Sikayoran Ulo na Pamilya​—Mantinien so Maabig ya Espiritual a Rotina

¹ Anggaman pigaran dekada a sikatoy nanayam ed Babilonia a kasmak so idolatriya tan inkauges, si Daniel so kabkabat a nanlingkor ed si Jehova a “tuloytuloy.” (Dan. 6:16, 20, NW) Panon ton apansiansia so espiritualidad to? Ipapatnag na rekord na Biblia a sikatoy walaan na mauksoy a rotina ed panggagawa na saray kimey a nisiglaot ed tuan panagdayew. Alimbawa, niyugali to la so pampikasi a mamitlo ed sanagew diad silir to. (Dan. 6:10) Maseguron sikatoy walaan met na niletneg lan panontonan parad arum nin espiritual ya aktibidad, a singa say panagbasa ed Ganggan. Kanian, sanen nipaarap ed makapasesgay-bilay a subok, si Daniel so agnagiing ed debosyon to ed si Jehova, tan sikatoy mamilagron niliktar.​—Dan. 6:4-22.

² Ontan met natan, nepeg ya isekar tayoy inkasikatayo a “mansiansian aliing tekep na sigpot a pantultuloy.” (Efe. 6:18, NW) Say mundon pambibilayan tayo so “walad pakayari na sakey a marelmeng.” (1 Juan 5:19, NW) Nayarin ag-iilaloan ya onlesa so isusumpa odino saray pakasalsalian a manubok ed pananisia tayo. Legan na baleg a kairapan, saray lingkor na Dios so magmaliw a puntirya na malaknab a panangataki nen Gog na Magog, a singano mairap so pakaliktar. Mankaukolan iya na naspot a panagmatalek ed si Jehova.​—Ezeq. 38:14-16.

³ “Say sakey a makanan tombok et say panggawa ed epektibon panagbasa, panagaral, tan paningbat na sankapamilyaan ed Biblia bilang dalan na bilay da.” Ontan so nibaga diad introduksion na drama ed 1998 a distriton kombension ya apauloan na “Sikayoran Pamilya​—Gawaen a Dalan na Bilay Yo so Inagew-agew a Panagbasa ed Biblia!” Intuloy na satan: “Sano maparanay a tumboken na saray pamilya itan a programa tan diad paraan a magmaliw a mabilabilay so Biblia, sayan rotinan nisiglaot ed Biblia so makapawala na baleg ya epekto diad pamilya. Satan so mangarum na pikakabat tayo. Mamabiskeg na pananisia tayo. Tan mangitarya ed sikatayo na saray napanuliranan a totoo, salanti, saray nagnap a matoor a lalaki tan bibii a nayarin managyat tan mamaseseg ed sikatayon mangidepensa ed katuaan.” Legan tayon kokonsideraen iray nanduruman aspekto na maabig ya espiritual a rotina, kaukolan ya imanoen na saray ulo na pamilya so sakey odino duaran paraan pian napaaligwas day espiritual a programa na pamilya ra.

⁴ Konsideraen so Salitay Dios ya Inagew-agew: “Sano sigpot lan makapanuley so Panarian na Dios tan say linawa to so nagawa la’d dalin a singa met ed tawen, anggapo lay mauges a totoo, pati masebeg ya ayayep, a ‘mamaunong odino mamagbag.’ (Isa. 11:9; Mat. 6:9, 10)” Pinmatnag iratan a balikas diad Usisaen so Kasulatan ya Inagew-agew​—2001 diad impangomento ed teksto parad Setyembre 11. Agaylan makaligliwa iyan panonot! Bilang ulo na pamilya, kasin niyugali yo la so inagew-agew a pangonsidera ed teksto na Biblia tan pankomento ed satan a kaibay pamilya yo? Saya so makagunggonan tuloy. No aliwan posibli so pantitipon diad kabuasan, nayarin nagawaan yo itan diad labi. Oniay inkuan na sakey ya ama: “Say oras na pangdem so matukoy parad sikami pian singbaten so inagew-agew a teksto ed Biblia.”

