Eskedyul na Pamilya—Say Inagew-agew a Panagteksto
1 Pansasagpotan a maong na maaron atateng so pangitarya na masustansian tagano ed ananak da. Anggaman kuan, mas importante so pangitarya ed sikara na espiritual a tagano manlapud Salita na Dios. (Mat. 4:4) Sakey lan paraan pian saray anak yo so nawalaan na ganas ed espiritual a tagano tan ‘ombaleg ed kilalaban’ et say pangonsidera yo na inagew-agew a teksto tan saray komento na satan ed kada agew bilang pamilya. (1 Ped. 2:2) Iner kasi pakapangilugaran yo ed saya diad eskedyul na pamilya yo?
2 Diad Oras na Panangan: Say pangigapo ed agew diad pangonsidera ed teksto so ontulong ed pamilya yo a mannodnonot ed si Jehova ed interon agew. (Sal. 16:8) Denesidi na sakey ya ina ya ibasa tan itongtong ed anak ton laki so teksto tan saray komento legan na panaalmusal na anak to tan manpikasi ran dua antis ya onla so anak to ed eskuelaan. Saya so amabiskeg ed anak ya agmikompromiso ed isyu na nasyonalismo, resistian so imoral iran tukso, tan makpel a mantasi ed saray kaeskuela tan managbangat to. Anggaman sikato labat so Tasi ed eskuelaan, agton balot aliknan bukbukor to.
3 No aliwan praktikal ed pamilya yo so pangonsidera ed teksto diad kabuasan, nayari yon gawaen itan diad saginonor na agew, nayarin legay pangdem. Paniistoryaan met na arum so nipaakar ed saray eksperiensya ra ed lawak na ministeryo tan saray punto ya agustoan da ed personal a panagbasay Biblia legan na satan. Dakel so mannodnonot ed saratan a pankanawnawa legay panangan bilang sakey ed saray sankaliketan a panaon dan saniiba bilang pamilya.
4 Diad Labi: Parad arum a pamilya, say sankaabigan a panaon a pangonsidera ed inagew-agew a teksto et antis a tuloy na pampainawa ra ed labi. Maabig met iyan pankanawnawa pian makapanpikasi iran saniiba. Diad inagew-agew a pakadngel na ananak yo ed saray balikas yo nipaakar ed si Jehova tan saray pikakasi yo, sikatoy magmaliw a petepeteg a persona ed sikara.
5 Komon ta bendisyonan nen Jehova iray sagpot yon mangipurek na katuaan ed ananak yo legan yon uusaren so Usisaen so Kasulatan ya Inagew-agew diad maabig a paraan.