Ipanengneng nen Jehova ed Sikatayo no Panon so Pamilang ed Saray Agew Tayo
“Ibangat mo kami a mamilang na saray agew mi, pian makala kami na sakey a puso na kakabatan.”—SALMO 90:12.
1. Akin a matukoy a kerewen ed si Jehova ya ipanengneng to ed sikatayo no panon tayon ‘bilangen iray agew tayo’?
SI Jehova a Dios so Manamalsa tan Manangiter-Bilay tayo. (Salmo 36:9; Apocalipsis 4:11) Kanian anggapo la so walad sankaabigan a kipapasen a mangipanengneng ed sikatayo no panon so makabat a pangusar ed saray taon na bilay tayo. Matukoy sirin so inkerew na salmista ed Dios: “Ibangat mo kami a mamilang na saray agew mi, pian makala kami na sakey a puso na kakabatan.” (Salmo 90:12) Say koma-90 a Salmo, a pakaromogan tayo ed satan a kerew, so seguradon makanepegan na maalwar a pangikonsidera tayo. Balet, imanoen tayo nin unona so antikey a segek na sayan kanta a pinuyanan na Dios.
2. (a) Siopa so tinukoy ya anibukel ed Salmo 90, tan kapigan itan nisulat? (b) Panon a naapektaan na koma-90 a Salmo so panmoria tayo ed bilay?
2 Say superskripsion na Salmo 90, unong ed New World Translation, so anawag ed satan bilang “pikakasi nen Moises, say too na tuan Dios.” Lapud idadanet na sayan salmo so kinatikey na bilay na too, maseguron atibukel iya kayarin nibulos iray Israelita manlapud panangaripen na Ehipsio tan legan na 40-taon ya impanteyengteyeng da ed kalawakan, sanen anampot so matungangan kailalakan lapud impatey na nilibolibo. (Numeros 32:9-13) Antokaman so kipapasen, ipapanengneng na Salmo 90 ya antikey so bilay na ag-ayadyarin totoo. Malinew sirin a nepeg tayon usaren a makabat so mabli iran agew tayo.
3. Antoray manunan lugan na Salmo 90?
3 Si Jehova so ipaparungtal na Salmo 90, bersikulo 1 anggad 6 bilang say magnayon a panag-ayaman tayo. Ipapabitar na Sal 90 bersikulo 7 anggad 12 no anto so nakaukolan tayo pian nausar so maples ya onlalabas iran taon na bilay tayo diad paraan a makapaliket ed sikato. Tan singa nibalikas ed Sal 90 bersikulo 13 anggad 17, magunaet tayon pipirawaten so pakaawat na maaron kaabigan tan panamendisyon nen Jehova. Siempre, sayan salmo so agdirektan onaplika ed personal iran eksperiensya tayo bilang lingkor nen Jehova. Anggaman kuan, nepeg tayon ipapuso a mismo so masimoon iran balikas na satan. Usisaen tayo sirin a maong so Salmo 90 unong ed panmoria na saramay nidedika ed Dios.
Jehova—Say “Petepeteg a Panag-ayaman” Tayo
4-6. Panon a si Jehova et “petepeteg a panag-ayaman” tayo?
4 Oniaran salita so impangigapo na salmista: “O Jehova, sika so nagmaliw a petepeteg a panag-ayaman parad sikami leleg na saray amin a kailalakan. Sakbay a nianak a mismo iray kapalandeyan, odino sakbay mon pinawala so dalin tan say mabungan dalin a singa atekepan na pampapasakit, manlapu la’d panaon ya anggapoy geter anggad panaon ya anggapoy geter et Dios [odino, Madibinon Sakey] ka la.”—Salmo 90:1, 2, NW, paimano’d-leksab.
