Pankimey ed Saray Mansasalita na Lenguahe na Sananey a Bansa
1. Anton pankanawnawa so niwala ed sikatayo legan itayon manpupulong?
1 Imbaga nen Jesu-Kristo a say maong a balita et nipulong ed interon dalin “bilang pantasi ed amin a nasyones.” Amta na saramay amin a mibibiang ed panagpulong tan panagbangat a kimey so kaimportantian na saratan a salita. (Mat. 24:14, NW; 28:19, 20) Legan itayon manpupulong tan manggagaway babangatan, nayarin makaromog itayo na totoon taga arum a bansa a mansasalitay sananey a lenguahe. Kanepegan da met so makadngel na mensahe na Panarian tan ontalindeg ed dapag na katuaan sakbay ya onsabi so makapataktakot ya agew nen Jehova. (Mal. 3:18) Panon tayon napulongan iramay mansasalita na lenguahe na sananey a bansa a walad teritorya tayo?
2. Panon tayon naalig si Jehova sano mitotongtong tayo ed saramay mansasalita na sananey a lenguahe?
2 Aligen so Panmoria nen Jehova ed Saramay Mansasalita na Sananey a Lenguahe: Pian naalig tayo so agmanangidumaduman panangaro nen Jehova ed amin a walad teritorya tayo, nepeg a mabiskeg so pilalek tayon tulongan iray totoo a makagamor na suston pikakabat ed tuan Dios, si Jehova, antokaman so lenguahe ra. (Sal. 83:18; Gawa 10:34, 35) Anggaman say manunan pupulongan tayo et saramay mansasalitay lenguahe na kongregasyon a kawalaan tayo, nepeg a sinononot tayo ed pankaukolan na saramay mansasalita na sananey a lenguahe tan mananap na saray paraan pian ninabang ed sikara so mensahe na Panarian na Dios. Say pangibaliwala ed saramay mansasalita na sananey a lenguahe et agmitunosan ed gagala nen Jehova a napulongan iray totoo ed amin a bansa. Panon tayo sirin a natulongan iray totoo a mansasalita na sananey a lenguahe?
3. Anton makanakanan kagawaan so intarya’d sikatayo, tan panon tayon niparaan so pangusar ed satan?
3 Usaren so Bokleta a Good News for People of All Nations: Denisinyo iyan usaren sano makaromog itayo na saray mansasalita na sananey a lenguahe. Awit yo iyan lanang, magmaliw kayon pamilyar ed saray karga to, tan iparaan so pangusar ed satan. Markaan yo la iramay lenguahe a maslak ed teritorya yo pian mainomay yon naanap iratan. No walaray naalan literatura ed saratan a lenguahe, nayarin praktikal so pangala na pigaran kopya pian nipalima ed unabung kayarin nipabasa so mensahe a walad bokleta.
4. Panon ya usaren so bokletan Nations ed ministeryo tayo?
4 No walay aromog yo ed ministeryo a mansasalitay sananey a lenguahe tan agkayo segurado no antoy lenguahe to, igapo yo so tongtongan diad pangipanengneng ed apis na bokleta. Ibukay yo ed mapa a walad akindalem ya apis, ituro so inkasikayo tan say bansa a panaayaman yo, tan ibaga yo a labay yon naamtaan no taga iner so unabung tan no anto so lenguahe to. No naamtaan yo la so lenguahe to, nengnengen so kawalaan na satan diad table of contents, anapen so pahina, ipaimano ed unabung so mabakat iran letra ed tagey na pahina, tan ipaamta yo ed unabung a labay yon ipabasa ed sikato so mensahe. No abasa to la itan, mangiyopresi na tract ed lenguahe to odino ituro iray salitan amarkaan na gray, a mangibabagan labay yo so ompawil pian mangawit na publikasyon ed dilin lenguahe to. Insan yo ituro so salitan “ngaran ko”, tan ibaga yo so ngaran yo. Onsublay, ituro so “ngaran mo”, tan alagar yo so ebat na unabung. Iyuksoy yo so ipawil.
