Akin a Kulkulang so Panaon?

PANAON. Nayarin nairapan tayon ukeran ya eksakto iyan salita, balet seguradon amta tayon ag-itayon balot nawalaay magenap a panaon. Amta tayo met a maples so ilalabas na panaon. Diad tua, mebetbet tayon iyeey-ey, “Agaylay peles na ilalabas na panaon.”

Anggaman kuan, mapatnag a mas susto so Ingles a manag-anlong a si Austin Dobson sanen inkuanto nen 1877: “Onlalabas so panaon, kuan yo? Andi! Mansiasiansia ni so Panaon, sikatayo so onlalabas.” Nanlapulad impatey to nen 1921, naandi lay Dobson ed loob na ngalngali 80 taon; tuloytuloy ni balet so panaon.

Inkadaakan na Panaon

Nipaakar ed Manamalsay katooan, onia so ibabaga na Biblia ed sikatayo: “Sanen agni ra apabutay so palpalandey, odino sanen ginawam so dalin tan say mundo, salanti manlapu ed andi-anggaan ya angga ed andi-anggaan, Dios ka la.” (Salmo 90:2) Odino unong ed impangipatalos na The New Jerusalem Bible ed satan, “manlapud inkamagnayon angga ed inkamagnayon et Dios ka la.” Kanian mantultuloy so panaon a singa say Dios a mismo so mantultuloy​—ed ando lan ando!

Midumaan a tuloy ed Dios, a walad pakayari toy inkamagnayon na panaon, onia so nabasa tayo nipaakar ed totoo: “Ta amin na saray agew mi linmabas ira ed peles na sanok mo: palabasen mi so taotaon mi a singa sakey a tagaumen a tinongtong. Pitomplo a taon so dukey na pambilay mi, odino nisengeg ed kaksilan walomplo a taon; et say kapangtaan da mansagpot ni tan manermen; ta sikato so napaso ed magano, tan ontekkiab kami la.”​—Salmo 90:9, 10.

Akin balet ya antiktikey so bilay natan, anta malinlinew ya ibabangat na Biblia a gagala na Dios a manbilay ya ando lan ando so too? (Genesis 1:27, 28; Salmo 37:29) Imbes a mantultuloy a dukey na bilay unong ed ginagala na Dios, akin a say karaklan a totoo et manbilay labat na kulang a 30,000 ya agew, diad silong na sankarakpan iran kipapasen? Akin a kulkulang so panaon na totoo? Siopa odino antoy makasengeg ed sayan makapaermen a situasyon? Iter na Biblia so malinew tan makapenek iran ebat.a

Lawas Onkukulang so Panaon

Pekderan na saray maedad la a diad agano ni iran dekada et say kurang na kabibilay so pinmeles. Impabitar na sakey a dyurnalista, si Dr. Sybille Fritsch, a legan na apalabas a 200 taon, say trabaho ed loob na sakey simba so inmabeba manlapud 80 anggad 38 oras, “ingen ag-iya amatunda ed panrereklamo tayo nipaakar ed kakulangay panaon.” Impalinew to: “Anggapoy magenap a panaon; mabalor so panaon; say pantalikarkar parad panaon et aliling toy panab-abot lay linawa; okupadon maong a bilay.”

Saray balon imbento so amawala na saray pankanawnawa tan posibilidad ya agbalot naisip na akadkauna iran kailalakan. Balet no babaleg so posibilidad ed pakapibiang ed dakerakel ya aktibidad, babaleg met so pakadismayaan ed inkakulang na panaon a panggawa ed saratan. Natan, diad dakel a parti na mundo, okupadon tuloy so eskedyul na totoo, a manaapuran mangisumpal ed sakey a deadline pian isublay so sananey. Nepeg ya onsipot so ama ed 7:00 na kabuasan pian mantrabaho, nepeg ya ipatnubang na ina iray ugugaw diad eskuelaan ed 8:30 na kabuasan, say laki so manpadoktor ed 9:40 na kabuasan, tan amin tayo so nepeg a manparaan parad importantin miting ed 7:30 na labi. Diad pangisasambot ed sakey a deadline kayari na sananey, ngalngali anggapo lay panaon parad dinanman a panrelaksan. Tan manreklamo itayo ed inagew-agew a makapasawan rotina tan ed makapakesaw a katataranta.