5 Parad sikatayo “say andi-anggaan a Dios,” a Jehova, so “petepeteg a panag-ayaman”—espiritual a salimbengan. (Roma 16:26) Maligen itayo lapud sikato so lawas akaparaan ya ontulong bilang “Dumerengel na pikakasi.” (Salmo 65:2, NW) Lapud iyiilalo tayo iray kapagaan tayo ed mangatatawen ya Ama tayo panamegley na inad-aro ton Anak, ‘say deen na Dios, a talonaan ton amin a pakatalos so manbantay ed kapusoan tayo tan saray nonot tayo.’—Filipos 4:6, 7; Mateo 6:9; Juan 14:6, 14.
6 Panggagayagaan tayo so espiritual a kaligenan lapud, diad piguratibon panagsalita, si Jehova so “petepeteg a panag-ayaman” tayo. Itatarya to met iray “silir”—a nayarin maapit a nisiglaot ed saray kongregasyon na totoo to—bilang espiritual a salimbengan, a ditan et makatulong na baleg iray maaron managpastol parad kaligenan tayo. (Isaias 26:20; 32:1, 2; Gawa 20:28, 29) Niarum ni, arum ed sikatayo so kabiangan ed saray pamilyan walaan na andukey lan rekord na serbisyo ed Dios tan personal da lan naeksperiensya a sikato so ‘petepeteg a panag-ayaman leleg na amin na saray kailalakan.’
7. Diad anton pantalos a “nianak” iray kapalandeyan tan apawala so dalin a singa atekepan na “pampapasakit”?
7 Wala lay Jehova sakbay a “nianak” iray kapalandeyan odino apawala so dalin a singa atekepan na “pampapasakit.” No moriaen ed punto de bista na too, mankaukolan na dakerakel a sagpot so pamawala ed sayan dalin diad amin na saray kabiangan, inkagawa, tan komplikado iran mekanismo na satan. Tan diad impangikuan na salmista a saray palandey so “nianak” tan say dalin so apawala a singa atekepan na “pampapasakit,” ipapanengneng to so pirmin panagrespeto ed kalaknab na kimey a nalalanor sanen pinalsa nen Jehova iratan a bengatla. Agta kaukolan ya ontan met so panagrespeto tan panamabli tayo ed saray ginawa na Manamalsa?
Si Jehova so Lawas Akaparaan ya Ontulong ed Sikatayo
8. Anto so kabaliksan na salitan si Jehova so Dios a “manlapu la’d panaon ya anggapoy geter anggad panaon ya anggapoy geter”?
8 Inkanta na salmista: “Manlapu la’d panaon ya anggapoy geter anggad panaon ya anggapoy geter et Dios ka la.” Say “panaon ya anggapoy geter” so nayarin ontukoy ed saray bengatlan walaan na panampotan balet ta agnapiho so kabayag na satan. (Exodo 31:16, 17; Hebreos 9:15) Balet, diad Salmo 90:2 tan ed arum niran pakabasaan ed Hebreon Kasulatan, say “panaon ya anggapoy geter” so mankabaliksan na “andi-angga.” (Eclesiastes 1:4) Agnarandan na kanonotan tayo no panon a say Dios et lawas lan wala. Ingen ta si Jehova so andian na gapoan tan panampotan. (Habacuc 1:12) Sikato so lawas mabilay tan akaparaan ya ontulong ed sikatayo.
9. Diad anto so angiparaan na salmista ed nilibon taon a kiwawala na too?
9 Say salmista so apuyanan a mangipara ed nilibon taon a kiwawala na too ed antiktikey a panaon diad imaton na magnayon a Manamalsa. Oniay insulat to sanen tinukoy to so Dios: “Sika ipaarap mo so too ed kadederal; tan kuan mo, Pawil kayo, sikayo ya anak na totoo. Ta say sanlibo a taotaon ed pakanengneng mo singa labat karuman no linmabas la, tan singa sankapuyat ed labi.”—Salmo 90:3, 4.
