Maparanay ya Aralen so Salitay Dios Bilang Pamilya
“Aliwa a say tinapay labat so napambilay na too noag say amin a salitan ombesngaw ed sangi’ Dios.”—MATEO 4:4.
1. Antoy ibabaga na Biblia nipaakar ed responsabilidad na saray ulo na pamilya pian bangatan so ananak da ed saray dalan nen Jehova?
MABETBET a papanonotan nen Jehova a Dios iray ulo na pamilya ed responsabilidad dan bangatan so ananak da. Satan ya instruksion so manginlong ed ananak parad peles a bilay tan makapangiparaan met ed sikara parad bilay ed arapen. Sakey ya anghel a mangirerepresenta ed Dios so angipabitar ed si Abraham ed responsabilidad ton manbangat ed sankaabungan to ta pian “tontonen [da] so dalan nen Jehova.” (Genesis 18:19) Imbaga ed saray Israelitan atateng ya ipaliwawa ra’d ananak da no panon ya inliktar na Dios so Israel manlapud Ehipto tan no panon ya inter to’d sikara so Ganggan to diad Palandey Sinai, ed Horeb. (Exodo 13:8, 9; Deuteronomio 4:9, 10; 11:18-21) Saray Kristianon ulo na pamilya so nasisimbawan mamabaleg ed ananak da ed “kadudusa tan panamilin na Katawan.” (Efeso 6:4) Anggano saksakey ya ateng so manlilingkor ed si Jehova, nepeg ton panggunaetan a bangatan iray ananak to ed saray dalan nen Jehova.—2 Timoteo 1:5; 3:14, 15.
2. Kaukolan ni kasi so panagaral na pamilya no anggapoy ananak ed abung? Ipaliwawa.
2 Agkabaliksan na saya a say panagaral na pamilya ed Salitay Dios so para labat ed saray sankaabungan a walaray ananak. Sano walay panagaral na pamilya bilang sanasawa anggano anggapoy ananak ed abung, saya so pakapatnagay maabig ya apresasyon ed espiritual iran bengatla.—Efeso 5:25, 26.
3. Akin ya importanti so inkamaparanay ed panagaral na pamilya?
3 Pian nagawaan a maong iya, kaukolan a maparanay a niiter so instruksion, bilang pitunosan ed leksion ya imbangat nen Jehova ed Israel diad kalawakan: “Say too agnabilay ed tinapay labat, noag say amin a pamaakaran ya ombesngaw ed sangi nen Jehova so kabilayan na too.” (Deuteronomio 8:3) Dependi ed saray sirkumstansia na pamilya, arum a sankaabungan so nayarin mangiyuksoy na sinimban panagaral; arum so nayarin walaan na antitikey iran sesyon a panagaral ed inagew-agew a paraan. Antokaman so pilien yon uksoyan, aggagawaen so panagaral no wala labat lay pankanawnawa. ‘Saliwen so panaon’ parad satan. Say panaliw na ontan a panaon so maong a puonan. Akadependi ed satan so pansumpalan na bilay na saray membro na pamilya yo.—Efeso 5:15-17, NW; Filipos 3:16.
Saray Gagalan Lawas Nonoten
4, 5. (a) Diad panamegley nen Moises, antoy inletneg nen Jehova parad atateng bilang importantin gagala ed pangibangat ed ananak da? (b) Antoy sasaglawien na satan natan?
4 Sano mangikokondukta ka na panagaral na pamilya, maong a tuloy so pansumpalan to no sankanonot moray pihon gagala. Konsideraen so pigaran posibilidad.
