Tepetepet Manlapud Saray Managbasa
Akin a sasaglawien na Isaias 30:21 a say salita nen Jehova so manlalapu ed “beneg mo,” bangta say akaunan bersikulo so mangipapasen ed si Jehova ed arap diad impangikuan a, ‘Saray matam nanengneng da naani so Manangibangat ed sika’?
Oniay nabasa ed Isaias 30:20, 21: ‘Agniyamot anggan kapigan so Manangibangat ed sika, noag ingen saray matam nanengneng da naani so Manangibangat ed sika. Et saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato; sano onarap kayo ed nikawanan, tan sano onarap kayo ed nikawigi.’
No ipasen a literal so teksto, nanenengneng na managbasa si Jehova, say Engranden Managbangat, diad arap to balet narerengel toy boses To ed beneg. Bangbalet, saratan a salita so piguratibo tan nepeg a talosan ya ontan.
Say ipapanonot na bersikulo 20 a piguratibon panagsalita et samay nipaakar ed lingkor a manseserbi ed katawan to, a lawas akaparaan ya ontulok ed saray bilin to. Singa say lingkor a maobserba ed andawes na lima na katawan to pian natebek so labay ton pagawa, saray totoo nen Jehova natan so maalwar a mangiimano ed tuloytuloy a nibase ed Biblia a panangibangat ya ipapagamor nen Jehova panamegley na mangaraldalin ya organisasyon to. (Salmo 123:1, 2) On, onkikiwas ira unong ed panangidirehi to, alerto ed antokaman ya ipatnag nen Jehova panamegley na “matoor tan makabat ya aripen.”—Mateo 24:45-47.
Anto sirin so salita a narerengel na saray lingkor to a manlalapud beneg? Makatunongan so pangibaga a say boses a manlalapu ed beneg et say boses na Dios ya imbesngaw to ed apalabas, sikatoy mansasalita panamegley na nisulat a Salita to unong a nipapalinew panamegley na ‘napanmatalkan a managpaga’ to. (Lucas 12:42) Narerengel na saray lingkor na Dios natan so boses to panamegley na maseet a panagaral tan pangiyaaplika ra ed saray prinsipyo ed Biblia diad bilay da diad tulong na saray publikasyon ya imparaan na “matoor tan makabat ya aripen,” say ‘napanmatalkan a managpaga.’ Diad panmamatalek tan diad pagmamaliw dan alerto ed nipanpanaon a panangiwanwan ya itatarya na Engranden Managbangat tan diad panagaral ed Salita na Dios, ya insulat pigaran siglo lay apalabas, saray lingkor to so piguratibon makakanengneng ed sikato ed arapan da tan makakadngel ed boses to diad beneg da.—Roma 15:4.