10. Panon ya ‘ipaarap na Dios so too ed kadederal’?
10 Ompatey so too, tan sikatoy ‘ipaarap na Dios ed kadederal.’ Salanti, ompawil so too ed “dabok,” a singa atemek, odino amekmek a dalin. Singa oniay ibabaga nen Jehova: ‘Ompawil ka ed dabok na dalin ya angalaan ed sika.’ (Genesis 2:7; 3:19) Saya so onaplika ed amin—mabiskeg odino maletey, mayaman odino mairap—lapud ta anggapo so ag-ayadyarin too a ‘makayari a manondon na agi to ed anggan anto a pangiparalanan, nisay nayarian to so mangiter ed Dios na sakey a panondon ed sikato, pian sikatoy manbilay ni lawas.’ (Salmo 49:6-9) Balet agaylay pisasalamat tayo ta ‘inter na Dios so bogbogtong ya Anak to, pian siopaman a manisia ed sikato et walaan na bilay ya andi-anggaan’!—Juan 3:16; Roma 6:23.
11. Akin a nibaga tayon say andukey a panaon tayo et antiktikey ed Dios?
11 Diad punto de bista nen Jehova, anggan say 969-años a si Matusalem so nambilay labat na kulang a sakey ya agew. (Genesis 5:27) Parad Dios, say sanlibon taon et singa labat karuman—sakey a peryodo na 24 ya oras—sano linmabas la itan. Sinalambit met na salmista a parad Dios say sanlibon taon et singa labat apat-oras a pambantay na sakey a managbantay diad sakey a kampamento legan na labi. (Uko-ukom 7:19) Malinew sirin a say andukey a panaon ed sikatayo et antiktikey ed magnayon a Dios a Jehova.
12. Panon ya ‘intakos’ na Dios iray totoo?
12 Misunian ed magnayon a kiwawala na Dios, say kaplesan a bilay na too so talagan antiktikey. Oniay kuan na salmista: “Sika ibatik [odino, itakos] mo ra a singa ikanas na sakey a delap; sikara so singa sankaugip: dia ed kabuasan singa ra dika ya ontubo. No kabuasan sikato ombulaslas, tan ontubo; dia ed kapisdem nataksing, et namagaan.” (Salmo 90:5, 6) Naimatonan nen Moises so nilibon Israelitas ya inatey ed kalawakan, ya ‘intakos’ na Dios a singa delap. Sayan parte na salmo so nipapatalos ya: “Intakos mo so totoo diad ugip na ipapatey.” (New International Version) Diad biek a dapag, say karukey na bilay na ag-ayadyarin totoo et “singa sankaugip” a maganggano—no ikompara ed sanlabi lambengat ya iyugip.
13. Panon itayon ‘singa dika,’ tan panon iyan mangapekta ed panag-isip tayo?
13 Singa itayo labat ‘dika ya ontubo ed kabuasan’ balet kasabi na labi et alenes la lapud mansasnit a petang na agew. On, maganggano labat so bilay tayo a singa dika a nalenes ed loob na sanagew. Agtayo sirin peperdien iyan mabmablin kayarian. Imbes, nepeg tayon anapen so panangigiya na Dios no panon so nepeg tayon pangusar ed nakekeraan niran taon ed sayan sistema na bengabengatla.
Si Jehova so Ontulong ed Sikatayo a ‘Mamilang ed Saray Agew Tayo’
14, 15. Say Salmo 90:7-9 so walaan na anton kasumpalan ed saray Israelita?
14 Oniay inyarum na salmista nipaakar ed Dios: “Naupot kami lapu ed sanok na linawam, tan lapu ed sanok mo nagulo kami. Sika inggaton mo so kasulitan mi ed arap mo, saray maamot a kasalanan mi inyan mo ra ed liwawa na lupam. Ta amin na saray agew mi linmabas ira ed peles na sanok mo: palabasen mi so taotaon mi a singa sakey a tagaumen tinongtong [“esaes,” NW].”—Salmo 90:7-9.