⁵ No walaan kayo la na maabig a rotina ed paningbat ed inagew-agew a teksto bilang pamilya, sikayoy nakomendaan. Nayarin nagunggonaan kayo nin nagkalalo diad pambasa ed porsyon na Biblia kaleganan na satan. Niyugali la na arum so pambasa ed interon kapitulo ya angalaan na teksto parad kada agew. Arum so mangitutultuloy ed panagbasa, a kakalkalnaan dan susumpalen so pinilin libro na Biblia. Ontulong so inagew-agew a panagbasa ed Biblia pian nabayuboan na pamilya yo so mabunigas a takot a napaermen si Jehova tan mamaaralem na pilalek dan gawaen so linawa to.​—Deut. 17:18-20.

⁶ Nagkalalon makagunggona so programa na pamilya yo a panagbasa ed Biblia tan panangonsidera ed inagew-agew a teksto no makapangigana kayo na pigaran minuto pian singbaten so praktikal a kablian na impormasyon. Oniay isusuheri na libron-panaralan ya Eskuelaan Parad Ministeryo, pahina 60: “Nayarin mamili ka na pigaran bersikulo manlapud babasaen ed Biblia a niyeskedyul ed satan a simba, singbaten so kabaliksan da, insan itepet iray tepet a singa saraya: ‘Panon a saya so mangiwanwan ed sikatayo? Panon so nayarin pangusar tayo ed sarayan bersikulo ed ministeryo? Anto so ipaparungtal na saratan nipaakar ed si Jehova tan say paraan to diad panggagawa ed saray bengatla, tan panon a satan so mamabiskeg na apresasyon tayo ed sikato?’” Say ontan iran tongtongan nipaakar ed espiritual so ontulong ed sankaabungan yo pian ‘mantultuloy dan natalosan no anto so linawa nen Jehova.’​—Efe. 5:17, NW.

⁷ Panagaral na Pamilya: Say tuloytuloy a pangikondukta ed panagaral na pamilya kada simba so maabig a paraan pian nipanengneng na saray ulo na pamilya ed ananak da a manunaan iray espiritual a bengatla. Oniay anonotan na sakey a kalangweran a laki: “No maminsan et si Tatay so naknaksawan a nanlapud trabaho a sengegay pirmin pakakaugip to, anggaman ontan et nantultuloy so panagaral, kanian tinmulong iya ed sikamin natebek so inkaseryoso na satan.” Makatulong met so ananak pian magmaliw a maaligwas so uksoyan. Sakey a pamilya a walaan na siamiran ananak so regular ya ombabangon ed alas singko pian makapanaral ira bilang pamilya lapud anggapo lay arum ya oras a nagawaan da itan.

⁸ Pian magmaliw ya epektibo so panagaral na pamilya, nepeg a say ulo na pamilya so ‘mangimanon maong ed ibabangat to.’ (1 Tim. 4:16) Oniay inkuan na libron-panaralan ya Eskuelaan Parad Ministeryo, pahina 32: “Nibagan maong a say epektibon panagaral na pamilya so onggapo ed pangusisan mismo ed pamilyam. Panon ya onaaligwas ed espiritual iray membro na pamilyam? . . . Sano kaibam a manpupulong iray anak mo, ag-ira kasi nababaingan ya ikabat day inkasikara ed saray kalimog da bilang Tastasi nen Jehova? Kasin panliliketan da so programa yo ed panagbasa tan panagaral na Biblia bilang pamilya? Kasin peteg a gagawaen da so dalan nen Jehova a dalan na kabibilay da? Bilang ulo na pamilya, say maalwar a panag-imaton so mangipatnag no anto so nakaukolan mon gawaen pian niletneg tan napabiskeg so espiritual iran kalidad ed kada membro na pamilya.”

⁹ Saray Miting ed Kongregasyon: Kaukolan a say pamparaan tan iyatendi ed saray miting ed kongregasyon so importantin kabiangan na sinimban rotina yo. (Heb. 10:24, 25) Panapanaon et nayarian yon iparaan so arum ed saray miting bilang pamilya. Imbes a manpaleen anggad apos-aposan la, kasin niyarunsa yo so masakbay lan pangiparaan? Say mauksoy a rotina ed sayan pamaakaran so mamaaligwas ed kalidad na panagparaan yo tan saray gunggona a nagamoran yo ed saray miting.​—Uli. 21:5.

