Idayew si Jehova Dia ed Loob na Baleg a Muyongan

1, 2. Anton pankanawnawa so itatarya ed sikatayo na distriton kombension, tan anto so sakey a paraan a nagawaan tayo iya?

¹ Saray tinaon a distriton kombension tayo so mangitatarya na alay abig a pankanawnawa pian nigloria si Jehova. Say liknaan tayo et singa ed samay liknaan nen David ya angikantan: “Ikdan ta ka na pisasalamat ed loob na baleg a muyongan: idayew ta ka ed utel na saray dakel a totoo.” (Sal. 35:18) Diad manasingger a “Maridios a Katutulok” a Distriton Kombension, panon tayon naseguro a bilang nankakasakey a totoo et nidadayew tayo si Jehova?

² Sakey lan paraan a nagawaan tayo iya et diad panamegley na kondukta tayo. Oniay inkuan na saray mangaasikaso ed pasilidad na sakey a kombension: “Base ed saray kombension yo, imbaga mi ed arum a relihyoson grupo a malabay a man-abang na pasilidad ya imatonan da no panon a mankokombension iray Tasi nen Jehova, lapud sankaabigan so uksoyan yo.” Diad panamegley na itsura, pikokoopera, tan kondukta tayo, kada sakey ed sikatayo so makapibiang ed satan ya alay abig a balikas na panangidayew, a kanepegan na Dios tayo.​—1 Ped. 2:12.

3, 4. Panon a say inkasimpit et ontulong ed sikatayon mangawes ed paraan a matukoy ed saray Kristianon ministro, diad pasen na kombension tan kayari na saray sesyon?

³ Personal ya Itsura: Nakaukolan so inkasimpit pian say paraan na panangawes tan panag-ayos tayo so makapangidayew ed si Jehova. (1 Tim. 2:9) Oniay inkuan na libron Eskuelaan Parad Ministeryo, pahina 132: “Say toon masimpit so mapaga ed pakaopendi ed arum tan agmanawag na agmanepeg ya imano ed inkasikato.” Diad dakel a daldalin, kasmak la so agmasimpit a panangawes. Balet, aapresyaen nen Jehova so panggugunaet tayo a sikatoy irepresenta ed matukoy a paraan. (Gawa 15:14) Anggaman say pankombensionan et nayarin diad sakey ya “sports center” odino pasen a panagligliwaan, say pandaragup so magmaliw a “baleg a muyongan” tayo legan na taloy agew a kombension. Kanian, sano mandaragup itayo ed imaton nen Jehova, nepeg itayon mankawes a walaan na dignidad a makanepegan ed sankatagyan a Persona ed uniberso.​—1 Awa. 29:11.

⁴ Nepeg ya imanoen tayo met so itsura tayo kayari na kada sesyon. Anggaman nayarin labay tayo so mankawes na mas komportable sano sikatayoy manpapainawa odino mamangan ed restawran, importante a say panangawes tan panag-ayos tayo et siansian matukoy parad saramay “mangibabagan mangigagalang ed Dios.” (1 Tim. 2:10, NW) Aliwan say uso ed sayan mundo so pakadeterminaan na marakep a kawes. (1 Juan 2:16, 17) Saray Kristianon publikasyon tayo so mangitatarya na makatulong iran ilustrasyon na masimpit tan mauksoy a panangawes na saray lalaki tan bibii diad nanduruman kipapasen. Say pangipeket ed saray badge kard tayo legan itayon walad lugar a pankokombensionan so mangipanonot a sikatayoy ministros na Dios ed amin a panaon.​—2 Cor. 6:3, 4.

5. Anton maabig ya ehemplo so impanengneng na saramay kapanaonan nen Esdras?

⁵ Respetoen so Dulang nen Jehova: Diad panaon nen Esdras, sanen sikatoy manpaparaan a manbasa ed Kasulatan, “amin a baley [so] inmalagey” lapud respeto tan pantamitam da ed instruksion ya awaten da. Legan ya itutuloy nen Esdras so pambabasa, “saray layag na amin a baley sikara so maimatlek.” (Neh. 8:3, 5, 6) Binidbir da a si Jehova so mansasalita ed sikara, tan saya so amakiwas ed sikaran ontalineng tekep na respeto. Ontan met kasi ikikiwas tayo legan na saray kombension tayo?

6, 7. Panon tayon nipatnag so panagrespeto ed espiritual a dulang nen Jehova?

⁶ Say Soberanon Katawan na uniberso so angitadia ed sikatayo na ponsia. (Isa. 25:6; 1 Cor. 10:21) No papablien tayon maong so pasen tayo ed espiritual a dulang nen Jehova, gawaen tayon kalat so iyatendi ed amin a taloy agew na kombension. Kasin inyareglo yo la iray pampundoan, panluganan, tan say pambakasyon ed sekular a trabaho? Magenap kasi so inggana yon panaon parad pamparaan tan pambiahe ta pian masakbay kayon makasabi ed pankombensionan, diad ontan et wala ni oras yon mananap na yurongan, makapituyaw kayo ni ed saray agagi, tan makapikasakey ed sikaran mangidayew ed si Jehova diad manangilukas a kanta tan pikakasi?​—Sal. 147:1.

⁷ Say panagrespeto ed dulang nen Jehova so mamakiwas ed sikatayon ontalineng a maong ed programa tan paliisan so pitongatong ed arum, pangan, odino panakar-akar ed pasilyo legan na programa. Diad panamegley na matoor tan makabat ya aripen, itatarya nen Jehova so espiritual a tagano a nakaukolan tayo natan. (Mat. 24:45) Anggapo ed sikatayo so malabay a makasaew ed satan. Nepeg a kaabay na atateng so ananak da tan tulongan da iran sigpot a nagunggonaan.​—Deu. 31:12.