15 Saray matungangan Israelita so ‘naupot lapud sanok na Dios.’ Sikara so ‘agulo lapud sanok to,’ odino ‘atalagnaw ed insanok to.’ (New International Version) Arum et “nagba ra ed kalawakan” bilang resulta na panangukom na Dios. (1 Corinto 10:5) ‘Inggaton nen Jehova iray kasulitan da ed arapan to.’ Sikato so akikuentaan ed sikara lapud saray parungtalan a gawa ran mauges, anggan saray “maamot a kasalanan,” odino sinakoban iran kasalanan da, so walad ‘arap na liwawa na lupa to.’ (Uliran 15:3) Bilang puntirya na sanok na Dios, saray agnagbabawin Israelita so ‘amalabas ed saray taon da a singa esaes.’ Nipaakar ed satan, say antiktikey a bilay tayo et singa ingas ya ondalan ed saray bibil tayo a singa labat inyesaes.
16. No walaray maamot a mangaagamil na kasalanan, anto so nepeg dan gawaen?
16 No wala so siopaman ed sikatayo a maamot a mangaagamil na kasalanan, nayarin niyamot tayo itan a kondukta manlapud kaparan totoo diad loob na sakey a panaon. Balet say inyamot tayon mauges a gawa so walad ‘arap na maliwawan lupa nen Jehova,’ tan saray kiwas tayo so maneral ed maapit a relasyon tayo ed sikato. Pian napapawil tayo so relasyon ed si Jehova, nakaukolan ya onkerew tayoy panamerdona to, italirak iray pakakaluksoan tayo, tan maliket ya awaten so espiritual a tulong na saray Kristianon mamatatken. (Uliran 28:13; Santiago 5:14, 15) Agaylan magmaong itan nen say ‘palabasen tayoray taon tayo a singa esaes,’ a napepeligro so ilalo tayon andi-anggaan a bilay!
17. Anton karukey na bilay so kaslakan ed totoo diad inkalapagan, tan saray taon tayo so napno na anto?
17 Nipaakar ed karukey na bilay na ag-ayadyarin totoo, oniay inkuan na salmista: “Pitomplo a taon so dukey na pambilay mi, odino nisengeg ed kaksilan walomplo a taon; et say kapangtaan da mansagpot ni tan manermen; ta sikato so napaso ed magano, tan ontekkiab kami la.” (Salmo 90:10) Say karukey na bilay a 70 taon so kaslakan ed totoo diad inkalapagan, tan diad edad ya 85, impaimano nen Caleb so nikaduman biskeg to. Balet ta walaray nipuera, a singa si Aaron (123), Moises (120), tan si Josue (110). (Numeros 33:39; Deuteronomio 34:7; Josue 14:6, 10, 11; 24:29) Balet nipaakar ed saramay andian na pananisian kailalakan a pinmaway ed Ehipto, saray nirehistro manlapud 20 años a patagey so inatey ed loob na 40 a taon. (Numeros 14:29-34) Natan, diad dakel a bansa say inkalapagan a karukey na bilay na too so mansiasiansia ed loob na taon a sinalambit na salmista. Saray taon tayo so napno na “gonigon tan makapasakit iran bengatla.” Mapmaples iratan ya onlabas, ‘tan ontekkiab itayo la.’—Job 14:1, 2.
18, 19. (a) Anto so kabaliksan na ‘pamilang ed saray agew tayo ta pian nawalaan itayo na puso na kakabatan’? (b) Say pangagamil tayo ed kakabatan so mamakiwas ed sikatayo pian gawaen so anto?
18 Oniay ontumbok ya inkanta na salmista: “Siopa so makaamta na pakayari irap na linawam, salanti unong na itatakot ed sika, ontan so sanok mo? Kanian ibangat mo kami a mamilang na saray agew mi, pian makala kami na sakey a puso na kakabatan.” (Salmo 90:11, 12) Anggapo ed sikatayo so sigpot a makaamta no panon kabiskeg so isanok na Dios odino say kalaknab na isanok to, tan saya so nepeg a mamaaralem ed mapagalang a takot tayo ed si Jehova. Diad tua, satan so nepeg a mamakiwas ed sikatayo pian kerewen ed sikato ‘no panon tayon bilangen iray agew tayo ta pian nawalaan itayo na puso na kakabatan.’