Agtayo Bukbukor so Walaan na Kulkulang a Panaon

Say Kabusol na Dios, si Satanas a Diablo, say sakey a lapud inkasilib to et nansumpal ed intikey na bilay na katooan, so biktima natan na dilin inkarelmeng to. (Ikompara so Galacia 6:7, 8.) Nipaakar ed inkianak na Mesianikon Panarian ed tawen, impailalo ed sikatayo na Apocalipsis 12:12 sanen inkuanto: “Kanian manliket kayo, O katawenan, tan sikayon manaayam ed sikara. Kasi lara so dalin tan dayat: ta say Diablo inmakseb ed sikayo, a wala ed baleg a sanok to, ya amta to a daiset la so panaon to.”

Unong ed napanmatalkan a kronolohiya na Biblia tan say pakakasumpal na propesiyay Biblia, manbibilay itayo la natan ed pansampot na satan a ‘daiset a panaon.’ Agaylan gayaga so pakapikabat a say panaon nen Satanas et maganggano lan naupot! Bektan nikalinsurong la, saray matulok a totoo so nipawil ed inkayadyari, tan nadampot da so andi-anggaan a bilay a ginagala nen Jehova parad sikara sanen gapo ni. (Apocalipsis 21:1-4) Aliwa lan problema ed satan so inkakulang na panaon.

Kasin naisip mo no antoy kabaliksan na pambilay ya andi-anggaan​—pambilay ya ando lan ando? Agka lan balot naaburido makasengeg ed saray bengatla a kaukolan mo nin ipanabuas. No kaukolan moy dakel a panaon, wala ni nabuas, odino ontumbok a simba, odino ontumbok a taon​—diad tua, sakey ya inkamagnayon a ninanatnat ed sika!

Usaren a Makabat so Panaon Tayo Natan

Diad pakakamorian limitado lay panaon to a mangimpluensia ed totoo, panggugunaetan nen Satanas a pansiansiaen ya okupado so totoo ta pian anggapoy panaon dan ontalineng ed maong a balita nipaakar ed niletneg lan Panarian na Dios. Sirin, maabig no talinengen tayo so simbawa na Dios: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal; ya anamoten yo so panaon, ta saray agew sikara so mauges. Kanian aliwa kayo komon a makulangkulang, noag ingen talosan yo no anto so linawa na Katawan.”​—Efeso 5:15-17.

Agaylan makana a makabat tayon usaren so panaon tayo parad saray bengatlan sankaimportantian imbes a daraken itan ed andi-kakanaan iran gegemtan ya agmangitarok na magnayon a gungguna! Nepeg tayon bayuboan so mipadparan awawey nen Moises sanen inmey-ey ed si Jehova ed oniaran impapuson salita: “Ibangat mo kami a mamilang na saray agew mi, pian makala kami na sakey a puso na kakabatan.”​—Salmo 90:12.

Tua, amin ed mundo natan so okupado. Anggaman kuan, pasesegen kan maong na Tastasi nen Jehova a mangusar na arum ed mablin panaon mo pian manaral nipaakar ed kakaukolanen na Dios parad pakagamor na andi-anggaan a bilay ed silong na uley na Panarian to. Say sakey oras ed sakey simba ya usaren ed sistematikon panagaral na Biblia, ‘panebek ed no anto so linawa nen Jehova,’ so mamasarag ed sikan personal a naeksperiensiam so kasumpalan na sarayan salita: “Onarawi ka ed mauges tan manggawa ka na maong; et manbilay ka lawas. Say matunong tawiren to so dalin tan manayam diman lawas.”​—Salmo 37:27, 29.

[Paimano ed leksab]