Tepet
◼ Kasin kaukolan ya ireport ed kongregasyon so panagaral na Biblia bilang pamilya?
No say sakey a Kristianon ateng et mangikokondukta na panagaral na Biblia bilang pamilya tan kaiba iray agbautismadon ananak, say ateng so nayarin mangireport na sakey oras labat kada simba, sakey a panagpawil kada simba, tan sakey a panangiyaral na Biblia kada bulan. Onaplika iya anggano say panagaral et sabien toy masulok a sakey oras, maminpigan ikokondukta ed sakey simba, odino ikokondukta ed indibidual ya ananak.—Nengnengen so libron Our Ministry, p. 104.
No amin ed sankaabungan et bautismadon Tasi, sirin say oras odino panagaral so agkaukolan ya ireport bilang lawak na serbisyo (likud no say anak et manaaral ni ed komaduan libro kayari na bautismo). Say rason et say report na kongregasyon ed lawak na serbisyo so mangipatnag a manuna ed agawaan ed pangipupulong ed maong a balita tan pangibabangat ed katuaan na Biblia ed saraman so aliwan dedikado tan aliwan bautismadon lingkor nen Jehova. (Mat. 24:14; 28:19, 20) Balet, ag-iya mamawas ed kaimportantian na satan a regular a pangikokondukta ed panagaral.
Responsabilidad na Kristianon atateng so pangiyaral ed ananak da. Saraman so mankaukolan na tulong ed pangiletneg odino pamaaligwas na panagaral da bilang pamilya so nayarin onkerew na tulong ed saray mamatatken. No lapud saray sirkumstansya et mas maabig parad sakey a manangipalapag so pangikondukta na panagaral na Biblia ed agbautismadon anak a laki odino bii na sakey a Kristianon pamilya a kabiangan na kongregasyon, kaukolan ya itupleg ed manangasikason manangimaton odino manangasikaso na serbisyo. No naabobonan so ontan a panagaral, say sakey a mangikokondukta ed satan so nayarin mangireport ed satan a singa ed pangirereport to ed arum nin panangiyaral na Biblia.
Say panangipasal ed ananak ed saray dalan nen Jehova so mankaukolan na nagkalalo nin panaon tan sagpot nen say irereport ed lawak a serbisyo. (Deut. 6:6-9; Uli. 22:6) Saray Kristianon atateng so manepeg a komendaan lapud panasakbat da ed ambelat a responsabilidad da ed panagpabaleg ed ananak da “ed kadudusa tan panamilin na Katawan.”—Efe. 6:4.