Tepetepet Manlapud Saray Managbasa
No nambikkel so sakey a too, nayari kasin manpaliwawa ed ponpon so sakey a Kristianon ministro?
Kaukolan a mandesidin bukor so kada Kristianon ministro tekep na malinis a konsiensia, no kasin nayarian toy manpaliwawa ed ponpon na sakey ya ibabagan nambikkel. Sano mandedesisyon, nepeg ton ikonsidera iray onggendan a tepet: Panon a momoriaen nen Jehova so panagbikkel? Peteg kasin say inatey so amatey ed sikaton dili? Kasin say deperensya ed mental odino emosyonal so amakiwas ed impanbikkel? Panon a momoriaen so panagbikkel ed lugar yo?
Bilang Kristianos, interesado itayo no panon a momoriaen nen Jehova so panagbikkel. Parad si Jehova, say bilay na too so mabli tan sagrado. (Genesis 9:5; Salmo 36:9) Say ginagalan pamatey ed sarili et dilin-panamatey, kanian satan so agmakapaliket ed imaton na Dios. (Exodo 20:13; 1 Juan 3:15) Kasin satan a katuaan so mangamper ed pangiter na paliwawa ed ponpon na sakey a biktima na panagbikkel?
Konsideraen so agawa ed kinen Arin Saul na Israel. Sanen amoria ton agla makaliktar ed unor a pibabakal sumpad saray Filisteo, “si Saul inala to so kampilan to, tan sikato so tinakbaan to,” imbes ya inabuloyan ton say kabusol to so mangabil ed sikato. Sanen aromog na saray Filisteo so bangkay to, imbitin da itan ed bakor na syudad na Bet-san. Et nen akabatan na saray manaayam ed Jabes-galaad so ginawa na saray Filisteo, inala ra so bangkay tan pinoolan da itan. Insan da inala iray pukel to tan inkotkot da. Sikara ni ingen so nan-ayunal ed loob na pitoy-agew, sakey a panag-ermen a kustombre diad limog na saray Israelita. (1 Samuel 31:4, 8-13; Genesis 50:10) Sanen akabatan nen David, a nilanaan nen Jehova, so ginawa na saray manaayam ed Jabes-galaad, oniay inkuanto: “Bendito kayo komon ed Jehova, sikayo ya impatnag yo so saya a kaabigan ed katawan yo, si Saul, tan sikato so imponpon yo. Et natan si Jehova ipatnag to so maong a linawa tan katuaan ed sikayo.” (2 Samuel 2:5, 6) Ag-impatnag na Biblia a saray manaayam ed Jabes-galaad so kinondena lapud impangagamil da ed say ipapasen a ritual ed ponpon nen Arin Saul. Nikompara itan ed kipapasen na saramay agniponpon lapud mauges a ginawa ra. (Jeremias 25:32, 33) Nayarin ikonsidera na sakey a Kristianon ministro so salaysay nipaakar ed si Saul diad pandeside no kasin nayarian to so manpaliwawa ed ponpon na sakey a biktima na panagbikkel.
Nayarin labayen met na ministro ya ikonsidera so gagala na pampaliwawa ed ponpon. Aliwan singa saramay totoon manisia ed imortalidad na kamarerwa, saray Tastasi nen Jehova so agmangipoponpon tekep na lingon ideya ya ibagan say inatey so linma la ed sananey a mundo. Imbes a say inatey so nagunggonaan, say manunan gagala na paliwawa ed ponpon et pian ligliwaen iramay ataynan tan mangiter na pantasi ed saramay akiponpon nipaakar kipapasen na inaatey. (Eclesiastes 9:5, 10; 2 Corinto 1:3-5) Sakey nin importantin rason na pampaliwawa ed ponpon et pian tulongan so amin ya akiponpon a mandalepdep ed kinatikey na bilay. (Eclesiastes 7:2) Kasin onkana irayan gagala diad pampaliwawa ed ponpon na say biktima na panagbikkel?
Tua a nayarin liknaen na arum a ginagalan pinatey na too so inkasikato, a kabat ton sigpot a sikatoy mankakasalanan ed si Jehova. Balet kasin posiblin naynay so pamekder ed ontan a liknaan? Kasin satan so nayarin ginawa a bengatbengat? Arum ya analin manbikkel so nagbabawi tan agda la intuloy itan. Agla makapambabawi so sakey a too ed ginawa to sano inatey la.
Sananey nin importantin sengegan et lapud saray deperensya ed mental tan emosyonal so nalalanor ed dakel iran panagbikkel. Sikaraya so peteg a natawag a biktima na panagbikkel. Unong ed pigaran estatistika, 90 porsiento ed saraman so manbibikkel et walaan na probleman nipaakar ed mental, emosyonal, tan inkaadik ed druga. Kasin perdonaen nen Jehova so dilin-panamatey a ginawa na totoon wala’d ontan a kipapasen ed mental? Agtayo nayarian so mangukom no kasin say inatey et akagawa na agnaperdonan kasalanan diad imaton nen Jehova. Nayarin usisaen na Kristianon ministro iray sirkumstansya tan medikal a rekord na inatey sano kokonsideraen to no kasin manpaliwawa ed ponpon na say biktima na panagbikkel.
Wala ni sakey ya aspekto ya ikonsidera: Panon a momoriaen na totoo ed komunidad so panagbikkel tan say impatey na too? Saya so nagkalalon imanoen na saray mamatatken ya interesado ed reputasyon na lokal a kongregasyon na saray Tastasi nen Jehova. Mandependi ed inkalapagan ya awawey nipaakar ed panagbikkel diad lugar yo, tan nagkalautla ed onian kaso, nayarin lablabayen na mamatatken so agpampaliwawa ed ponpon diad publiko odino manggawa ed satan diad Kingdom Hall.
Anggaman ontan, no akerew ed sakey a Kristianon ministro a mangidaulo ed ponpon, nayarin liknaen ton diad personal a pamaakaran et nayarian ton gawaen itan. No denesidi ton gawaen itan, nepeg a sikatoy maalwar ya agmangibabalikas na inkasegurado nipaakar ed no kasin posibli so kioli. Si Jehova labat so makaamta no walay ilalo ed arapen na inatey, tan anggapoy makapangibaga no kasin say inatey so napaoli odino andi. Nayarin iyapasakey na ministro so paliwawa to ed saray katuaan na Biblia nipaakar ed ipapatey tan mangiter na ligliwa ed saray ataynan.