5. Anto so onsublay a gawaen tayo pian naasikaso so interes na saramay mansasalita na sananey a lenguahe?
5 Saray Uksoyan ed Panagpawil: Nepeg a panggunaetan so pamawil ed saramay angipanengneng na interes ed mensahe na Panarian, antokaman so lenguahe ra. No nanengneng tayo a say unabung et talagan interesado ed Dios tan ed Salita to, say Biblia, nepeg ya isulat so impormasyon ed Please Follow Up (S-43) form, tan iter itan a tampol ed sekretaryo na kongregasyon yo a mangipawit ed sangan opisina pian say interesado et nabisita na saramay mansasalitay lenguahe to. Insan ipawit na sangan opisina itan a form ed matukoy a grupo a mansasalita ed satan a lenguahe. Sano naawat da la itan, bisitaen dan tampol so interesado. Nayarin ikdan na sekretaryo so manangasikaso ed serbisyo na sananey a kopya na form pian amta to no itutuloy nin papawilen na grupo a manguusar na sananey a lenguahe imay interesado. Nepeg ya usaren labat iyan form no walay angipanengneng na interes.
6. Antoy kaukolan tayon gawaen no makaromog tayoy interesado a mansasalitay sananey a lenguahe?
6 Nayarin onlabas ni so pigaran simba manlapud samay impangisubmite na S-43 form tan say aktual a pakaromog na aturon manangipalapag ed samay interesado. Kanian, pian nabayuboan so interes na unabung, samay manangipalapag ya angisubmite na S-43 form so kaukolan ya ompawil ed sikato anggad onsabi imay manangipalapag ya imbaki na grupo a mansasalita na lenguahe to. Diad arum a kipapasen, nayarin igapo lay panagaral na Biblia ed samay interesado. Balet, legan na satan a panaon, panon a makala so manangipalapag na literatura parad samay interesado?
7. Anton probisyon so intarya pian makala itayo na literatura parad saramay naromog tayon mansasalita na sananey a lenguahe?
7 Literatura Parad Arum Iran Lenguahe: Agkaukolan a mangala iray kongregasyon na dakel a literatura parad arum iran lenguahe. Balet no naseguro na manangasikaso ed serbisyo ya ondarakel so interesado ed partikular a grupo na mansasalitay sananey a lenguahe, nayarin desidien toy mangala na dugarugan karakel na literatura ya usaren na saray manangipalapag parad satan a lenguahe. No anggapoy naalan literatura ed kongregasyon yo, sarag yoy man-order. Nayarin medyo mabayag so isabi na saray literaturan manlapud sananey a bansa. Kanian diad www.watchtower.org, walay probisyon a sarag yon i-print iray literatura. Dakel ditan iray publikasyon a nipatalos ed nilasus a lenguahe a nayarin nabasa na saray manangipalapag odino na saray interesadon totoo. Andi duaruwa a sayan probisyon et makanakana diad pamayuboy interes ya impanengneng na saramay mansasalitay sananey a lenguahe.
8. Anto so betang na kongregasyon diad pamayuboy interes na saramay mansasalitay sananey a lenguahe?
8 Betang na Kongregasyon: Ompan diad saray lugar ya ondarakel so bilang na saray manaayam a mansasalitay sananey a lenguahe et anggapo so asingger a kongregasyon a mangikokondukta na panagaral ed satan a lenguahe. Kanian nepeg tayo iran imbitaan ya onatendi ed saray pantitipon tayo. Say makaaron pangabrasa tan pangipanengneng na personal ya interes et managyat ed sikaran regular ya onatendi. Siempre diad gapo et medyo nababaingan ira lapud sananey so lenguahe tan kultura ra, ingen anggapo so makaamper ed panangaro na saray tuan Kristianos diad sankamundoan ya impanaagi na Saray Tasi nen Jehova. (Sof. 3:9; Juan 13:35) Kasin marunong kayo a mansalita na sananey a lenguahe? No labay yo tan maliket kayon mamawil ed saramay interesado a mansasalita na lenguahen sarag yon salitaen, ipangasin ipaamta iya ed sekretaryo na kongregasyon yo pian nipaamta iya ed sangan opisina. Makatulong iya ed sangan opisina sano manaanap ira na manangipalapag ya ompawil ed sakey ya angipanengneng na interes.