¹⁰ Say kalidad tan inkamaparanay so pakapatnagan na epektibon espiritual a rotina. Anto no nairapan kayon mangiparaan ed amin a miting lapud saray sirkumstansya? Oniay isusuheri na libron-panaralan ya Eskuelaan Parad Ministeryo, pahina 31: “Paliisan iray patit diad panapuran panaral ed materyal ta pian nagawaan lambengat odino, lalon makapuy, diad agla panaral na anggan dinan ed satan lapud agmo nagawaan ya amin. Imbes, determinaen no kaunongan karakel so naaral mo, tan satan so gawaen mon maong. Satan so gawaen mon kada simba. Kabekta, panggunaetan mon palaknaben ya isakop so arum iran miting.”

¹¹ Sano onsabin masakbay iray pamilya ed saray miting, ontulong iya pian niwala ed sikara so suston awawey na kanonotan a mangidayew ed si Jehova tan minabang ira ed itatarya ton instruksion. Kasin onia so niyugali na pamilyam? Mankaukolan itan na maabig a panagplano tan pikokoopera na balang membro na pamilya. No naimanom a say pamilyam et mabetbet a manaapura tan nadedetdetan diad piaaral ed labi, kasin makapanggawa kayo na pananguman ed rotina yo? Kasin walaray bengatla a nagawaan lan masakbay? No nabebelatan so sakey a membro na pamilya ed kinarakel na kikimeyan, kasin natulongan na arum? Kasin makabawas na kesaw no balang sakey et akaparaan lan onsipot parad miting pigaran minuto ni ed masasakbay? Makatulong so maabig a panagplano pian niwala so espiritu na kareenan diad loob na pamilya tan diad kongregasyon.​—1 Cor. 14:33, 40.

¹² Lawak na Serbisyo: Say pangiletneg na pihon panaon ed pibiang diad ministeryo so sakey met nin kabiangan na maabig ya espiritual a rotina. Oniay nanonotan na kalangweran a lakin si Jayson: “Diad pamilya mi et mabetbet ya igagana so kabuasan na Sabado parad lawak na serbisyo. Makagunggona iya ed siak ta diad lalon ipapaway ko ed ministeryo, lalon nanenengneng ko so maabig a resulta na satan tan lalon panggagayagaan ko itan.” Dakel a binmaleg ed saray pamilya a Tasi so makakaimano met a say pakawalaan na pihon panaon parad ministeryo kada simba so ontutulong ed sikara pian onaligwas bilang Kristianon ministros.

¹³ Makatulong met so mauksoy a rotina pian magmaliw a lalon makapagayaga tan mabunga so panaon ya uusaren na pamilya yo diad lawak na serbisyo. Panon iyan nagawaan? Oniay insuheri na Hulyo 1, 1999 a Panag-Bantayan, pahina 21: “Kasin tunggal paminsan et ipapanaon yoy panagaral na pamilya yo pian tulongan iray membro na sankaabungan yo a manparaan parad lawak na kimeyan ed satan a simba? Say panggawa ed satan so makagunggonan tuloy. (2 Timoteo 2:15) Makatulong itan ed pagmaliw a makabaliksan tan mabunga so kimeyan da. Sagpaminsan, nayarin mangigana kayo na interon sesyon ed panagaral parad ontan a panagparaan. Mas mabetbet, nayarin saglawien yoray aspekto ed lawak na ministeryo ed mas antikey iran diskusyon diad sampot na panagaral na pamilya odino diad arum a panaon legan na simba.” Kasin sinali la na pamilya yo iya?

¹⁴ Mantultuloy ya Onaligwas: Diad sayan impangonsidera, kasin naimano yo iray aspekto a ditan et maabig so nagagawaan na pamilya yo? Komendaan so pamilya yo, tan pambanikelan so iyaligwas ed saraya. No naimano yo so pigaran aspekto a nakaukolan a paaligwasen, mamili na sakey odino duara a pankimeyan ya unona. Sano nagmaliw lan kabiangan iratan na espiritual a rotina yo, pankimeyan so sakey odino duara ni. Magmaliw a positibo tan makatunongan. (Fil. 4:4, 5) Say pangiletneg na maabig ya espiritual a rotina parad sankaabungan yo so mankaukolay pirmin sagpot, balet makagunggona itan, lapud ipapaseguro nen Jehova ed sikatayo: “[Say] manguksoy na dalan to a maptek iparungtal koy panangilaban na Dios.”​—Sal. 50:23.