Eskedyul na Pamilya—Say Panagaral na Pamilya
1 Say sankaabigan lan langkap a ninabang yo ed ananak yo bilang Kristianon ateng et say walan panangaro yo ed si Jehova. Sakey lan importantin pankanawnawa a nagawaan yo iya et ‘kapagno manyurong kayo ed abung yo’ parad sinimban panagaral na Biblia bilang pamilya. (Deu. 6:5-7) Balanglan mananisia so asawa yo, sananey so relihyon na kapamilyaan yo, odino mansusulo kayon ateng, natulongan yo ray anak yo ya onapit ed sikayo tan ed si Jehova panamegley na regular a panagaral na pamilya.
2 Panangigapo: Say unonan kundang et say pangiletneg na niyugalin panagaral bilang pamilya. No agkayo segurado no kapigan so panaral yo, akin ya agyo pantongtongan iya a sankapamilyaan? (Uli. 15:22) No walaray angkelag nin anak yo, ompan labayen yo so mabetbet ingen ta antirikey a panagaral ed interon sakey simba. Tebeken no antoy matukoy parad sankaabungan yo. Mangitalaga na espisipikon oras parad panagaral diad eskedyul na pamilya yo, tan panggunaetan a tumboken itan.
3 Anto so nayarin aralen yo? Walaray manpaparaan parad ontumbok ya aaralen ed Panagaral na Kongregasyon ed Libro odino Panagaral na Panag-Bantayan. Aaralen na arum so materyal a nagkalalo lan denesinyo parad saray kalangweran. Inkuan na ama na ugaw nin laki tan bii: “Say sakey lan mamapagmaliw ed panagaral mi a pabpaborito na saray anak mi ya aktibidad ed simba et say pangiyaakto mi ed saray eksena ed My Book of Bible Stories. Mas importante a walay nipurek tan nipatalos mi ed sikara nen say karakel na nakobrian min parapo.”
4 Manaral a Sinimba: Say panagaral na pamilya so nepeg a regular tan pantamitaman na amin a membro na pamilya. Nayari met ya umanen so agew tan oras pian nilugar iray ag-iilaloan a situasyon. Nayarin wala met iray pankanawnawa a kaukolan so pananguman ed aaralen. Balet, antokaman a nakaukolan a pananguman et nepeg ya agpansengegay mabayag a pakasuawi ed niletneg lan eskedyul na panagaral. Inkuan na sakey ya anak a bii manlapud sakey a sankaabungan a sano nauman so oras na panagaral da, isulat na Ama ra no kapigan itan, insan to ipeket ed lugar a seguradon nanengneng na amin a membroy pamilya. Agaylan nakomendaan iratan a sagpot pian napansiansia so regular a panagaral na pamilya! Legan yon papabalegen so ananak yo ed “kadudusa tan panamilin na Katawan,” nipapatnag yo so aro yo ed sikara tan ed Mangatatawen ya Ama tayo.—Efe. 6:4.