9. Kapigan a naikdan iray manangipalapag na instruksion parad sananey a lenguahe, tan panon iyan gawaen?
9 Instruksion Parad Sananey a Lenguahe: No ontutulong kayo ed saramay mansasalita na sananey a lenguahe, paseseg yo iran onatendi ed kongregasyon a manguusar na dilin lenguahe ra, no asingger labat so kawalaan na satan. Balet no aliwan posible itan, ompan desidien na arum a manangipalapag so manaral na satan a lenguahe pian mas lalo dan natulongan iramay interesado. No anggapoy asingger a kongregasyon tan ondarakel iray totoo a mansasalita na satan a lenguahe, nayarin mangiyuksoy so sangan opisina na klase pian naaral itan a lenguahe. No onia so nagawa, ipaamta na sangan opisina so pankaukolan ed sankaasinggeran a kongregasyon, a mangipaamta ed nagawan klase. Saramay manaral ed saratan a klase et nepeg a walaay gagalan onalis ed saray grupo odino kongregasyon pian makatulong ira ed iyaligwas na saratan a grupo.
10. Kapigan naporma so sakey a grupo a mansasalitay sananey a lenguahe, tan antoray basiyan na satan?
10 Pamormay Grupo: Pian makapangiletneg na grupo a mansasalitay sananey a lenguahe, nepeg a nadampot so apatiran kakaukolanen. (1) Nepeg a walaray talagan interesado a mansasalita ed satan a lenguahe. (2) Nepeg a walay melag a grupo na saray manangipalapag a makaamta odino manaaral na satan a lenguahe. (3) Nepeg a walay elder odino ministeryal a lingkor a mangidaulo tan mangikondukta na anggan maminsan ed sakey simba a panagaral. (4) Nepeg a mabulos iray ulop na mamatatken a manuporta ed satan a grupo. Sano akapet la irayan kakaukolanen, mansulat iray ulop na mamatatken ed sangan opisina pian ipaamta so kipapasen na grupo tan kerewen da so pangiyabuloy a say kongregasyon da et manuporta ed grupo a mansasalitay lenguahe na sananey a bansa. (Nengnengen so Organisado, p. 106-107.) Say elder o ministeryal a lingkor a mangidadaulo ed grupo et natawag a “manangasikaso na grupo” odino “lingkor na grupo.” Tan responsabilidad to met ya asikasoen so interon grupo.
11. Akin et sakey a pribilehyo so pankimey ed saray mansasalita na sananey a lenguahe a walad teritorya tayo?
11 Say pankimey ed saray mansasalita na sananey a lenguahe a walad teritorya tayo et makanan kabiangan na sankamundoan a panagpulong ya inletneg na Ehemplo tayon si Jesu-Kristo. Komon ta panggunaetan tayon gawaen so betang tayo tan nengnengen no panon a panmayegmegen nen Jehova iray bansa tan iloob ed organisasyon to iray mabli ed imaton to. (Ag. 2:7) Talagan makapnek so sigpot a pibiang tayo ed sayan kimey! Komon ta bendisyonan nen Jehova so nankakasakey a sagpot tayo pian napulongan iramay mansasalita na sananey a lenguahe diad teritorya tayo. Lawas tayon nononoten ya anggaman walaray babeng, bendisyonan nen Jehova iray sagpot tayo!—1 Cor. 3:6-9.