5 Diad kada panagaral, panggunaetan so pamaelet na panangaro’d si Jehova a Dios. Legan a nantitipon so Israel ed saray patar na Moab, sakbay iran linmoob ed Insipan a Dalin, impaimano nen Moises ed sikara so ipamoria nen Jesu-Kristo ed saginonor bilang “[say] baleg a ganggan ed katunongan?” Anto itan? “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:36, 37; Deuteronomio 6:5) Pinaseseg nen Moises iray Israelita ya ipaslep iya ed dilin kapusoan da tan ibangat itan ed ananak da. Mankaukolan itan na panangulit, pangipaimano ed saray rason no akin ya aroen si Jehova, pangarap ed ug-ugali tan kondukta a nayarin mangamper ed pangipanengneng na satan ya aro, tan panangipatnag na panangaro’d si Jehova ed dilin bilay da. Kasin ontan met ya instruksion so kaukolan na ananak tayo? On! Tan kaukolan da met so tulong pian ‘galsiman so puso ra,’ salanti, pian ekalen so antokaman a mangamper ed panangaro ra’d Dios. (Deuteronomio 10:12, 16; Jeremias 4:4) Arum ed saratan a babeng et nayarin say panpilalek ed saray bengatla ed mundo tan ed saray pankanawnawan kigaletan iran aktibidad to. (1 Juan 2:15, 16) Nepeg a say panangaro’d si Jehova et aktibo, mabulos, a pakiwasen to itayon manggawa ed saray bengatla a makapaliket ed mangatatawen ya Ama tayo. (1 Juan 5:3) Ta pian nawalaan na manbayag iran gungguna so panagaral na pamilya yo, kada sesyon so kaukolan ya ikondukta ed paraan a mamaelet ed sayan aro.
6. (a) Antoy kakaukolanen pian nainabang so suston pikakabat? (b) Panoy pangidadanet na Kasulatan ed kaimportantian na suston pikakabat?
6 Inabang so suston pikakabat nipaakar ed saray kakaukolanen na Dios. Antoy sasaglawien na saya? Saglawien toy mas ni nen say basta pamasa’d ebat manlapud sakey a magasin odino libro. Kaslakan a kakaukolanen toy paningbat pian naseguron saray manunan salita tan ideya et atalotalosan. Say suston pikakabat so importantin kabiangan ed pangisulong na balon personalidad, ed lawas pangiyapasakey ed talagan importanti iran bengatla sano aarapen iray problema ed bilay, tan, sirin et diad panggagawa ed peteg a makapaliket ed Dios.—Filipos 1:9-11; Colosas 1:9, 10; 3:10.
7. (a) Say pangusar ed antoran tepet so ontulong ed pamilya pian praktikal dan niyaplika so aaralen a materyal? (b) Panoy pangidadanet na Kasulatan ed kablian na ontan a gagala?
7 Tulong ed praktikal a pangiyaplika ed nanaaralan. Lapud sayan gagala, legan na kada panagaral na pamilya, itepet: ‘Panon a naapektaan na sayan materyal so kabibilay tayo? Kasin kakaukolanen toy antokaman a pananguman manlapud peles a gagawaen tayo? Akin a kaukolan tayoy manggawa na saray pananguman?’ (Uliran 2:10-15; 9:10; Isaias 48:17, 18) Say pangimanon maong ed praktikal a kiyaplikaan na saray bengatlan naaralan so magmaliw ya importantin sengegan ed espiritual ya ibubulaslas na saray membroy pamilya.
Makabat ya Usaren Iray Kagawaan ed Panagbangat
8. Antoran uusaren parad panagaral na Biblia so intarya la na aripen a klase?
8 “Say matoor tan makabat ya aripen” so akapangitarya la na daakan ya uusaren a nausar ed panagaral. Say magasin a Panag-Bantayan, ya usaren tekep na Biblia, so wala la ed 131 a lenguahe. Walaray libron parad panagaral na Biblia ed 153 a lenguahe, brosyur ed 284, audiocassete ed 61, videocassette ed 41, anggan say programa ed computer parad panag-research ed Biblia ed 9 lenguahe!—Mateo 24:45-47.
9. Panoy pangiyaplika tayo’d simbawan wala ed saray tekston nisita ed sayan parapo sano aaralen so Panag-Bantayan bilang pamilya?