19 Saray salita na salmista so pikakasi a si Jehova so mangibangat ed totoo to no panon so pangagamil na kakabatan diad pamabli tan pangusar ed nakekeraan niran agew da diad naabobonan na Dios a paraan. Say karukey na bilay a 70 taon so onnatnat na manga 25,500 ya agew. Balet, antokaman so edad tayo, ‘agtayo amta no anto so bilay tayo nabuas, ta sikatayo et sengaw ya ompatnag a maganggano insan nabalang.’ (Santiago 4:13-15) Lapud say ‘panaon tan ag-ilaloan a nagawa so onsabi ed sikatayon amin,’ agtayo nibaga no kaunongan ni karukey so pambilay tayo. Ipikasi tayo sirin a nawalaan itayo la natan na kakabatan a mangarap ed saray subok, tratoen so arum ed manepeg a paraan, tan gawaen so anggaay nayarian tayo diad serbisyo ed si Jehova natan la! (Eclesiastes 9:11; Santiago 1:5-8) Igigiya itayo nen Jehova panamegley na Salita to, say espiritu to, tan say organisasyon to. (Mateo 24:45-47; 1 Corinto 2:10; 2 Timoteo 3:16, 17) Say pangagamil ed kakabatan so mamakiwas ed sikatayo ya ‘anapen nin unona so Panarian na Dios’ tan usaren iray agew tayo ed paraan a mangigloria ed si Jehova tan mamaliket ed puso to. (Mateo 6:25-33; Uliran 27:11) Siempre, say sigpot-puson pandayew ed sikato so agmangekal ed amin a problema tayo, balet maseguron manresulta itan ed pirmin liket.
Say Panamendisyon nen Jehova so Mangitarok ed Sikatayo na Gayaga
20. (a) Diad anton dalan a ‘pakepaen na Dios so sanok to’? (b) Panon so pideneng nen Jehova ed sikatayo no nankasalanan itayo na ambelat balet ta impanengneng tayo so tuan panagbabawi?
20 Agaylan abig no makapanliket itayo ed interon bilay tayo! Nipaakar ed saya, oniay inkerew nen Moises: “Pawil ka ed sikami, O Jehova; panon kabayag? Tan pakepam so sanok mo ed saray ariripen mo. O peselen mo kami ed kabuasan na panangasim [odino, “matoor ya aro”], pian makapanggayaga kami tan manliket kami ed amin na saray agew mi.” (Salmo 90:13, 14, NW; paimano’d leksab) Agnalilingo so Dios. Anggaman kuan, ‘pakepaen’ tan ‘benegan’ to so sanok to tan pati say pangipaakseb to ed dusa sano say pasakbay to nipaakar ed ontan a kiwas so amawala na pananguman ed awawey tan kondukta na saray magbabawin managgaway-mauges. (Deuteronomio 13:17) Kanian anggano akapankasalanan itayo na ambelat balet ta impatnag tayo so tuan panagbabawi, ‘peselen itayo nen Jehova na panangasi to,’ tan nawalaan itayo na rason a ‘manggayaga.’ (Salmo 32:1-5) Tan diad pangegemtan ed matunong a kurang, nalikna tayo so matoor ya aro na Dios ed sikatayo tan ‘makapanggayaga itayo ed amin na saray agew tayo’—on, diad interon bilay tayo.
