Manpakpel Ka
1. Kapigan kaukolan a manpakpel iray estudyante, tan akin?
1 Kasin natatakot kan manpulong ed eskuelaan ta iisipen mon ompan balawen da ka? Talagan kaukolay pakpel pian makapantasi, lalo la no mabaing ka. Antam no antoy makatulong ed sika?
2. No nipaakar ed panagpulong ed eskuelaan, akin et kaukolay pakatebek?
2 Pakatebek: Anggaman nayarim a gawaen ya personal a teritoryam so eskuelaan, agto labay ya ibagan kaukolan mon pulongan so amin a wadtan a singa gagawaen mo ed panagkabkaabungan. Kaukolan ya makatebek ka pian antam no kapigan ka mansalita. (Ecl. 3:1, 7) Nayarin pankanawnawam ya ibagay pananisiam legan na discussion odino sano walay asainmin mod eskuelaan. Odino ompan tepetan ka na kaklasem no akin et agka mibibiang ed sakey ya selebrasyon. Diad gapo ni labat na school year, saray arum ya kalangweran et ipapaamta rad mamaestra ra a Tasi nen Jehova ira tan iikdan da ra na literatura a mangipapaliwawad pananisia tayo. Tan saray arum et mangititilak na literatura diad desk da pian mantepet iray kaklase da nipaakar ed satan.
3. Antoy gawaen mo pian akaparaan kan manpulong ed eskuelaan?
3 Panagparaan: No manparaan ka, mas walay talek mod sarilim. (1 Ped. 3:15) Kanian isip mo la no anto ray posiblin itepet da tan no antoy iyebat mo. (Uli. 15:28) No nayari, awit mod eskuelaan so Bibliam tan pigaran publikasyon, a singa saray libron Reasoning, Young People Ask, tan saray literaturan nipaakar ed panamalsa, pian nakonsultam iratan no nakaukolan. Isuherim ed saray ateng mo ya ilaktip ed panagdayew na pamilya yo so panagpasal iran sesyon.
4. Akin et kaukolan mon itultuloy so manpulong ed eskuelaan?
4 Pagmaliw a Positibo: Agmo iisipen ya balawen ka na amin a pulongan mon kaeskuelam. Nayarin saray arum et mandinayew ed sika lapud pakpel mo tan ompan ondengel ni ra ingen. Balet agka komon nadidismaya no anggapoy ondengel. Tandaan mo ya naliliketan si Jehova ed pansasagpot mo. (Heb. 13:15, 16) Itultuloy mon ipikasi ed sikato ya lanang to kan tulongan a ‘manpakpel a mangiyabawag ed salita to.’ (Gawa 4:29; 2 Tim. 1:7, 8) Imadyin mo pay panlikliket mo no walay ondengel ed sika. Tan ompan nasabi panaon et magmaliw ni ingen a kaparam a lingkor nen Jehova!