Konsideraen so Salita nen Jehova ya Agew-agew!
1 Kada agew et nipapaarap iray balon angat ed pananisiam. Nayarin lawas kan papaskaren na taga paway a kabat mo a man-date. Labay na managbangat mon gegemtanen mo so sekular a karera, odino labay kan pantrabahoen na amom na andukdukey ya oras. Nayarin onkakapuy lay laman mo. Anggaman onsabi ed sika iratan a subok, agmo bukbukor. Akaparaan si Jehova a mangiter ed sika na nakaukolan a kakabatan pian natalonaan iratan. Say pangonsidera ed teksto ed Biblia tan saray komento dia ed Usisaen so Kasulatan et sakey a paraan a regular a pakagamoran mo ed Salita nen Jehova. Kasin aanamoten mo iyan probisyon?
2 Niwala so Tulong: Dedeskribien na Isaias 30:20 si Jehova bilang say ‘Baleg a Managbangat’ a tuplegan na totoo na Dios parad tulong. Iter to ed sika so talagan nakaukolan mo pian arapen iray angat ed pananisiam. Panon? Ipapaliwawa na ontumbok a bersikulo: “Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato.” Natan et ipapasabi nen Jehova so “salita” to panamegley na Kasulatan tan saray publikasyon na ‘matoor ya aripen.’ (Mat. 24:45) Wala so daakan a kakabatan dia ed apalabas iran artikulo na Panag-Bantayan, a misiglaotan ed amin lawarin aspektoy kabibilay bilang Kristiano. Say panrepaso ed saray inaon diad Usisaen so Kasulatan so makatulong ed sikan makapangipaalagey na kamalir na pikakabat a makanakana diad pangarap ed amin a nengneng na subok.—Isa. 48:17.
3 Iyeskedyul Itan: Anggaman dakel a gawa ed kabuasan, inlugaran na sakey ya ina so pambasa tan paningbat ed teksto tan saray komento ed anak ton laki leleg a manaalmusal. Saratan a salita tekep na pikakasi so unor a narengel na anak to kada kabuasan sakbay ya onla’d eskuelaan. Sikatoy apabiskeg lapud saratan pian resistian iray pakaingganyo ed sekso, pian agmikompromiso nipaakar ed nasyonalismo, tan pian makpel a mantasi ed saray estudyante tan ed saray managbangat. Anggaman sikato labat so Tasi ed eskuelaan, agton balot aliknan manbukbukor.
4 Manilalo ed si Jehova tan ed Salita to parad panangiwanwan tan panangigiya. No gawaen mo itan, sikatoy magmaliw a tudtua ed sika, a singa napanpiyaan a kaaro. Ompanon ka ed sikato ya agew-agew! Kaiba iray minilyon ni ed sankamundoan ya inagew-agew ya ontutupleg ed Salitay Dios, naimanom komon a saray matam so magmaliw ‘iran mata a makanengneng ed Baleg a Managbangat mo.’