21. Diad saray salitan nikurit ed Salmo 90:15, 16, anto so nayarin ikekerew nen Moises?
21 Oniay masimoon ya impikasi na salmista: “Paliket mo kami a singa say dukey na saray agew ya impamaermen mo ed sikami, tan saray taotaon ya akanengnengan mi mauges. Paparungtalen mo so gawam ed saray ariripen mo, tan say gloriam paparungtalen mo ed saray anak da.” (Salmo 90:15, 16) Nayarin kekerewen nen Moises a bendisyonan na Dios so Israel tekep na panliket a misimbangan, odino manbayag na singa saray agew na impanirap da tan saray taon legan na impanagmak day kalamidad. Kinerew to a say ‘gawa’ na panamendisyon na Dios ed saray Israelita so ompatnag ed saray lingkor To tan say karlangan To so nipatnag ed saray ananak, odino ilalak da. Matukoy so pangipikasi tayo a saray bendisyon so nipalabo ed matulok a katooan diad insipan na Dios a balon mundo.—2 Pedro 3:13.
22. Unong ed Salmo 90:17, anto so matukoy ya ipikasi tayo?
22 Anampot so Salmo 90 ed onian kerew: “Say kalimgasan komon na Katawan a Dios mi wala komon ed sikami; tan iligen mo so gawa na limalima mi ed sikami: on, say gawa na limalima mi iligen mo pa.” (Salmo 90:17) Ipapanengneng na sarayan salita a matukoy ya ipikasi tayo ed Dios a bendisyonan toray sagpot tayon manlingkor ed sikato. Bilang alanaan iran Kristiano odino say kakaiba ra, say “arum a karnero,” panliketan tayo so pansiansia ed sikatayo na ‘kalimgasan nen Jehova.’ (Juan 10:16) Agaylan liket tayo ta say Dios et ‘pinaligen to so gawa na limalima tayo’ bilang manangiproklama na Panarian tan ed arum niran paraan!
Komon ta Mantultuloy Tayon Bilangen Iray Agew Tayo
23, 24. Panon tayon nagunggonaan ed pandalepdep ed koma-90 a Salmo?
23 Say pandalepdep ed koma-90 a Salmo so nepeg a mamaelet ed pandedependi tayo ed si Jehova, say “petepeteg a panag-ayaman” tayo. Diad panmolimoli tayo ed saray salita na satan nipaakar ed kinatikey na bilay, kaukolan a lalo itayon magmaliw a sikakabat ed pankaukolan na panangigiya na Dios diad pamilang ed saray agew tayo. Tan no manpeleng itayo ed panggugunaet tan pangaagamil ed maridios a kakabatan, seguradon nagamoran tayo so maaron-panangasi tan panamendisyon nen Jehova.
24 Mantultuloy ya ipanengneng nen Jehova ed sikatayo no panon so pamilang ed saray agew tayo. Tan no ontulok itayo ed panangibangat to, makapantultuloy itayon makapanbilang ed saray agew tayo ed andi-anggaan. (Juan 17:3) Anggaman ontan, no talagan pipirawaten tayo so bilay ya andi-anggaan, si Jehova so nepeg a magmaliw a salimbengan tayo. (Judas 20, 21) Unong a naimano tayo ed onggendan ya artikulo, sayan punto so lalon nipalinew diad makapaseseg iran salita na koma-91 a Salmo.
Panon Yon Ebatan?
• Panon a si Jehova so “petepeteg a panag-ayaman” tayo?
• Akin a nibaga tayon si Jehova so lawas akaparaan ya ontulong ed sikatayo?
• Panon itayon tulongan nen Jehova a ‘mamilang ed saray agew tayo’?
• Anto so ontulong ed sikatayo pian ‘makapanggayaga ed amin na saray agew tayo’?
[Litrato ed pahina 10]
Si Jehova et Dios la ‘sakbay a nianak iray kapalandeyan’
[Litrato ed pahina 12]
Diad punto de bista nen Jehova, say 969 años a si Matusalem so nambilay lambengat na kulang a sanagew
[Saray litrato ed pahina 14]
‘Pinaligen nen Jehova so gawa na saray lima tayo’