9 Dakel a sankaabungan so manguusar na panaon ed panagaral na pamilya pian manparaan parad Panagaral na Panag-Bantayan ed kongregasyon. Agaylan makatulong itan! Lugan na Say Panag-Bantayan so manunan espiritual a tagano a nitatarya pian pabiskegen so totoo nen Jehova ed sankamundoan. Sano aaralen yoy Say Panag-Bantayan bilang pamilya, aglabat basta basaen iray parapo tan ebat ed niprinta iran tepet. Panggunaetan a talosan. Ipanaon so pananap ed saray teksto a nisita balet ta ag-inaon. Pakomentoan ed saray membro na pamilya ed no panon a mitukoyan iratan ed parapo a sisingbaten. Ipapuso itan.—Uliran 4:7, 23; Gawa 17:11.
10. Antoy nagawaan pian napibali iray ananak ed panagaral tan pian magmaliw itan a makapaliket a panaon parad sikara?
10 No walaray ugugaw ed sankaabungan yo, antoy nagawaan yo pian pagmaliwen so panagaral yo ya aliwa labat a rotina na pamilya noagta makapabiskeg, makapainteres, tan maliket a panaon? Panggunaetan a lawas ipibali so balang sakey ed matukoy a paraan ta pian say imano so lanang ya akaapasakey ed aaralen a materyal. No posibli, iparaanan so kada ugaw na dili ton Biblia tan aaralen a magasin. Bilang pangalig ed inkaligsa ya impatnag nen Jesus, abayan na ateng so melag nin ugaw, anganko et kaukolan ya amparan iray angkelag ni. (Ikompara so Marcos 10:13-16.) Nayarin paipaliwawa na ulo na pamilya ed ugaw ni so litrato a pinmatnag ed aaralen a materyal. Say ugaw so nayarin pabtangan lan masakbay a mamasa ed sakey a teksto. Say mas panguloan so nayarin pabtangan a mamitla na saray pankanawnawan praktikal a kiyaplikaan na aaralen a materyal.
11. Anto niray arum ya uusaren ed panagbangat a nitarya la, tan no wala iraya, panon a makagungguna iratan ya usaren ed panagaral na pamilya?
11 Anggaman nayarin uusaren yo so Say Panag-Bantayan a basiyan na diskusyon yo, aglilingwanan so arum nin uusaren ed panagaral a wala ed dakel a lenguahe. No nakaukolan so reperensia odino salaysay na sakey balikas ed Biblia, nayarin niiter itan na Insight on the Scriptures. Arum a tepet so nayarin naebatan diad itupleg ed Watch Tower Publications Index odino diad pangusar ed panag-research a programa ed computer ya intarya na Sosyedad. Say panaral a pangusar ed sarayan uusaren, no wala iratan ed lenguahe yo, so makanan kabiangan ed panagaral na pamilya. Tekep na gagala ed panagyat ed interes na saray ugugaw ni, nayarin isalet yo met ed panagaral yo so pambantay ed sakey a makaibangat iran video na Sosyedad odino ondengel ed apilin drama ed audiocassette insan singbaten itan. Say maong a pangusar ed sarayan uusaren ed panagaral so makatulong pian makapainteres tan makagungguna ed intiron pamilya so panagaral na pamilya.
Itukoy ed Saray Pankaukolan na Pamilya Yo
12. Panon a say panagaral na pamilya so walaan na importantin betang diad pangarap ed saray importantin pankaukolan na pamilya?
12 Nayarin say kaslakan ya aaralen na pamilya et say leksion ed Panag-Bantayan parad simba. Balet ta sinononot ed saray manunan peles a problema tan opinyon na pamilya. No agmantratrabaho ed sekular so ina, sikatoy makapangusar na panaon kaibay ananak to kada agew sano onsabi ira manlapud eskuelaan. Arum a problema so naasikaso ed satan a bekta; arum so nayarin mankaukolan na nagkalalon imano. Sano walaray importantin pankaukolan na pamilya, ag-ibabaliwala iratan. (Uliran 27:12) Nayarin aglabat ontutukoy iraya ed saray problema ed eskuelaan noagta ontan met ed arum a problema. Mamili na matukoy iran materyal, tan masakbay lan pakabatan so pamilya nipaakar ed no antoy aralen.
