Akaparaan Ka ta lan Mantasi Diad Eskuelaan?
1. Antoray balon pankanawnawa yo legay paneeskuela yo?
1 Balanglan maneeskuela ka la odino onggapo ka ni labat, sikayo ran kalangweran a Kristiano so nipaarap ed saray balon angat tan desdes. Balet walaan kayo met na balo iran pankanawnawa pian ‘mantasi ed katuaan.’ (Juan 18:37) Kasin akaparaan kayo lan maong a mantasi?
2. Antoran panangipasal so ontulong ed sika pian arapen iray angat a naabet mo ed eskuelaan?
2 Pian natulongan kan ontalona ed amin ya aspekto na bilay, akaawat ka la na panangipasal manlapud si Jehova, diad saray atateng mo, tan ed matoor tan makabat ya aripen. (Uli. 1:8; 6:20; 23:23-25; Efe. 6:1-4; 2 Tim. 3:16, 17) Tekep na kipapasal mo la ed saray kakaukolanen na Dios tan amtam la ray angat ya arapen mo ed eskuelaan kada agew, iparaan moy inkasikan mantasi. (Uli. 22:3) Nonot mon maong so instruksion tan saray makatulong a Makasulatan iran suhestion a naromog ed duaran tomo na Young People Ask ontan met ed mitukoyan iran artikulo a regular a nipapalapag ed Awake!
3. Diad antoran paraan a makapantasi ka diad eskuelaan?
3 Nanduruman paraan so pakapantasim diad eskuelaan. No naoobserbaan na arum so desentin panagkawes tan panag-ayos mo, say ugali tan panagsalitam, say inkamarespetom ed saray kaklasem tan mamaestram, tan anggan saray gradom, tan nalikas dan maabig so impamabaleg ed sika, nayarin itepet na arum, “Akin a nidumaduma ka?” (Mal. 3:18; Juan 15:19) Pankanawnawam la iyan makapantasi tan ipaliwawam so talindeg mo. (1 Tim. 2:9, 10) Legan na paneeskuelam, nayarin nipaarap ka ed saray angat a singa say nasyonalistiko iran seremonya tan holiday. No tepetan ka no akin ya agka mibibiang, kasin ibagam labat a, “Sebel itan ed relihyon ko; Sakey ak a Tasi nen Jehova,” odino, anamoten mo iyan pankanawnawa pian mantasi nipaakar ed maaron Amam, si Jehova? Say maabig a panagparaan diad panangiwanwan nen Jehova so ontulong ed sikan akaparaan a mangiter na maabig a pantasi ed saray mamaestram, kaeskuelaan mo, tan arum ni.—1 Ped. 3:15.
4. Akin a matalek kan ontalona ka ed pantasi?
4 Anggaman medyo natatakot ka ed angat a mantasi diad eskuelaan, nonot mo a napaliket moy Jehova no panggunaetan mo itan. Miliket kami ed sika diad saray pankanawnawam a makapantasi ed arum diad eskuelaan. Kanian, manpakpel tan manparaan a mantasi legan na paneeskuelam!