Kasin Akaparaan Iray Anak Yo?
1. Akin et kaukolan a manparaan iray maneeskuela?
1 Ginmapo lamet so sakey taon a paneskuela na saray ugugaw. Seguradon wala lamet iray naeksperiensya ran subok tan desdes. Pankanawnawa da met a ‘tasian so katuaan.’ (Juan 18:37) Kasin akaparaan ira?
2. Pian akaparaan iray anak yo, antoy nepeg dan naamtaan?
2 Talaga kasin natatalosan na ananak yo no antoy labay ya ibaga na pibibiang ed saray nasyonalistikon seremonya tan paganon selebrasyon tan no akin et mauges so pibiang ed saratan? Akaparaan la ra kasi ed saray desdes a singa say pangala na atagey a kurso, pidi-date, tan pan-inum na alak odino pan-druga? Basta da labat kasin ibaga ya bawal iratan ed relihyon da, odino amta ran ipaliwawa so sisisiaen da?—1 Ped. 3:15.
3. Antoy gawaen na saray atateng ed Panagdayew na Pamilya pian niparaan iray anak da?
3 Usaren so Panagdayew na Pamilya ed Labi: Siempre, legan na interon taon na paneeskuela ra, nayari yon pantongtongan iray probleman naaabet na ananak yo. Balet, no masakbay yo lan pantongtongan iratan, nawalaan iray kompiyansa ed sarili ra. Agta maabig no usaren yoy sakey odino duaran eskedyul na Panagdayew na Pamilya yo parad saratan? Nayari yon tepetan iray anak yo no anto ray problema rad eskuelaan. Saramay apantongtongan yo nen katantaon et nayari yon repasoen natan ta mas baleg la ra tan mas dakel lay amta ra. (Sal. 119:95) Sarag yoy mangilaktip na panagpraktis, ya onakto kayon maestro, guidance counselor, odino kaklase. Ibangat yo ray anak yon usaren so Biblia tan arum ni ran libro a singa say Reasoning tan Young People Ask sano onebat. Say gagawaen na sakey ya ateng ed kada gapo na pan-eskuela et ipapasal to ray anak to no panon dan ibaga ed saray balo ran maestra ya Tasi nen Jehova ira.—Nengnengen so Say Panag-bantayan, Disyembre 15, 2010, pahina 3-5.
4. Antoy nepeg a gawaen na saray makabat ya atateng?
4 Legan na sarayan kaunoran ya agew, lalon “mair-irap” iray subok a nadadalan na saray Kristianon kalangweran. (2 Tim. 3:1) Kanian, iisipen lan unona na saray makabat ya atateng no antoray posiblin naabet da. (Uli. 22:3) Diad sayan taon na pan-eskuela na ananak yo, gawa yoy anggaay nayarian yon iparaan ira.