13. Akin a makagungguna so pantotongtong na pamilya ed no panon a talonaan so inkaduka?
13 Bilang alimbawa, say baleg a kabiangan na dalin so apektadoy inkaduka; kanian diad dakel a pasen, nayarin kapilitan so paningbat ed no panon a talonaan itan. Kasin say panagaral na pamilya ya akasentro’d aktual iran situasyon ed bilay tan saray prinsipyoy Biblia et pankaabiganan na sankaabungan yo?—Uliran 21:5; Eclesiastes 9:11; Hebreos 13:5, 6, 18.
14. Antoran situasyon a pagmaliwen ton nipanpanaon so paningbat na pamilya nipaakar ed panmoria nen Jehova ed karawalan, bakal, tan Kristianon neutralidad?
14 Sananey nin tema a mankakaukolan na paningbat et say karawalan. Amin tayo so kaukolan a nawalaan na panmoria nen Jehova a pirmin nipaslep ed kaisipan tan kapusoan tayo. (Genesis 6:13; Salmo 11:5) Say panagaral na pamilya nipaakar ed sayan tema so makapangitarya na lukas a pantotongtong ed no panon a piarapan iray pilyo ed eskuelaan, no kasin manaral na karate, tan no panon so pamili na matukoy a panagligliwaan. Saray marawal a panlalaban so kaslakan la; ngalngalin amin a bansa et sasaloten na balanglan guerra sibil, panggugulaan lapud politika odino ethnic, odino saray labanan na pangkat. Bilang resulta, ompan kaukolan na pamilya yo a pantongtongan so nipaakar ed panmantini ed Kristianon kondukta bangta apaliberan na saray grupon manlalaban.—Isaias 2:2-4; Juan 17:16.
15. Panoy nepeg a kiiter na instruksion nipaakar ed sekso tan panangasawa ed ananak?
15 Legan ya ombabaleg iray ugugaw, kaukolan day instruksion nipaakar ed sekso tan panangasawa, a matukoy ed edad da. Diad arum a kultura et agbalot sisingbaten na maslak ya atateng so nipaakar ed sekso ed ananak da. Say agnaibangat ya ugugaw so nayarin makalay pikewet iran panmoria manlapud arum a kalangweran, tan saray resulta so makaderal. Agta magmaong so pangalig ed si Jehova, a mangiiter na diretsaan balet maabig a simbawa ed sayan pamaakaran diad Biblia? Ontulong so maridios a simbawa ed ananak tayo pian napansiansia so dilin-respeto tan pian tratoen iraman so agkapara ed sekso tekep na dignidad. (Uliran 5:18-20; Colosas 3:5; 1 Tesalonica 4:3-8) Anggano asingbat yo la irayan pamaakaran, agmasuyat ya isingbat lamet itan. Legan ya onlelesa iray balon problema, makana so pangulit.
16. (a) Diad nanduruman sankaabungan, kapigan dan gagawaen so panagaral na pamilya? (b) Panon yon inarap iray babeng ta pian nawalaan na regular a panagaral na pamilya?
16 Kapigan a gawaen so panagaral na pamilya? Bilang pangalig ed saray pamilyay Bethel ed sankadalinan, dakel a sankaabungan so mangiyeeskedyul ed panagaral na pamilya ra ed Lunes na labi. Parad arum et duma. Diad Argentina sakey a pamilya na 11, pati 9 ananak, so regular ya ombabangon kada ala’ singko ed kabuasan pian manaral bilang pamilya. Lapud nanduruman eskedyul ed trabaho, anggapo lay arum a posiblin oras. Aliwan mainomay itan, balet ta ipurek toy kaimportantian na panagaral na pamilya ed kaisipan tan kapusoan na ananak. Diad Pilipinas sakey a matatken so walaan na regular a panagaral na pamilya kaibay akulaw to tan taloran ananak da legay ibabaleg da. Legan na simba et personal met ya iyaaralan na atateng so balang sakey ed ananak ta pian balang sakey so mangayarian ed katuaan. Diad Estados Unidos, sakey ya agin bii a say masiken to et aliwan Tasi so mangipapatnubang ed ananak to ed school bus na eskuelaan a kinabuasan. Legan dan aalagaren so bus, sikaray manguusar na anggad samploran minuto a manbasa tan maningbat ed matukoy a Makasulatan a materyal ya aaralen, insan say ina so mangidaulo na antikey a pikakasi antis ya onlugan iran ugugaw ed bus. Diad Democratic Republic of Congo, sakey a biin agmananisiay masiken to ya angikaindan ed pamilya da so kaukolan a mangibunek ed panagaral lapud agtanto akapanaral. Say baleg lan anak ton laki so ontutulong diad ibisita to’d pamilya kada simba pian idaulo so panagaral a kaibay ina to tan saray ugugaw nin agagi to. Say ina so mangipapanengneng na maabig ya alimbawa diad magunaet a panagparaan to. Wala tay pigaran problema a makakaamper ed regular a panagaral na pamilya ed sankaabungan yo? Ag-onsusuko. Panggunaetan so panamendision nen Jehova ed saray sagpot yo pian nawalaan na regular a panagaral ed Biblia.—Marcos 11:23, 24.
