ontan so iilaloan na Dios a gawaen tayo.” Diad pangipatnag na dignidad, nipanengneng so panamagalang tan panangaro ed sakey tan sakey tan nidadayew si Jehova. (1 Ped. 2:12) Nipanengneng na satan so maridios a takot tan pisasalamat tayo ed say pribilehyo a sikatayoy nibabangat na Ama tayo. (Heb. 12:28) Komon ta panggunaetan tayon ipatnag so dignidad legan tayon aalagden so “Tumboken so Kristo!” a Distriton Kombension tayo ed sayan taon.