8. Anto so akerew ed sikatayon gawaen parad panangugto, tan akin?

⁸ Nakerew a manbalon itayo la na pangugtoan imbes ya onalis ni ed pasen na kombension pian manaliw na naakan no oras na panangugto. Makapaliket ta maslak ya inmatendi ed kombension nen katantaon so maapit ya anumbok ed sayan direksion. Agaylan abig no ontan so gawaen na amin diad sayan taon! (Heb. 13:17) Sayan uksoyan so mangiiter na alay abig a pankanawnawa a panggayagaan so makapabiskeg a pililimog ed saray agagi tan mangarum ed espiritu na pankakasakey tan kareenan a mamagalang ed si Jehova.​—Sal. 133:1.

9, 10. Anton kaaruman a pankanawnawa ed pangidayew ed si Jehova so itatarya ed sikatayo na kombension?

⁹ Impormal a Panagtasi: Diad pambiabiahe tayo a paarap tan pasempet manlapud kombension, dakel so pankanawnawa tayon mangidayew ed si Jehova panamegley na saray bibil tayo. (Heb. 13:15) Sano sikatayo so mamangan diad restawran odino mitotongtong ed sakey ya empleyado na hotel, panggunaetan tayoy mangiter na pantasi. Say kanonotan tan kapusoan tayo so napano na espiritual a kaykayamanan. Inabang tayo irayan maabig a bengatla ed saramay nanaabet tayo ed impormal a paraan.​—1 Ped. 3:15.

¹⁰ Pitalaran tayo iyan pankanawnawa a nabendito si Jehova “dia ed saray muyong.” (Sal. 26:12) Komon ta nankakasakey tayon idayew si Jehova dia ed “Maridios a Katutulok” a Distriton Kombension.

[Kahon ed pahina 5]

Saray Panonot ed Distriton Kombension

◼ Saray Oras na Programa: Onggapo so programa ed alas-8:30 na kabuasan diad Biernes tan Sabado, tan alas-9:00 na kabuasan no Simba. Pigaran minuto antis na gapoy sesyon, onyurong lay tsirman ed plataporma legan na manangilukas a musika na Panarian. Nepeg ya onyurong itayo lan amin ed satan ya oras pian onggapo so programa a walaan na dignidad. Manampot so programa ed alas-4:35 na ngarem diad Biernes tan Sabado tan alas-4:10 na ngarem no Simba.

◼ Paradaan: Diad amin a pasen na kombension, panggunaetan tayo so manggawa na saray uksoyan parad paradaan. Amin a de-luganan so nepeg a manumbok ed direksion na saray attendant ed paradaan ta pian agnairapan iray arum. Lapud kaslakan lan limitado so paradaan diad saray assembly hall, no nayadyari et milugan odino manpalugan itayo la imbes a sakey odino duara labat a too ed kada luganan.

◼ Panagreserba na Yurongan: Nayari lambengat ya ireserbaan iramay kaluganan yo odino saramay kaiba yo ed abung.

◼ Donasyon: Nalalanor ed panangiyareglo na distriton kombension so panggastos na baleg. Nipanengneng tayo so apresasyon tayo diad boluntaryon pandonasyon ed sankamundoan a kimey diad Kingdom Hall tan diad kombension. Antokaman a tsiken idonar ed kombension so nepeg ya ingaran ed “Watch Tower.”

◼ Panangugto: Ipangasin manbalon lay pangugtoan imbes ya onalis ed pasen na kombension pian manaliw na naakan diad restawran odino ed saray manlalakoy naakan no oras na panangugto. Nayari so mangusar na melag a cooler a nayarin iyan ed silong na yurongan. Saray angkabaleg a pampamilyan coolers, napisit iran kargaan, tan de-alkohol iran iinumen so agnayarin awiten ed pasilidad na kombension.

◼ Panagrekord: Agnayarin ikonekta ed electrical odino sound system na pasilidad so anggan dinan a klase na rekorder tan nayari labat itan ya usaren no agmandisturbo ed arum.

◼ Bautismo: Saray kandidato na bautismo so nepeg ya onyurong ed niganan pasen a panyurongan da antis ya onggapo so programa no kabuasay Sabado. Nepeg a mangawit so balang sakey na masimpit a kawes a pampabasa tan tuwalya. Pian naseguro a matukoy so isulong na saray kandidato ed sayan okasyon, saray mamatatken a mangirepaso ed sikara na saray tepet ed libron Organisado so nepeg a mangilaktip ed saya diad pangirepaso ra.

◼ Saray Badge Kard: Ipangasin ipeket so badge kard diad amin a panaon legan a walad kombension tan sano manbiabiahe a paonla tan pasempet. Saya so nayarin naala ed kongregasyon. Isakbay yo la so pangala yo na saray kard parad sikayo tan pamilya yo.

◼ Panaglitrato: No manlitrato kayo, ipangasin agmanguusar na flash legan na saray sesyon.

◼ Saray Pager tan Cell Phone: Nepeg ya i-set iraya pian agmakadisturbo.

◼ Aksidente tan Emerhensia: Sano niwalay medikal ya emerhensia ed pasen na kombension, ipangasin tuplegen so sankaasinggeran ya attendant a tampol a mangipaamta ed First Aid Department pian nadetermina na saray kualipikadon first-aid personnel a walad kaliber-liber so inkaseryoso na situasyon tan ontulong ira.