Saray Tumang ed Pantultuloy
17. (a) Ta pian nawalaan na regular a panagaral na pamilya, antoy kakaukolanen? (b) Anton eksperiensia so mangiyiilustra ed kablian na regular ya instruksion na pamilya nipaakar ed saray dalan nen Jehova?
17 Nakaukolan so panagplano. Kakaukolanen so pantultuloy. Balet saray gungguna a resulta na regular a panagaral na pamilya so mablin tuloy. (Uliran 22:6; 3 Juan 4) Diad Alemanya, si Franz tan Hilda, so amabaleg na pamilyan 11 ya ananak. Kalabas na saray taon, inkuan na marikit da a si Magdalena: “Say ipapasen kon sankaimportantian natan et anggapoy anggan sakey ya agew a linmabas ya anggapoy naawat min espiritual ya instruksion.” Sanen say espiritu na nasyonalismo so pinmalalo ed silong nen Adolf Hitler, inusar na ama nen Magdalena so Biblia pian iparaan so pamilya to ed saray subok ya amoria ton onsabi. Sinmabi panaon, saray mas malangwer a membro na pamilya so inerel tan inawit ed reform school; arum ed pamilya so inaresto tan inkulong ed saray prisoan tan ed panangipangawan iran kampo. Arum so pinatey. Say pananisia ran amin so malet—aliwan diad panaon na pirmin panamasegsegang labat noagta dia met ed tinmumbok iran taon, parad saramay agpinapatey.
18. Panon a natutumangan iray sagpot na mansusulon atateng?
18 Dakel a mansusulon atateng, ontan met ed saramay say kaasawaan da et agmananisia, so mangitatarya met ed ananak da na regular ya instruksion ed Biblia. Sakey a mansusulon ina tan balo, a taga-India so mangibubunek pian ipaslep ed duaran ananak to so pangaro’d si Jehova. Balet, sikatoy naermenan a tuloy sanen agla mililimog so anak ton laki ed totoo nen Jehova. Sikatoy kinmerew na panamerdona ed si Jehova ed antokaman a kakulangan to diad impangipasal to ed anak ton laki. Balet talagan ag-alingwanan na anak a laki so naaralan to. Kayari masulok a sakey dekada, sikatoy pinmawil, inmaligwas a maong ed espiritual, tan nagmaliw a matatken ed kongregasyon. Natan et sikato tan say akulaw to so manlilingkor bilang sigpot-panaon a payunir a ministro. Agaylay pisalsalamat na saraman ya atateng ya angipapuso ed simbawan manlapud si Jehova tan ed organisasyon to pian mangitarya na regular ya instruksion ed Biblia ed sirkuloy pamilya! Kasin iyaaplika yo itan a simbawa ed sankaabungan yo?
Kasin Nipaliwawa Yo?
◻ Akin ya importanti so regular a panagaral na pamilya?
◻ Antoy nepeg a gagala tayo legan na kada panagaral na pamilya?
◻ Antoran uusaren ed panagbangat so niwala parad sikatayo?
◻ Panon a nitukoy so panagaral ed saray pankaukolan na pamilya?
[Litrato ed pahina 15]
Paaligwasen na saray pihon gagala so panagaral na pamilya yo